VOKSA NEKNA TAWH VANGAM A KITAN DIAM?

~Pu Tong Seal

(1) So, whether you eat or drink, or whatever you do, do all to the glory of God. 1 Cor. 10:31
“Bangbang nane nadawn, na sem zong in, Pasian pah tawi nang in, sem in” cih kamal pen- mi tampi te’n zangh khial zel hi. Zeisu/Pasian phalo pipi, ne ding, dawn ding hi leng- Pasian min pahtawi kihi nawnlo aa, Pasian melsia kisuak ta hi.

(2) Voksa, Zusa… saniin aa minpiang te neeklo ding ci na pi, tua te neek teiteei na tawh Pasian a melsia kisuak ta, Pasian a pahtawi lo kisuak ta. Aneek ding ciang, thu ngen in nephial ta leng, Pasian in hong paakta khol lo ding hi. Adam le Eve te’n, Tua sing gah, neeklo ding thei ven, a neekma in thu ngen peuh leh – Pasian in aphal pah dia? Neeklo ding, a kikham pen, khamlo singah asuak pah dia?

(3) Hehpihna sung life style- cih pen, Zeisu i upciang, ut bangbang in gamtat theihna licence a ki ngah maw leh?

(4) Saniin sa siang pen, Leitung mihing khempeuh aa ding hi. Israel mite aa ding bek hi lo hi. Israel minam apian ma, Noah hun lai pek in, sa niin sa siang a kikhen sa hi. Israel minam a om ma pek ahi, Noah hun in, sa siangte kop 7 tembaw sung kilut sak hi. Noah te innkuan in, tuipi liim hun sung a neek ding zongh hi thei in teh kici hi. Adam leh Eve hun ah zongh Pasian in, Saniin Sasiang khenkhin thei ding hi. Bang hanghiam cih leh Adam mawh khit teh, gan gawh biakna kipan ta, tuno ki go ta. Savun puan kisilh sak ta. Biblical scholar te genciang in, a sa te zongh Adam & Eve te’n ne thei kha ding kici hi.

(5) LST sung i sim ciang, Moses leh Israel mi te neeklo ding bek, kum 40 hun sung bek a kikham cihna mun khat zongh om lo hi. Tua dan upna, san dan pen, ei leitungmi te deihkaih sandan hi bek hi. Pasian in, saniin khempeuh siangtho sak khinta cih peuh mah LST sung ah kimu lo. Pasian in phalna pia kik nai lo. Tu dong mah in, a niin hi suak lai hi.

(6) Pasian ii niin acih te, Sia Suanpi in bel- ama thu in, siang hi, na ut ut in ne un ci hi ven. Pasian kamal zui zaw ding maw? Mihing kamal ahi, Sia Suanpi kamal zui zaw ding maw.

(7) Tu bekin, hehpihna khutnuai hi lo hi. Mihing mawh ma pek in hehpihna kong a kihong ta hi. (the lamb that was slain before the foundation of the world), LST lui sung zongh hehpihna om aa, LST thak sung zongh hehpihna om hi. Tua hehpihna ei mihing te’n i zat khial ding hi lo hi. Tua hehpihna pen, ut bangbang in gamtattheihna licence khawng i sak khak ding lau huai mahmah hi.

Zeisu um peuh leng, gum khiatna a ngah sa hi ing, ut bang bang ka ta zongh in, gupkhiatna ngah veve ding hing cih pen, Pianthakna hi lo in, Piansualna tak tak khat hi. Pastor tampi te’n hi bang in, thu hilh hilh lai uh hi.

Pu Tong Seal