Zirlai 12: BABULON CHUNGA RORÊLNA

ZIRLAI 12-NA                                         March 16–22

BABULON CHUNGA RORÊLNA

Chângvawn: “Chutichuan, vân atanga lo chhuak âw dangin, ‘Ka mite u, a chhûng ata kha lo chhuak rawh u, chuti lo zawng, a sualnaahte khân in tel ve ang a, a hremna tawrh tûrte kha in lo tuar ve dah ang e. A sualnate chuan vân a tawng hial tawh a, Pathian pawhin a khawlohnate chu a hai rêng rêng si lo’ a tih chu ka hria a” (Thupuan 18:4, 5, NKJV).

SABBATH CHAWHNU                                                              March 16

Chhiar tûrte: Thup. 17, Jer. 51:13, Exod. 28:36–38, Thup. 13:1–8, Thup. 13:18, Thup. 16:2–12.

HREMNA pasarihna khân Eufretes lui a tikang chat ta vek a, chumi awmzia chu khawvêl mipui bual âta awm thîn lo harh chhuak taten tâwpna huna Babulon an tanpuina an hnûk kîr tihna a ni. Kâr hmasa zirlâia kan hmuh tâk ang khân, a thiltihtheihna lâksak vek a nih hma hian ramhuai thlaraute chuan Pathian tih ni âwm taka lang thilmak tak tak an lo ti hmasa phawt dâwn a (Thup. 16:13, 14). Chu ramhuai thiltih chuan Harmagedon indonaa inbuatsaihna tûrin mi sualte a tipumkhat dâwn bawk a ni.

Indona hnuhnûng ber chu tan a nih vê leh lîrnghîng nasa tak a lo awm ang a, chu chu hremna pasarihna-in a ken telte zînga mi a ni ang. Lîrnghîng chuan Babulon hnuaia inzawm khâwmte chu a tidarh ang a, hmun thumah  an inthen darh dâwn a ni (Thup. 16:18, 19). Tâwpna huna Babulon hi khawpui ni angin a sawi a, chu chuan hun rei lo te chhûng atâna Pathian mite do tûra khawvêl sawrkâr ropuite leh sakhaw hruaitute an inpumkhatna chu a entîr a. Mahse, he an inpumkhatna hi a tâwp leh ta thuai a, tâwpna huna Babulon chu a lo keh darh ta vek mai a ni.

Thupuan 16:19 hian tâwpna huna Babulon chu a inrêlbâwlna tlûk chhiat tûr thu chauh a puang a ni tih a hre reng ila. Chutianga a lo tlûk chhiat tâk dân chu bung 17 leh 18-ahte hian kan hmu zui leh nghâl bawk. Tâwpna huna Babulon tlûk chhiat dân leh a tlûk chhiat chhante a sawi hmain (Thup. 17:12–18:24) he sakhua kalsual hi sakawlh sen tak chunga nawhchizuar thû angin a sawi tê tê phawt a. He sakawlh sen tak, Babulon nawhchizuarnu hian a fanute nêna tang dûnin khawvêl hi Pathian kalh zâwnga awm tûrin a thlêm thlu dâwn a ni (Thup. 17:1–11).

*Tûn kâr zirlâi hi Sabbath nîa sawi ho thei tûrin lo inbuatsaih ang che.

SUNDAY                                                                                                             March 17

Babulon Nawhchizuar chu

 Thupuan 17:1 chhiar la. Jeremia 51:13 chuan Babulon thutna ‘tui tam tak’ hi Eufretes lui a ni tih a sawi a. Thupuan 17:15-in a sawi dân atang hian ‘tui tam tak’ tih hian eng nge a entîr ve thung le?

