ZSL 13: Upna Sungah Kal Khat

Zomi Ssabbath School Lesson 13: Upna Sungah Kal Khat, Zokam, Zolai, Zopau, Tedim, Chin, Myanmar, Laisiangtho, Lai Siangtho, Hilhna, Sinna

 

LESSON 13                                                       *September 19–25

 

UPNA SUNGAH KAL KHAT

 

SABBATH NITAKLAM                                     September 19 

 

TUKALSUNG SIMDING: Fil. 2:5–11; Mate 4:18–20; Sawl. 9:3–6, 10–20; John 21:15–19; 1  John 3:16–18.

 

KAMNGAH: “Zeisu Khazih lungsim puakzia na nei un: Pasian pianzia nei napi in, Pasian tawh a kizakim theih nadingin, thatang hatthu asuang kei hi. Amah kiniamkhiat tawmzaw a, nasemlim a hongpua hi. Mihing bangin amah hong kibawl a, mihing teekteek mah ahong sun hi.” (Filippi 2:5–7).

 

Vantung vangliatna ahi, vanmite’ biakpiakna, Pa tawh kikholhkhopna cihte nutsiatna in ngaihsut zawhloh kipiakkhiatna ahi hi.Pasian’ itna lakding leh leimi khempeuh tankik dingin, gimna thuak liangin leitungah hong tuaksuk hi. “Pasian’ tokhom maiah gupngahte i din theih masiah gupkhiatna manzah i telzo nai kei ding hi. Minthang tawntung innpi vangliatna i muh ciangin, Zeisu in hih teng khempeuh nusia zen maw i ci ding hi. Vantung pan hawlkhiat bangbek hi lo in, ei adingin supna manthannate hong thuaksak hi. Ama’ khe phungah kham lukhu khiasuk in, “A kigo Tuuno in vangliatna le hauhna, pilna le thahatna, pahtawina, minthanna le phatna a ngah dingin kilawm hi” (Rev. 5:12) aci uhhi. —Ellen G. White, The Desire of Ages, p. 131.

Zeisu hong gupna in tehpih ding omlo hi. Ama makaihna zui in, a thupiak mangin, ama’ gam sung om ding mite i zon ciangin, kipiakkhiat kul hi. Eite kipiakna leh Ama’ hong kipiakna in tehpih theih hi lo mahleh, kha gupkhiatna pen, upna sungah kalkhat hibek hi. Masuan nei mello i omna panin hong lakhia hi. Kipiakkhiat ding zong hong ngenphial mah taleh hong piak ding nopna in lianzaw kanlai hi.

 

SUNDAY                                                                      September 20

KIPIAKKHIAT ZAHDONG ZEISU’ ITNA

 

Sawltak Paul in Zeisu’ lungsim bang “neih ding” hong hanthawn hi. Tua in dotna tawmkha omsak hi. Zeisu lungsim koibang hi hiam? Ama ngaihsutna koibang hiam? A lungsimthuk koibang hiam?

Filippi 2:5–11 simin. Zeisu lungsim leh ama’ nuntakzia koibang hi cihiam?

 

 

Khang tawntungin Zeisu in Pasian tawh kikim hi. Paul in “Pasian pianzia nei napi in, Pasian tawh a kizakim theih nadingin, thatang hatthu asuang kei hi (Fil. 2:6). Pianzia a cih pen Greek pau in morphe hi. Nakhat peuh ie bulpi cihna hi. A kikim na nih kizomsak hi. The SDA Bible Commentary sungah: “Khazih pen Pa tawh kikim in koih a, vanglian dangte tungsiah pekah omsak hi. Paul in, kiniamkhiatna tawh Khazih hong kipiakna a pulak nuam ahi hi.”—Volume 7, p. 154. Ama’ tawntung pianzia a pulakna ah Ellen G. White in, “Khazih’ nuntakna in a bulpi hi a, kawmtawm hi lo, bul dang neilo” ci hi.”—The Desire of Ages, p. 530.

Khangtawntungin Zeisu in Pasian tawh kikim hi napi,  “Amah  kiliantawm   saklo”  hi.  Greek kammal tawh lungluthuai sem hi. “Hawmsak” zong kici thei hi. Pasian’ zia a neih khempeuh nusia in mihing bangin kiniamkhiat tawm in “Amah kihawmtawm sak” hi. Sila hikawmin, vantung’ itna thukham pulak a, singlamteh tungah a sangpen itna hong lak hi. Eite tawntung nuntak nadingin a nuntakna hong kipia hi.

