AH 5: Tavuan Puakim (Azom)

Adventist Home: Kumkikna Lamen Innkuan, by Ellen G White, Tedim, Zokam, Zopau, Zolai, Thadou, Kuki, Hmar, Paite, Chin, Myanmar
THUKHEN 5
Kiteenna Tau Panin
Hehpihna Tokhom, ZomiSDA, Adventist, Tedim, Zolai, Zopau, Zokam,
TAVUAN PUAKIM
Khatsimin Sepding Tavuan Nei.—Deih kibangin akigawm nupate in zia le tong kibatlohna nei in tavuan zong kibanglo ding hi. Nasep tuak zong neiding uha, ahizongin numei pen ana sep zah tawh kituakin itding, hi lo hi. Amau pen vanpua ganhing hilo hi. Zi in lawm ahihna tawh apil apasal tung leh innsungah thupha tung sak ding hi. Akalsuan sialin “Hihpen numeite dinmun mah ahi hiam?” ci in kidong den ding hi. “Bangci bangin innsung kahuzaapna pen Christ tawh kibang ding hiam?” Pasal in zi’ nasep pakta ahihna kilangsak ding hi.1
 
Zi in pasal zahtak ding hi. Pasal in zi pen it leh thupi ngaihsut ding hi. Kiteengin akigawm bangun Christ upna ahzong pumkhat suak ding hi. Tua pumkhatte in Christ’ thu sinkhawm leh Khasiangtho sungah atualbialkhopna uh sangin bangin Pasian lungkim sak zaw diam?2
 
Pasal naneihma in bangkua ah sepding naneihloh banglo-in tu-in sepding nanei ta hi. “Migitna, lungnem na, ziadamna, lungduainate silh un.” “Christ in eite hong it mah bangin itna tawh nungta un.” Anuai a thuhilhnate simpha in: “Zi aw, Topa tungah na ki-ap bangin napasal tungah ki-ap in. Ahangin Christ in pawlpi lutang ahihbangin pasal in zi’ lutang hi. Tua ahihmanin pawlpi in Christ tungah to akaai bangin na khempeuhah zi in pasal thudot hen. Pasalte aw, Christ in pawlpi it in anuntakna apiak mahbangin na zite uh it un.”3
 
Pasian in Evua Ahilhna.—Tu-a kipanin dahna leh natna-in Evua luai tading hi. Topa in, “Na lunggulhna-in napasal hiding, amahin nang hong ukding hi.” Piansak lain Pasian in Adam tawh kizakim in amah bawl hi. Pasian’ ki-itna thukham tawh kituakin Pasian’ thu mang hile-uh, amau gel kithutuak kinken ding uha, ahihhangin mawhna in ki uitui lohna piang sak ta hi.
 
Tu- in khat zaw zawin khat tungah tokaaina bek tawh kithuhualna kingah kik thei bekding hi. Mawhna abawl masa pen Evua hia, apasal ukna athuak kul ta hi. Pasian lamlahna langpanin Evua in apasal kiang panin paikhia ahihmanin ze-etna hong tuak hi. Ama’ zolna tawh Adamin mawhna abawl manin tu-in apasal ukna nuaiah lut hi. Mawhna ah akia lei mite in Pasian’ thukham thupi ngaihsut uh hileh, hihin mawhna hanga thupiang ahihhangin, thupha sanna-in piangding hi. Pasalin thuneihna zang khialzel a, numei tampite in thangpaihna leh vangik puak lawh uh hi.
 