Bible-ah hian ‘hmeichhia’ tih chu Pathian mite chhinchhiahna atân hman a ni a. Thupuan bû-ah pawh hian Pathian kohhran dik tak chu hmeichhe thianghlim anga târ lan a ni ve bawk (Thup. 12:1, 22:17). Chutiang chuan, nawhchizuar pawh hian kohhran kalsual, kohhran suak a entîr tihna a ni ang. Thupuan 17:5-ah chuan, he nawhchizuar hi Babulon khaw ropui tia sawi a ni a. Hmâsâng Babulon kha Eufretes lui rin chhana awm a ni ang chiah khân, tâwpna huna Babulon pawh hi a ruahmannate a taka tipuitling tûrin mipui tam tak tanpuinaah a innghat ve leh chiah a ni.

Thupuan 17:2 hi Thupuan 14:8 leh Thupuan 18:2, 3-te nên chhiar la. Tâwpna huna Babulon nêna inzawmna nei a, Babulon-in a thlêm thlûk mi chi hnih a sawite chu tute nge ni?

A hmasa zâwkte chu leia lal, sawrkârna fawng chelhtute an ni a. Anniho hi nawhchizuar Babulon nêna inzawm, amah ngâitute nia târ lan a ni. Thuthlung Hlui lehkhabu-ahte hian inngâi tih tawngkam hi Israelin Pathian a hawisan a, milem pathian a belh thu sawina atân hman a ni fo va (Isa. 1:21, Jer. 3:1–10). Leia lalten he nawhchizuarnu an ngâi tlat mai hian tâwpna hunah chuan Babulon leh sawrkârna fawng chelhtute hi bawlhhlawh takin an la inzawm dâwn a ni tih a entîr a—kohhran leh sawrkâr inzawmna a thleng dâwn a ni.

Babulon nawhchizuarnu nêna inzawmna tenawm tak nei dang lehte chu leia chênge, mipui tam takte hi an ni a. Hêng mite hi Babulon mi ngaih chînna uain hmangin thlarau lamah hrâi ruih tawh an ni. Sawrkârna fawng chelhtute ang lo takin hêng mipui nâwlpuite hi chu Babulon zirtîrnate leh thil tih dân dik lo tak tak hmanga bual ât tawh an ni a, chuvâng chuan Babulon-in anmahni a vênghim thei dâwn emaw an ti tlat nghe nghe a ni. Miin zû an ruih tawh chuan ngaihtuahna fîm an hmang thei tawh thîn lo va, awlsam taka thunun mai theih an nih tawh thîn (Isa. 28:7). Khawvêl pum pui hi—mi rinawm la awm chhunte tih loh chu—Babulonin a la hruai bo vek dâwn a ni.

A tâwpkhâwkah chuan—vawiinaah pawh a nih dân ang leh, thil nih dân phung ve rêng a ni hrim hrim ang hian—mi tam zâwk daihte hi chuan an la tisual dâwn a ni. Hei hian mipui tam zâwkte ngaihdân chu—mi tam zâwkte ngaihdân ni eng ang pawh ni se—zui ve ngawt a hlauhawm dân eng nge min hrilh le?

THAWHTANNI                                                                                                               March 18

Sakawlh sen tak chunga chuang nawhchizuar chu

Thupuan 17:3 chhiar la. Hri chhiaa khat hremna berhbu kengtu vântirhkoh pasarihte zînga pakhat chuan Johana chu rawn biain, tui tam tak chunga thû nawhchizuar chunga hremna lo thleng tûr chu a entîr dâwn a ni tih a hrilh a. Chu nawhchizuar chu sakawlh sen tak chungah a chuang a. Eng tiang kawngtein nge ‘tui’ tih leh ‘sakawlh’ tihte hian Babulon tantute nihna a târ lan le?