Zeisu lungsim sungah kipiakkhiat dong itna om hi. Zeisu nungzuihna pen, amah bangin itna, ama sep bangin sepna, ahi hi. kihawmsak dingin A Khasiangtho tungtawnin Zeisu kipia lecin piakkkhiatna hong om ding hi. Zeisu ading na khempeuh piakkhiat kul hi. Laisiangtho in zong “Hih thu hangin Pasianin alianpen in amah koih a, min lian dang khempeuh sangin, min lianzaw in a koih hi”(Fil. 2:9). Vantung ahihleh leitungah i piakkhiat khempeuh tawh kiman lel hi. Piakkhiat om zelzel mahleh, nopna in leekzaw den lel hi. Tua tawntung nopsakna in Khazih tawh maang khawm tawntung ding hi’ng a, hih lei ah i piakkhiatte in gen taaklo luazaw hi.

Khazih adingin na pumpi na sihsak nunungpen bang hun hiam? Na Christian khualzinna in koi bangin hong dawngsak hiam?

 

MONDAY                                                                    September 21

KI-AAP DING TONA

 

Nang Peter leh John in ki ngaihsun in. Galilee gam zingsang nisuak tung in zan huihvot teng hawlkhia khin hi. Ngaihsut khatbek na nei a: nga tampi man ding. Nga manpha mahmah in, mailam ah zong manpha lai ding. Zing nisuak tungin Nazareth khuami Zeisu hong pai na mu hi. Na nundan kikhel ding cih thei peuhmah nailo? Na ngei na bang ngeinawn peuhmah kei ding hi.

Mate 4:18–20 simin. Peter le John in Khazih nungzuih ding banghangin khentat uh ahi tam? Zeisu in ngabeng sangin a sangzaw bang ngiimna khat adingin sam hiam?

 

 

John lungdamthu panin, hihte in abeisa kum khat valdeuh khawng pan kipan Zeisu thei uh a, ki-aap nailo bek hihtuak uh hi. Tat le heek, kampau tawh a zolna zong om tuak mah hi. A gunkuang uh leh a phual uh nusia liangin Zeisu’ nung a zuih uh pen, sapna lianpi cih a theihman uh ahi hi. Hih ngabeng lelte in, ngiimna lianpi khat adingin amau kisam cih phawkuh hi. Pasian in na siamnate nusia liang dingin hong samlo a, ngeina khengval ngiimna khat ading hong sam hi a, hong itna gen sawn ding leh ama minthanna dingin a thuman tecipang ding hong sam hi.

Siahdongpa Mate a kisapna ngaihsunin, Matthew 9:9 simin. A ciaptehhuai bangthu namu hiam?

 

 

Rome gam siahdong peuhmah in kumpi aana tawh lauthawngsakin mipi nengniam mahmah uh hi. Israel lakah zong muhdahpen leh kihpen a thuakpawl ahi uh hi. Khazih sapna ah “Hongzui in” ciziau a, Mate in Zeisu’ thu theikholkhin a, zuinuam giauguau ahihna kidawk hi. Sapna a ngah phet leh, a kigingsa hipah hi. Khazih in a nungzui dingin a saantheih lamdang saluazaw hi. I lungsim tawngah a sangzaw lunggulhna i neiden hi. A manpha khatpeuh, a lianzaw, a sangzaw a dingin nungta nuamtek hihang. Mate mahbangin, Khazih in anungzui dingin hong sam hi.

Zeisu nungzui dinga   kipiakhiate ngaihsun  in. Atawpna ah mawksuaklo ding naci ngam hiam?

 

TUESDAY                                                                     September 22

PAUL: PASIAN TEELSA BEEL

 

Paul in Khazih a saanphet in, a nuntakzia kikheel siang hi. Khazih in masuan thak pia hi. Ama’ nopsakna mun pan lakhia in, ama ngaihsut khakloh thute phu dingin paipih hi. Khasiangtho in makaih in, Mediteranian tuipi kiim teng ah Pasian’ kammal tangko hi. Ama’ tecipanna   in Christian pawlpi leh leitung’ tangthu lumletzo  hi.

Sawl. 9:3–6, 10–20 simin. Hihte panin Zeisu in, Paul nuntakna ah ngiimna sangmah mah nei ahihna koici pulak hiam?

 

 

Zeisu in, mi’ deihloh penpente khawng ama’ teci dingin teel ziauzizau hi. Dawiveipa, numei ginalo, Samaria numeinu, siahdongpa, Galilee ngabengte leh, Christian a bawlsia galgilo penpa cihte ngaihsun in. Ama’ itna in tuate khempeuh kikheelsak in, amau ading Khazih bawlsaksa thute tecipang dingin paikhiasak zen hi. Tua tangthu gen cim theilo uh hi. Alamdang Khazih sepsaksate hawmsawn uh hi. Omkhong theilo uhhi.