Eden huan sungah Evua in Adam kiangah omin ngaihmuang kisa hi. Khangthak numeite in zong Evua mahbangin Pasianin apiaksa dinmun la-in asangzaw tum le-uh, aniamzaw dinmunah kiasuk ding hi. Pasian’ ngimna bangin inn nasepte maitai takin asem hithiat nuamlote tungah tuabang kiatna atung ding ahi hi.4
 
Zite in Ukna Mang; Pasalin It.—Akidong zel thu ah, “Azi in amimal deihna anei thei ding hiam?” Laisiangtho in teltakin agenna ah, pasal in innkuan lutang hi, ci hi. “Zite, pasalte’ ukna mang un.” Hih thupiakna hihlai ah dinkhawl hileh, numeite dinmun pen enhuai hetlo hi. Thu tuamtuam panin ahaksa leh sittelnapi khat hia, kiteenna tawmzaw hileh amaute adingin tangzang zaw ding hi. Ka pasalin “zite, pasal’ thu mang un” cih simin tawp hi. Azom sim lengh, “Topa maiah akilawm bangin” naci hi.
 
Zi in Pasian kihtakna leh aminthanna amitsuan kinken dingin Pasianin ngen hi. Tokaaina taktak pen Jesus Christ tung bekah hiding hi. Amah in mongneilo Ama’ nuntakna tawh man pia in honglei zo hi. Thu siangtho theihna Pasianin amah piakhin a, atheilo kineihin palsat theilo hi. Ama’ mimal hihna apasal sungah amangding hilo hi. Ahangin tua mimal pen Christ in aleisa ahi hi. Na khempeuhah pasal’ deihdeih in nungta ding, cihpen mittaw thumanna ahi hi. Satan’ kol panin suahtakna angahkhin ahihmanin tuabangin amimal mansuah leh apumpi leh akha suplawh ding hi. Zi kiangah ading pasal sangin asangzaw KHAT om hi. Tua in a Honpa hia, apasal tungah akiapna pen “Topa’ deihna tawh kituakin” kipia ding hibek hi.
 
Pasalte in akipum ap dingin zite anget ciangin, innkuan sungah zite in thuneihna khat zong neilo hi, ci-a atangko ahi hi. Tua in Laisiangtho tawh kikelki in zite akoih uh ahi hi. Hihbangin Laisiangtho akhia hilengh, kiteenna ie ngimna apalsat uh asuak hi. Pasal in avek in thu neiding, cihpen khialhna ahi hi. “Pasalte, na zi uh it un, leh thangpai sak kei un.” Banghangin pasal in azi tungah thangpai ding hiam? Mawhna tawh akidim leh khialhna tampi bawlin pasalin azi amuh lehzong, thangpaihna in siatna damsaklo ding hi.5
 
Pasalin Christ’ Thu aman bangun Zite in Mang hen.—Pasian’ lampi kikepsaklo ahihmanin pasalte in azite tungah bawlsiam lo uha, Pawlpi tunga Christ ie lungsim zong kilak thei lo hi. Zite in pasal cih khempeuh azuidingin pasalte in lamen uh hi. Innkuan makai ahihna uh tawh pasal in zite aukcip dingin Pasianin ngimna neilo hi. Christ tungah aki-ap zolote in zi tungah thunei theilo ding hi. Amah in agilo, angoltol, akitom thei, angsung thugen, alungtom khat in pasal in zi’ lutang hi, zi in pasal thu khempeuh mang hen, ci kei hen. Amah in Topa hilo hi. Pasal taktak picing zolo hi.
 
Ephet laikhakna sunga bangin pawlpi leh Christ kizopna ah pasal dinmun lim tawh kilak hiam?. Pasal in innkuan ading honpa hiding hi. Pasal in mipi takin, Pasian piak picinna tawh, azi leh atate asangkhan ngam hiam? Ama husa nazak ciangin asiangtho anamtui hiam? Jesus Christ ie hong itna ah akilam nuam takpi hiam? Tua zia leh tong innsungah te’ng sakin, athuneihna azang ngam hiam?
 
