Tawlngalo leh Langdo

Tawlngalo leh Langdo - Zomi Sabath School Lesson 2, 3rd Quarter 2021
Lesson  2                                                             *July 3–9

Tawlngalo leh Langdo




Sabbath Nitaklam                                                    July 3

 

Tukalsung Simding: Numbers 11:1–33; 12:1–13; 13:27–33; 14:1–23, 1 Cor. 10:1–11, Numbers 14:39–45.

Kamngah:Leitung beikuan a om eite adingin hih thupiangte i etteh ding hi a; eite hilhkholh nadingin lai sungah kiciamteh ahi hi.” 1 Cor. 10:11.

            Kum zalom tampi sung, mi tampite in, uite leh innkhawi ganno-te in, ziinliin kuan ciangin, tawlngalo omkhong theilo ci in theikhia uhhi.    

            Mipil misiamte muhkhiatna ah, ganhingte in ziinliin tawh akipawl apiang theite, a liinna, ziinliin pimaa a hongtung masate thei uhhi cihi. Ziin a liinmaa lei a liinmaa in ganhingte in omkhong theilo in buai mahmah cihi. Saite bangin, mihingte phawkthamloh leisungtawng kiliing ciaiciai khawng zong phawkhi ci uhhi.

            2011 kum August 23 ni a Washington D.C ah 5.8 -magnitude ziin a liin madeuh in, Smithsonian Institution’s National Zoo a ganhingte omdan tumdang mahmah hi ci hi. Tua ganno te lakpan lemur zawngte in, ziinliinmaa minute 15 khawng panin nakpitakin awng ziazua uh cihi.

            Tukal sungteng in mihingte om khong theihlohna, leitung lauhuainate hang ahilo, a puksa mawhneite hinapi uh a, Zeisu in upna leh thumanna tungtawnin hong piak tawlngakna aneilote tangthu i sinding uhhi.




Sunday                                                                                     July 4

Gamlakah Tawlngalo

            Israel mite in Sinai nusia in Canaan a zuat uh ciangin tawlngalo in gim kisakhading uhhi. Egypt a paisat-khit uh kumkhat valta hi (Numbers 1:1).Khapsagam lut dingin kiging khinta uhhi. Ami kisimkhin a kiging sitset uhhi. Pasian vangliatna nasepte tampitak mah mukhinzo uhhi. Tua pipi mah Sinai a paisat uhciangin phunciakciak lai uhhi.

            Numbers 11:1–15 simin. Israelte bangteng phunciakciak uh hiam?

…………………………………………………………………………………………………….…………………………………………………………….

            Israel mite in sa, tangmai, tuitangmai, lothaangsan leh kaangte duh uhhi. “Kua in sa hong piading hiam? Egypt ah manpialo in i nek ngasate, tangmaite, dawnpawlte, lo-uih neute, lo-uih san, lo-uihkangte i phawkphawk hi. Tu in itha beita a, hih manna simloh bangmahdang ompeuh mahlo hi” (Numbers 11:4-6) ci uhhi. A uphuailo zah ahaksat thuakte (Exodus1) mangngilh napi uhin, a nekngei uh anlimteng phawkkik bilbel uhhi.

            Pasian’ manna tawh kumkhat kivakkhin napi uh, tawldam kisalo lai uh a, adang lunggulh lai uhhi. Moses in zong ninglua mahmah ta hi. Mi tawlngalote makaih dingbel baihlo ding hi. Ahih hang Moses in a belhdingpa theilel hi. “Banghangin nanasempa hong hici bawlsiat nahi uh hiam? Banghangin na maipha uh hong musaklo in, hihmi khempeuhte’ tavuan keitungah hong suan nahi uhhiam?” (Numbers 11:11) a cihi.

            Tua thuumna Pasian in koici dawnkik hiam? Numbers 11:16–33.

…………………………………………………………………………………………………….…………………………………………………………….

            Ih tawldamloh laitakin hong zalo dingin Pasian bengngonglo hi. Israelte zong a sanek dingun vamim pia hi. Ahih hang Israelte duhtaktak sapen tuate hilianlo zaw hi. I heh i sin-uuk ciangin, tuabang nengnengte in hehna tawh kuang hipong lel a, i kituhpipen zong hikhollo hi. A thukzaw in i lungsim sungah a omsa khat peuh hangin kitawng i hizaw hi. Israelte in Pasian’ makaihna a langdo uh hi a, eite’n zong i kidop mahmah kul hi.

            Banghangin a beisa hunte pen amau dinmun taktak sangin hoih kisakha den hiam?

 

Monday                                                                       July 5

A Kilawhbaih

            Numbers 12:1–3 simin. Miriam leh Aaron bang hangin heh uh hiam?