Sawltak 28:28–31 leh 2 Timothy 4:5–8 simkak in. Paul in kha gupkhiatna’ng nasepna ah ama kipiakna tungah lunghiang hetlo ahihna hihmunte in bang gen hiam?

 

 

Ama’ hun nunung lamin, Rome ah kiman in a om sungin, Paul in “Gentile mite tungah Pasian hotkhiatna thu kigen ta dinga, maute in za ding uh hi”(Sawl. 28:28) ci hi. Amah’n ahawh khempeuh saang a Pasian’ thu genpih hi (Sawl. 28:30, 31). Anunung lam ciangin, na semzom ding Timothy sawl a, amah bel “Kidemna ah ka hattawp in ka tai khin a, upna thu kho takin lenin ka zo khin hi” ci hi (2 Tim. 4:7). Paul banglian in hong kisapkhak loh hang, Pasian in leitung lumlet dingin eite hong sam gige hi. Akum akumin a thuak haksatna khempeuh kawmkal pan (2 Cor. 11:25–30), Topa sapna sung mahah thuman tite hi. Zeisu’ nungzuite a bawlsia penpa in, Christian’ upna sungah a kipkho penpa leh Topa ading kipia nuamte ading etteh takcing penpa hong suak hi.

Pasian in bang dingin nang hong sam hiam? Na hih beek hiam?

 

WEDNESDAY                                                  September 23

ITNA IN HONG SAWLTE

 

Itna peuhmah gamtatna ah kilang hi. Khazih’ itna in amangthangte adingin seploh phamawh sak hi. Paul in Corinth pawlpi tungah “Khazih’ itna in kote’ nuntakna hong uk hi” (2 Cor. 5:14) ci hi. Christian biakna limlim gup ngah nading asia khempeuh nutsiat bek tawh kicinglo hi. Zeisu in vantungah “a sia” peuh nusialo a, a hoih khempeuh nusia zaw hi. Zeisu in i hunte, siamnate, neihsa cihte hong ngen bek hilo a; i nuntakna mahmah hong ngen hi. Zingsang khat, Galilee bualtui geiah nungzuite tawh a kimuhkhopna vuah, Pasian’ itna in sawl ahihna gen  hi.

John 21:15–19 simin. Zeisu in Peter kiangah bang dotna thumvei dong a, Peter in koici dawn hiam? Banghangin Zeisu in hih dotna khat thumveivei dong hiam?

 

 

Peter in a Topa thumvei nial ahih manin, itna a lohkik na’ng Peter kamteek tawh thumvei dawngkik sak hi. Nungzuite mai ah, Zeisu in Peter’ mawhna maisak a, amah ngiat puahpha in, mailamah na lianpi semsak lai ding hi.

John 21:15–19 simkik lecin, tutung ciang bel, Peter in ama itna a gen ciangin Zeisu in koici dawnkik hiam? Bang hihdingin Zeisu in sawl hiam?

 

 

Pasian’ itna in nungta hi. Itna taktak cih pen lungnopsak ciang hibeklo a, kipiakna kul hi. Itna in hong gamtangsak hi. Amangthang Pasian’ tate omna khempeuh hong phasak hi. Zeisu in Peter kiangah “Ka tuunote vaakin” acih teh, thupiakna leh lungnopsakna ahi hi. Topa in it thuk ding deih hi. Peter in a zumhuai mahmah in, Zeisu a kimat ding ciangin, kisamsiatna tawh a Topa nial himah taleh, Zeisu in, amah masuan lianpi khat neisak lai nuam hi. Cihnopna in, tat le hek tawh na Topa nialkha ci ni. Lungdamthu panin, hehpihna om veve lai a, Pasianin hong paai pahlo hi. Na ut nakleh, Ama’ ading nang sep theih om veve lai ding hi.

 

Peter bangin Topa “na nial” ngei hiam? Na nial ngei leh, nang’ tangthu e leh, Peter a bek hi lo, Peter tungah Khazih kammalte in nang bang hong gen hiam?

 

THURSDAY                                                                  September 24

ITNA HANGA KIPIAKNA

 

Peter le Zeisu’ kihona a tawp lamah, mi nih tuigei ah lampai uh hi. Tuihual in tuinawl a sat kawm, Zeisu in nungzui cih pen kipiakpian kul cih gen hi. Zeisu’ sapna a saan nakleh, a masuan in “Ka tuute vakin” cih theisak nuam hi.

John 21:18, 19 simin. Zeisu in, ama nungzui i hihleh bang kipiak kul cihiam? Zeisu in Peter lauhthawn pian nasa hiam? Banghang maw?

