SC 6: Upna leh Saanna

Steps to Christ by Ellen G White in Zokam, Zolai, Zopau, Tedim, Chin, Myanmar.
Christ Kiang Zuatna Chapter 6 UPNA LEH SAANNA Ellen G White
 
Kha Siangtho in na lungsim hong khanlawhsak ciangin, mawhna a siat huaina, a hatna, a gau le a gim huainate na mu-a, kihna tawh na en hi. Mawhna in Pasian tawh hong kikhen sak a, siatna khut nuai ah kol-awk nahih lam na kiphawk hi. Na suahtakna ding na hanciam ciangin, na cihmawh lam na kiphawk semsem hi. Na ngaihsutnate siangtho lo-a, na lungsim nin hi. Na nuntakna huaihamna le mawhna tawh kidim ahih lam na mu hi. Mawhna hong kimaisak ding, hong kisil siang ding le hong kisuahtak sak ding na ut hi. Pasian tawh kilem a, Amah tawh kibatna – na ngahna dingin na hih theih bang om hiam?
 
Na kitangsap pen khamuanna hi-a, Vantung pan a mawh maisakna, khamuanna le itna ahi hi. Tua pen sum in lei thei lo, pilna in zong piang sak thei lo, ciimna in zong cin zo lo hi; nangma hanciamna tawh ngah zawh dinga lamet ding hi lo hi. Ahi zongin Pasian in tua pen, “sum piak kul lo, man piak kul lo-in,” a khawnkhongin hong pia hi (Isaiah 55:1). Na khut zan khia-a na san leh tua in nang a’ ding hipah lel hi. Topa in, “Na mawhnate sandup abang zongin, vuk bangin a ngo ding hi; san-au bangin asan zongin tuu-mul abang ding hi,” “Lungtang thak kong pia dinga, na sung lamah lungsim thak ka guang ding hi,” ci hi (Isaiah 1:18; Ezekiel 36:26).
 
Na mawhnate thuum in, na lung sung panin na paai khia hi. Nang mahmah Pasian a kipia dingin na khensat hi. Tu-in Amah zuan in la, na mawhnate hong maisak a, lungtang thak ahong guan dingin ngen in. Hong khapsa mah bangin Ama’n hong pia hi ci-in um in. Pasian’ hong (50) kamciam thupha ih ngah hi ci-a ih up takpi leh a ngah takpi ih hihi, ci-in, leitung ah a om lai-in Jesu in hong hilh hi. Ama hihtheihna a um mite, Jesu in a natna uh damsak hi; amuh theih uh nate panin amaute huh hi; tua bangin amuh theih loh uh nate tawh kisai-in Ama tungah muanna nei sakin, mawhnate mai sak thei ahihna um sak hi. Pum zaw pa a dam sakna ah hih thu tel takin hong gen hi: “Mihing Tapa in leitung ah mawh maisak-theihna nei ahih lam na theihna ding un, ci-in (pum zaw pa’ kiangah Amah in), Tho in la, na delhphah la-in na inn ah ciah in,” ci hi (Matthew 9:6). Tua mah bangin Jesu’ na lamdang bawlte agenna ah thuhilh sia John in, “Jesu in Pasian’ Tapa Christ hi, cih na up theihna ding uh leh, tua na upna uh hangin Ama min tawh nuntakna na ngah theihna dingun, hih thute a kigelh ahi hi,” ci hi (John 20:31).
 
Jesu in cina a damsak dan Lai Siangtho in a gennate panin, mawhnate hong maisak dingin Amah ih up dan ding thu pawl khat ih thei hi. Bethsaida bual gei a pumzaw pa’ thu ngaihsun kik dih ni. Amah cimawh mahmah hi; akhut akhe azat theih loh kum sawmthum leh kum giat pha ta hi. Tua kim lai Jesu in, “Tho in la, na delhphah la-in lam pai in,” ci hi. “Topa aw, kei nong dam sak ding leh na cih bangin sem mah ning,” ci leh kilawm hi. Ahi zongin ci lo hi, Christ’ kammal um hi; adam mah in kingaihsun pah hi; hong kisa pah hi, lam pai thei nuam in, hong pai pah takpi hi. Christ’ cih bangin hong ta-a, Pasian in hihtheihna pia hi. Amah dam ta hi.
 
(51) Tua mah bangin nang zong mi mawh khat nahi hi. Na mawhna sate na maisak thei kei hi; na lungtang na khel thei kei a, nang le nang na kisiangthosak thei kei hi. Ahi zongin tuate khempeuh Christ tungtawn a hong hihsak dingin Pasian in kamciam hong pia hi. Tua kamciam na um hi. Na mawhnate thuumin, nang mahmah Pasian na ki-ap hi. Amah biak ding na ut hi. Tua bang liana na hih takpi leh Pasian in a kamciam hong tung sak ding hi. Tua kamciam um in, na mawhna hong kimai sakin hong kisiangtho sak hi, ci-a na up leh, na up bangin Pasian in hong piang sak ding hi; pumzaw pa in, dam ing, ci-a a ki-up cianga Christ in lam pai theihna apiak bang lianin, nang zong a siangtho nahi ta hi. Na up banga a piang ahi hi.
 
