VAN THAKTE LEH LEI THAK

VAN THAKTE LEH LEI THAK
Tatkhiatte teen nading mun

Van thak leh lei thak pen tatkhiatna ngahte teen nading mun hi ci-in Laisiangtho in li vei bang hong gen hi. Pasian in nitawp ni cianga ding hong kamciamna thu Isaiah in hibangin tomkimcingin hong gen hi, “En un, a thak vante leh lei thak khat ka piangsak ding hi. A masa nate kiphawk nawn lo-in lungsimin zong a kingaihsun kha kei ding hi.” (Isaiah 65:17; 66:22). Leitungah khatveivei ciangin lungdam lua, ahihkeh nasa lua cih dan tuamtuam ih phut khak ciangin mangngilh ngei kei ning kici kha thei hi, van thak leh lei thak ih luah hun ciangin mangngilh ngei kei ning ih cihte nangawn akiphawk kha ding bang hilo hi bangzah in nuam ding hiam? Paul in, “Amah a itte adingin Pasian bawlkholhsate mitin mu ngei nai lo, bilin za ngei nai lo, lungsimin ngaihsun ngei nai lo” (1 Corinthians 2:9) acih mah bangin mihing lungsim tawh geel zawh batloh, kam tawh kisuut siam ding bang ahilo, deihna teng kimna ding mun van thak leh lei thak hi-a tua munah “thumaanna aomna mun van thakte leh lei thak ngakin ih om hi,” ci-in Peter in lungmuanna hong guan hi (2 Peter 3:10). Abraham in zong alemet mihing khut tawh kibawl hilo Pasian lamh ngiat khuapi ahi hi (Hebrews 11:10).

Tua muna tengte in “ka cina” ci ngeilo ding (Isaiah 33:24). Sihna zong om nonlo dinga, “Pasian in khitui khempeuh hong nulsak ding hi” (Isaiah 25:8). Tua mun pen “Lungmuangtaka tenna mun, inn muanhuai leh bangmah in nawngkaisak lo-a, khawlna munah Ka mite a teng ding uh hi,” Topa in ci hi (Isaiah 32:18). Zechariah in Pasian pen amau Kumpipa hi dinga thumaanna tawh uk ding hi ci hi (Zechariah 14:16). Tua kumpi gam pen Babylon kumpipa mangmat Daniel in akhiatna agen milimpi adengzaan suangtumpi ahi akip tawntung ding Pasian kumpi gam ahi hi (Daniel 2:44).

Tua Pasian kumpi gam mailamah ah ih luah nading mun pen tu mahmah in zong kingah thei hi ci-in Zeisu in hibangin hong gen hi, “Pasian kumpi gam note sungah aom hi” ci hi (Luke 17:20, 21). Tua kumpi gam hong pian meng nadingin “Na gam hong piang tahen” ci-in thu na ngen un ci-in Topa thungetna ah Zeisu in hong gen hi. Vangliatna leh minthanna tawh Zeisu hong kumkik ciangin Pasian kumpi gam hong piang ding hi (Matthew 16:28).

See also  Thuman Mite Upna tawh Nungta

Zeisu hong kumkik ciangin Amah tawh vantungah atawntung ih mang ding hiam? Mang lo ding, vantungah kum 1000 sung bek ki-om dinga hih leitung (lei thak) ah atawntungin Amah tawh ih teengkhawm ding hi. Mi pawlkhatte up bangin ih taksa tawh hilo, ih kha bek tawh tawntung kimaang ding hilo-in hih ih taksa pumpi Zeisu hong kumkik ciangin mitphiat kal sungin asi theilo pumpi-in kikhel dinga ih pumpi mahmah tawh akimang khawm ding ahi hi (1 Corinthians 15:52). Kum tul kum then apai zongin, TV or internet te aom kei zongin Lei Thak ah kuamah kicim manlo dinga mun thak tuamtuamte ah na thak tampi kisin ding hi.

Amial Ngeilo Khuapi
Lei Thak ii khuapi ahi Jerusalem Thak pen ahoih mahmah mun hi ding hi (Mangmuhna 21:9-22:5).
• Khuapi kulh leh a bulpite suang manpha namkim tawh kibawl.
• Kongpite kep manpha tawh kibawl.
• Lampite kham tawh kibawl kham kongzing hidinga maan(mirror) ih et mah bangin pailet in kimu ding hi.
• Pasian’ vang in nak tan mahmah ding ahih manin mial ngeilo ding hi.
• Khuapi sungah asiang mahmah “nuntakna gun tui” luang ding hi.
• Nuntakna sungkung in kha simin gah hong gah den ding hi.
Atawntungin Jerusalam Thak bek ah ki-omlo dinga leitung bupah mundang tuamtuamah zong hunnuam kizong kawikawi ding hi.

Kinatsakna Omlohna Mun
Kuamah in liangvai in kivei lo dinga, akipampaih, aki-itlo ci bang Lei Thak ah omlo dinga dikna leh migitna te tawh mi khat leh khat kidon ding bek thamlo-in vantungmi mak zalom tampite tawh ih kikhawlkhawm dinga nisim phialin lawm thak leh mun thak tuamtuamah ih kikhawlkhawm ding hi. Tua munah tulaitak-a vantung tung khinsa Enoch, Elijah, leh Moses te zong om ding hi! (Piancialna 5:24; Matthew 17:2). Abraham, Isaac, leh Jacob te zong om ding hi cih kician hi (Matthew 8:11). Hih atung khinsate hangin eite zong upna sungah ih cihtak nakleh van thakte leh lei thak ih luah takpi ding hi cih kimuanna ih nei hi.

