Tawldamlohna Zungpite
Lesson 3 *July 10–16
Tawldamlohna Zungpite
Sabbath Nitaklam July 10
Tukalsung Simding: Matthew 10:34–39, Luke 12:13–21, Phil. 2:5–8, Luke 22:14–30, Matthew 23:1–13.
Kamngah: “Enna leh huaihamna a om nakleh, buaina leh siatna nam khempeuh tawh kizom pahpah hi” James 3:16.
Aspen kici singkungte hoihthei mahmah a, pi 45 pan 90 bang sang thei hi. Khua votna mun, khaalvotna mun bekah pothei hi. A singte innsung vanzat ahi a, meigit leh laidal bawlna peuh in kizang hi. A singhawngte in limin tha-om ahihmanin, sazuk leh gamsa dangte in phalbi hun ciangin, tua singkungno tehte ne in kivak uhhi.Aspen singkung in nitaang kisampha mah mah uh a, no-den ahih manun, phalbi hun nangawnin ganhing tuamtuamte adingin an ahi hi.
Aspen kungte in singkung zung golpente lakpan namkhat hihna tawh min ngah mahmah hi. A zungte in lei sungah manlang takin lutsukgawp in, mun zaipi huamin zaam gawp uhhi. Tua aspen singkungte in kum 150 bang nungta thei a, leisung lam a om a zunglamte ahihleh kum a tulsim in nungta thei uhhi.
Tukal sung tengin, eite’ tawldamlohna zungpite pawlkhat i sin ding uhhi. Zeisu sungah tawldamna taktak i ngahtheih nading panin hongdal thei na tampi omhi. Pawlkhat tebel kician mahmah lel ahih manin awlmawh luat kul khollo hi. Leisung a omcip aspen kungzungte bangin a kician khollo pawlkhatte bel, i Honpa kiangpan hong khenkhiat theihzia pen kiphawk khalo thei tham hi.
Sunday July 11
Zeisu in Kikhenna Hong Puak
Kitot kiseel nuam kisa khollo hi. Ki pumkhat kilem uttek hihang. Kilemna tentan leh pawlpi sung buainate vensak theihding dan khawng zong kihilhhilh hihang.
Matthew 10:34–39 simin. Zeisu in “kilemna pia dingin hongpai ka hi kei a, namsau khah dingin hongpai ka hihi” acih pen bang a cinuam hiding hiam? Zeisu in “Kilemna Kumpi” a cihin e, bang khiatna nei ding hiam? Isa. 9:6.
……………………………………………………………………………………
Zeisu’ kammal Matthew 10:34–39 sungate pen lipkhaphuai liang hi. Galkapte’n a cin demdam kumpilian in hong pai ding sangsik, kiniamkhiatna tawh, naupangno khat lelin hong pai a, vengte leh galte nangawn itding a cipa in, a nungzuite kiangah kikhenna leh kitotna kongkhah ding hi ci leuleu hi. E’n zong lamdang i sakmah bangin, nungzui te’n zong lamdang sading uhhi: Piangthei ding mawleh?
Matthew 10:35-39 sungah thumaanna cihtakna thu vive hi. Micah 7:6 kammalte la kikin, Zeisu in amipihte kiangah, tawntung hun ading teelsiam ding sawl hi. Tapa khatin a Nu/Pa thusim kul hi. Tua thu pen Moses in mualtung panina lak thukham sungah hongkalh hi. Pasian’ kalh ngiat hi a; tua thu aza mite lungsimin, Zeisu khengzo ding hileh, khensatna kipkhat neihkul hi. Nu leh Pa in atate itin kemcing ding uhhi. A hihhang tua itna in, anu leh pa in Zeisu a itna uh sangin a liatzawk leh, khentat haksa khat a kisam uhhi. Amasa temah masak dingin Zeisu in hong vaikhak hi.
Zeisu in tuathu teeltheih nadingin cingtaak cih kammal tawh laigual thum hongpia hi. Cingtaakna in lungsim sangte leh mawhna zote zong hituanlo uhhi. Cingtaakna in Zeisu tawh kizopna tungah kinga hi. Nu, pa, atate pan kipanin nakhempeuh tungsiah ah Zeisu i teelleh i cingtaak ding hi. Singlamteh thuakna teel a, Zeisu i zuih hang hi.
“I khangnote pen upna siangtho’ kha tawh kidimin, singlamteh pua a Zeisu’ nung azuih uh sangin a lianzaw lametna ka nei kei hi. Khazih nungzui khangnote mainawt unla, thukhun zui in, thumaan leh sianthona puantual kituamsak un. Honpa in nangma hihtheihpen munah hong makaih ding a, tua munah zat taakcing na hi ding hi.”—Ellen G. White, Testimonies for the Church, vol. 5, p. 87.