Hong kisiangthosak ahih lam na phawk dong ngak kei in; “Ka um hi, ka upna bangin piang hi, ka phawkna hang hi lo hi. Pasian’ hong cihna bang hizaw hi,” ci in. 
 
Jesu in, “Na deih peuhpeuh uh, na nget uh ciangin, ngah hi hang ci-in um un, tua hileh na ngah ding uh hi,” ci hi (Mark 11:24). Hih kamciam atangtun nading thu khat om hi: Pasian’ deihna tawh kituak in ngen ding, ci hi. Pasian in mawhna panin eite hong siangtho sak nuam hi, A tate hong suakta sak nuam hi; nuntak siangtho hong nungta sak nuam hi. Hih thuphate ih nget ding ahi hi, ngah ih hih lam zong ih um ding hi, ngah ih hih manin Pasian’ tungah lung damna ih ko ding hi. Jesu’ kiang zuan a sianthona ih ngah ding, mai zumna le kisuan-taakna om lo-a thukham mai-ah ih din ding, eite hamphatna ahi hi. “Tua ahih ciangin tu-in Jesu Christ sungah om a, ci-le-sa’ deihna zui loin, Kha Siangtho’ deihna azui mite tungah mawhsakna a om kei hi.” (Romans 8:1). 
 
Tua hun a kipan na pumpi nang a’ hi nawn lo hi; manh tawh kileisa nahi hi. “Ngun le kham banga a kisia thei nate tawh note hong kitanh ahi kei hi;… kawkbanna le meel-hemna (52) a om lo tuuno tawh kibang Christ’ sisan manpha tawh hong kitan hi.” (1 Peter 1:18, 19). Hih banga abaih ziau Pasian upna panin, Kha Siangtho in na lung sungah nuntakna thak hong piang sak hi. Pasian’ innkuan sungah asuak na hi ta-a, A Tapa a it bangin Pasian in nang hong it hi. 
 
Tu-in nang mahmah Jesu na kipia khin ta hi. Nung kik kei in. Ama kiang panin kihem khia nawn kei in. Ni simin, “Christ’ neihsa kahi hi; Amah ka ki-ap zo hi,” ci in. A Kha hong piakna ding le A hehpihna tawh ahong kepna ding Ama kiang ngen in. Nang mahmah Pasian na kipiakna le Amah na upna tawh Ama ta asuak nahih mah bangin Ama sungah na nuntak ding ahi hi. Sawltak Paul in, “Note in Topa Jesu Christ na saan uh mah bangin, Ama sungah nungta un,” ci hi (Colossians 2:6). 
 
Sittelna sungah om lai ih hih manin, Ama thuphate ih nget ma-in, kipuah pha ih hih lam Topa’ tungah ih lah phot kul hi, ci-in mi kim khat in ngaihsun uh hi. Tu mahmah in zong Pasian’ thupha kingen thei hi. A thanemnate uh ahuh dingin Pasian’ hehpihna ahi Christ’ Kha aneih ding uh kisam hi, tua lo-in amaute in siatna a nang zo kei ding uh hi. Ih hi bang lian mah in, mawhna adim, acimawh, apawl ngaipi mahin Amah ih zuat ding Jesu in hong deih hi. Ih zawngkhalna, ih haina, ih mawhna khempeuh tawh pai-in, kisikna tawh Ama khe phung ah ih bok ding hi. Hong itna ang lum ah eite ahong kawi ding, ih liamnate ahong damsak ding le ih kihhuaina khempeuh pan a ahong sil siang ding pen Ama vanglianpi ahi hi. 
 
Hih mun ah mi tampi khial uh hi; Jesu in a mimal ciat a amawhna uh maisak ding cih um lo uh hi. Pasian’ kammal ahi bangin sang lo uh hi. Mawhna a kici khempeuh a maisak dingin mawh-maina a khawnkhong in kipia ahih lam mi khempeuh in atheih ding uh pen hamphatna lianpi ahi hi. Pasian’ kamciamte, nang a’ ding na sak khak lohna lungsim paai khia in. Tuate (53) a kisik mawh nei khempeuh a’ ding ahi hi. A um mi khempeuh kiangah vantung mite in a puak dingin thahatna le hehpihna Christ tungtawn in kivaihawm zo hi. Amaute a’ dinga a si pa – Jesu’ sunga om hatna, sianthona le diknate a ngah zo lo ding zahin a mawh lua kuamah om lo hi. Mawhna tawh anin gawp a puante uh suah khiat sak a, dikna puan paak asilh sak dingin Jesu in amaute ngak hi; si lo-a a nungta dingin amaute sam hi. 
 
