Lesson 13                                             December 19-25

VANTUNG, PILNA, LEH TAWNTUNG SINNA

           

SABBATH NITAKLAM             December 19

Tuaklsung Simding:  John 3:16; 1 John 5:13; 1 Tim. 1:16; 1 Cor. 13:12; Zech. 13:6.

Kamngah: “Kuamah in a muhngeiloh, a zakngeiloh, piangthei dingin zong a ngaihsutloh uh thupen, Pasian in amah a it mite adingin, a bawlkholhsaksa ahi hi.” (1 Cor. 2:9)          

            Laphuakpa in, sihding patau in, zing khuavak, sihna, lungziinna cihte koipen in han galkhat panin hong ngak hiam cih la in phuak hi. A laphuak sungah “Nungciang ading Kiginkholhna Sangpi” cih zong omsak hi. Mailam ah bang piangding cihzong theihmeel lohpi in, mailam a ding koici kiging thei ding hiam?

            Kamphatna tawh, Laisiangtho in, vantungthu, leithakthu leh tawntung hunciangin nuntakzia ding kisinzia ding cihte hongpia gai hi. Tu quarter buppi sungpanin tua Kiginkholhna Sangpi pen hih leitung hipah a, i pilna sinna khempeuh tawh “mailam” a dingin kiging dending hihang.

            Sang khatpeuhpeuh in thuhoih tampimah leh, zatpah theihding tatzia tampi mah hongpia thei ding hi.Mikhatin tua pilna khempeuh neikhin mahtaleh tawntung nunna taanleh bang phatuam peuhmah ding hiam?

*Tukal sung tengin, khang tawntunga kihongden ding sangpi ah i sin tawntung ding thute i entel ding hi. Hongpai ding tua sangpi tunciangin, hih leitungah i ngaihsut batlohthu tampi takte i sin i mu i teltaktak ding hi.           

 

SUNDAY                                                 December 20

Misite Omzia                                   

            Kum AD 1600 lai in Piancit laikungpu Blaise Pascal in mihing omzia ngaihsun phapha hi. A muhtel mahmah khat: mi khat kum bangtanvei a nungta zongin, a nuntak sung ahoih mahmah ta zongin, khatvei teiiteii amah silel ding hi lel hi.

            Tua banah, sihkhit ciang bangbang piangtaleh, sihkhit ciang hun sauzaw thampek hi napi, sihma in hun tomno khatsung kinungta masa sese hi. Tua hi a, Pascal adingin, misite mailamah bangin ngak hiam cih muhkhiat kul a, tua kawmkal ah mi tampi in “nasep taan lawh liangin, minsiat lawhliang in nasem” gawp uh ahihhang, a sihkhit uhteh bangthu piangding cih peuhmah ngaihsun kha keiilo uhhi.

            Pascal in thukhat mu hi. Tua pen, Laisiangtho in tamveipi a gengen, Zeisu hong hotkhiatna kamciam, amau’ mailam panin a ngak gige kamciam hipah lel hi.

            Anuai a munte simin. Bang lam-etna hongpia hiam? John 6:54; John 3:16; 1 John 5:13; 1 Tim. 1:16; John 4:14; John 6:40; Jude 1:21; Titus 3:7.

            Tawntung nuntakna in Singlamteh sungah vangnei a: Singlamteh sungah bangmah dangin vangnei theilo a, tawntung nunna bekin neithei hi. Vannuai a bawlpa in “leitung bawl” (Heb. 1:2) a, “Pasian hangin eite piangin, hingin i gamtang” (Acts 17:28), ahih manin, Pasian in mihing’ sung ah hong sunglut a, tua cilehsa in hong si ding a . . . bangding in maw? Eite lamgei khawngah silel in muatgawp ding maw?

            Tuahangin, Laisiangtho thak pen tawntung nuntakna tawh kizeem a, na khempeuh  a neipipa kiangah ki aapkik ding cih kamciam omhi. Kum awn tultampite in a kisiasate khempeuh puahphat nading in kicing zolo ding uhhi. Tawntung hun bekmah in tuate khaikhin thei ding a, ciangtanh hun sangin ciangtanhloh hun lianzaw a, cikmah hunin kiciangtanh loding hi.      