………………………………………………………………………………………………………………………………………………………………….

            Miriam leh Aaron unau gelun Cush minam Moses’ zii ngai hetlo napi in ki imm khilkhial uhhi. Zipporah pen Midian minam ahi hi (Exodus 3:1). Israel mite lakah “teeltuamte” nangawnin eite lungsim puakziate mah nanei veve uh a, a hoihlam zong hibeeklo lai hi. Laisiangtho in hihthu pen a paulam uh cihi. A thubulpi taktakbel kamsanna hizaw hi. Tua madeuh in Pasian in Moses kiangah Israel makaihna ah Moses ahuh dingin mi sawmsagih teelkhiasak khin hi (Numbers11:16, 17, 24, 25). Aaron leh Miriam tegelin makaimah a semsem uh (Exodus 4: 13-15, Micah 6: 4) hinapi, kimakaihna thak tungah patauhna khat hong nei uh a, “Topa in Moses tung bek tawnin thugen ahi hiam? Eite tung zong tawnin thu hong gen hilo hiam?”(Numbers12: 2) ci uh hi.

            Pasian in tua phunna koibangin dawng hiam? Numbers 12:4–13. Banghangin Pasian in tua bangin nawhsa in dawng hiding hiam?

…………………………………………………………………………………………………………………………………………………………………..

            Pasian in nawhsa takin dawng a, thudang omtheilo hi. Kamsaanna zong kiliatsak nading zong hituanlo hi. Moses in Pasian tungah kinga mahmah ahih manin makai ding mahin kilawm mahmah hi.     

            A tangneu khatna in, Moses langdo dingin a mapangpi pen Miriam mah hipah cihi. Tua lai in, Aaron pen Israelte siampilian hi khinzo hi. Amah phak zenleh, biakbuk sungah mipite aiawh in lutthei nawnlo ding hi. Pasian in tawmvei sung phakna tawh Miriam a thuhilhna pen, amau gel leh a innkuante lungsimpuak hoih salo in kikhel kul ahihna a lahkhiatna ahi hi. Miriam ading Aaron thungetna ah amahmah kihel ahihna kipsak (Numbers 12:11) a, tu in, mawhsakna lamah painawnlozaw in, Aaron in Miriam ading thungetsak a, Moses in zong Miriam adingin thungetsak (Numbers 12:11-13) lai hi. Pasian in amite sungah tua bang lungsimpuak mu nuam hi. Tua thungetna Pasian in za in, Miriam damsak hi. 

            Pawlpi kimakaihna mawhsak ding baih mahmah ahih tei hang; bang dinmun peuh hitaleh makaite tungah phunciak sangin, amau ading Pasian mawhmaisakna ngetsak thei zawleng bangzah in hoihzaw ding hiam?

 

Tuesday                                                                       July 6

Tawlngaklohna in Langdona Hong Tunh

            A tangthu bel thuhoih tawh kipan bilbel hi. Israel mite Canaan gamgi dong tungta uh a, thukan mi 12 te’n zong gamsung ki-enkawikawi sakzo hi. Hong thupuakte uh zong nasia thei mahmah uhhi.

             Thukante hong thupuak Numbers 13:27–33 ah simin. Koimunsan lianah Israelte lam-etna kipaampaih lian hiam?

…………………………………………………………………………………

            Caleb’ thupuak honglut masiah peuhmah a lunghiangte thupuak in gualzo keei hi. Pasian’ khapsa gam zuat ding peuhmah Israel in geelkeeilo hi. Galzawhna awt ding sangin; lungsim tawldamlo, kahding leh phunciak ding bek teelzaw uhhi.        

            I lungsim a tawldamloh ciangin, upna tawh kalsuan ding i hizaw hi. Tawldamlohna in lawpna hong suksiatsak lel hi. Mipilte in amuhna vuah, tawlngak tawmlua ihmut khamlohna khawng in teelkhialhna, thauluatna, zongsatna leh lungkhamluatna piangsak thei ci uhhi.

            Numbers 14:1–10 simin. Bang piangzom hiam?

…………………………………………………………………………………

            Thute asia panin asuukzaw in piang hi. Caleb thuumna ah “Topa langpan kei tapeuh ni” (Numbers 14: 9) acih pen kuamah’n donlo uh a, makaite suang tawh deng dingin hong kikaikhawm uhhi. Tawl damlohna in langdona hong tunh a, langdona in sihna hongtunh hi.

