HSS 3: THURUK ATANGA THUPUAN

kHANGTAWN lUNGGULH: kI-APNA

ZIRLAI 3            January 11–17

THURUK ATANGA THUPUAN

 

CHANGVAWN: “Daniela chuan, ‘Pathian hming chu kumkhaw tlaitluanin fakin awm rawh se, finna leh thiltihtheihna a ta a ni si a’ tiin a chhang a,” (Daniela 2:20, ESV).

 

SABBATH CHAWHNU                                                                  January 11

Chhiar Tur: Deuteronomi 32:4; Sam 138; Daniela   2:1–16; 2:17–49; Tirhkohte 17:28; Johana 15:5; 1 Petera 2:4.

 

GREENLAND kiang vel tuipui chu vur tlang lian pui puiin a khuh vek a ni mai a. Vur tlang te deuh zawkte chu vur tlang lian pui puite chet loh dan hawi zawngin an che thung a. Chung vur tlang lian pui puite chu tuifinriat luan dan zuia an insawn zel laiin, a tlang te deuh zawkte erawh chu thliin a chhem dan zuiin an che si a, an insu nasa thei hle a ni.

Khawvel chanchina hnamte lo dinchhuah leh tluk chungchang kan ngaihtuahin, tuifinriat tui luan dan leh a chung lama thli tleh dan nen a inzul viau mai. Tuipui chunga thli tleh dan chuan mihring ruahman leh tum danglam deuh reng hi a entir a. Mahse, chutianga thli lo thawka a thil a chhem lai chuan, chu ai maha thiltithei zawk tuipui luang dul dul chu a kal reng tho bawk si a. Pathian finna leh thuneihnain a tum angin a kal zel a ni. Pi White-i chuan heti hian a sawi, “Nimahsela, van boruak zau taka englai pawha mahni kawng theuh zawha arsite an kal muai muai ang khian, Pathian thil tum chuan hmanhmawh luat emaw, khawtlai luat emaw a nei ve lo.”— Ellen G. White, Desire of Ages (Chatuan Nghahfak), p. 26.

Hnamte dinchhuah leh tluk te, ngaih dan te, political party-te chenin mihring duh dana ding a an viau laiin, Daniela 2 erawh chuan, Pathian chu a tawp kharna ropui tak thlenga mihring chanchin inher veltirtu chu a ni zawk tih a tar lang.

 

SUNDAY                                                                                        January 12

HMUN TINA AWM PATHIAN CHU

 

Daniela 2:1–16 chhiar la. LALPAN lal ber hnena mumang a pek avangin Hebraite khan eng harsatna nge an hmachhawn?

 

Hmanlai khawvelah kha chuan mumangte hi an ngai thupui thei hle a. Mumang tha lo an neih chuan chhiatna thleng tur angin an ngai a. Chutiang chuan, Nebukadnez- zaran a mumang a buaipui viau pawh kha thil awm tak a ni kan ti thei ang a; mumang a nei tih mai loh chu a mumang tak pawh a hre chhuak thei tawh bawk si lo.

 

Babulon mi fingten mumangte chu an pathianten hrilh fiah theiin an ring a, mahse he mumang kher hi chu a mangneitu lal berin a theihnghilh tawh avangin tihngaihna reng an hre bik lo. Ani khan a mumang chu han hrilh thei se chuan, amah tihlawm nan a hrilh fiahna chu an phuah chawp thei mai pawh a ni ang. Mahse, chutiang a nih tak si loh a, mumang hrilh fiah thiamte pawhin lal hnena mumang chungchang eng mah an hrilh theih loh a, dinhmun khirh taka an din tak si-ah chuan,”Tisaa khawsa lo pathiante tih chauh lo chu entir thei tur tu mah an awm lo ve,” (Daniela 2:11, NKJV) tih pawm lo thei lo va siam an ni ta a ni.