Johana hi inlârnaah thlalêra hruai a ni a, chutah chuan sakawlh sen tak chunga hmeichhe pakhat chuang lâi a hmu a. Nawhchizuar tih hian sakhua a entîr lâiin, sakawlh tih erawh hi chuan sawrkâra thuneitu, a fawng chelhtute a entîr ve thung. Sawrkâr thuneitute chunga sakhua chuang tih chuan thil hrang daih pahnih—sakhua leh sawrkâr inthlun zawmna a kâwk a, hetiang hi tûn hmain a la thleng ngâi lo. Amaherawhchu, hrilhlâwkna chuan hêng thil pahnihte hi tâwpna hunah chuan an la inzawm ngei dâwn niin a sawi tlat mai si. Sakawlh chunga chuang tih chuan thil eng emaw thunun tlat tih a kâwk a; sakawlh sen tak chunga chuang a nih angin he tâwpna huna sakhaw dik lo hian khawvêl sawrkâr hrang hrangte a la thunun ang.

Nawhchizuar zia hrang hrang hrang zînga engte hian nge drakon, tuifinriat atanga lo chhuak sakawlh leh lei atanga sakawlh lo chhuak-te (Thupuan 12 leh 13) chu kawh le?

He nawhchizuar hian puan sen duk leh sen lâr a sin a, tin, rangkachak leh lung man tam leh tuikeplungin a inchei bawk. Hetiang hi hmâsâng huna nawhchizuarten mite hîpna atâna an inthuam dân a ni ve rêng a (Jer. 4:30). Rawng sen lâr hian—thisen rawng a ni ang ngeiin—he sakhaw dik lo hi a tawrhhlelhawm tûrzia a tilang.

Nawhchizuar inthuam dân hian Thuthlung Hluia puithiam lalber inthuamna pawh kha a an ve deuhna lâi pawh a awm a, ani pawh khân kawrfual sen duk leh sen lâr a hâ thîn a, rangkachak pawh a inbel thîn bawk (Exod. 28:5, 6). A chala Pathian sawi chhiatna thu inziak hian puithiam lalber lukhuma ‘Lalpa Pual’ (Exod. 28:36–38) tih inziak kha a rawn luahlân bawk a. A kuta no a ken hian Babulon lal Belsazzara leh a mikhualten zû an inna biak bûk bungbêlte (Dan. 5:2–4) kha min hriat chhuahtîr bawk. Tin, nawhchizuar kuta no hian Pathian lak ata khawvêl hruai bo a nihna tûra Setana siam chawp tâwpna sakhaw kalsual chu a entîr ve leh bawk a ni.

Nawhchizuar Babulon hi mi thianghlimte leh Isuaa martar, Krista thuhretu an nih avânga an nun chân tate thisena rûi nia sawi a ni bawk a. He thisen chhuahna hian tâwpna huna Babulon chu hun laihâwl vêla pope kaihhruaina hnuaia Kristian sakhaw kalsualna, chanchin thaa rinawm Kristian maktaduai têlin an thih phahna nên khân a inzawm niin a sawi.

Nawhchizuar Babulon lan dân leh thiltihte hian Thuatira kohhrana Jezebeli mizia kha a rawn pho lang a (Thup. 2:20–23 en rah). Eng tin nge hêng hmeichhe pahnihte inanna hian tâwpna huna Babulon nungchang chu a lo sawi fiah le?

THAWHLEHNI                                                                                                              March 19

Sakawlh sen tak hi tu nge ni?

Thupuan 17:3 hian sakawlh sen tak chu Thupuan 13-in a sawi tuifinriat atanga lo chhuak sakawlh, Pathian mite dova hnehtu ang deuh kha niin a sawi a (Thup. 13:5– 7). He tihduhdahna hun hmasa lamah hian hmeichhe thianghlim chu thlalêrah tlân chhiain, chutah chuan ni/ kum 1260 chhûng, A .D. 538 atanga 1798 thleng a awm ta rih a (Thup. 13:5–7). Tûnah hian kohhran hrang hrangte inzawm khâwmna hunah chêng tawh mah ila, Protestant-te chuan hun kal tawha tihduhdahna râpthlâk tak an tawh kha chiang takin an la hre thei tho. Hrilhlâwknain a sawi dânin, khatiang deuh kha, mahse a âia nasa zâwk daih chu a lo thleng leh dâwn nghe nghe a ni.

