ZSL 11: Zeisu’ Tangthu Hawmsawn

LESSON 11                                                       *September 5–11

 

ZEISU’ TANGTHU HAWMSAWN

 

Sabbath Nitaklam                                                     September 5 

 

TUKALSUNG SIMDING: Ephet 2:1–10; 1 John 4:7–11; Maku 5:1–20;  Hebrew   10:19–22; Galati 2:20; 1 Corinth. 1:30.

 

KAMNGAH: “Pasian’ Tapa a um mite in nuntak tawntungna nei nahih lamtak uh na theih nadingun, hih lai a hong gelh ka hi hi” (1 John 5:13).

 

Abeisa sinnate sung pan, lungdamthu sangin nuntakzia a kheeltheizaw thudang omlo cih kician mahmah hi. Upna theology le doctrine khawng hong nialmah in teh. Zeisu in nang nuntakna sungah bang teng hong sepsak cihbel hong dong khollo kha ding hi. Tecipang i cih pen Zeisu’ thu i theih zahzah hawmkhiatkikna hi. Amah’n ei ading bangteng hong sepsak cih thu, mite theih sakna ahi hi. Tecipan ciangin, ei’ upna dik a, mi’ upna diklo cihciang leltawh i pan peuhmah leh, langdona lianpi phu pahlian ding hihang.

I teci panna pen, Zeisu’ itna, hehpihna le a thuman tawh a piangthaksa lungsim tawh ahih nakleh, nang’ nuntakzia hong kheelsak tua thuman in, tua mite’ huzaap in sangthei ding uhhi. Nang nuntakzia a kheelzo thuman in midang nuntakzia zong kilamdangsak ding hi.

Khazih in, upna doctrine khempeuh’ laigil ahih nakleh, Laisiangtho in Ama’ nuntakzia hong musak ding   a, i hopsawn lungdamthu sangthei ding uhhi.

 

SUNDAY                                                                      September 6

ZEISU: I Tecipanna Thubulpi

 

Christian i hi a, eima’ tangthu i neiciat hi. Zeisu  in, nang’ nuntakzia hong puahphatna le nang ading hong sepsak thute na gending omlua hi.

Ephet 2:1–10 simin. Khazih i theihma in i bangci om hiam? I theihkhit ciang e leh koici?

 

Khazih i theihma in (Ephet 2:1–3) 

…………………………………………………………………………

 

I theihkhit ciangin (Ephet 2:4–10)

 …………………………………………………………………………

A lamdang pianthakna! Khazih i theihma in “mawhna sungah si”, “leitung lampi tawn” “ci le sa deihna zui” “mawhna’tate” i hi hi. Tomgen leng, Khazih i theihma in, ngiimna lam-etna nei meello in vakzau lel   hihang.

Leitung nopna ngah ding bang kihi napi, picing zolo in lungkiatna vive in hongtuam zaw hi. Khazih leh hong itna i zuat ciangin kilamdangta hi. Tu’n Khazih sungah i “nungta” takpi hi. Tehpih omlo hong hehpihna hangin, hotkhiatna i ngahthei ta hi. Zeisu in hong lamto a “vangtung ah Amahtawh i ukkhawm theihna dingin, sihna panin Pasianin a hong thokhawmsak hi” (Ephet 2:6). John in “Ama sungah nuntakna om a, tua nuntakna in mihingte adingin khuavak ahi hi” (John 1:4) a cih mah bangin, Khazih sungah nuntakna in khiatna thak le ngiimna thak anei   hi.

 

Ephet 2:10 simin. Christian upna sungah gamtat hoihna ki bulphuh mahmah ahihna hih munin hong koici lak hiam? Upna hangin hotkhiatna cih tawh kisai in, “thukham zuih zawhna hang hi lo” (Rom. 3:28) cih thu koici teltheih ding i hihiam?

 

Khazih in nang’ nuntak hong koici kheelsak a, tua kikheelna in mi khatpeuh a ding Zeisu theihlawhna a piangthei diam?