Lal rilru mangang chuan Babulon mi fing zawng zawngte chu tihlum turin thupek a chhuah a. Chutianga rawng taka chetna chu hmanlai khawvela tih ngai loh pawh a ni bik lo. Phiar rukna thil avangin Daria I-na pawhin khawchhak mifing zawng zawngte tihhlumtirin, Xerxes (Ahasuera) pawhin a engineer-te lei a dawhtir chu a chim leh tak si avangin a tihhlumtir vek tih hriat a ni. Nebukadnezzara kha thupek a chhuah khan, Daniela leh a thiante pawh khan an zirlai an zir chhuak ve chiahin, lal mi thiamte zinga chhiar tel an ni tawh a. Chuvang chuan, lal thupek khan anni pawh a huam tel a. Tawng bul lama a lan dan phei chuan mi thenkhat kha tihhlum tan tawh niin, Daniela a thiante kha a dawta tihhlum ve tur angin a lang.

Mahse, Daniela khan,”fing tak leh remhre takin” (Daniela 2:14), Arioka, tihhlumna thupek hlentu tur chu a dawr a. Mumang chungchang thuruk chu chinfel a nih theih nan amah Daniela ngei chuan hun pek belh hlek turin lal hnenah ngenna a thlen a. Thil ngaihnawm tak chu, lal khan mi fingte kha ‘hun tisei lui’ mai angin a lo sawisel tawh nain, Danielan ‘hun pek belh’ tura a dilna erawh chu a lo pawmsak nghal mai thung a. Daniela hian khang mi fing dangten ‘chutiang thuruk chu mihring tu mahin an hrilh fiah thei lo vang’ an tih kha a pawmpui a. Mahse, zawlnei hi chuan Pathianin mumang leh a hrilh fiahna chu a tar lang thei tih a hre thung a  ni.

See also  ZSS 8: Pasian leh A Thuciam

 

Theologian-hoten Pathian “immanence” chungchang sawiin, thilsiamna nen kha chuan a inang chiah lo nain, Pathian chu hnai taka la awm reng a ni an ti. Lal Nebukanessara hnena mumang a pekna atang khan Pathian chu kan hnena awm a nihzia eng nge min zirtir? (En tel tur, Tirhkohte 17:28.)

 

 THAWHTANNI                                                                              January 13

TAWNGTAINA CHU

 

Daniela khan a thian pathumte kha tawngtai hona a neihpui nghal a, Pathianin mumang chu a puan loh chuan tihhlum tur an ni dawn tih a hrilh fiah a. Harsatna lian tak kan hmachhawnin, chona namen lo tak hmachhaw ngai  si min chinfelsak turin kan Pathian hi a ropui tawk a ni  tih hi kan hre reng tur a  ni.

 

Daniela 2:17–23 chhiar la. Hetah hian eng dilna chi hnih ang chi nge chuang?

 

He bungah hian dilna chi hnih tarlan a ni a. A hmasa zawk chu dilna tawngtaina niin, Danielan mumang leh a hrilh fiahna lantir turin Pathian hnenah ngenna a thlen a (Daniela 2:17–19). An tawngtaina thuchham tak chu tarlan a ni lo nain, Daniela leh a thiante khan “Babulon mifing dangte zinga Daniela leh a thiante chu an boral ve loh nana he thu inthup chungchangah hian van Pathian khawngaihna an dil” tih min hrilh (Daniela 2:18, NKJV).

An tawngtai laiin, Pathianin an dilna chhangin lalber mumang leh a hrilh fiahna a tarlansak ta a ni. Keini pawhin “Van Pathian zahngaihnate” dila kan tawngtaiin, heta tar lan ang ema ropui ni kher lo pawh ni se, min chhansak ve dawn a ni tih rinngamna kan nei thei a; a chhan chu Daniela Pathian kha kan Pathian a ni ve tho a ni.

Pathianin an dilna a chhansak takah chuan, Daniela leh a thiante khan lawmthusawina leh fakna tawngtai an hlan leh ta thung a. Pathian chu finna hnar a nihna leh, thilsiamte leh khawvel inlumlet chunga thuneitu a nihnaah an fak a. Hetah hian kan tan zirlai zir tur pawimawh tak a awm. Tawngtaia, Pathian hnena thil tam tak dilna kan thlen hian, kan dilnate min chhansak avanga fak leh lawmthusawina eng zat nge kan thlen leh thin le? Phar sawmte chanchin atang khan mihringten lawmthu sawi nachang kan hriat loh thin zia chiang takin a lang. Phar sawm tihdam zinga khan “Pathian hnena ropuina hlan” turin mi pakhat chiah a lo kir leh a nih  kha (Luka 17:18).