            “A citaklo thukante in Caleb leh Joshua huat acihin hua uh a, suang tawh denlup dingin a kiko uhhi. A haigawp mite in suangtum tawmin a thuman thukan nihte thah a sawm uhhi. Kiko vevasa in, a suangtum tawitek uh tawh thukan nihtelam a taai uhleh, thakhatthu in a suangtumte uh khia in, a daaikhipkhep uhhi. Alungsimuh launa tawh kidim tahi. Pasian in amaute gitlohna pan in khawlsak hi. Tua ciangin biakbuk panin, Pasian’ vangin khuavak bangin hong tangkhia hi. Mi khempeuhin Topa’ limlahna muciat uhhi. Kua mahin langdo ngam nawnlo uhhi. Thukan zuaute in laulua uh ahih manun, kuun khenkhansa in, giahbuk tekah a ciah uhhi.”—Ellen G. White, Patriarchs and Prohets, p. 390.

            Tuamunsan lianah Topa in ama vangliatna mipite lakkhia lian hi. Gamlakvakna 14 i sim ciangin, gamdaai dikdek tuak uh a; makai khempeuh in Moses leh Pasian kihona bekmah ngai dingin kigingta uhhi. Tua suangtumte pen, Moses, Caleb leh Joshua den nading ahihlam Pasian in thei mahmah lel a, a bulpipen Pasian Amah langdona ahihlam tellua mahmah hi.




Wednesday                                                                 July 7

Palai Khat

            Hih langdona hangin Pasian in Moses ading bang hamphatna khat piathei hiam? Numbers 14:11, 12. 

…………………………………………………………………………………

            Pasian in Israel mite susiagai in, Moses tungtawnin minam thakkhat piansak ding kam honglaam ta hi.

            Moses in, amahbek hilo, Pasian, hih bangin tang langdona koibangin dawngkik hiam? (Numbers 14:13–19). 

…………………………………………………………………………………………………………………………………………………………………..

            Hih santakah Pasian’ mimaan taktak hong kidawk ta hi. Moses’ dawnna pen a khangin kip suksuk a, tua khitzawh kum 1,400 ciangin Zeisu in zong a nungzuite adingin thungetsak hi(John 17). Moses in hih bangin a hihna tungtawnin Laisiangtho sangnaupang tampi takin, eite ading Zeisu hong sepsakna muhlawh uhhi. Amau mawhna eimawh hong kidong selo hi. Moses in “Alian Nangma itna kip tawh . . . Hih mite’ mawhna maisakin” (Numbers 14:19) ci in thumsak hi. Moses palai sepna hangin, Topa’n a maisak mah bangin, Zeisu sihna, thawhkikna leh palai sepna hangin ei mawhna hong maisak hi.

            Moses in: “Alian nangma hehpihna kip tawh kizui leh Egypt panin tuhun dong hong hih hih mite mawhna na maisakna tawh kizui in, kong thum hi” (Numbers 14:19) cihi. Hehpihna in tawldamlohna abulphuh langdona tawh kinakdo mahmah hi. Maisakna in kithakpatna ahi hi. Tuate in mannei hi. Hehpihna in mantawmlo hi. A kimaisak hangin, mawhnei mi in, mawhna leh langdona sulzui thuak ding uh a, tua sulzui pen, tua minamin khapsa gam lutlo ding cihna ahi hi (Numbers 14:20-23).

            Tua khit kum 38 sung, Pasian in amaute gamlakah kemlai ding hi. Anvak ding hi. Biakbuk panin hopih ding hi. Gamlak mahah amaute geiah om ding hi. Amau sihkhit ciangin, khangthakte in amau ciangkhut luah ding uh a, khapsa gamah tawlnga ding uhhi.

            Thukhenna tawh kibang mahleh; hehpihna hizel hi. Pasian a muang thei nailo hihbang mite in koici bangin, a thahat mahmah Canaan khuapite zo thei ding uh hiam? Amau zong khuamial sungah tukden keeite in, tua mite kiangah koibangin khuavak hithei ding uh hiam?

            A kimaisaksa mawhna gaau thuakna panin bang sulzui nakisin kha ngei hiam?

 

Thursday                                                                    July 8

Upna langah Lunghianna

            Gamlakah a vakvai Israel mite leh Zeisu nihveina hong pai madeuh a mite a kibatna bangteng peuh na mu thei hiam? (1 Cor. 10:1–11)

………………………………………………………………………………………………………………………………………………………………….

            Tangthu sungah Pasian’ mite in, khapsa gam zongin gamlakah vakvai uhhi. Gamlak acih in khiatna tampi nei hi. Tulai hunin, beihun a neilo media honpite, hong tum zangzang message tampite, a beitheilo gualnopna thu tampite tawh kibang hi. Zualzang video limte leh a deihhuai leitung van tuamtuamte hong kizuakzuak tawh kibang hi. Setvan siamte, khangnote, mihaute leh sexy mite hileng, i haksatna teng vengthei mah ding hi. Israel mite mah bangin, eite’n zong tawldamna mun i zongzong a, ahih hang ahilolo na mun tengah i zongzong kha uhhi.

