ZSS 3: Thusim pan Pulaakna ah
Lesson 3: Thusim pan Pulaakna ah
*January 11–17
Sabbath Nitaklam Jan 11
Tukal sung Simding: Daniel. 2:1–16; Acts 17:28; Daniel 2:17–49; Ps. 138; John 15:5, Deut. 32:4; 1 Pet. 2:4.
Kamngah: “Daniel in: ‘Pasian’ min kiphat tawntung tahen; Amah pil in a vanglian hi’ ci in Pasian min a phat hi.” (Daniel 2:20).
Greenland tuikulh kimkotah vukkhal a lian a neu tamlua hi. Aneute munkhat lamah luangleh, a golte peuh lehluan thei hi. Aneute pen huih semnana ah kiniil a, a golte leuleu tuipi tuiluang in niil hi. Tangthu sungah gamte piang a puukkik cihte enleng, tuipitungah tua huih le tuipi tuiluang tawh kibang uh hi. Huih pen, genkholh theihloh na kikheel mengmengte, gentehna mi’ lungsim khawngtawh kibang hi. Tua banah, huihpi le guahpi, a kithuah ciangin, hatzaw thampek in, tuipi tuiluang tawh kibang hi.
Pasian’ ukzawhna le pilna in tuate piangsak hi. EGWhite in, “Aksi te’n ciangtanhsa amau lampi ciatmah a zuihuh bangin, Pasian’ deihna in, nawhlua kaailua cihte omlo hi.” Desire of Ages, p. 32. Gamte piangin a puukkikna pen, mi ngaihsutna, gamvai party te deihna le mi khatpeuh ngongtatna hang hilel napi, Daniel 2 in, tuate khempeuh a hawl a gamtangsak pen, van a Pasian hi cih hong lak hi.
Sunday January 12
Pasian Hong Sung omna
Daniel 2:1–16 simin. Topa’n kumpipa apiak mang hangin, Hebrew te’n bang haksatna thuaklawh uhhiam?
…………………………………………………………………………………………………………………………………………………………………
Tanglai mite in mang thupi laak mahmah uh hi. Mang tawh thu kilakkholh ciangin, siatna lam vive in kila zawpian hi. Tua hang mahin, Nebuchadnezzar zong, patau mahmah napi, thei nawn hiaulo hi. Babylon mipilte’n, a pasiante in hilhthei dingin umuh himah leh, kumpipa’n a mang mangngilh khinta ahih manin, amau hihding omnawnlo hi. A mang sung a muhte genthei le, a khiatna pen kumpipa lungnoptheih nading genthei ding uh hi. Ngeina omlopi khat a hih manin, tua mang a gentheikei uh a, “mihing a hilo, pasiante longal, a genthei ding kuamah omlo hi” (Daniel 2:11) cita uh hi.
Patauh le hehna tawh, Babylon mipil khempeuh thahlup dingin, kumpipa’n thupia ta hi. Hihzah ngongtatna, tanglai in zong omngei nailo hi. Tangthu ciaptehna ah, Darius I in bum le aaitawi peuhmah thatlum a; Xerxes in, lei khat kicimh ahih manin, leibawl engineer teng sihdaan pia hi. Nebuchadnezzar in thupiak a piak laitak pen, Daniel le a pawlte zong sang manlian, kumpi innah nasem ding a kikoih lian hun ahi hi. Tua ahihmanin, tua sihdaan amau inzong thuakkha ding uh hi.
A tangthubu bulpi genna bang hileh, Daniel le a pawlteng thatmasa pen ding hizawsop hi. Daniel zong “pilvang takin” (Dan. 2:14), mithat dingpa Arioch tawh va-kiho hi. Kumpipa’n, a mang le a khiatna gentheih nading hun tawmno a piak ding Daniel in ngen hi. A mipilte’n “hun” leinuam cih theipipi mah, kumpipa’n, Daniel’ nget “hun” piapah lian hi. Bum le aai tawi lel mihing in hih thuthuk muzolo ding cih Daniel in tel mahmah a; Pasian bekmah in tua mang le akhiatna pulaak thei ding cih thei hi.