Thupuan 17:8 chhiar la. Hemi chânga a tawngkam hman hi Thupuan 13:8-a a tawngkam hman nên khâikhin ang che. Eng tin nge Thupuan 13:3 hian sakawlh lo awm dân chhâwng thumte leh a thiltihte chu a rawn sawi fiah le?

Sakawlh sen tak chu lo awm tawh zet a, chumi hnu-ah awm leh lo va, chumi hnu leha leilâwt atanga lo chhuak chho va, boralnaa kal tûr anga sawi a ni a. He a lo awm dân chhâwng thumte hian Pathian hming, Jehova—‘awm mêka leh awm tawha leh lo la awm tûra’ (Thup. 1:4; Thup. 4:8) chu a rawn entawn ve ngawt phawt a. Chu bâkah, sakawlhin a lo pal tlang tawh awmna chhâwng pathumte pawh a kâwk leh bawk. Chûngte chu:

  • Sakawlh chu lo awm ‘tawh zet’ a ni. Tûn hmâin a lo awm tawh thîn a. Thla 42 chhûng, ni/kum 1,260 chhûng zet chu hna a lo thawk tawh (Thup. 13:5 leh Zirlâi 9-naa Sunday zirlâi kha en ni se).
  • ‘A awm leh ta lo a ni.’ Sakawlh chuan thihpui khawp hiala nâ hliam a tawrh (Thup. 13:3) avângin awm lo ang maiin kum 1798 atang khân a reh ta vang vang a. Hetih chhûng hian mi tu mah pawh a tihduhdah lo; mahse a lo dam chhuak leh tlat mai.
  • A tâwp a tâwpah chuan a hliam tawrh na tak mai chu a lo dam leh ta a, a hmaa thiltihtheihna kha rawn nei lêt lehin nasa takin hna a thawk leh ta a ni.

Thupuan 17 hian Thupuan 13:1–8-in a sawi sakawlh hliam na tak tuar lo dam leh ta chanchin kha a sawi a. He sakawlh lo dam leh ta chungah hian nawhchizuar Babulon chu a thû a ni. Hun laihâwl vêla a thleng ang deuh khân hun rei lo te chhûng chu kohhran leh sawrkâr hi an tang dûn leh dâwn a, tihduhdahna pawh a rawn thleng ve leh bawk ang.

“Dodâlna te, en hranna leh ngaihtheih lohna te, tihduhdahna te pawh lo chhuak leh rawh se; chutih hunah chuan thinlung chanvea ringtu nite leh mi vervêkte chu an nghîng ang a, an rinna pawh an thlah hial ang. Nimahsela, Kristian dik takte chu lungpui anga nghetin an awm ang a, hun râlmuanga an awm lâi âi khân an rinna a chak zâwk ang a, an beiseina pawh a êng zâwk bawk ang.”—Ellen G. White, The Great Controversy, p. 602. Hêng thute atang hian tâwpna huna thil thleng tûrte lo thlen hma hauh pawh hian Kristian kan nihna anga kan thil tawn tûr chungchângah eng vaukhânna thu nge kan lâk chhuah theih le?

NILAINI                                                                                                               March 20

Sakawlh lu pasarihte chu

Thupuan 17:9–11 leh Thupuan 13:18 chhiar la. Sakawlh lu pasarihte hian eng nge a entîr tih hrethiam tûr chuan fin thiam a tûl hle a. Heti lâia ‘finna’ a tih hi eng kawnga finna nge ni? He finna, Pathian laka chhuak hi eng tin nge miin a neih theih ang (Jak. 1:5 en la)?