Daniela chhanna khan lawmthu sawi leh fakna hlan pawimawhzia min hrilh ni mai lo vin, dilna lo ngaithlatu Pathian nungchang pawh a tar lang nghal a. A hnena kan tawngtaiin, kan thatpui dan ber turin min chhang dawn a ni tih Amah chu kan rinchhan thei a, chutiang a nih avang chuan Amah fak leh lawmthu hrilh chu kan ti fo tur a ni.

 

Sam 138 chhiar la. Eng ang dinhmuna ding pawh ni ilang, Pathian chunga lawmthu sawi fo tur kan nihzia eng zirlai nge heta tang hian kan lak chhuak theih ang?

 

THAWHLEHNI                                                                               January 14

MILIM CHU, THEN KHATNA

 

Daniela 2:24–30 chhiar la. Hetah hian thil kan hriat reng tur thil pawimawh eng nge Danielan a sawi? (Johana 15:5.)

Tawngtaina chhangin, Pathianin lal mumang leh a hrilh fiahna a tarlansak a. Daniela khan “Van Pathian” hnen atangin thuruk chinfelna a lo thleng tih lal hnena hrilh kha a tim lo. Chu bakah, mumang leh a hrilh fiahna a tarlan dawnah, a hmaa la tarlan loh, lal berin a zan mu thei lo vin thil a ngaihtuah nen lam a sawi chhuah sak a.Chutiang thu bengvar thlak chuan thuchah a sawi tur pawh chu a ti awihawm zual a; a chhan chu lal chauhin a hriat chutiang thu chu chunglam thiltihtheihna atanga chhuak a nih vang a ni. Mumang chu lal Nebukadnezzara tana chanchin lawmawm lam a nih lem loh avangin Daniela tan pawh han sawi kha a timawm deuh thei a ni.

Daniela 2:31–49 chhiar la. Nebukadnezzara lalram awm dan tur eng nge mumangin a tar lan?

 Mumangah chuan milim lianpui, a lu chu “rangkachak, a awm leh a ban tangkarua, a pum leh a malpui dar, a kete thir, a kephah a then thir a then bellei,” (Daniela 2:32, 33, NKJV) hmuh a ni a. Chutah lungin “milim chu a keah a delh a” (Daniela 2:34), a ti kehsawm a, buhsi angin thliin a len bo zo ta vek a. Danielan chung thir chi hrang hrangte chu khawvel hun lo kal zel tura lalram indawt chho zel tur entirna a ni tiin a hrilh fiah a. Nebukadnezzara tan thuchah chua a chiang hle: Babulon chu thiltithei leh ropui tak ni mah se, a la tlawm anga, lalram dangin a la rawn luahlan dawn a, chutiang zel chuan Pathian chatuan lalram a lo din thlengin a inthlak chho zel dawn a ni.

See also  MSS 9: စစ်ဆေးခြင်း၊ ဒုက္ခဆင်းရဲခြင်းနှင့်စာရင်းများ

Mihring thil zawng zawngte daih rei lohzia hi ngaihtuah la. Isua-ah chauh kan neih theih beiseina ropui chungchang eng nge hei hian min zirtir tur ni ang (Johana 6:54; 2 Korin 4:18)?

 

NILAINI                                                                                         January 15

Milim Chu, Then Hnihna

 Milim leh a hrilh fiahna chungchang kha chhiar nawn leh la (Daniela 2:31–49). Pathianin khawvel chanchin lo awm tur a hriat lawkzia chungchang eng nge hei hian min zirtir?

Nebukadnezzara mumangin a tarlan hrilh lawkna hian a tlangpuia hrilh lawkna leh, tlema chiang deuh zawka Daniela 7, 8 leh 11-a hrilh lawknate kan zir dan turah tehfung tangkai a la ni thei dawn a. Chu bakah, Daniela 2 hi hrilh lawkna delhkilh nei a ni lo. Tawpna hun thleng kawk hrilh lawkna: hmalam huna a taka thil lo la thleng tur Pathianin a hmuh lawkzia tarlanna a  ni.