Theologians te in Pasian “hong sungomna” genzel uh a, piancil laibang a hih nawnloh hangin, Pasian hong nai om mahmah hi. Kumpi Nebuchadnezzar tungah mang a piakna hangin, eite sungah Pasian hong sungom a hihna bangci theihtheih ding ih hi hiam? (Acts 17:28.)
Monday January 13
A Thungetna
Daniel in a lawm thumteng kaikhawm pahlianin thunget hun la ding, Pasian in tua mang hong lakkei zenzen leh lah sihdaan thuak ding cih genpah hi. Thu lian mahmah ih phut ciangin, tua thute a daisakzo dingin ih Pasian liankhop ahihna phawk tawntung ciatni.
Daniel 2:17–23 simin. Bangthu namnih ngen uh hiam?
………………………………………………………………………………………………………………………………………………………………
Thu namnih ngen uh ci hi. Amasa in, tua mang le a khiatna pulaak dingin, Pasian kiangah ngen uh hi (Daniel 2:17-19). A thungetna kammalte ki pulaaklo himah leh, Daniel l a pawlte’n “vantung Pasian in eite honghehpih in, tua thuthukpi genkhia thei in, Babylon gamsung a mipil dangte tawh thahna ih thuakkhawm loh nadingin” (Daniel 2:18) ci in thu a ngen uh hi. A thungetna uh Pasian in sangin, kumpipa’ mang le a khiatna a hilh hi. Eite’n zong, “vantung Pasian’ hehpihna” ngen leng, Daniel’ thungetna a sang Pasian in eite Pasian mah hilai hi.
Pasian in a thungetna uh sang a hihmanin, lungdamkoh biakpiakna bawlpah uh hi. Pilna khempeuh’ bulpi Pasian hi a, piansak nate le gamvai khempeuh ukhi ci in phat uh hi. Pilna hoihmahmah khat ihngahtheih ding omhi. Na tampi Pasian kiangah ih ngenthei zel hi. Ih thungetna hong dawnciangin bang tanvei lungdam ih ko ngei hiam?
Zeisu kiangpan damna ngah miphaak sawmte in, lungdamnamel theilo mite omzia honglak hi. Damna ngah sawm lakpan khatbekmah hong paikik in “Pasian’ min phat” (Luke 17:18) hi. Daniel hih dan in, lungdamkoh biakpiakna bek hilo, Pasian omzia zong hong theitelsaklai hi. Thu ihnget ciangin, ei aading ahoihpen in hong bawlsak khit the, lungdam ihkoh tawntung ding zong kisam hi.
Ps. 138 simin. Hih lungdamkoh thungetna panin, Pasian tungah lungdam theihna ding bangin hong huhthei ding hiam?
Tuesday January 14
Milim, Khen Khatna
Daniel 2:24–30 simin. Eite ciaptehhuai a thupi bangpeuh Daniel in gen hiam? (John 15:5.)
………………………………………………………………………………………………………………………………………………………
Angetna uh dawnna in, Pasian in mang le a khiatna lak hi. Daniel in zong, ziakai lo in, kumpipa kiangah “van Pasian” in thuthukpi hong lak hi ci in genpah hi. Mangthu a gen maa in, kuama phawkkhakloh in, kumpipa alupna tungah ihmu theihetlo cih nangawn pulak hi. Kumpipa bekin a theih ihmut theihloh thu khawng a pulaakkhiat theih ciangin, mihing dinmun tawh hi lo, vangliatna in hih thute pulakkhia cih kumpipa in theikhia hi. Daniel in tua mang a pulak kawmin, Nebuchadnezzar aadingin thuhoih hikhollo ahih ciangin, patau demdamsa mahin gen hi.
Daniel 2:31-49 simin. Nebuchanezzar’ kumpigam mailamthu bang om ci hiam?