Vântirhkoh hian sakawlh lu pasarihte chu tlâng pasarihte a nih thu a sawi a. Bible letlingtu thenkhat chuan hêng tlâng pasarihte hi Rome khawpui thuthmun, a innghahna mual pâwng palî -te sawina niin an ngâi a, chuvâng chuan, Grik thumal, oroi (‘tlâng’ tihna) chu ‘mual pâwng’ tiin an letling ta thên mai hlawm a ni. Tin, tlâng pasarihten an entîr lal pasarihte pawh an awm leh bawk a. Chu bâkah, hêng tlângte hi a ruala tum khata awm tlâng vek ni lovin, a indawt tê têa lo awm an ni zâwk bawk.

Hêng tlâng pasarihte hian tu lalte mah an entîr hran lo va, a chhan pawh Thupuan hian mi mal tute emaw chungchâng ni lovin, an nihna, an thil tih dân leh kalphung zâwk chu a sawi vâng a ni. Bible-ah hian tlâng tih hi khawvêl lalte emaw, lalramte emaw entîrna anga hman a ni ve fo va rêng a (Jer. 51:25; Ezek. 35:2, 3). Bible hrilhlâwknaah pawh ‘lalte’ tih chuan lalram a entîr bawk (Dan. 2:37–39, Dan. 7:17 en la). Chuvângin, hêng tlâng pasarihte pawh hian khawvêl lo awp tawh thîntu lalram indawt pasarih, Setanan Pathian do nân leh a mite tihnatna hmanrua atâna a hmante kha a entîr a ni.

Johana hunlâi atanga thlîr chuan hêng lalram pasarihte zînga panga chu an tlu chhe tawh a, pakhat chu ding mêk niin, a dang pakhat chu lo la ding tûr a ni ve thung. Adventist mi thiamte zîngah pawh ngaihdân rual thap a awm bîk lo na-in, tam tak chuan lalram panga tlu chhe tawhte hi Thuthlung Hlui hunlâia khawvêl awmptu lalram ropui tak tak (a châng chânga) Pathian mite lo tihrehawm tawhtute kha niin an ngâi a. Chûngte chu: Aigupta te, Assuria te, Babulon te Medo-Persia te leh Grik te a ni. Lalram ‘pakhat la awm’ a tih hi chu Johana hunlâia Rome Lalram kha a ni ang.

Lalram pasarihna, ‘lo la awm rih lo’ a tih hi Thupuan 13-in a sawi, tuifinriat atanga lo chhuak sakawlh a ni a— chu chu pope, khawvêl awptu leh Pathian mite tihrehawmtu niin, chu lalram chu Johana thih hnu, milem be sawrkâr Rome Lalram a tlûk hnua lo lang tûr a ni. He hrilhlâwkna thu, thil thleng tûra a sawite thlen hma kum za tam taka lo ziah tawh hi a dikzia chu chanchin kal tawhte kan thlîr kîr hian chiang takin a lang.

Johana hnênah hian sakawlh sen tak chu lalram pariatna a nih thu leh, chu chu lu pasarihte zînga mi kha a nih nghe nghe thu hrilh a ni bawk a. Chuti a nih chuan, a khawi ber hi nge ni ta ang? Hêng lû pasarihte hi a indawta lo awm an nih avângin a pariatna chu thihpui khawp hiala nâ hliam nei lu pasarihna kha a nih ngei a rinawm. He lalram pariatna hunah hian sakawlh sen tak chu lo langin, nawhchizuar Babulon thiltumte chu a hlawhtlin theih nân hma a rawn la dâwn a ni. Tûnah hian thihpui khawp hiala nâ hliam dam chho leh mêk hunah kan chêng a. He lalram pariatna hi tâwpna hun a thlen hma deuh hlekin a rawn lang ang a, tichuan, chatuana boralnaah a kal leh nghâl dâwn a ni.