Pasal leh pa tekin thulang theihlo in, Christ ie kammalte atheidingin asin hiam? Thuneih nopna hangin zite anuaiah apumkoih ahi hiam? Kalani singkhuam mitsuanin enlengh, innkuan sungah “pasalte aw, Christ in pawlpi it-in apumpi apiakkhia hi, akammal tawh hahsiangin asawpsiang bangin nazite uh it un.” Jesu in Khasiangtho tungtawnin aitte ahong sawpsiang nadingin leh mawhna namcin leh mawhna huzaapna panin ahong kep nadingin singkhuam tungah hong kikhai hi.6
 
Kithuakzo Kimding.—Eite in Khasiangtho ihneih keileh innkuan sungah kithuhualna omlo ding hi. Zi in Christ ie lungsim aneih leh akampaute kidawm dinga, alungsim kiuk dinga, thumangin, sila bangin kingaihsun tuan selo in, pasal’ lawm bang ahiding hi. Pasal in Pasian’ sila ahileh, azi tungah kitosak loding hi. Ngoltol in thumanna siik loding hi. Kinluatna tawh zong innkuan kingai zo ding hituanlo hi. Pasian’ Khasiangtho innah teeng hileh vantung tawh akibang inn hita hi. Akhial aom leh adangte in Christ bangin kithuakna zangdinga, vot takin kaikhialo ding hi.7
 
Numei ahia pasal ahizongin khatmahin innkuan ukna tuh kei hen. Na deihna azuidingin kuamah aana sawl kei un. Hihbangin gamta in, itna sungah kiom veve theilo hi. Migi in, lungduai in, thuakin, telsiamin, zia dam in. Kiteenna kamciam napiaksa bangin Pasian’ hehpihna tawh khat leh khat lungnopna na kipia zo thei uh hi.8
 
Phaltakin Kimang un.—Kiteenna ah numei leh pasalte-in aki-uklo bangin gamta thei uh hi. Pasal in adeihna atuam, zi in zong atuam in, akizui nuam omlo tuak hi. Hihbang thu aomnaah lungnoplohna piang pen hi. Khat thu khatin manding hoih hi. Adeih bang tuakin akipei le-uh lungnopna om thei lo hi.9
 
Numei leh pasalin Jesu kiangah kiniamkhaitna leh lungnemna asin khit naikei uhleh naupangte in apulaak theih zel mahbangun amau’ thu bek thu sathei uh hi. Aki-uklo, alungsim khauh zaw zawin uk nuam ding hi. Tuabang mi in Paul kampau sim hen: “Ka neu lai in, naupang bangin kapau a, naupang bangin kathei hi, naupang bangin thu kangaihsun hi: ka uham ciangin naupannate ka paai hi,” ci hi.10
 
Innkuan Haksatnate Bulhkikna.— Zi leh pasalte in inn nasepte hawmding akilungkim phial uhzongin Pasian tungah akipiak zawh kei uhleh innkuan haksatnate bulhtuah kikding haksa hi. Utna akibanglo inn sungah ki- it in kilen dending, cih ahitheilo thu ahi hi. Bangkua sung vai khempeuh ah nakilungtuak ding uh hi. Zi in Christian ahihleh apasal tawh akibangin utna kibang ding hi, banghanghiam, cihleh pasal in innkuan lutang ahi hi.11
 
Akitumkak Innkuan Thuhilhna.—Nalungsim maanlo hi. Dinmun khat nalak ciangin thu saikak lopi-in, nangthu mah tuktehin omsuak lecin bang piang thei ding, cih ngaihsut kikna na nei kei hi. Tua banah na nazi in nang’ ngaihsut banglian apom lohlam natheih ciangin thungetna leh na kampaunate tawh namelh mang hi. Na zi ngaihsutnate upa lungsim tak tawh theihpih leh ziadam takin pelh bawl sangsikin nakibatlohna munte mah genkik kikin, nakimah aomte zong awlmawhlohin maan na kisa teltal hi. Midangte zong nanga tawh kibangloin angaihsun theih dingin thu napia kei hi. Hihbang te in Christian kung pana agah hilo hi.12
 