………………………………………………………………………………………………………………………………………………………………
A Mang sungah a vanglian milimpi hi in a “lutang khamcitak, awm le khutte ngun, a taailam tau, ngaltaak lamteng sik, a khe sik le buan kihel” (Daniel 2:32, 33) in mu hi. Tua laitakin, suang khat in “milim khe-te dengtan” (Daniel 2:34) a, tua milimpi vutlevai suak in, huihsungah lengmang hi. Sum a dawldawl tawh kibawl milimpi in, adawldawl mahin a piangding kumpite hi a, khat khit khat kilaih suksuk ding cih Daniel in genkhia hi. Kumpi Nebuchadnezzar in Babylon gampi bei in, gamdang khatin laihding a, gamkhat khit khat kilaihlaih khit teh: Pasian’ tawntung gamin kiptakin a dangteng laihmang ding cih hong teltheita hi.
Mihing’ nasepnate in tawmveisung bek ahihzia en in. Tua in, Zeisu bek sungah ihneihtheih lam-etna lian hong koici hilh thei naci hiam? (John 6:54, 2 Cor. 4:18)
Wednesday January15
Milim, Khen Nihna
Mang le a khiatna simpha kik in (Dan. 2:31–49). Pasian in leitung tangthute a theihkholzia hong bangci lak hiam?
………………………………………………………………………………………………………………………………………………………………
Nebuchadnezzar’ mangin, Daniel 7, 8 le 11 sung tengah om genkholhnate teltheih nadingin a cialcial in honglak hi. Daniel 2na pen, a piang tawmtawm thute hilo zaw hi. Hun nunung thu, hong piangding thute Pasian in mukhol a hong pulaak hizaw hi.
- Kham- Lutang in Babylon hipah (626- 539 BC) hi. Kham lobuang sumdangte in Babylon hauhna le ukzawhna lim pua theilo hi. Laisiangtho in “Kham Khuapi” (Isa. 14:4) na ci a, “Topa khut sungah khamhai khat” (Jer. 51:7 le Rev. 18:16) saikak in. Tangthu pupi Herodotus in Kham a vumliangna khuapi naci liang hi.
- Ngun- Awm le Khutte in Media-Persiagam hi (539–331 b.c.). Ngun in kham sangin man tawmzaw ahihmah bangin, Medo-persia gamin Babylon hauhna le hoihna baanzo ngeilo hi. Tua banah, Persiate in phiangsiah piakna ah ngun bekmah zang uh ahih manun, ngun tawh lim kipuasak hi.
- Tau- Taai/Gil in Greecete hi (331–168 b.c.). Ezekiel 27:13ah, Greek mite limlim tau summeet bawl hi ci hi. Greek galkapte zongin taugaldal silhin minthang uh hi. A lukhuh, a lumte, a heite tau-ngo kihel ci hi. Egypt mi Psammetichus I in, Greek tuipi-misuamte a-zawhgawp lai in, a kigenkholsa a picin nadingin “tuipi sung pan tau-mite hong kahto” in mu hi ci in Herodotus in gen hi.
- Sik-Ngal in Rome (168 b.c.–a.d. 476) hi. Sik-ngal in Rome lim hi a, sik in suksiat a hat mahmah Rome kumpi limpua a, kumpi dangte sangin sawt omzaw lailai hi, ci in Daniel in gen hi.
- Sik-Buan Khe in a kikhenkhamh Europe hi a(ad 476–Zeisu hong kumkik) hi pah hi. Sik le buan kihel cihpen, Rome kumpi kikhenkhap khit ciang thupiang ding ahi hi. Mi tampi takte in, Europe gawmkik nading, kumpi innkuante kiteenna tawh hanciamden mahleh, hih genkholhna in, Pasian’ tawntung gam hong piandong ki khenkhamsa mahin om paisuak ding ci hi.
Thursday January 16
Tua Suangtum
Daniel 2:34, 35, 44, 45 simin. Leitung mailam thuding bang hong hilhkholh hiam?
…………………………………………………………………………………………………………………………………………………………………
Tua mang mungtup pi in, “hun nunung” a piangding thute ahi hi (Dan. 2:28). Bang zahta hau in thahat mahleh, sik le buan gamte in, hong piang ding suang-gam maitaaite vive hilel uh hi. Sik lh buante pen, mihing bawltawmte vive hi mahleh, suang bel mi khut khoihkhak hetloh in, hong piang hi. Tomgen leng, gam masa khempeuh beisiang in, suang-gamin kip tawntung ding hi. Tua suang in, Pasian limpua (gentehna Deut. 32:4; 1 Sam. 2:2; Ps. 18:31) a, Messiah (Ps. 118:22; 1 Peter 2:4, 7) lim zong pua hi. Pasian’ tawntung gam pen, nadang peuhmah tawh ki limpuasak theilo hi.