Khatveivei ciangin ei teeltawm ahi khollo singlamteh peuh hong kipuasak thei a, khatveivei ei teeltawm zong om thei hi. Bangbang hitaleh, koici bangin tua singlamteh cihtakna tawh i puathei ding hiam?
Monday July 12
Angkhualna
Aspen singzungte a golzaw leisunglam omte mah bangin, angkhualna, mihingte sungah a kiseel khinkhian “mawhna” in Zeisu sungah tawldamna taktak hong musaklo hi. Mawhna min i suut limlim ciangin, angkhualna pen minlawh baihpen salo nahiam? Mi tampitak adingin ang khualna pen, amau pianzia hilel peuh hi.
Luke 12:13–21 simin. Zeisu in a thugentehna sungah thubuai pen suutkik dihin. I mailam ding geelkholhna in Pasian’ gam tawh akituaklo angkhualna ahithei diam? A hihkei phialleh zong Zeisu in bang hong hilhkhol hiam?
…………………………………………………………………………………………………………………………………………………………………..
Hih thugentehna pen Luka gospel laibu sungbekah kipulak a, mipite lakpan dotna tuam tuamte dawnkikna vive ahi hi. Gamhluah lamtawh kisai a kidot ciangin Zeisu in, unau nih tungah thukhenna tawh genteh hi. Hih tengah Zeisu in a bulpi limlim angsung khualna hi ci in kawkpha pen hi. Mikim gamtatzia abul thukzaw in a zung tosuk hi.
Nangma nuntakna sungah angsung khualziate ngaihsun in. Angkhualna in Pasian, nupa, innkuan, pawlpi, vengpaam leh naseppihte tawh koibangin hong kikhensak thei hiam? Philippi 2:5–8 sungah bang gen hiam?
……………………………………………………………………………………………………………………………………………………………………
Min akitheilo mihaupa in, ama’ kisapna leh ama’deihna bek khual in, mit muhloh vantung thute peuhmah ngaihsutin neihtuak vetlo hi. A lianzaw, ahoihzaw, a tamzawte tungah Pasian’ gam kiphut khollo hi. Zeisu in eite hong aiawh noptheih nadingin, bangin lunglutsak hiam cih Paul in hong pulakkhia hi.
Philippi 2:5–8 in angkhuallohna, kiniamkhiatna leh itna hong pulak hi. Pasian leh midang i itna in, eima deihteelna a niilkhiat zawhkeileh, leitungah ansaal tampipi a lamlam ihi a, vantung ah bangmah i kholkha kei ding uhhi (Matthew 6:20).
Banghangin hauhnopna leh van ngah nopna lamah kizol baihpen thei hiam? Nuntak na’ngin sum tampimah i kisam teita zongin, bangzah bangzahneikhin mahtaleng, kideih semsem laithei hiam?
Tuesday July 13
Lunggulhna
Zeisu’ leitung nasep nunung kalkhat sung, singlamteh tungah kikhai madeuh sungtengin hong hanthotnate in lungsim hong zomahmah hi. Tawldamlohna leh lunggulhnate in mihingte thusia lamah hawlgawp ahihna hong theisak hi.
Luke 22:14–30 sim inla; an-nekkhopna sungvuah nungzuite in a lianpen ding a kituhkeei uh ngaihsun in (Luke 22:24). Bang hangin nungzuite lampial in mihing vangliatna lamah paikha thei zenzen uhhiam?
……………………………………………………………………………………………………………………………………………………………………
Pawlpi, innkuan leh nasepna sungah kua lianpen cihkhawng kikupna peuh omthei mah ding hi. Lungsim sung khawngah zong ngaihsun khamahni in, kician takin kua paukhia hiam?
Zeisu nungzuite lakah alianpen ding akidot masakna mun hinailo lai hi. Matthew 18:1 ah nungzuite in Zeisu kiangah hihbangin hemdot gialgual uhhi; “Vantungah kua lianpen ding hiam” ci uhhi. Zeisu dawnkikna bel pilkam mahmah hi. Naupangno khat samin, amaute laizangah koih hi. A mitte uh liiksakin; a mitkhute uh lamto uhhi. Zeisu hihdan pen hilhcian kultuak a, Matthew 18:3 sungah, “a mantakpi kong cihin, note kikheel in naupang nabatkei uhleh, vantung ki ukna sungah nalut ngeikei ding uhhi” cihi.