Sanggamnu sanggampa, Jesu alut theih nadingin na lungsim kongkhakte hong un. Na kha biakinn sungah sam un. Kiteenna sung alut khempeuhte’ adongkhak nate panin na gualzawh nadingin khat leh khat kihuh un. Na gualzawh nadingin nasia takin Satan tawh na kido kul ding hi. Hih galsimna ah Pasian’ huhna nadeih leh na nih un kipawl un. Siatna apau na mukte cip unla, akisap leh khukdinin, “Topa, ka kha ie gal hong do sakin,” ci in.13
 
Na Sung uha Christ in Pumkhatna Piangsak.— Pasian’ deihna apicin leh, zi leh pasal in kizahtak tuak ding hi. Itna leh kimuanna nalamkik ding uh hi. Innkuan ie kilemna leh kipumkhatna asusia thu peuhmah nasikcip ding uha, migitna leh itna na iplah ding uh hi. Lungnem, thuakzo, leh itna apulaak zote’ tungah tuabang lungsim mah kilang kik ding hi. Khasiangtho aom ciangin kiteeng dinga kilawm kisaklohna thu gennate beiding hi. Christ, aminthang lametna, note sungah aom leh innsungah kipumkhatna leh ki itna om ding hi. Zi’ lungsungah Christ ateen leh apasal’ sunga aom Christ tawh kithutuak ding hi. Jesu pai-a, Amah a-itte om nading abawl innpi ah ateeng khawmdingin na hanciam khawm ding uh hi.14
 
 
KITEENNA: SEP LEH NGAH DING
 
Jesu in hong Tolten Saklo.—Kiteenna in Pasian piak thu siangtho hia, Ama thukhunte in hu-in adal hi, cih aumte-in ngaihsutna tawh aki ukding uh ahi hi.1
 
Jesu in zi aneilo dingin kuamah thupia lo hi. Kiteen kizopna asusia dingin Amah ahong pai hilo hi. Asanglap ding leh apiancil bangin aguang kikdingin hong pai hi. Itna leh angsung khualna aomlo innkuan kizopna amuh ciangin Jesu lungdam hi.2
 
Kiteenna in Siangtho leh Thu tawh kituak.— Nek leh dawnna ahia kipi kiteenna in mawhna hipah lo hi. Noah hun in kiteenna kiphal a, tu-in zong kiteen ding kiphal hi. Thu tawh akituak kiteenna in hoih takin kizangin, uang takin kizang kei peuh leh, thu hoih ahi hi. Ahizongin Noah hunin Pasian kolo ahihkei leh Pasian makaihna zong masa lo-in mite in kiteeng uh hi.
 
Mihing kizopnate in akikhel kinken thei thu hia, ih gen ihhawmnate ah puahphat ding kisam hi. Noah hunin kingaihna akiphal hangin a uangin akizat ciangin Pasian’ maiah mawhna suak hi. Hih leitungah zong mitampite in anuntakna uh mansuah uh hi. Kiteenna leh kiteen kizopna ngiat ah lungtung uh hi.3
 
Kiteen kizopna in siangtho hi. Tuhun ciangin kiteenna paulamin mite in mawhna namkim bawl uh hi. Kizang khial ahihmanin thu palsatna suak hi. Ni nuanunga akilangding lim hong suak hi. Noah hun lai in kiteenna mawhna natun uh hi. Asiangtho kiteenna ie pianzia ihtheih ciangin leh kiteenna ie ngetnate kitel ciangin, Vantungin hong thukim ih hi. Tua panin aki teeng nihte in lungnopna kingahdinga, Pasian kipahtawi ding hi.4
 
Kiteen Kizopna ah Ngahding.—Christian hi-ing acite in kiteenna pan akingah hamphatnate leh gamtat nading asiangtho thukhun bulpite ngaihsut ding ahi hi.5
 