Pawlkhat in, suang-gam pen, Zeisu in leitung a om sungin phutzo hi; a lungdamthu in, leitungbup kizeel a, Pasian’ gam kiphutzo hi, ci uh hi. Tua suang-gam in, gam 4 teng puukkhit, gam khenkhap hun, khe-peek hun khitciang hipan hi. Zeisu leitung a om hun in, Rome kumpi hun sung hi a, gam 4na hipan hi.
Tua suangin mualpi suak ci hi. “Tua suangtum hong khangkhang a, mualcia pha in, leitung khempeuh a dim hi” (Dan. 2:35) ci hi. Mual cih teh, Laisiangtho Lui hunlai in Pasian biakinnpi dinna Zion mual hong phawksak hi. Mual panin a ki lakhia suang in mual suakkik cih lungngai in. Hih mualbel a omsa mual mah hi a, vantung Zion mual hi in, vangtung biak innpi, Khazih in a tawntung gam a phuh na’ng mun hi. Vantung pan hong tuaksuk ding acih Jerusalem (Rev. 21:1–22:5) in, hih genkholhna tangtungsak ding hi.
Daniel 2 in gam khempeuh hong pulaak khinzo hi. Hong piang ding gam nunung genkholhnate muanding bangzah in thupi hiam? Banghangin tua genkholh nate uploh ding baih mahmah hiam?
Friday January 17
Ngaihsutbeh Ding: Daniel 2 sung a milimpi pen kham le ngun tawh kibawl hi a, hauhna tawh kipaaikaan hi. Tau le sik zong galhiamte le um-le-beel bawlna in tanglai in zang uh hi. Tua a hih manin, milimpi in, mihingte nasepna lakkhiatna ahi hi. A tumdang diakin a limpuak ahi, leitung kumpi gamte khat khit khat kilaih suksukin, hun nunung ciangin kilemlohna omding cihthu ahi hi. Tua suang tumdangna pen “kuama lawnlohpi” (Daniel 2:45) a cihteh mihing tha hatna a hilo khat in, mihing nasepsa khempeuh a tawpna tungsak ding cihna ahi hi. “Mihing mit tawh muhtheihloh in, vanglian khatpen langdona vanglian khatmah tawh kido gige hi. Tuate khempeuh’ nungah, Pasian om gige a, en gige in, Ama’ hoihsakpen in tua kidona makaih gige hi” William H. Shea, Daniel: A Reader’s Guide (Nampa, ID: Pacific Press, 2005], p. 98.
Kikup Ding Dotnate:
- Leitung haksatna thuaknate khempeuh lakah, Pasian in nasem gige in, nakhempeuh minthanna tawh thukhup ding cih theih ding bangzah in thupi nasa hiam? Tuani a tun masiah, thuaksiatnate khempeuh a nuamtuamsak thei dingin, nang bang nasem thei ding hiam?
- Daniel le a pawlte in, a mipihte a suksiatsak milimbia makaite tawh kinaitak le thumaan takin nasemkhawm thei cih koici telgen theih ding na hi hiam?
- Mi pawlkhat in kuama lawnlohpi suangpen lungdamnathu leitungbup a kizelhna hi acihuh ihtheikhin hi. A hihtheihlohna hangthu tampi lakah, Daniel 2:35 ah, suangtum in milim khepeek a deenciangin, gammasa teng khempeuh kitamzan in, “huihin leenmang khinin, kimu nawnlo” ci hi. Singlamteh khitzawh tuathu piang nailo hi. Pawlkhat leuleu in, suang in pawlpi hi ci uhi. Suang-gam in mihing ukna khempeuh luahding cihthu phawk khalo uh hi. Leitung buppi a huam ukzawhna ahi hi. Tua hi a, Zeisu hong kumkikna bekmah in hih mang tangtungsak ding hi. Banghangin, Zeisu hong kumkikna in, hun nunung a hih suangin milim khe-peek a deenna hithei ding hiam?