Kikheelna in Zeisu sungah tawldamna taktak muhna ahi hi. A pualam pan huhna peuh kisam i sapong mawk hi. Eima tha tawh zawhloh dinglam i theih ciangin Zeisu i zong saan hi. I lungsim lunggulhnate puahphatna i phawkkha vat hi. Zeisu’n acihna ah: Hih naupangno bangin Keimah hong muangun. Liatna taktak icih in eima hamphatna nusia a, vangam pomna hizaw hi.
Zeisu a nunung nitak an aneklai ciangdong nungzuite in tuatawh kisai bangmah telnailo uh hih tuakzaw hi. Amau kinial susupte in, mailamah a zopkik ngam nawnloh dinguh khatleh khat kisiatna piangsak hi.
Kum tawmvei sungmah Zeisu tawh kikhawl a, nasemkhawm, a thuhilhna zaza hinapi uh, hihciangbek mah tungzo uh hiding hiam? Mite lungsim omzia limhoihlo honglak himawk hi! A hoihlampan enleng, nungzuite kinial susup kawmkal ah, Topa in a hehpihna beisaklo a, amaute nusialo hi.
Mawhnei apukte omzia ahi, kiliatsakna pan kidaltheih nadingin; banghangin singlamteh tungah Zeisu engige ding i hi hiam?
Wednesday July 14
Kineihkhemna
Kineihkhemna cih pen, ama hihlohna pipi, a hihding bangin kineih cihna hi. Zeisu in Pharisee mite leh Laitheite amaizumsak nadingin, tua kammal a zatna Mate 23 sungah sagihvei bang omhi (Matthew 23:13, 14, 15, 23, 25, 27, 29). Lungdamna laibu 4 sungah, Zeisu’ hehpihna leh mawhphelna pen mi zualzangte, siahdongte, angzuakte leh tualthatte peuh adingin piakhia napi; Pharisee teleh laitheite ading peuhmah om hetlo hi (Matthew 6:2, 5, 16; 7:5; 15:7–9; 22:18).
Matthew 23:1–13 sim inla, Zeisu gen, mi kineihkhemte omzia namlii gualsuk in.
……………………………………………………………………………………………………………………………………………………………………
Zeisu in laitheite leh Phariseete thu lii tawh kibangsak hi. Kum zalom khatna hunlai Judah ngeina sungah Phariseete in biakna zehte khauhtakin zui uhhi. Laibu sungah kigelhte, kamtawh a kigenkhiate zui cinten in biakna siangtho ding hanciam uhhi. Tua ngeinate langkhatah Sadducee a kici mihaute ahi phadeuh, siampite tawh akizom pawl om leuleu hi. Greek lai, apau leh lungsim puakte nei uh a, thukhenna umlo banah sihkhit nuntak kikna umlo uhhi. A zalenpawl cihding hi. A pawlnih mahun kineihkhemte hikhawm uhhi.
Zeisu cihbangin: eite zong i genbang i hihkei a, mite ading zehte khauhsak semsem napi, eimah’n zang selo, mite hanciamsak mahmah, Pasian bekin angah ding a kilawm pahtawinate eimah’n ngahnuam cihkhawng i hihleh a kineihkhemte mah i hipah hi.
A kammalte bangzahin khauhpai taleh, Zeisu in, mi kineihkhem acihcihte khempeuh zong itna leh deihsakna neiveve hi.
“Pasian’ Tapa in biakinnpi leh a thungaite a etsuk phetin, Vantung hehpihna in Amah tuampah lian hi. Lunggimsa dipkuatna aw ling kauhkauh tawh khitui luangsa in, ‘Aw Jerusalem, Jerusalem aw, kamsangte na thatzo a, nang kiangah kong sawl kamsangte suang tawh na deng hi. Akpi in a note a kha nuai-ah a khopkhop bangin ka tate khawmkhawm mah taleng, a utkei uhhi’” cihi.”—Ellen G. White, the Desire of Ages, p. 620.
Zeisu in khauh takin a taigawp biakna makaite bang na hihloh ding bang hangin kisam hiam? Tua bang kineihkhem siam i omkhak zenzenleh, koibangin mukhia ding a, koibangin suakta sakthei ding ihi hiam?
Thursday July 15
Tawldamlohna Azungin Botkhia
John 14:1–6 simin. I tawldamloh kawmkalin, lungkham lailai loh nading bang cih ding hiam? Kideidanna, angkhualna, lunggulhna, kineihna cihte zo in, tawldamna taktak muhna tawhtang bang hiam?