Thu tuamtuamte ah nu leh pate mahmahin kiteenna zangkhial uha, aganhing lungsim uh punsuah uh hi.6
 
Uangtatna Pelding.—Thu tawh akituak khat pen a uanga zatna in mawhna lianpi ahi hi.7
 
Nu leh pa tampite in kiteenna panin theihding tampi sinkhialo uh hi. Satanin hunla in amaute’ lungsim leh a nuntakna uh aukcip ding kidal khollo uh hi. Kiteenna nuntakna uangtakin azat lohdingin akikhal dingin Pasianin angetlam mulo uh hi. Mitawmte bekin ci-le-sa deihna ciangtanding pen biakna thuzuihna khat in sang thei bek uh hi. Amaute deihteelnate leh nupa omkhopna utut a zatding hizaw, ci in kithukim lai uh hi. Pasian bia akisa numei pasal tampite in amaute nuntakna athanem sak leh pumpi khempeuh asusia thagumte pangzatna ahi uangtaka nupa omkhopna nei uh hi.8
 
 Kei-Nialna leh Kidekna Galvil Kammal Hiding.— Piangsakpa’ na ihsep nadingin pumpi leh lungsim thate ahoihpenin ihkepna in Pasian ahong piak tavuan khat ahihlam mikhempeuhin atheihding kadeih hi. Christian ahi zi-in apasal ganhing lungsimte atho sak thei kammal leh mithekte kidawm hen. Hih vai adingin tha azangdingin mitampite in tha neilo uh hi. Akhangno hun panun akhuak uh thazawm sak uha, ganhing lungsim alungkimsak nadingin athagum uh hupkang uh hi. Kiteenna ah kei-nialna leh kidekna in galvil kammalte hiding hi.9
 
Lungsim asiangthoa kepding leh pumpi acidam dingin kepna in Pasian hongsawl tavuan ahi hi. Tua hileh Pasian adingin picing nasep ihsem dinga, mihing pihte adingin phattuamna ihbawl zo ding hi. Sawltak Paul in: “Ci-le-sa lunggulhna azuilo dingin asithei napumpi sungah mawhna ki-uk sak kei-in.” Tuabanah, “Zawhna angah dingin ahanciamte in nakhempeuhah akidam uh hi.” Christian akici khempeuhte ahong hanthotna ah, “Pasianin asaan theih anungta biakpiakna” napia un, ci hi. “Mi khat peuhin kei kiangah Amahmahin midangte tungah thuhilh napi amahmah paihkhiat ding lakah kihel hilo hiam, ahongcih loh nadingin ka pumpi ukna nuai ah kakoih hi” ci lai hi.10
 
Ama ommawh thoih nadingin azi vanzatin zatna in ki-itna siangtho hanga gamtatna hilo hi. Tua in ganhing lungsim zongsatna ahi hi. Mihing tawmte bekin Sawltakpa genbangin itna pulaak uh hi: “Pawlpi in siangtho in mawhbanna aomloh nadingin ahahsiang, asawpsiang nadingin Christ in anuntakna piakhia in Pawlpi a it hi.” Pasianin kiteenna ah akipulaak ding siangtho acih ki-itna nam-in hihbang ahi hi. Itna in siangtho a, asiangtho thukhun ahi hi. Ahihhangin ci-le-sa lunggulhna in kidam ding ngaihsun lo-in, ngaihsutna tawh ki uk nuamlo hi. Nungzui thupiang dingte mu theilo hi. Hih sem lengh bang piang ding, cih ngaihsutna neilo hi.11
 
Banghang Satanin Kidamna Thanem Sak.— Satanin kiteenna tawh kizopna alutte lakah siangthona tuktehna piciang khiam nuama, kidamna thanem sak nuam hi. Amahin ganhing lungsim khang tektek leh khalam siangthona kiamsuk ahihlam thei hi. Eite’ khalam adingin bangmah hong awlmawh saklo hi. Suan leh khakte tungah amuhdah huai ama lim sutna hong khencip nuam hi. Nu leh pate zia leh tong tungah ama zia leh tong ahong khensak sangin khangthakte tungah khen nopzaw sa hi.12
 