            Pascal dik hi: hong pai ding huntawh etkak ciangin i hunte kiciangtanhlua hi. Hong ngak gige tawntung hun a ding a kiginglo peuhmah – haidaan.

            Sihkhit ciangin thupiang dingte a lum aletin a genthei khat kiangah nabangcih hiam? Tuabang a thutel mello khat koici in huhthei ding nahi hiam?

 

MONDAY                                                     December 21

Thaksuahna

            “Amaute mit panin khitui khempeuh nulsak ding hi. Thuluisate maiming khinta ahih manin, sihna, dahna leh nasa a kahna cihte om nawnlo ding hi” (Revelation 21:4). Hih i leitung leh leitungthak in bangzah in kilamdang ding ci hiam, sihna, dahna leh nasakna om nawnlo hiven?

____________________________________________________________________

____________________________________________________________________

            Christian khatin a lawmkhat kiangah, Zeisu tungtawnin lungdamthu lam-etna leh tawntung nuntakna pulak hi. Tua pa in bel thalnial pahhi. “Nungta tawntung maw?” Patau liangin, “kum 70, 80 zong haksalua khinzo hiven; tua hun haksa pite kua’n sausak lailai nuam ding ci nahia? Hell hipeuh” cihi. Hihpa in ngaihsutkhat bel nei ding a, ahihhang tawntung nuntak kamciampen hih leitung nuntak a kizomsuak lel ding a hihlohlam telcianlo hiding hi. Tua dan kua ut peuhmah ding? Atung a Laisiangtho munte in alui na khempeuh  beimangkhin zo a, na khempeuh  a thaksuak khin hi ci hi.

            Anuai a munte in hongpai ding i omna munthak ding koici gen hiam?

2 Pet. 3:10–13 _____________________________________________________

Revelation 21:16 _______________________________________________________

            Eite a ding a thupipen dotna in hibang hi: Hih mun thakah om theih na’ng bang kisam hiam? Koici tuntheih ding? Tua mun tawh kisai i hihna koici theih ding?

 

TUESDAY                                                           December 22

 Thei Nading Hi

            “Vantung in sangkhat hi a; thukisinna munin vannuai hi a; a siapa in Pasian ahi hi. Tua sangkee pen Eden ah hong hi; hotkhiatna ngiimna zong kipicing sakzo a, pil sinna zong Eden huansung mahah kihong ding hi.”—Ellen G. White, Education, p. 301.

            Midangte nabatleh bel nadotding tamlua ding hi. Mawhnavai, thuakna, cinatna, sihna cihte banghang piang cihkhawng dong kawikawi nuam ding hiteh. Leitung’thu mahmah zong thu thukpi dotding tam mahmah lelhi. A uphuai hetlo thuthuk tampite science tungtawnin kitelthei ta a hih hangbatphakloh zong tampi takmah omveve lai hi.

            Leitung a niampenna pan van a sangpen dong, a tangthei a neupen khatpan kipan, van awng thawlsung a kikhung a lianpen vuklamte dong, eite ngaihsut zawhna in a phakzawhloh a lianzaw a thukzaw tampi takte, hih leitungah hun tomno sungbek i sinkhathei hi. Tualai tawntung hun i tun ciangin, thuthu tampitakte i theikhiana ding hi.

            Anuai a munte in i nunsung i sinkhak dahna mawhna thuakna leh sihna cihte beisiang ding cih koibangin gen hiam?

1 Cor. 13:12 ____________________________________________

1 Cor. 4:5 _________________________________________________          

            Tu laitakin eite’ ading akiseel khinkhian thuthukte, khatvei ciang ih thei nading cih kamciam omhi. Tu in a haksa mahmah thute tua niciangin telna ding cih lam-etna lianpi ahihmanin, Pasian phat ding lobuang a dang omlo hi. Tu’n i hihtheih dingpen upnatawh lenkip, Pasian’kamciamte muangngiungeu, i sansa khuavak nuntakpih in a tawpdong kipkho ding hihang. A lungdamhuai thu in “Khazih hongpiak vangliatna tawh na khempeuh  hihthei” (Phil. 4:13) cihi.

            Na lungsim sungah bang dotna gik a omhiam? Ngaihsut haksalua nasak bangpeuh om hiam?