……………………………………………………………………………………………………………………………………………………………………
Tawldamlohna pen Zeisu tawh zoding hihang. Amah lampi, thumaan leh nuntakna hi. Hi leitung media tawh kidim sungah ngiim namel neilo in i gammanh laitakin, Amah’n lampi maan hong hilh ding hi. Vantung thukham piapa ahih mahbangin Amah thumanthutak hi a, Ama’ Kha in thuman thutak ah hong tunh ding hi (John 16:13). I liam i bai, i tawl, i gim i nat i lungkiat hun ciangin Amah nuntakna ahihi. Nuntakna cingtaak zong hong khaamzo hi (John 10:10). Tua sungah tawntung nuntakna leh tawntung inn kihelpah a, hih leinuntak tawh a kibanglo nuntakzia ahi hi. Piangsakpa in tumahmah in, tehpih omlo liangin a kicingmahmah in hongpiathei hi.
“Note lungkham kei un” cihpen lam-etna tawh hong nungtasak nuam hi. Lungkiat laitak in Amah’n hong lamto thei hi. Khuamial leh mawhna sung i kitom laitakin, eite sungah nahoih hong kipansak in hong zosak Amah ahi hi (Phil. 1:6).
Leitungah bangzah thusia taleh, Zeisu hong piak kamciamte en gige lel in. Hong bawlsak innpi ah natna, tawldamlohna, thuakna cihte beisiang ding hi. Tua pen Khazih Zeisu sungah hong kipia lam-etna hi a, kuakua hi taleng, tualniam kihhuai ninnoi mipoi i hih laitak mahin hongpiak ahi hi.
I thanem napi tengmah tawh Pasian zuan ding hang a, a napipi, a kisia pipi, a pukpipi mah Amah’n hong sang veve ahihlamtak theihding ahi hi. Tua in hehpihna hangbek hi a, upna tawh i zonleh hong kipiakhin hipah lel hi.
Jeremiah 3:22 simin. Pasian in bang hih dingin hong sawl a, Amah’n koibangin hong dawntuah ding ci hiam?
…………………………………………………………………………………………………………………………………………………………………
Zeisu’ kammal zong ngaihsun ni: “Keima omna munah note na hong omtheih nadingun note a hong la dingin ka hong paikik ding hi” (John 14:3). Nihveina hong pai ding pen bangzah in a thupi thubulphuh hi thei hiam? Misite omzia a theitel Adventist mite phadiak adingin nihveina hongpai ding banghangin thupi hiam?
Friday July 16
Ngaihsutbeh Ding:
“Eimah kibulphuh nuntakna sungah khantohna gahphatna om theilo hi. Khazih pen aituam honpa in nasaankhit nakleh, nangmah kimangngilh inla, midang huh sawmzaw in. Khazih hong itna leh hoihna gengen in. Sep ding peuhmah semin. Kha veina na lungsim sungah nei inla, na thahatna khempeuh tawh kha mangthang zongin. Khazih’ Kha nangah ciangin- na khangto ding a, gah na gah ding hi. Kha hong hehpihna in nangma gamtatna minsak ding hi. Na upna khangto ding a, na muhna hong thukzaw ding a, na itna zong cingtaak ding hi. Khazih na suun semsem ding a, siangtho, thupi in na ithuai ding hi.”—Ellen G. White, Christ’s Object Lessons, pp. 67, 68.
Pawlpi mite thu-kinialna tawh kisai in, “a langnih tuakun Pasian’ hehpihna in a tuamcip kei nakleh, ki hona hun kisausak a, hun ki mawk beisak in, Pasian’ nasemte in hoih takin ngai phapha uhhi. Kisaktheihna leh angkhualna paikhia peuh le-uh, minute nga sungin tua haksatna ki hemkhia zo ziau ding hi.”—Ellen G. White, Early Writings, p. 119.
Kikup Ding Dotnate:
- Koibangin angkhualna zothei ding ihi hiam? Mi khatleh khat koibangin kithupisim theih ding ihi hiam?
- Lunggulhna in a sia hihetlo hi. I lunggulhnate tawh kisusia sakzawlo in, lunggulhkawmin Pasian kiangpan na lianpite koibangin i sangtheizaw ding hiam?
- Lunggulhna, kineihkhemna, angkhualna, hazatna cihte a pualamah kidawk saklo sam hihang. I maitangah itna puaksiam mahmah lel hihang. Aspen singkungte mah bangin, tua a hoihlote khempeuh lei sungah i phumcip uhhi. Kha-kidim gamtatna in koibang taktak hi ding hiam? Tawldamlohna zogawpin Zeisu sungah tawldamna koibangin ngahthei ding hiam?
- Thursday dotna ah nihveina hongpai dingthu lungngai in. Tua lo tawh bang lam-etna i neizo ding hiam? Tua lo in Zeisu khatveina hong paina in bang hong sepsak thei ding hiam? Misite lah nih veina hong pai dong ihmu lai ding ci hive hang.