Zeisu in Nang Bangci Hong Mu Hiam?

Tua ih zat Nii tang pen leitung 9 in kiim um in, tua pen Nii innkuan khat kici hi. Tua ih Nii bangmah in, amau leh amau a tang aksi tampi a om lom khat pen Glaxy kici in, Ei tenna Ni innkuan omna Galaxy min pen Milky Way Galaxy kici hi. Hih Milky Way Galaxy dan mah in Galaxy dang Sang(Billion) a sim in om lai hi ci-in leitung mipil te in mukhia uh hi.  Milky Way Galaxy khat sungah aksi bekbek Sang(Billion)’ 200 bang om hi. Tua zah a tam aksi te lakpan in leitung khuavak hong pia vantung a Nii in aksi khat hi pan phing hi. Khuavak tha hatna in Second khatin tai(Mile) 186,000 tung hi. Ih Nii in leitungah khuavak hong tut zawhna dingin Minutes 8 sawt hi. Tua ahih manin ih leitung leh Nii pen tai 93,000,000 kim bang ki gamla hi. Ih Nii pen mipil te muhna ah leitung 9 in kimvel hi. Ih leitung panin anai pen aksi in Proxima Centauri kici in, nai khat in tai 16,000 apai Rocket tha tawh  apai ding hi leng kum 175,000 teh ki tung pan ding hi ci uh hi.

Tua ahih leh aksi bekbek Sang(Billion) 200 val bang aom ih Omna Milky Way Galaxy khat anawl khat pan anawl  dang khat ih tun zawhna dingin, Minute hilo, Second khat in tai 186,000 a pai khuavak tha tawh kum 100,000 bang ki pai ding ci uh hi. Tua pen Milkey Way Galaxy khat kantana pai nading hi panin, Milky Way Galaxy dan in aksim lom a omna Galaxy dang zong Sang(Billion) 178 bang om ci sawn sawn lai uh hi. Tua aksi khempeuh in amau’ leitung ciat nei lai dingin tuat lai dih in. Tua banah tua ih gen aksi sim zawh loh teng pen  mipil te muhzawh aksi teng bek hi pana, Universe buppi ii seh sawm suah seh khat khawng bek hi pan hi ci lai lai uh hi. A dang aksi seh sawm suah seh kua te pen amial, khuavak omlo aksite hi ci uh hi. Gen. 1:2 na sim in.

Tua khuavak omlo aksi mial te lakah, tuma kum 100 val lai a, E.G.White ii gen aksi kawm hawmpi (blackhole) akici zong aki hel khat mah ahi hi. Amialna sahlua leh zai lua mahmah ahih manin khuavak nangawn in pai let zolo ci uh hi. E.G.White ii genna ah Zeisu nihveina hong pai kik ciangin, Misiangtho te tua aksi kawmhawm(blackhole) sung hong totpih ding ci hi. Zeisu vangtangin a tan pempam ka mu khol nuam mahmah hi. Tua aksi kawmhawm(blackhole) thu a genlai in aksi lam a siamten E.G.White pen mihai ci in, na ko bawl uh hi. Tu hunciangin mipil te in, hong mukhia panpan uh hi. Pasian gamin bangzah ta-in zai hiam? lamdang hiam? Ih mawhna khuakte in, banzo vetlo hi. Hih thute vantungah sin behbeh lai ding cih in ih upna leh ih lametna khat zong ahi hi. “Universe thu a kim zaw in  gelh ni cileng, hong tamlua ding ahih manin tom, kim, cing thei pen ding ih at pak ahi hi.”