 

WEDNESDAY                                                     December 23

Mailam Hong Om Ding Sang

            “Tuhun laitakin tomno sung lungkhamna kathuakte uh in kathuakna uh sangin nakpi  takin a lianzaw tawntung minthanna sung hong tunpih ding hi. Banghanghiam cihleh, a kimuthei nate mitsuan kahikei uh a, a kimutheilonate mitsuan kahi uhhi.” (2 Cor. 4:17–19). Hih munte in bang lam-etna hongguan naci hiam? Zeisu tungtawnin hong kamciamsa tawntungna bangteng khawng in hong ngak gige hihtuak hiam? Revelation 21:1, 2; Revelation 2:7; Revelation 7:14–17.

            Zeisu tungtawnin kamciam tampitak leh thuhoih tampitak mah hong kipia ahih teii hangin i maiah hong ngakte vai tawmcik bekmah kidawksak kiukiau hi. A kitheitel penpen khatbel, tualai ah mawhna omnawn vetlo a hihmanin, nuntakna in thupi mahmah ding cih ahi hi. 

            Na i saknate, thuaknate, mawhna hangin kitom a hanciam keiikuite, tuate khempeuh hong paihkhiat siangsak dingin Zeisu hong pai hi a, leitung mahmah zong, Pasian in a bawlcillai mawhna lutmaa lai a bang lianin thaksuaksak kik ding hi. A hoihzaw in puahpha khinzo hi. Tua a lamdang thutampite kawmkal ah, Zeisu’ hong hotkhiatna hangin, Ama’khutte tungleh a khete tungah meima pawnte i mu tawntung thei ding hi.       

            “Eite muhna hong mialsak kidalna pen hong hepkhiatsak ding a, leitung’ hoihna, tuhunin microscope tawh i etliangte, tua ni ciangin i mit guaktangin i muthei ding hi. Tu hunin telescope i cih a gamla etna tawh i etliangte pen, mawhna’ guu hong kihepkhiatsak khit ciangin, leitung buppi ah ‘Topa Pasian’ hoihna’ vive hiding a, i pilna sin dingte hi tawntung ding hi. Science sangnaupang in piansakna tangthute simsuk ding a, kisiatna’ guu khatzong om nawnlo cihthu thei ding hi. Piansak na khempeuh sungpan awgingte a ngaih ciangin, dahna tawh thuumna awging omnawnlo tahi. A zai mahmah vannuai ah, piansaksate khempeuh sungah, laimal golpi tawh Pasian’ min kigelha, leitung, vantung leh tuipiite sungah natna kici peuhmah omnawnlo hi”—EGWhite, Education, p. 303.

            Tu leitungah nuntak haksa mahmah tawh a kibang nawnlo, leitungthakah tending nuntak ding daan geelsuk dih in. Na koici muh hiam? Na lamet khatpeuh a omkha hiam?

 

THURSDAY                                                        December 24

Sia Lianpa           

            Tu quarter buppi sung i muhna ah, Khazih in leitungah Siapa khatin nasem cihthu ahi hi. A nasep kipatphetin, tatleh heekna khempeuhah, Ama’ thu, Pa’ thu, gupna’ thu leh i maiah hong ngak gige thute hilh tawntung hi. (Matt. 5:2; Mark 4:2; Luke 19:47; John 6:59).

            Lungdamthu khatpeuh simpak lecin, Zeisu’ thuhilhna na simkha pahding hi. Tu mahmah in zong, a thutungtawn in. leitungthak hong tungding cihthu hong hilh kinken hi. Ngaihsut ding khat panin, hih leitungah mawhna in vangikpi hong suanh gawp a, na khempeuh  kiciangtanhlua mahmah cihtawh tehkaak lecin kibatloh daan.

            “Mi khatpeuhin ‘Na awm a na liammaate bang ahi hiam?’ ci in a dot ciangin, ‘Ka lawmte’ innah a liam ka hihi” (Zech. 13:6) ciding hi. Bang gennuam a’i tam?