 

Monday                                                                      September 7

KIKHEELZAWHNA VANGNEI MIMAL TECIPANNA

 

John le James, Zebedee tapate, “Keektang Tate” kici hi (Maku 3:17). Tua minneu pen Zeisu phuahngiat ahi hi. Samaria gamsung a kantan lai in, John hehluat gawp phawkna ahi hi. Lampi ah zangiak na’ng a zon vualeh, Samariate in Jewte mudah uh a hihmanun, na langdo uh hi. Inn hoihlopen nangawnah kisang zolo hi. John le James in bel tua vai baihsak mahmah lel uh hi. “A nungzuite sung pan James le John in hihthu atheih uhciangin, Zeisu kiangah, ‘Topa aw vantung panin meikuang ngenin, amaute kangtumsak le ung nong awi hiam” (Luke 9:54) ci uh hi. Zeisu in unau tegel taiisuk pah in, tua khua pan paikhia uh hi. Zeisu in, ngongtatpa hi lo a itna bek zang hi.

Zeisu’ itna sungah, John lungtomna tengin, itna hehpihna le hoihna tawh kilaihta hi. John’ laikhakbu khatna sungah zong itna cih bekbek 40 vei kigelh a, thu dang tuamtuam tawh 50 veival bang om hi.

1 John 1:1–4; 1 John 3:1; 1 John 4:7–11 le 1 John 5:1–5 simin. Hih munte in, John pen Zeisu tawh a kikholh manin, ama nuntakzia a kikheeldan bangteng gen hiam?

 

Vannuai thukip tawntung khat omgige a, EGWhite genna ah: “Zawhthawhbawl limlim pen  Pasian ukna   le thukham langdona hi a; itna tawh sepna bekmah amah’n deih hi; itna pen kisawl theilo; zawhthawhthu tawh kisawl theilo hi. Itna bekmah in itna khanglosak thei hi”—The Desire of Ages, p. 22.

Khazih sungah ki aapkhit ciangin, hong itna in ei tungtawnin mite taan hi.  Christiante’ tecipanna lianpen  in a kikheel nuntakna ahi hi. Khial theilo cihna zong hipah samlo a, hong itna le hehpihna luanna tuizawlpi kisuakpah samlo hi. Ahih hangin Khazih hong itna in, ei nuntakzia pan kilangin, i kimkot mite ading thupha i hi thei    hi.

Midangte tungah Khazih hong itna bangzah na lengsak hiam? Na dawnna in nang tungah bangzah nasem takpi cih ngaihsun in.

 

TUESDAY                                                                     September 8

ZEISU’ TANGTHU GEN

 

Zeisu in Pasian nasem a sawl masakpente kuate hiam? Nungzuite hi lo hi. Ama nung sawtpi a zuite zong hi lo hi. A sawl masakte mihaite, dawivei a khuasung khuapua a buaisak mahmahte ahi uh hi. Dawiveipa khatin dawi vangliatna tawh sikkhaute botsat in, awging lualua in tau gamgam a, amahmah suangzum khawng tawh kikui gawp hi. Ama tauna awte in, amau’ khate gimthuak mahmah cih hong lak hi (Mate 8:28, 29; Maku 5:1–5). Zeisu tawh a kimuh uhteh, a nuntak kikheel uhhi. Angei ngei nawnlo uhhi. Amau’ pumpi a bawlsia den dawite hawlkhiatsak in, vok sungah lut sak a, tua vokte keen ah kiagai uh hi (Mate 8:32–34; Maku 5:13, 14).

 

 

Tua dawiveite Khazih’ vang tawh mi-thak hong suak uh hi. Khuapihte in tuagel Zeisu’ khephung ah tu a, Topa’ kammalte ngai cih mu uh hi. Mate lungdamthu sung pan dawivei nih kikhahkhia ci a, Maku lungdam laibu in tua nihte lak pan khatpa’ thu bek ciamteh hi. Bangbang hileh Zeisu in a pumpi, lungsim le kha cidamsak hi limlim  hi.

Maku 5:18–20 simin. Hih dawivei damkik, thu-um thak tegel, Zeisu kiangah omsuak nuam mahtaleh, Zeisu in koiah paisak hiam?