 

  1. A lu rangkachak khan Babulon (B.C.626–539 ) a entir a. Rangkachak tluka Babulon lalram hausakzia han entir thei a awm awm lo Bible chuan ‘rangkachak khawpui’(Isaia 14:4), leh “LALPA kuta  rangkachak no” (Jeremia 51:7; khaikhinpui tur, Thupuan 18:16) tiin a sawi. Hmanlai huna chanchin ziaktu Herodotus khan khawpuia rangkachak tamzia kha a sawi nasa  hle.
  2. A awm leh ban tangkarua khan Media-Persia (B.C.539–331) a entir Tangkarua chu rangkachak ang ema hlu a ni lo angin, Medo-Persian lalram khan Babulon mawina chu a thleng pha ve ngai lo. Chu bakah, tangkarua hi Persia entirna inhmeh tak a nihna chu, an chhiah chawina atana tangkarua an hmang kha a ni.
  3. A pum leh a malpui dar khan Grik (B.C.331–168 ) a entir Ezekiela 27:13 chuan Grik hote kha dar bungbela sumdawng thin angin a sawi a. Grik sipaite pawhin an ralthuama dar an hmang kha an hmingthanpui a ni. An lukhum te, phaw te leh indona-hreipui atan dar an hmang thin. Herodotus chuan Aigupta lal Psammetichus I khan Grik lawng suamhmang mi runtute kha “tuipui atanga lo kal dar hmang mite” tih thlen famkimna angin a ngai hial a ni.
  4. A ke thir khan Rome (B.C.168–A.D. 476) a entir tih a chiang Daniela sawi ang khan, thir chuan Rome Lalram ram lak chakzia entirin, a hma lalram dangte aiin a  ding rei zawk daih bawk a. Thir hmanga he lalram entir hi a inhmeh thlawt a ni.
  1. A ke a then thir, a then bellei hian Europe ram inthen darh (A.D. 476–Krista Lo Kal Leh thleng) a entir a. Thir leh hlum inpawlh hi Rome Lalram lo keh darh ta entirna inhmeh tak a Europe ram zawm khawm leh tuma beihna a awm nual tawh a, chu chu lal chhungkaw inneih pawlhna hmang te leh tun hnaia European Union thlengin a ni; mahse, Pathian lalram din a nih thlenga a awm dan tur sawi lawk ang khan, inthenna leh tanrual theih lohna a awm zel a ni.

 

NINGANI                                                                                        January 16

LUNG CHU

 Chhiar tur: Daniela 2:34, 35, 44, 45. Khawvel awm zel dan tur chungchang eng nge heng changte hian min hrilh?

 Mumangin tarlan a tum ber chu “nakin hnua” (Daniela 2:28) thil lo la thleng turte a ni. Thir leh hlum lalramte chu thiltithei leh hausa takte pawh ni mah se, ‘Lung lalram’ din a nih hmaa lo ding tur lek an ni. Thir leh hlum chu mihringte kut chhuak an nih laiin, mumanga lung erawh kha chu mihring kuta deh ni lo a ni thung. Tawngkam dang chuan, khang lalram dangte kha chu an tawp leh zel mai a, lungin a entir lalram erawh chu chatuanin a ding reng a ni. Lung hi Pathian entirna atan hman a lo ni fo tawh thin a (entir nan, Deut. 32:4; 1 Samuela 2:2, Sam 18: 31), chutiang zelin lung hian Krista (Messia) pawh a entir tho bawk (Sam 118:22; 1 Petera 2:4, 7). Chutiang chuan, Pathian chatuan lalram din entirna atana lung han hman hi a inhmeh hle a  ni.

See also  MSS 4: မီးဖိုတွင်းမှနန်းတော်တွင်းသို့

Mi thenkhat chuan he leia Isua rawngbawl chhung khan ‘lung lalram’ chu din a ni tawh tiin an sawi a; Pathian lalram pawh chuan khawvel pum pui hi awh khat ta vek angin an sawi bawk. Lung lalram a taka a lo din hun tur erawh chu milim hmanga entir anga a ke leh ke zungtang lalram inthen sawmte an tluk vek hnuah chauh a ni dawn si a. Isuan he leia rawng a bawl lai kha, lalram palina, Rome lalram la din lai a ni a, chuvangin a thlen famkimna a ni thei lo tih a chiang mai awm  e.

