Bang hun in Topa Jesu hong suak hiam?

Christ in the Manger - When Was Christ Born |Zomi SDA

Banghun in Topa Jesu hong suak hiam? 

Peter Suumpi


Bang hun in Topa Jesu hong suak hiam? Ih bawl ngeina ahi December 25 ni aa hong suak himah ding hiam?

Hih thu tawh kisai in mi tampi te in ih tel ding kisam hi. Topa Jesu hong suah kum, hong suahni cih tawh kisai in akician in a-omlohna hang hitaleh, updan sandan kibat lohna tuamtuam tampi tuni dong in ihmu thei ding hi.

Leitung mun tuamtuam aa om Christian atam zaw in Christmas pen December 25 ni in kibawl hi. Ahizong in nisuahna lam Pawlpi te in Topa Jesu ii suahni pen January 6 ni in abawl zong om hi. Hibang aa akibatlohna ahang bang ahi hiam? Topa Jesu ii suahni taktak pen bang ni tawh kituak mah hiam? Athu in ih thei nuam tek hi. Hi mah leh Christmas pawi hong kibawlna ahang ii zungpi tawm bang ih thei kim tek sa ahi hi.

AD kum zalom 4 hun akipan Christian te in Christmas pawi kibawl hi. AD 389 kum in Valentinianus ii hawm khiat hun-awng ciaptehna lai hawm sazian sung ah nipi te leh Easter nite bek kigelh hi. Tua hun lai in Christmas kibawl nailo cihna ahi hi. Christian te in Christmas pawi ih bawl theih nading un hunlekaal tampi bei hi cih ummawh hetlo in ih mu thei ding hi. Hih bang ahihna pen ahang thu nih na om hi.

Atung lam in Pawlpi in Topa Jesu ii gimthuakna, sihna le hong thawhkikna zah in Topa Jesu ii suahni pen thupit bawl lo hi. Topa Jesu ii gimthuakna, sihna le hong thawhkikna te thupit bawl zaw in nungzuipi te tung pan kam vaikhak thu bulpi in na kinei suksuk zaw uh hicih pen kilang mahmah hi.

A kigelh masa pen thuciam thak Laisiangtho in zong hih thu hong lak hi. Akigelh masa penpen ahi Lungdamna Laisiangho ahi Mark gelhna sung ah Topa Jesu akituiphumna le tuiphum pa John ii thuhilhna cih te tawh kipan hi. Tua hi in Topa Jesu ii neulai thu le asuahna thu te kigelh lo hi. Anung lam ciang in akician in Matthew le Luke te in Topa Jesu suahna hong gelh uh hi. Tua hong suahzia pen akigelhna akhan lian gawm li sung bek ah kigelh hi. Behlap ding hileng, tua akhanlian te sung ah zong tampi tak kibat lohna om lai hi. Hi bang aa akibat lohna ahang bulpi pen Laisiangtho gelh te ii agennop thubulpi uh akibat loh man ahi hi. Christmas pawi ih bawlna athu bulpi in tua laisiangtho bu nih sung aa kigelh Topa Jesu ii neulai thute hang ahi hi.

See also  Adam, Death and the Age of the Earth

Misiangtho Paul ii laikhakna te sung ah zong Topa Jesu suahna thu kigelh lo hi. Hih bang in zekai takin Topa Jesu suah pawi ih bawlna ahang khat in tuahun lai in Pawlpi in suksai takin bawlsiatna athuak hang hi zong kici thei hi. Rome empire sungah amau ii ni pasian pawi ni (Sol Invictus) pen equator le ni akigam lat pen hun ahi phalbi hun sung in bawl uh hi. Tua pawi ni pen December 25 ni tawh kituak hi. Tua pawi ni pen Christmas ni in aki-khekziau dan in mi tampi in ki ngaihsun hi. Tua ni in deidan neilo tung sun ni ahi Topa jesu ii suahni pawi bawl leng kilawm pen ding hi. Tua bang ahang tuamtuam te hang in Pawlpi in kum zalom masa lam in gam khat ii ngeina le thuciin te tawh kizui in Christian zia tawh akituak theithei ding in ahanciamna hang zong hikha ding hi. Tu hun in zong tua bang mah in “amun tawh kizui in” in kisapna tampi a om lam ih phawk ding kisam hi.

December 25 ni pen Christmas ni in akoi ci bang in ki kipsak hiam cih zong sandan akibang lo thu tampi om lai hi. Tangthu kan khat ahi Usener in ama genna ah atung in AD 352 -354 kum sung in Pope Liberius in Christmas ni ding in December 25 ni in akipsak ma in January 6 ni in Christmas pawi kibawl hi ci hi. Tua kum mah in Pope in January 6 ni pen “Mipil thum te pawi”(Epiphany) ni in ciamteh hi. Hih bang aa ahong ciahtehna pen Rome khuapi pan in nisuahna lam gam te ah damdam in hong kizel ahi hi ci hi. Adang tangthu kan khat ahi Duchesne in atung in nitumna lam Pawlpi in December 25 ni in hitaleh nisuahna lam Pawlpi in January 6 ni te in Christmas pawi bawl tek uh hi ci in gen hi. Hong sawt ciang in nisuahna lam Pawlpi in nitumna lam Pawlpi ii zat Christmas ni damdam in hong zang ahi hi.