NINGANI                                                                                                               March 21

Babulon chunga rorêlna chu

Thupuan 17:12–15 leh Thupuan 16:14–16 chhiar la. Hêng thute atang hian ‘lal sâwmte’ chungchâng eng nge hriat tûr awm le?

Hêng lal sâwmte hi tute nge ni ang tih chungchângah ngaihdân hrang hrang a awm a. Amaherawhchu, Thupuan hian tute nge an nih tih min hrilh tlat lo. A bu chhûng thu atanga kan hriat theih zawng chu sawrkâr inzawm khâwm, tâwpna lo thlen hmaa lo lang zawk leh, nawhchizuar tanpuitute an ni tih hi a ni mai a. An number (‘sâwm’) hian khawvêl sawrkârte/lalramte chu sakawlh lakah an rinawm êm êm dâwn a ni tih a entîr a ni.

Thupuan 17:13, 14 hian Thupuan 16:1216-a kan hmuh tawh Harmagedon indona chungchâng kha tâwi tê-in a rawn sawi nawn ve leh a. Ramhuai thilmak tihte chuan a hmin hneh tawh êm avâng leh drakon te, tuifinriat atanga lo chhuak sakawlh te leh, zâwlnei derte hnathawh azârah khawvêl sawrkâr hrang hrangte chuan Berâmno chu an do rawn dâwn a ni. Tawngkam danga sawi chuan, Harmagedon indona hi sipai chakna hmanga Middle East-a inbeihna ni lovin, Isua lo kal leh huna inbeihna hnuhnûng ber, Setana leh a thurualpuiten Krista leh a vântirhkohte an do hun tûr chu a ni zâwk.

Thupuan 17:16–18 chhiar la. Thupuan 16:2–12-a kan hmuh atang hian, lal sâwmten Babulon laka an rilru put dân an thlâk leh chhan chu eng nge ni? Babulon laka thil thleng phênah hian tu nge awm?

Hêng ki sâwm, Europe ram lo keh darh tate rawn thlâktu lalramte chu an thin a rim êm avângin nawhchizuar Babulon (chu chu tâwpna huna pope rawn inlan dân tûr a ni a) chu an huat rawn ta thut mai a, eng mah nei lo leh saruakin an siam ta a ni; an huatzia entîr nân a sa te eiin, amah chu meiin an hâl ral hial nghe nghe. Nawhchizuar Babulon chunga thil thleng tûr chungchâng sawiin, Johana hian uirê hmang Jerusalem chunga thil thleng tûr Pathianin a lo sawi tuma tawngkam a hman (Jer. 4:30) ang deuh kha a rawn hmang ve leh a. Meia hâl ral hi puithiam fanu, nawhchizuara intibawrhbângte hremna atâna an hman thin a ni (Lev. 21:9). Tûn hmâa a lo bum thin sawrkâr hotute chu hremna pasarihte laka a vênhim theih loh avângin an lo harh chhuak ta a. Bumin an lo awm reng a ni tih an hriatin amah chu huat namên lovin an hua a, an bei ta hial mai a ni. He tâwpna huna sakhaw kalsual hian, a lama tang zawng zawngte nên Pathian rorêlna chu a pumpuhlûmin an la tuar ang.

Tâwpna huna thil thleng tûrte chungchângah hian a chhânna awm rih lo zawhna tam tak a awm a, chuvâng chuan kan rilru pawh a buai deuh thîn rêng a nih hi. Thupuan 17:14-ah hian eng thutiam nge kan hmuh a, he thutiam hian eng nge kan tân pawimawhna a neih le?