“Hih mite in Khazih thugenna tawmvei sung bek ngaikha man uh hi. Sermon khat beek limtakin ngai ngeilo uh hi. Khazih in nungzuite midang a pantah theiding in a hilh bangin, amau te’n hih thei lo uh hi. Zeisu in Messiah cih thu a lungsim sungah kiptakin lenpeuh uhhi. A theih thu uh gen thei hi; amau mitmuh, bilzak le vangliatna a muh uh ahi hi. Pasian’ itna in i lungtang hong lawn nakleh, mi kimin hihthei hi”—Ellen G. White, The Desire of Ages, p.

Amau teci panna in Decapolis kici, Galilee bualtui gei a khuapi sawmteng Zeisu sang dingin kigingsakzo hi. Tua in mimal teci panna vangliatna ahi  hi.

 

WEDNESDAY                                                  September 9

KHAMUANNA TAWH TECIPANG

 

 

Zeisu sungah hotkhiat khamuanna i neih keileh, mite tungah i hawmsawn theikei ding hi. I neihlohpi lah i hawmtheikei ding hi. Christian thu-ummi pawlkhat in, gupngah theihnadingin a hoihkhop gamtat kul ci in um uh hi. Mipilpa khatin “Keimah ka ki-en a, gupkhiat theih dingin ka kimu kei hi. Zeisu ka-en a, mangthang theihna ka mu kei hi” ci hi. Topa’ kammal kiptakin gingden a “Leitung mi khempeuh aw, Kei lamah hong kihei unla, hotkhiatna ngah un! Banghanghiam cihleh Kei pen Pasian ka hi a, kuamah dang omlo hi”(Isa. 45:22).

I Topa in hong piakkhong hotkhiatna sungah nuamsa dingin hong deih hi. Ama’ diksakna ciamkha dingin, mawhna’ gu thuak na’ng pan suaktak ding hong deihsak hi. Paul in Rome 5 sungah “Upna hangin Pasian tawh kipawlkhin i hihmanin i Topa Zeisu hangin Pasian tawh a kilemkikta i hi hi” (Rome 5:1). “Tu in ahihleh, Khazih Zeisu tawh kipawlin, a nungta mite pen mawhna thukhenna tawh kipelh hi” (Rome 8:1) cilai hi. Sawltak John in zong “Pasian Tapa tawh a kipawl peuhmah in nuntak tawntungna nei a, Pasian Tapa tawh a kipawllote in, nuntak tawntungna neilo uhhi” (1 John 5:12, NKJV).

Upna tawh Zeisu i san leh, a Khasiangtho tawh eite lungsim sungah hong teng a, tawntung nuntakna in ei’ aa hipah hi. Pasian’ hehpihna le Zeisu’ gupna khatvei i saan nakleh, khahsuah thei nawnlo cih bangin up ding hi lo hi (2 Pet. 2:18–22; Heb. 3:6; Mang. 3:5). Ama kiang pan paikhia nuam leng ei thu ahihteei hang, Ama’ itna tel a, hong thuaksakna a telte in, Ama kiang pan paikhiat ding ngaihsun ngeilo uhhi. Nisim in Zeisu hong itna i hopsawn theih ding mite zong tawntung ding hihang.

Zeisu sungah gupna na khamuang zo hiam? Bang peuh nasiksan hiam? Banghang tua bangin na lungmuang thei hiam? Koi pan na ngah hiam? Na kiciat melkei leh zong banghang kicianlo? Tua khamuanna koici neihtheih ding na hiam?

 

THURSDAY                                                                  September 10

TECI PANTAAK THUKHAT

 

“Tu hun a ka nuntakzia pen kei hang hinawnlo in ka sungah ahong om Khazih hang ahi hi. Keima ading anuntakna hong pia Pasian’ Tapa ka muanna tawh tu laitak a nungta ka hi hi” (Gal. 2:20).

Khazih i saan khitleh kipiakna ciang khat bel om ding hi. Nutsiat ding pawlkhat hong ngen hi. Ama’ nungzui ding i hihleh: “mi khatpeuh in kei hong zuihnopleh, ama’ deihna bangin gamta nawnlo in, nisimin a singlamteh pua in hongzui ding hi” (Luke 9:23). Singlamteh tungah sihmawk bel nasialua hi. Khazih sungah i nuntakna aap khit teh “milui” pen singlamteh tungah kikhai hi (Rome 6:6). I lunggulhte le i zongsatnate nutsiat peuhmah bel na mahmah ding a, aih hang i san ding thaman bel leek zolo ding hi.