Lei Thak ah Adam leh Eve te in mawhna abawlma uh tawh kibang dinga na khempeuh kicinna tawh kidim ding hi, ganhingte khat leh khat or mihingte khat leh khat or ganhingte’n mihing, mihingte’n ganhing kinasak cih bang omlo ding hi (Isaiah 11:6-9; 65:25). Ih pumpi thak zong cidam sinsen-in atawntungin thadim ding ci hi (1 Corinthians 15:42, 43), ih khuakte zong ciim zawtham laipek ding hi. Eite in na thak tampi ih sin dinga, sin theilo, sin khalo, kingahlo cih bang omlo-in mihing pianzia, piansakna thu tampi sinin athak nono tampi ih mukhia ding hi. Alungkim huai penpen in Lei Thak ah Pasian tawh maitang kimu-in ih kiho ding hi (Mangmuhna 22:4) tua munah eite hong it mahmah ih Pa Pasian, Zeisu, leh Khasiangtho tawh maitang kimu-in hunnuam kicingtakin ih zang khawm ding hi. Ngaihsun dihin Sabbath biakpiakna hun simin mi khempeuh Pasian’ hehpihna tokhom kiangah hong kikaikhawm ding cileng (Isaiah 66:23) Pasian tokhom kiim nai-ah ih tut nop leh ih paibaih kul kha ding mate! Pasian in alungdam mahmah leh nuam ih sak mahmah ding hong deih ahih cianga vantungah alian mahmah pahtaak man hong pia ding hilai ahih manin van thak leh lei thak ah bangzah in nuam ding ahi hiam? (Matthew 5:12). Leitunga Satan piak theih lungnopna, kipaknate leh nopsaknate tawh tehkak theih loh ding Moses ii mitsuan Pasian pahtaakna eite in zong ih mitsuan ding kisam hi (Hebrews 11: 24-26). Pasian pahtaak man ih ngah ding kal ih ngak sungin hih leitungah ih thuak haksatnate tawmkhakal sung bek hi dinga, Pasian tawh ih minthan khop ciangin atawntung hiding hi (2 Corinthians 4:17, 18) bangzah takin nuam ding hiam!

See also  Pilna Thupitna

Tualai munah lungtang at siavuan cihte FBI thukansim cihte om nonlo dinga, ahih hangin mi kimin sep ding nasep ih nei ciat ding hi. Pasian mite in tualai munah Pasian’ gam uk nasep kisem ding hi (Matthew 25:21; Mangmuhna 22:5). Pasian hong piak kivakna leh siamna te tawh na ih sem dinga, hih leitunga ih kivak ih siamna te sangin a hoih zaw alian zaw thampekin ih sem ding hi. Adam leh Eve te in Eden huanah nasep aneih uh mah bangin eite in zong sep ding ciat ih nei ding hi bang nasep hi dingin na up hiam? Pasian in gamlapi aom aksi lomte hong uksak ding hiam, kuamah in ih thei nai kei hi. Bangbang nasep ih ngah zongin Pasian hong piak nasep in nakpi takin nuam mahmah lel ding hi! Adang nasep leh uk tuamtuam zong Lei Thak ah nei kha ding hi hang: innlam, lokhawh, huan bawl, music tum (Isaiah 65:21; Piancialna 2:15; Mangmuhna 14:3; 15:2) cih atuamtuamte om ding hi cih ih thei hi, bangzah in nuam ding ahihiam! Hih thute pen a hong piang takpi ding thu ahi hi “Kumpi tokhom tunga tupa in, “Na khempeuh athakin ka bawl hi!” ci hi. Tua ciangin amah in, “Hih thute muan takin thumaan ahi manin gelh in,” hong ci hi.” (Mangmuhna 21:5).

Mawhna akici limlim anengno nangawn akipan mawhnei khempeuh hell meikuang tawh akisuksiat khitciangin ih teenna ding mun pen anak hoih mahmah in Pasian in “van thak leh lei thak” (Mangmuhna 21:1) Adam leh Eve te adinga ahoih mahmah abawl mah bangin pauban omlo, kitasam omlo, akicing tawntung teen nading mun bawl thak ding hi (Matthew 5:5). Alamdang mahmah khat lai-ah tua munah Pasian in a kumpitokhom—vantung phualpi pan—leitungah hong tuah ding hi (Mangmuhna 22:3). Tua munah akiphiatsiang ding aomlo ding khat om hi tua in mawhna ahi hi. Lei Thak ah na khempeuhte hih tua-a leitung ngeina tawh kibang nonlo ding ci hi (Mangmuhna 21:4)—bangzahin lungdam huai hiam! Tua munah ahoihlo aom nonlo dingte: mawhna, ze-etna, sihna, dahna, nasakna, cinatna cihte bei mang ding hi ci-in John in (Mangmuhna 21:4) na ah hong gen hi; ahizongin mawhna hanga aom abeilo ding thu khat om-a tua in eite mawhna hanga Zeisu thuakna ii limmapawn manglo-in om tawntung ding hi (John 20:25-27). Tua mun bang tawh kibang ding cih akicingin Pasian in hong gen loh hangin eite in ahiding dan tawm ih ngaihsun thei hi. Pasian in a kumpi gam hong phut takpi ding hi, lawpin na kigingta hiam? Pasian tawh adik kizopna lunggulh bel leh zon belin nei-in thungetna leh a Kammalte simna tawh hun tampi na zangta hiam? Van thakte leh lei thak aluah dingin Topa in asim mimal thupha hong pia hen.

See also  From Optimism to Hope
Tags:

Admin

Admin

Top