Uangtatna Thaman.—Numei pasalte aw, ni khatni ciangin ci-le-sa lunggulhna leh lungkim sakna ie thaman na mu ding uh hi. Apualam ah mite bangmahin ganhing lungsim zia le tong kimu thei hi.13
 
Ganhing lungsimte nakhalloh ciangin bang piang hiam? Pasian’ vantungmite ukna mun na lupna khan uh thanghuai tatnate hangin asiangtho lo suak hi. Azum huai ganhing bang tatna in pumpi uka, pumpi in kisia in, akihhuai natnate piang sak hi. Thupha dinga Pasianin ahong piak tu-in samsiatna na suak sak uh hi.14
 
Uangtakin nupa omkhopna in agualzo biakpiaknate hoihtakin susia a, pumpi bup tha aguanding khuak sunga nate hong lakkhiat sak ahihmanin thagumte bei sak hi. Hih pumpi suksiatna ah numei khatmahin pasalte huh ding hilo hi. Itna taktak apasal tungah aneih leh kha tawh anungta ahihleh, hihbang sep pih lo ding hi.
 
Ganhing lungsimte kizang semsem leh khauhpai tekteka, alunggulhna in ngongtat samsam hi. Pasian akihta numei pasalte in khanglo ta un. Christian ka hi, aci mitampite amaute kidam zawhlohna hangin khuak leh theihna sazangte sihsuah uh hi.15
 
Pasalte in Theihneih ding.—Pasalte-in kidawm, awlmawh, omden, thuman, leh hehpih theiding hi. Itna leh hehpihna lak ding uh hi. Christ ie thuhilhnate zui uh hileh, amaute’ itna in ganhing tatlo dinga, amaute pumpi leh azi’ pumpi susia lo dinga, azi zong natna sia ngahsak loding hi. Ganhing bang lungsim lungkim sak nawnlo dinga, kazi in kacih bangbangin amang ding ahi hi, cilo ding uh hi. Pasal’ lungsim picing hileh, alungsim siangtho in, Christiante neih dingdan mahin angaihsutna kisanglap hileh, kiteen kizopnaah kilang ding hi. Amahin Christ sunga lungsim nei hileh, pumpi asusiapa hiloin, ziadam itna tawh asangpen Christ ie tuktehna cingding hi.16
 
Muanlohna Alutciangin.—Azi-in apasal ie ngetna bangbang zuiin, pasal’ ganhing lunggulhnate alungkim saknaah azi it takpilo ahihna kilang hi. Zi in tuabangin azuihna tawh apasal mitah numei manphatna kimansuah hi. Asangna panin azi akikaihkhiat mu a, atuah peuhpeuh tungah cingh ding hi, ci hi. Azi’ sianthona, tawlna, leh aom kinkenna muanglahin, hell meikuang bang ganhing lunggulhna alungkim sak dingin numei dang azong ding hi. Pasian thukham zong kin nawnlo hi. Hih mi in ganhing sangin sia zaw hi. Mihing pumpi apua dawi ahi hi.
 
Asiangtho, amaan, asaang thukhunte tawh kilawmta lo hi. Zi inzong apasal haza leuleu a, numei khat peuh mu leh keimah bangin luppih pah ding hi, ci hi. Pasian leh lungsim ciimna tawh apasal ki uklo ahihlam mu a, lunggulhnate in hih nupa kidalte balkekin Pasian’ zia apua pasalin ganhing lungsim ie sila asuak ta hi.17
 
Manzawhding Hilo Kikutna Buaina.—Tu-in dotding thu in: Akidaamlo ganhing banga ngetna ahihlam athei azi in mangmang laiding hiam? Agamtatna in pumpi susia in sianthona leh pahtawina tawh pumkhat asuahna suksiat sak hi. Hih pumpi asiangtho anungta biakpiak nadingin zat ding hoih zaw hilo hiam?
 