 

ZIRTÂWPNI                                                                                                             March 22

Zir belhna: Babulon a tlûk chhiat hnu chuan vân atangin âw ring tak a lo chhuak a. Babulon chhûnga la awm Pathian mite chu, “Ka mite u, . . . lo chhuak rawh u” (Thup. 18:4) tiin a rawn au a. Chhan eng eng emaw avângin Pathian chibai bûktu tam tak chu Babulon chhûngah an la awm rih a ni. Chuvângin, Pathian chuan tâwpna huna a kohhran hi he sakhaw kalsual lak ata mite ko chhuak a, a sualnaahte chuan an tel ve lohna tûra hrilhtu atân a hmang a. A hremna tawrh tûrte chu an tawrh ve lohna tûrin an lo chhuah ngei ngei a ngâi. Pathian chuan mi tu mah hi an boral a duh lo a ni (2 Pet. 3:9) . Thupuan 19:1–10 hian Pathian tihtu Babulon-a la awm rihte chuan he kohna hi an lo chhâng dâwn tih a sawi a. Chuti a nih chuan, Pathian kohhran la bâng kan nihna anga kan chunga mawhphurna a nghah hi a sâng hle a ni tih ngaihtuah ang che. He kan mawhphurhna hian kan thinlunga Pathian thutak kan mamawhzia leh kan nuna Thlarau Thianghlim lo thlen a tûlzia min hrilh em?

SAWI HO TÛRTE:

  1. Thupuan 18:4 hian Babulon chhûngah hian Pathian tihtu mi tam tak, amah Pathian ngei pawhin “Ka mite” tia a kohte an awm a. He thu hi ngun takin han ngaihtuah teh le? “He thuchah hi hril ngei tûr a ni a; mahse hril ngei tûr a nih rual hian keimahni’n kan neih ang êng la nei ve lote chu kan nawr vak emaw, kan hual chêp emaw, thiam loh kan chantîr emaw mai loh nân kan fîmkhur hle tûr a ni. Khawlâiahte vâk kualin Catholic mi leh sa kan hmuhte chu kan pâwng nawr chiam chiam tûr a ni lo. Catholic-te zîngah ngei pawh hian Kristian tha tak tak, êng an hmuh ang apiang zui mai thîn an awm a, anmahni tân pawh hian Pathian chuan hna a thawk ve tho a ni. Hamthatna leh remchânna ropui tak tak nei a, mahse an taksa, rilru leh thinlung tihmasâwn leh chuang bawk si lote chu . . . dinhmun hlauhthâwnawm takah an awm a. Chutiang mite chu thurin dik lo vuan a, mahse mi dangte chunga thil tha tih tum tlatte âi hian Pathian ngaihah an huatthlala daih zâwk bawk a ni.”—Ellen G. White, Evangelism, p. 575. He thu hian mi dangte chunga kan awm dân tûr chungchângah eng nge min hrilh le?
  2. Thupuan 17 hian sakawlh sen tak chunga nawhchizuar thû chanchin a sawi a. Bung 12-a hmeichhia hian Pathian kohhran rinawm a entîr lâiin, bung 17-a hmeichhia erawh hi chuan kohhran kalsual, Pathian lak ata khawvêl hruai botu a entîr ve thung. Nangma ngaihdânah, hêng hmeichhe pahnihte hian eng nge inanna an ngeih a, eng nge danglamna an neih bawk le? Chu âia pawha pawimawh zâwk chu, chutianga i khâikhinna atang chuan eng thil nge zir chhuah theih i neih tih hi a ni.
  3. Tûn kâra kan Bible châng chhiarte hian hnehna changa Krista lo kîr leh hmâ hun hnuhnûng bera khawvêl dinhmun, a bîkin sakhua leh ram rorêlna lama thil a kal sual nasatzia an târ lang hlawm a. Hei hian tûnah ngei hian Pathianin thuchah min pêkte laka kan rinawm, dik leh thianghlim a pawimawhzia min hrilh em le? Khawvêl pum puia kalsualna a hluar êm êm kârah hian rinawm taka awm tlat tûra sâwm kan nihzia inziahna Thupuan 16:15 hi chhiar la. Eng tin nge he vaukhânna thu hi keimahni ngeiah hian tûnah kan hmeh bel theih ang?