Zi 3 Nei Mipa

February 16                                                                                                                São Tomé and Príncipe

   Agen: Carlos Freitas, 48

Carlos in zi thum nei hi. Africa tuipi dunga gamneu Sao Tome gam ah teng uh hi. Amah le a sanggam pasal sagihte pen Seventh-day Adventist ahi a pii-uh’ innsung panin khangkhia uh hi. A pii uh a sih khit ciangin a unau tengun nungtolh kik khin uh hi. Kum 21 a phak ciangin, Carlos in Sunday tangg ahi, Edite tawh tanu khat nei uh hi.

Thu kinialna hong kipan pah hi. Tua tuikulh gam-a te’ ngeina ah, ta numei a suah phet in bilbah batsak pah uh hi. Tua pen lauhuaina panin a daal ding ahi hi. Carlos pen biakinn a tunzawh nawnloh saam hangin a tanu’ bil vut-in bilbah abat sak ding pen thukim vet lo hi. Tua bangin a buai mahmah kawmkal uah, a pasal’ theihloh kal in Edite in a tanu pen phungzi pa kiangah na tuisawp sak hi.

Tua thu a theih ciangin Carlos in a lawmnu maa’-in zi dang khat, Maria tenpih hi. Edite in pen a pasal ngai lai veve ahih manin kizom veve lai uh hi. “Tua hangin zi nih kinei kha suak hi” Carlos in ci hi. Tua khit ciangin, a thumna numei khat hong mu leuleu hi. Hong omkhawm in ta hong nei leuleu uh hi.

Tu-in a zi masa tawh ta 5, a zi nihna tawh ta 4, a zi thumna tawh ta 1 hong nei hi. Innkuan thum aadingin a hun hong khenta ahih manin a zi masa pangpa kisa lua-in, a vengte uh Adventist innkuan ahi nupa khat tawh va ki lawmta den hi. Amaute’ biakinn ah va kikhawm den in, a tawpna-ah tui va kiphum hi. Tua kawmkal ah Carlos in, VoA (Voice of America) US kumpi te’ zat thuthak pulaak khiatna zum ah nasep sem a, Pasian’ thu pen lunglut lua lo hi.

See also  MSS 6: Khuata Pan Kumpi Inn ah

 Ni khat, a zipi, Edite tawh a neih a tanute nih Sabbath ni ciangin tui kiphum ding ahi hi. Tua lai-ah tha a va pia dingin a zipi in sam hi. Tua sapna bel mangg bilbel hi. Kum 10 val gual apha, a tanute in biakinn sungah latuam sakna hongneih uh a zak ciangin a khitui hong luang hi. A neulai-a, a pi tawh akikhop lai nilehunte phawk hi. Mi’ muhding ut loin a lehlam nga-in a khitui nul simsim hi. Tua ni-a kipan in a zi masa tawh biakinn ah hong kikhawm den ta hi. A zi nihna Maria in hih thu atheih ciangin a pasal mawhsak in, kikhen ding tawh tobawl hi.

“Adventistte in zi tampi neih ding phal lo uh hi. Tu in nang’ Edite tawh ki letthat a sawm nahi hi,” Maria in ci hi. Carlos in, “Biakinnah, ka ki letthat pih ding a zong-a pai ka hi kei-a, Hotkhiatna zong aa a pai ka hizaw hi. Nang zong hotkhiatna na kisam hi. Biakinn ah kei tawh hong kikhawm zaw in,” a ci hi.

 Maria zong biakinn ah hong zui ta hi. Sabbath sim in Carlos in a zi mas te nutateng biakinn khat ah kha masa in, tua khit teh a zi nihna te nutateng biakinn dang khat ah kha leuleu hi. Amah bel kaingawi-in va kikhop pih kawikawi hi. Tua kawmkal ah a zi thumna pen in nusia in pasal dang khat tawh na omkhawm hi. Carlos in khanih sung, Sabbath sim in antangg in thu ngen den hi. A zi masa mah tawh kipzaw dingin a lungsim kizo zaw a, ahi zongin Lai Siangtho tungtawn in kipsak nuam hi. Ni khat, a Lai Siangtho hong kawm in thu ngen hi. “Lai Siangtho sung pan in aphii hong musak in Topa aw” ci hi.

See also  Nuntakna a Kheel Nindum

A Lai Siangtho leemna mun a etsuk leh Malakhi 2:14 sung mukha lian hi. “Na khangno lai-a na tenpih, ama’ tungah na cihtakloh, na zi leh nang’ kikal ah Topa teci hi-a; himah taleh amah pen nang’ kikoppih hi a, kiciamna tawh na tenpih na zi ahi hi.”(NKJV)

A zi nihna pen maak dingin Carlos in khentat ta hi. Tua thu Maria kiangah a gen ciangin a nupa un kap khawm ngekngek uh a, a tawpna ah a zi nihna Maria in telsiam ta hi. December 29, 2013 ni-in Carlos in a zi masa Edite pen thukip in tenpih ta a, tua khit ciangin tui kiphum uh hi.

“Tua khit a kipan nuntakna thak ka nei thei hi. Tu in mi thak ka hi ta hi. Pasian in kei’ tungah hong bawl thute agen kawikawi dingin kigingsa in ka om hi,” Carlos in ci hi.

Tu kuata, Sabbath 13 na sumpi khenkhat tawh Sao Tome ah biakinn khat kilam ding hi. Mission sumpi hong khia mimal kim tungah lungdam.

&&&&&

Tags:

Admin

Admin

Top