Nuntakzia khel a, a muibun tecipanna pen Khazih in eite a ding bang hong sepsakzo cih hi a, e’n Khazih bang piazo cih hilozaw hi. Ei kipiakna hang hilo a, Ama hong kipiakna hang hizaw hi. Eima phattuamna ding thute khempeuh nusia khin ding zong hong ci tuanlo hi.

Christiante tangthu sungah Khazih ading kipiakhiatna thu tampitak om hi. Hih mite in angsung khual hetlo in kipia mahleh, amau nasep tawh gupna zong hi tuanlo uhhi. A tamzaw peuhmah Khazih in amau ading a sepsaksate hangin, amau un zong Pasian’ sapna dungzui in biakna tau tungah a kipiakhia ahi uh  hi.

John 1:12; John 10:10; John 14:27 le 1 Corinth 1:30 simin. Eite tecipanna peuhmah Khazih in ei ading hong sepsaknate kibulphuh ngiat hi. I sinsate lakpanin hong hehpihna a omsunteng gualsuk dih ve.

Atung ate lakpan, nang ading Khazih hong sepsak thute ngaihsun in. Na nuntaksung a kipia ngam Christian khatpeuh na hikha ding a, a piangthak mahmah khatpeuh zong na hi ding hi. Zeisu in nang tungah bang zahin hoih a, lungnopna le nuamna hong piakte ngaihsun kik in. Na nuntak sung haksatnate kantan zawhna’ng tha hong guat zel hunte zong ngaihsun phapha in.

Khazih adingin bang kipiakkhiatna peuh hong kingen hiam? Midangte tungah thupha ahi thei dingin, bang peuh na sin kha hiam?

 

FRIDAY                                                                        September 11

 

NGAIHSUTBEH DING: Maku 5:25–34 simin. “Khazih’ nung a zui ngeingai mipite in vangliatna peuhmah phawkkha lo uh hi. Numei damlonu in dam ding cih lametna tawh, a lawnciangin, damna ngah takpi hi. Tua pen khalam thu ahi hi. Biakna vai genleng, kha gilkiallo le upna nungta lopi in thungetna in tang tunglo hi. Khazih in leitung gumpa hi cihciang lel upna in, kha cidamna bangmah om zolo hi. Gupna dong hongtun upna in, thuman upna ciangbek hi lo hi . . . Khazih up ziauna in kicing zolo hi; Amah sungah upna nei in. Nangma aituam hong gumpa; Ama’ kipiakna hangin gupna ngah cih upna kisam   hi.”

“Ama cihtakna i saanna in, leitungah Khazih tangko nading Pasian geelna ahi hi. Ama’ itna taang misiangte kiang pan i ngahsuk a; eimah teekin teci i pan lehbek muibun ding hi. Pasian’ vangliatna sungah i nasepna tawh teci i pansak thei hi. Mi kimin i kilamdang a, phutkhak thute zong kilamdanglai hi. Pasian in phatding hong deih a, mimal in phatding ahi hi. Khazih tawh kibang nuntakzia nungta a, Pasian’ itna theitel in i phat ciangin, kha a gumkhiazo kuama do zawhloh vangliatna in nasem ding hi”—EGWhite, the Desire of Ages, p. 347.

 

KIKUP DING DOTNATE:

1. Lohtheihloh a tecipan a kul theihna bang khawng teng hiam? Agrippa’ maiah Paul tecipanna simin. Sawl. 26:1–23. Amah’n bang bulphuh hiam?

 

2. Khazih hongsepsakte tecipanna in banghangin thahat thei hiam? Hih dotnate na dawngkha hiam: Nang tungah hibang hong tung mahleh, ke’n tua bang kaphutkhak ngeilohpi, bangcih ding? Nang tuahkhak thute in, Zeisu’ nung zuihtheih na’ng bang hong hilh hiam?

 

 

3. Mi tungah teci na pan ciangin bangte pelhhuai naci hiam?

 

4. Gupngah kitel cih tungtang ah: Christiante nuntakzia ahih ding banghang thupi hiam? Uplahlohna tawh koibangin gupngah kitelcian thei ding i hi hiam?