Hih zahta a avanglian Pasian’ tapa Zesu in, tuipi gei a seihnel  teng khempeuh lakpan malno khat zah zong ahi lo, hih leitung mawhna pan atan khia dingin, ong kipia khia in, aniam penpen bawngkuang sungah ong suakta zen maw…  Pa Pasian ong itna lian lua hi. Ih leitung khuak ten ban zo kei, Ih leitung kam te’n gen thei kei mahsi maw…

Pasian in mawhnei ahi mihing khuak tawh ih tel zawh khop dinga hong piak ahi Lai Siangtho nangawn tel khin zo nailo napi hang, hih zaha alian Pasian langpan kha pahpah mataw! Tuni in pil ih kisak khakna, vangnei ih kisak khakna, siam ih kisak khaknate ih pai khia zo nai diam? Amah tawh i kizop kei a leh, Zeisu in ei a te lel ong zatpih theilo kha ding hi. Amah tawh ih kizop a leh, ih ki niamkhiat kul hamtang hi. Amah zong bawng kuang sungah hong suak in, inn neilo, lo neilo in, thu maan a ding; ding den ahih manin biakna makai te leh, thukham hilh siate in mudah uh hi. Atawpna ah sing lam teh tung nangawn ah hong that ta mawk uh hi.

Hih zahtaka alian Zeisu bangin, mite tungah thupha pia thei dingin nang leh nang peuh na ki ngaih sun khakha lai hiam? Leitung neuno sunga va’ng, hauhna, pilna akici te tawh na buaibuai lai teng Zeisu in nang hong zang thei hetlo ding cih ih phawk thei nai diam? Topa zahtakna in pilna kipatna hi. Vantung pan a hong pai thuthuk te na theih nop a leh hi na kisak khak nate suah khia inla, Zeisu khephung ah kun in, na khitui tawh tetti lak in; Aman kua mah deidai nei hetlo in, a kisel vantung pilna te hong pia nuam in hong ngakngak hi. Ngen un; na nget uh leh Kha Siangtho na ngah ding uh hi.

Zeisu bawngkuang sungah hong suah lai in, tuucing te leh mipil te bekin, va mu kha uh hi. Tua laitak in, Ama hong sihna ding limcing a tuu a gogo siampite, thukham a siamlua siate koilam tung mang uh hiam? Tang tawng pek a kipan Zeisu a um mahmah leh ama mizat te in, mite muhna ah thusim huailo tak, sim mawh huai tak leh leitung pilna leh hauhna te nei selo uh hi. Tua ahih manin ana ngaklah gige ahi tuucing te leh mipil te banga, Pasian thu akan vilvel te leh mi a enlo athu ana en te bekin Topa sapna zathei bek ding uh hi. Pasian in tanglai hun a te leh tukhang hun ate hong it dan aki bang hi in, ahun leh amun zui in tang taka Ama thu a pulaak ding mi koih den hi. Ahih hangin tuate pen Siampite, biakna siate leh mipi a tamzaw te in langpan in, amau aleh do bangin tuat den uh hi.

Hih zahtaka lian lua leh ei a dinga hong kiniam khiat lua ahi Zeisu a dingin, hangsan takin mapang ngam nailo ding ih hiam, sanggamte aw…? Kei hong pahtawite Kapa mai ah ka pahtawi dinga, kei hong zumpihte Kapa mai ah ka zumpih ding hi. Amah ih biakpiak nate ah a zahtak huai thei penpen in biaktaak sa nailo lailai ding ih hiam? Khat leh khat ki-it ding, ki zahtak dingin, Zeisu in hong hilh thu mah ahi hi. Hih mah ta leh Zeisu aa tawh a ki tuah kei a leh, Kumpi te leh gam ukte mai nangawnah Zeisu adingin a ding ngam ding te hilo ihi hiam? Zeisu leh mihing mawkmawk kua zahtak huai zaw ding hiam? Tua ih cih ciangin mi peuhpeuh zahtaklo ding ih cihna hi peuh mahlo in, Zeisu a tawh aki tuah kei leh a ci bek ihi hi.

Zeisu muang mahmah leh a um mahmahin ki gen tek a, tuni in ih ki ngaihsut dingin ih deih in; na sungtawng  pai let a hong mu nang hong bawlpa Zeisu (John 1:3) in, nang hong muang zo, hong um zo taktak diam? cih ih ngaihsutna khempeuh ah ih omsak det dingin ih ki hanthawn nuam hi.

By : Khuavak thu