Hih akibang lo thu nih pen za ah za sang zolo in za ah za ih nial ding zong hong hipah tuanlo hi. Bangbang hitaleh Topa Jesu ii suah ni tawh kisai in Pawlpi mi masa te sanzia na kibanglo hi cih kimu thei hi.

See also  Santa Claus pianna thu 

Lk 2:8 sung ah “tua hun laitak in gamlak ah a tuuhonte agiahpih tuucing pawl khat a om uh hi” kici hi. Palestine gam ah tuu kicin hun pen February le March kha hun te ahi hi. Mi pawl khat te in tua hun Topa Jesu hong suak hi ding hi ci uh hi. March 25 ni in Christmas pawi abawl Christian pawl khat zong om veve hi.

Topa Jesu hong suah kum

Thangthu kansiam te muhna te le Laisiangtho ii lamlah na tawh Topa Jesu ii suah kum akituat thei ding dan ahi hi. Laisiangtho hilh sia te in bel Herod kumpi uksung in Topa Jesu hong suak hi ci uh hi. Herod uk hun sung pen BC 37 – 4 hun dong sawt hi. Tua Herod ii bawlsiat ding alau man in Joseph le Maria te Egypt gam ah tai uh hi (Mt 2:1,2: 15 – 19, Lk 1:5). Herod pen BC 4, April (1) ni in si hi ci in tangthu siam Josephus in gen hi. Luke in ama gelh lungdamna Laisiangtho sung ah Augustus Caesar in ama thuneihna tawh agam sung ah milip simna aneih hun laitak in Topa Jesu suak hi ci hi. (Lk 2:1-2). Augustus Caesar in BC 30 – 14 sung teng gam-uk hi. Adang Laisiangtho mun khat ah amasa gamsung milip simna pen Quirinius in Syria gam a uk hun laitak hi ci in kigelh hi. (Lk 2:2). Bangbang hitaleh Ouirinius in milip simna nihvei bawl hi cihna hong kilang hi. Lungdamna Laisiangtho agelh Luke in BC 7 – 6 kikal aa akibawl milip simna siksan in agelh ahi hi. Hih thute hang in Topa Jesu pen BC 7- 6 kikal in hong suak hi cih kician tak in kimu thei hi.

Topa Jesu hong suah pen BC le AD kikhen hun lian hilo hi. AD kum zalom 6 sung in Laisiangtho siam mipil Dionysius Exiguus in AD le BC kikhenna tangthu hong tuat pan ahi hi. Topa Jesu hong suah ni tawh kisai in atuamtuam kibat kim lohna hang pen hih Laisiangtho siam mipil pa ii tuat khialhna hang ahi hi. A taktak in kum 6, 7 bang manlang zaw in AD kum akituat ding ahi hi. Tiberius Caesar uk zawh kum 15 hun in Topa Jesu pen kum 30 pha khin hi cih pen Luke in gelh hi (Lk 3:1-23).

Dionysius Exiguus in hih Topa Jesu kum 30 pen bulphuh in AD atuat kik ahi hi. Mi khat peuh in kum 30 aphak ciang bek in Pasian na sem ding in kilawm pan hi (Gam 4:3, Eze 1:1). Hih ngeina tawh ki zawitawn in Topa Jesu pen kum 30 kim phata hi akici hizaw ding hi. Ahizong in Luke in Topa Jesu pen kum 30 lian hi cih gelh lo in kum 30 kim cih bek in gelh hi. Tiberius Caesar ii uk hun pen AD 24 hun ahi hi. Ama ii ukzawh kum 15 hun in Topa Jesu pen kum 30 val khinta ding hi.

See also  Adventist Tomorrow #13: Red-Hot-Sober.

Thukhupna

Topa Jesu bang hun lian in hong suak hiam cih pen ih thei cian kei hi. Tua theih cian ding zong pen ih upna aading akisam theih loh aphamawh thu zong hi khollo hi. Ni pasian ii pawi ni ahi December 25 ni in Topa Jesu ii suahpawi Christmas ih bawl pen akilawm pen hicih lunghiang ding hihetlo hi. Bang hang hiam cih leh Christ ih cih leitung khuavak ii pawi ni ahihman ahi hi. John in Topa Jesu mihing suakna honglak pen khuavak tawh na genteh hi. Topa Jesu mahmah in amau te kiang ah “Kei pen leitug khuavak ka hihi. Kei hong zui te in khuavak nuntakna nei ding uh aa, khuamial gamtatna nei lo ding uh hi” (Jn 8:12) ci in gen hi. Tua ban ah misiangtho Paul in “…sun khuavak sung aa om mite bang in akilawm in gamta ni…” (Rom 13:13) ci in na gen hi.

Christmas pawi ni in ih lungngaih ding thu in mong neilo Pasian hong itna thu ahi hi. Pasian mihing suahna hong lakna pen hua nidang lai hun bek hilo in tuhun nisim nisim in ih nuntakna sung ah Topa in mihing suahna hong la kikkik ahi hi. Tua hileh Christmas pawi ihbawlna in khiatna hong nei pan ding hi. Tua hangin Topa Jesu in ama suahni akician in hong theisak lo zong hikha thei ding hi.

“Bethlehem ah Topa Jesu tulvei then vei asuak phial zong in eite sung ah hong suak kei leh aMa ii hong suahna pen ei aading in khiatna om tuanlo hi.” – Alexander Pope.

Tangkona
Dr. Paul Kariamadam ii gelh “When Was Christ Born” pen zolai in kong let kik hi.

Lailet: Peter Suumpi

Tags: ,

Admin

Admin

Top