            Numbers 14:39–45 sungah, Pasian thukhenna pen Israel te’n koici dawnkik uhhiam?

…………………………………………………………………………………………………………………………………………………………………

            Pasian thukhenna tungah Israelte dawnna in ciapteh taak hi. “I khialkhin hi; Topa’ ciamsa munah i paito ding uhhi” (Numbers 14:40) ci uhhi.  

            Lungsim phellang bek a ki aapte pen, zatui hatlo tawh kibang a tangkai zolo hi. Tulai doctorte in nau suaktuung nai 24 sungin sut ding tuap natna dalna Hepatitis B zatui muta uhhi. Kipat dan hoih mahmah hi. Ahih hang tua kisut masakpen anungzui nihveina thumveina cihte a hunhun leh kul/kisam zahzah suttheih keileh, tua natna kidalzo tuanlo hi.          

            Gamlakvakna 14 tawpna lamah Israelte langdona, Pasian in a thukham leh Moses tungtawn in a makaihna cihte lungkhauh takin a nial uh manun, sihna lungkiatna sung tung uhhi. Upmawh thute in manham mahmah a, sihna hong tunh thei hi. Upmawh thute in lauhuaina tawh kizom phadiak hi. Launa khatpeuh i neih ciangin khentatna khat i bawlpak pen kisikkik in omzel hi.

            Upna tawh nagamtat hunte leh upmawh thu tawh na gamtat hunte ngaihsun phakik in. A ki lamdanna bang omhiam?




Friday                                                                                      July 9

Ngaihsutbeh Ding:

            “Tu in a mawhgamtatna uh pan a kisikkik bangin om uh hi. Ahih hangin akisik taktak ahi kei uhhi. Amawhna uh hang a thupiangte a muhuh ciang a kisikuh hibek uhhi. Topa thukhenna khauh a theih uhciangin, ki thangpai sak uh a, gamlakah ciahkik nawnlo dingin, a kigen uhhi. Galte gampan a tawlngakkik ding a thupiaklai in, Pasian in amau ki-aapna sin in takpilo ahihna tellak hi. Pasian’ thu manding a sawl thukante tungah, amau lungsim om bangin ngongtat a sawmluatna uh phawkkik uhhi. A lauhuai mahmah khialhna khat bawlkha ahih manin launa, tua a mawhna sulzui pen lauhuai mahmah a hihna thei in patau uhhi. A lungsimte kikheelna neilo hi. Tua hi a, Pasian thupiakna tawh, Moses in gamlakah ciahkik dingin Thu apia hi.”—Ellen White, Patriarchs and Prophets, p. 391.

            “Upna in upmawhna tawh kizomlo hi. Upna maan taktak a neite in upmawhthu tawh kipelh uhhi. Upmawhthu pen Satan in upna alangdona ahi hi. Upna in Pasian kamciamte muangin thumanna gah hi. Upmawhthu in zong kamciamte mah muang napi, Satan’ ngeina bangin mawh theihna paulapin zang uhhi. Upna in Pasian itna muang dingin i Nu/Pa masate makaih in, a thumangsak hi. Upmawhna in a thukham hong palsatsak a, hong itna lian mahmah lel ahih manin mawhna sulzui pan hong honkhia lelding hi ci uhhi. Hehpihna hong kipiaktheih na’ng thumanna ommeel lopi in, vantung’ maipha khawng zong cihpen upna taktak hi lo hi. Upna siangtho cihin kamciam leh Laisiangtho sungah Pasian’ vaihawmnate sungah bulkip nei hi.”—Ellen G. White, the Desire of Ages, p. 126.




Kikup Ding Dotna:
  1.  Upna leh upmawhthu a kilamdanna gentel in. Canaan a zawhna pen upna tawh sepna himah taleh, Israelte’n a dotakpi ciangin upmawh sepna hong suak hi. I gamtatzia leh khuahun in upna leh upmawhthu kikalah nasia takin khentel a hihna laktel in.
  1.  Mawhmaisakna a om theihna leitungah ih teen sungin mawhna thaman tawh ih kipelh thei kei hi. Mawhmaina ngahkhin hinapi, amah leh a itte tungah aguu tung lai ahih manin, koici bangin na huh thei ding hiam? 
           
See also  ZSL 13: Upna Sungah Kal Khat
Tags: ,

Admin

Admin

Top