Zeisu Birthday Gift Ding Bang?
“Topa kei va pai in va honkhia ning….nang leitung ah va pai aa mihing te lak nungta dingin kilawm kei lua…kei mah va pai zaw ning…” ci-in vantungmite khat khit khat in Zeisu kiangah a nget uh hangin a bawlsa vantungmi te in a bawlsa mihing te tankhia zolo ahih manin Zeisu mah leitung ong pai aa ong tan dingin ong ki thawi ta hi. Vantungmite pau hetlo iin dai tak kun khikhee uh hi. A Kumpipa, Topa uh, a bawlsa mite hon khia dingin leitung hong kum suk ding hita hi. A kumpi puan suah khia in, a lu tunga om kumpi lukhu suahkhia aa PA mai ah hong kun hi. “Pa aw na deihna a ki cingsak dingin leitung ah vapai in ii tate va honkhia ding hi’ng….” ci in lungdeihna ong sungkhia hi.
Inn pan in khualzin ding khat a om ciangin hoihtak lamsap ding sum ki-puasak iin, a paina ding mawtaw, meileng, vangleng leh tembaw a ki pan ticket-te tawh kigingsa iin kipai sak hi. Nei ta kei leng ii inn mah nuam ki sa in ii nu’ huansa an mah kiduh sese hi… Kum tampi sung kimu lo ding cih theihkholh ciangin khasiat suak aa diipngek na iin bawi aw cikciang nong tung kik ding hiam….dam in kimu kik ni maw… Khitui mualtuang iin ii ki khen hi…. Asi ding aa ki khen hilo napi khasiat suak in lungneu mahmah thei hi….Zeisu a si dingin ong pai hi zen hi….
Vantung khempeuh daidiidee hi. Vantung kumpipa in vantung nusia aa leitung ong pai ding hi ta hi ven…Ahi zongin vantung tengah lungdamna om hi…A beimang ding a bawlsa a tate in nuntakna ngahna ding aa Zeisu a pai ding hita hi ven…..nuamna leh khasiatna ki gawm khawm in vantung khempeuh in Zeisu mitsuan in… “Va pai inla leitung vakhel in….(Go and change the world…)” ci in khitui mualtuang kawm in kam hong ki vaikhak uhhi.
Khuamial in leitung khuhcip iin launa tawh kidim hi. Vantung mihonte in vantung panin Zeisu hong suahna mun dong ah a honhon in cingin muak uh hi. Khuamial lak mualtung gamsung aa tuucing te kiangah khuavaak hong puak in lungdamnathu tangko uh hi. Mipil milian te lamhilh in Zeisu kiang tun uh hi. Vantung kumpi leitung bawngbuuk sungah hong suak aa, a niampen bawngkuang sungah ong kisial a muh uh ciangin vantungmite khasia in diipngekna in om kha ding uh hi. Vantung vanglian Kumpipa in leitung a bawlsa mite, ahotkhiat ding mite lakah mun ngahlo in kuama phawklohna mun ah daitak in zin hong tung zen hi.
Tuni in Zeisu hong suahna lungdam pawi ah na ngah sum le paai, gualnopnate bek ngaihsun kei inla, Zeisu leitung hong pai aa hong suahna dingin bang teng nusia iin eite aa dingin bangzah nusia hiam cih i lungsim sungah ngaihsun pha kik ni… Suahni nei pen Zeisu hi aa suahni letsong (birthday gift) a ngah pen ei mihing te hi hang… Tuni in gamlapi pan hong pai in zin a hong tung naungek aa dingin mun aom hiam? Eite nuntakna, eimau innsung, leh lungtang sungah hong suak Naungek Zeisu bang Birthday Gift na pia hiam….????
Dr Kham Khan Khai
Lecturer, Faculty of Education,
Asia-Pacific International University.