Khatvei teitei Peter in galhangsihna tawh si ding cih genkhol nuam hi. Singlamteh tungah a khut zankha ding hi. Hihtengah Peter in a deihteel dingin Zeisu in sawl hi. Lungnopna lianpen kamciam a: Pasian’ gam adingin kha tampi hotkhiatna hi. Penticost ni-in mi a tulsim in Khazih hong zuat mu ding hi. Nalamdang pipite Zeisu’ min tawh lak dinga, mi tulsimte’ maiah Zeisu pahtawi ding hi. Khazih tawh kikholhna hangin tawntung nopsakna ngah ding hi.

Ahih hangin manpiak hun hong tung ding hi. Kipumpiakna hiding hi. Tua kipiakna pen Peter mit-hak gega sa mahin kingen mai hi. Tu in Peter in Zeisu’ nungzuihna sang a lianzaw kipiakna om nawnlo hi cih theikhia ta hi. 

1 John 3:16–18 simin. John in itna kician mellote, koibangin gen hiam? Kipumpiak itna koibangin hilhcian hiam?

 

 

Khangtawntungin ei’ sepkhiatte in kipiakkhiatna cin zolo hi. I hunzat dan, i nuntakziate pen ngah dinga kilawmlo zah in thupha ngah hi hang. Itna in a gamtat ciang, bangzah in nuam a, lawpna in kipiakna piang sak hi. Pasian’ itna peuhmah siit neilo in itthuk leng, mite leh Khazih kikal palaite i suak a, lungnopna sangpen i ngah ding hi. Zeisu in “Hih thu thei in na zuih uh leh na lung uh nuam mahmah ding hi” (John 13:17) ci hi. I nuntakzia tawh Pasian i pahtawi a, ama itna leh thuman midang i hopsawn ciangin lungnopna sangpen leh lungdamna kingah hi. 

Khangtawntung cih thu telhak veve a, ei theih ciang pen themcik hilel hi. Himahleh na hih theihzah in ngaihsun lecin, a hoih tawntung nuntakna- leitung nuntakna sang hoihzaw tham –hih leitungah hun tomno bek i neih sungin Zeisu sungah kamciam ahi tawntung nuntakna mansuah leng e? 

 

FRIDAY                                                                        September 25

NGAIHSUTBEH DING: “Kha lamah khuamu zawdeuhte in, pawlpi mite Pasian’ na a septheih nading dan vaihawmpih tawntung ding kisam hi. Abeisa hunin ki-awlmawh khalo hi. Siamna neite in asepkhop theih nadingin, ngiimna kician kibawlsak mello hi. Tua hangin mi bangzah mangthangkhin cih zong a phawk tawm mahmah hi.”

“Pasian’ nasem makaite, mipil vive hi uh a, masuan ding geelna nei sitset ding hi. A geelna vuah pawlpi mite leh veng le paamin a septheih dinguh munte limtakin etsak in geelta uh hen. Pawlpimi numei pasal kikhenlo in, siate le upate tawh ki lungtuak takin a sepkhop keingal leh, Pasian’ nasep kizo thei ngeilo ding hi.”

“Mawhneite hotkhiat nadingin, lungsim tak tawh sep ding kisam hi. Nuntakna thu amau kiangah i hilh dinga, amau hong pai ding i ngak kei ding uh hi. Mihingte’ lungsim a khanglo sakthei dingin kampau thei nuam si’ng maw! I hun tawmlua ta hi. Leitung beikuan among ah i omta hi. Hun mawk beisak ke’n. Hun in kham hi a, eima angsung khualna lel dingin paamaih lua hi. Kua in Pasian zong taktak a, ama nasem dingin, ama kiang pan mahin thala ding hiam?”

“Pawlpi simin siamna neitek uh a, mun maan takin semsak peuhleng, i mavang tuam mahmah ding hi. I pawlpi i phuhna dingin, siamna nei nasem pilte, siamna khangto sak dingin i kisam mahmah hi. Tuate pen Topa zatdingin kihilhpil thei ding hi”—Ellen G. White, Testimonies for the Church, vol. 9, pp. 116, 117.

 

KIKUPDING DOTNATE:

 

1. Atung a EGWhite kammal i deihna bulpi bang a hiam? Na mimal teci panna leh pawlpi nasepna ah hong koici huzaap thei diam?

2. Itna diktak i cih koibang hiam? Itna khem e leh koibangte hiam?

3. Topa a dingin a nuntakna nangawn a pia ngam mite’ thu kikum dih un. Bang pilna ih ngahthei ding hiam?

4. Sunday ni dotna nunung ahi Khazih ading na kipiakna tawh kisai bangci dawn na hiam, ngaihsun kik in. Kipiakhia takpi na hiam?Bangci sep na hiam? Kituak (worth) na sa hiam? Thu-umlo khat   kiang koici hilhcian thei ding na hiam? 

 

See also  Nasemte Kipawlna
Tags: ,

Admin

Admin

Top