Lung kha ‘tlang lian takah a chang’ tih a ni a. Chu chu, “milim delhtu lung chu tlang lian takah a lo chang a, lei pum hi a khat ta a” (Daniela 2:35, NKJV) tih kha a ni. Heta tlang tih hian Tempul dinna, Zion Tlang min ngaihtuahtir a. Hei hi Thuthlung Hlui huna Pathian lei lalram kha a ni. Thil ngaihnawm tak chu, tlang atanga lung, tlanga a chang leh ta kha a ni. He tlang, Bible changin a tarlan anga a taka awm tawh hian, a chatuan lalram din tura Krista lo chhuahna hmun, van Zion a kawk a ang hle mai. Van atanga lo chhuk Jerusalem (Thupuan 21:1–22:5) kha, he lalram lo thlen famkimna tur chu a ni dawn a  ni.

Daniela 2-a lalram zawng zawngte kha dik takin an lo thleng famkim zel a. Engati nge a tawpa Pathian chatuan lalram lo thleng tur hrilh lawkna rin pawh chu finthlak leh awm tak a nih? Engati nge hrilh lawkna rin loh hi thil tih awm loh tak a nih?

 

ZIRTAWPNI                                                                                   January 17

NGAIHTUAH ZUI TUR: Daniela 2-a milim kha thir hlu chi, rangkachak leh tangkarua hmanga din a nihna khan ram hausakzia a entir a. Dar leh thir hmanga siam a ni bawk a, khang kha hmanraw chi hrang hrang, ralthuam siam nan te, bungbel siam nante hman niin, chung chu hmanlai khawvela thil ziah nan leh inchhung hmanrua atan hman a ni thin. Chu chuan milim khan mihring nihna leh a thil tihte a entir tih a chiang mai a. Mihring taksa peng hrang indawt zel khan khawvel lalram inthlak chho zel leh tawpna hun thlenga mihring chanchin awm dan tur chu a entir  tih a chiang. Lung erawh kha chu ‘mihring kut chhuak’ a ni ve lo va (Daniela 2:45, NIV), chu chuan chunglam thiltihtheihna hmanga kan khawvel leh mihring kutchhuak zawng zawng chunga tawpna lo la thleng tur chu a entir a ni.

“Mihring mit ngawt kan thlir chuan khawvel chanchin hi lalna leh thuneihna inchuh reng renga buai chho reng angin a lang pawh a ni mai thei e. . . . Daniela chuan heng zawng zawng phenah hian Pathian chu dingin, min rawn thlir a, A mithmuha tha a tih dan ber chu thlentir turin a lo che thin a ni tih min hriat nawntir a ni.”—William Shea, Daniela: A Reader’s Guide [Nampa, ID: Pacific Press, 2005], p. 98.

 

SAWI HO TURTE:

 

  1. Engtin nge khawvela buai leh tawrhna tin reng karah pawh, Pathian chu thuneitu niin ropui taka tawpna a la thlentir dawn tih hriat hi a that? Chu hun a thlen hma loh chuan, khawvel tlu tawha tawrhna thleng tiziaawm tura kan lo tih ve tur chu eng nge ni?

 

  1. Engtin nge anmahni sala man a, an mite chunga chhiatna nasa tak thlentu hnam dang lal chunga rinawm taka Danielan a thawhpui kha kan sawi fiah ang?

 

  1. Kan hmuh tak angin, thenkhat chuan mihr inga kuta deh loh lung kha khawvela chanchin tha puan darhnaangin an bel a. A nih theihna chen pawh a awm ang a, Daniela 2:35 chuan lungin a hmaa hnamte a delh sawmin, “thliin a len bo zo va, hmuh tur pawh a awm lo,” a ti a. Chu chu kraws hnuah chuan a thleng rih lo. Chu bakah, mi thenkhat chuan lung lalram kha kohhranin mihring lalram thuneihna a luahlan ta angin an sawi a. Chu chu khawvel pum pui luah khattu lalram a ni. Chutichuan, Isua lo kal lehnaah chauh mumang hmanga hrilh lawkna hi chu a thleng famkim dawn a ni. Engati nge, Isua lo kal lehna chu tawpna huna lungin a tih tur thlen famkimna hrilh fiahna awmze nei awm chhun a nih?
Tags: ,

Admin

Admin

Top