Mihing khat le khat ih kibawl bangin Pasian in eite hong bawl lo hi. Ama ngaihsutnate pen hehpihna, itna le khualna vive ahi hi. Tua hi-a, “Mi gilo in ama lampi nusia hen la, adik lo mi in ama ngaihsutnate nusia ta hen. Topa’ lamah Amah kileh kik hen; Topa in amah a hehpih ding hi. Ih Pasian’ lamah kileh kik hen; Amah in a maisak kikeuh ding hi.” “Na thu palsatnate meii vom bangin ka nil khia-a, na mawhnate meii ngo bangin ka seem khia hi,” ci hi (Isaiah 55:7; 44:22). 
 
“Mite a sihna ah nopsakna ka nei kei hi, Topa Pasian in ci hi; tua ahih ciangin kihei kik un la, nungta un.” (Ezekel 18:32). Pasian’ kamciamte hong sut khia dingin Satan kiging sa-in om hi. Amah in lametna nitang le lung sung khuavak khempeuh la khia nuam hi; ahi zongin tua banga hong hih ding phal peuh mah kei in. Khem thei pa’ thu ngai ke’n la, “Ka nuntak theihna dingin Jesu si zo hi. Ama’n kei hong it a, ka siat cip ding hong deih lo hi. Ahong don Pa khat vantung ah ka nei hi; Ama hong itna neu seh kha-in, a hong piak thuphate ka mawkna sak kha ahi zongin, ding khia-in ka Pa’ kiangah ka pai dinga, ‘Vantung le Nangma mai-ah ka mawh zo hi; Na tapa cih dingin zong ka kilawm nawn kei hi; Na thacialte khat bang lel hong hi sak in,’ ka ci ding hi,” ci in. A vak-thapte a kisaan kik dan ding a tangthu in hong gen hi: “Amah gamla pi (54) ah a om lai-in, a pa in mu-a, hehpih ahih manin va delh a, a ngawng ah kawi-in a nam hi.” (Luka 15:18-20). 
 
Hih tangthu nangawn zong lungsim hong sukha mahmah ahih hangin, vantunga om ih Pa’ hong itna hong gen khia khin zo nai lo hi. Topa in, “Tawntung itna tawh nang kong it hi; tua ahih man in itna takpi tawh nang kong kai hi,” ci-in A kamsangpa hong gen sak hi (Jeremiah 31:3). Mawh nei pa a Pa’ inn pana gamla pi a om lai mahin, gam dang ah a neihsa teng a mawk bei sak hi napi, a Pa in amah ngai hi; Pasian’ lama ciah kik nopna lungsim ahong suak khempeuh pen Pa’ hong itna lungtang lamah Kha Siangtho in a vak thapte a hong zolna, a hong heelna le a hong sapna ahi hi. 
 
Na mai-ah Lai Siangtho pan a kamciam tampi tak om hi napi-in, up lahna nei lailai ding na hi hiam? Mawh nei mi khat hong ciah kik nop a, amawhnate a nusiat nop ciangin, kisikna tawh Ama khe phung azuan dingin Topa in amah nolh bekbak ding hi, ci-in um thei hiam? Tua bang ngaihsutnate paai khia in! Vantung a om ih Pa’ thu, tua banga ngaihsutna sangin na kha a susia thei zaw na dang om lo hi. Amah in mawhna mudah hi, ahi zongin mawh neite it in, a um khempeuh in gupna ngah a, vanglian gam sungah tawntung thupha angah theihna dingun, Christ’ pumpi sungah Amah hong kipia hi. Pasian in eite hong itna, kammal sanga ahoih apha zaw kammal om thei nawn ding ahi hiam? “Numei in anawi ane naungek mangngilh thei-in, a sul pan a piang ata hehpih lo-in om thei ding ahi hiam? Hihi, amaute in mangngilh thei kha ding uh hi, a hi zongin Ke’n note kong mangngilh kei ding hi,” hong ci hi (Isaiah 49:15). 
 
Up lahna le patauhna tawh a om mi aw, khuadak in; ei a’ ding ahong thuumsak (55) dingin Jesu nungta hi. A Tapa a hong piak manin Pasian’ tungah lungdam ko in la, nang’a dinga a mawkna-a asi ahih lohna dingin thu ngen in. Tu ni-in Kha Siangtho in nang hong sam hi. Na lungsim khempeuh tawh Amah zuan in; A thupha na ngah ding hi.
 
Pasian’ kamciamte na sim ciangin, gen zawh loh itna le hehpihna hong kilah khiatna ahih lam phawk in. Mawh neite’ lamah a bei thei lo hehpihna tawh Pasian’ hong itna lungtang hong pai hi. “Ama sisan hangin mawh maisakna ahi tatkhiatna eite in ih ngah hi” (Ephesians 1:7). Hi hi, Pasian pen nang hong huh pa hi, ci-in um in. Mihing’ sungah Ama zia-le-tong hong guang kik nuam hi. Kisikkikna le thuumna tawh akiang na naih leh mawh maisakna tawh nang’ kiang Ama’n hong nai ding hi.
xxXxx
See also  SC 3: Kisik-kikna
Tags: ,

Admin

Admin

Top