            “Tawntung hunte a paipai kawmin, Pasian leh Khazih minthanna kimu zel ding hi. Pilna a khan mahbangin, itna, zahtakna leh lungnopna khanghanhan ding hi. Pasian’ thu tam sin semsem leh, Ama’ omzia zahtakhuai semsem ding hi. Zeisu in, Satan tawh a kidona lianpi lakah hotkhiatna tangthu hongin a lahkhiat takciangin, gup ngahte’ lungsimah a lianpen ki aapna neinuam semsem in, a khamgawsemte ngaihsemsem in tum dinguh a; a tultul a thenthen mipite in lungsim kipumkhatin phatna lapi sazuaizuai ding uhhi.”

            “Kidona lianpi vengta hi. Mawhna leh mawhnei omnawnlo hi. Vannuai buppi siangtho sinsen hi. Piansak khempeuh in lungsim kipumkhatin lungdam mahmahta uhhi. Na khempeuh a bawlpa kiang panin nuntakna, khuavak leh lungdamna ciangtanh omhetlo in hong luangsuk hi. A neupen na khatpan a golpen leitung, a gamtangthei, a gamtang theilonate khempeuh in, amau hoihna ciat uh tawh, Pasian in itna ahihlam tangko ding uhhi.”—EGWhite, Kidona Lianpi, p. 678.

            I kisin ding thumanthutak khempeuh lakah, eite aiawh in Zeisu hong kipiakna lobuang i lungsim honghuupzo dang omlo hi. Tawntung hunsung khempeuh i sinciangin bangzahin thuk in kicing ding cih nangaihsun ngei maw? Tumahmahin, Zeisu in singlamteh tungah hong hihsaksate koibangin natelphasem theiding hiam?

 

FRIDAY                                    December 25

Ngaihsutbeh Ding: EGWhite, Education, laimai 301-309 “The School of the Hereafter,” Kidona Lianpi, laimai 662-678 “The Controversy Ended” simin.

            “Ih kihtak mahmah humpineelkaite tuuno tawh lumkhawm in, tua lei thakah kilemna tawh kidim ding hi. Leithak singkungte in maam zeza in sang mahmah a, kisiatna themzong baanglo ding hi.”

            “Hih leitunglui innhoih i cihte in; leithak limlang gun leh lono hingsilsial, a huangdiaidiai singkungte leh nuntakna tuinak, a taang khuapi leh puanpaaksilh lasa mite, leitung innte in a dem zawhloh, kuamah’n a ngaihsut zawhloh, kamtawh zong a genzawhloh van-innpi, hong phawksak hi. Gupngahte’ inn na lungsimin geeldih lecin, a hoihpen dingin na geelzah sangin nakpi takin hoih zawthampek lai ding hi.”—Ellen G. White, Heaven, pp. 133, 134.

            “Mailamthu ding lungkhamluatna in, i innpi tungtang thuman thutakte panin Khalam hong lampialsak zawsop hi. Khazih in A Pa’ inn sungah omna ding bawlkhol ding hi’ng ci in nungzuite kamciam pia hi. Pasian’ kammal a sangtheite in vantungah inn a omthu awlmawh ding uhhi. Adik thuman mite’ thaman pen, mihing’ kammal in cinzolo hi. A mukha tebekmahin telding uhhi.A min thang Pasian’ Paradise pen kuamah in lungsimin geelzolo hi.” EGWhite, Kidona Lianpi, laimai 674, 675.

 

Kikupding Dotnate:

1. Pascal thugente ngaihsun kik dih inla, tawntung a ding lunggulhna a nei mello mihingte e. Banghangin mihingte in tuabang hithei hiam? Banghang tuabang lungsim neithei aitam maw?
2. Tawntung nuntakna in, i upna thubulpi cih ngaihsun inla, tua omkeileh banghangin guaksuak-thei ding i hi hiam?
3. I leitungah thuthuk tampitakte ngaihsun in. Biology, geology, astronomy, physics, chemistry–na khempeuh kigawmkhawm ahih manin mipilte ngaihsut zahsangin buai huai ziazuazaw hi. Scientistte in “aneupen nuntakna” zong, neuhetlo ahihmanin gen in nei senawnlo uhhi. A piangthak khat peuh, muhthak khatpeuh a omkhakleh dotna tampitak hong piang pahzel zaw hi. Tuate hangin “Nungciang a saang” thute i telzawk na’ngin hong bangci huhthei ding hiam?