Nuntakna leh cidamna asiat dongin pasal ie lunggulhnate lungkim sakna in itna siangtho hilo hi. Zi in itna maan leh ciimna aneihleh apasal ie ganhing lunggulhnate aheikhiat nadingin, asang asiangtho khalam ngaihsutna ah makaih ding hi. Akisap leh kiniamkhiat takin leh ngaihna takpi tawh, anuam keiding ahizongin, nupa omkhopna uangtatna tawh kapumpi asia sakdingin hong mangzo keng, acih ngam ding kisam hi. Ziadam takin, ka pumpi amasa penin Pasian zat ding hia, nang deihna amasa ding hilo hi, ci leh Topa maiah thukhen ni ciangin maipha ngah zaw ding hi.
 
Angaihnate zi in sanglapto hileh, numei ahihna vang kemin siangtho in nungta hileh apasal zong ama hangin kihonzo ding hi.Nasep nih sepkhat in asep kul ding hi. Hihthu ah, pilna leh lungduaina lo-in bangmah kivaihawm theilo hi. Kha lungsim khauh ding leh innbul ding kisam hi. Thungetna panin hanta leh hehpihna kimu ding hi. Lungtang auk ding pen itna maan hiding hi. Pasian itna leh pasal itna tung bekah kizekkhiatna maan paikhia ding hi.
 
Zi in pasal zatdingin apumpi leh alungsim apiak ciangin na khempeuhah thu amanna tawh alungsim siangtho, avang, leh numei khat ahihna amansuah hia, pasal dinmun asanglap sak nading hunpha amansuah ahi hi. Pasal lungkhauhnate anip sakding hia, zi ie asiangtho huzaapna in apasalin alungsim ukin, akha mi suah nading makaih ding hi. Anupa un Pasian’ zia leh tongte pua in, leitung duhnate panin suahta ding uh hi. Tua huzaapna in ganhing lungsim panin Pasian phawkna lungsim lamah asanglap thei huzaapna lian nei hi. Pasal alungkim sak nadingin ama dinmun ngiamah tuahsuk hileh pasal itna in ganhing bang itna thukhun ah kibulh ahihmanin tuain Pasian lungdam saklo hi. Asiangtho huzaap apia dingin guallel ta hi. Phunna leh ciakna omlo-in pasal cihcih amanna tawh numei in pasal tunga apiak ding tavuan leh Pasian tungah apiakding tavuan atheihlohna kilang khia hi.18
 
Eite Pumpi-in Mantawh Kileizo hi.—Ganhing lungsimin pumpi sungah omin, pumpi tungtawnin na sem khia hi. “Taksa” ahihkeileh “ci-le-sa” ahihkeileh “ganhing lunggulhna” in akisia, mawhna akidim mihing aniamlam nuntakna pulaak a, taksa in Pasian’ deihna bangin gamtang zolo hi. Tua taksa leh alunggulhnate pen singkhuam tungah akhailum dingin hong kisawl hi. Bangci khaiding hiam? Mawhna ah zuidinga zolnate sisak in. Asia ngaihsutnate hawlkhia in. Ganhing bang ngaihsutna khempeuh Christ kiangah saltang hen.
 
Ganhing bang lungsim khempeuhte asang khalam vangliatna nuaiah lut sakin. Pasian itna bek piding ding hi. Christ bekin kuamah tawh kitanglo in lungsim tokhom tungah tu ding hi. Ih pumpite mantawh leisa van in ngaihsun in. Pumpi tunga khut leh khete zong dikna adingin khutzatte hiding hi.19
 
(Khen 5na zo ta hang ei, zom lai ni maw)
READ  CS 5: Jesu A Neite’ Piakkhiatna
Tags: ,

Admin

Admin

Top