Zirlai 6: PATHIAN MI CHHINCHHIAH TAWHTE

ZIRLAI 6-NA                                                            February 2–8

PATHIAN MI CHHINCHHIAH TAWHTE

Chângvawn: “Hêng mite hi hrehawm nasa ata lo chhuakte an ni a, an kawrfualte chu Berâmno thisena sû-in an tivâr tawh a ni” (Thupuan 7:14, NKJV).

SABBATH  CHAWHNU                                                                                                       February 2

Chhiar tûrte: Thupuan 7; 2 Pet. 3:9–14; Deut. 8:11–17; Thup. 14:4, 5, 12; Thup. 17:5; Rome 3:19–24.

CHHINCHHIAHNA pasarihte phelh a ni hian Krista ringtu nia inchhâl tawh phawt chuan an rinawm avânga malsâwmna emaw, an rinawm loh avânga ânchhia emaw an dawng ngei dâwn a ni tih a tilang a. Chhinchhiahna hmasa palî-te hian a mite chu thlarau lama an mutthlûkna ata kaihthawh a, hnehna chang tûra siam an nih theih nâna Pathian thununna hmanruate a sawi. Mahse, Pathian mite chuan chanchin tha haw êm êmtu he khawvêlah hian dik lo taka tih leh rah beh pawh an tâwk ve tho a. Chhinchhiahna parukna hawn a nih hian Pathian chu a mite tinatu laka phuba la tûrin a inpeih tawh a ni.

Bung 7 hi chhinchhiahna parukna leh pasarihna inkârah a rawn tla zep a. Chhinchhiahna parukna hian Krista lo kal lehna chu min hruai thleng a. Mi sualten rorêlna an hmachhawn a, Krista lo kal lehna nî-ah chuan tu nge ding zo vang tia zawhna an siam chu Thupuan 7 hian a rawn chhâng ta a: ding zo tûrte chu chhianchhiaha awm tawh mi 144,000-te a ni. Mi 144,000-te nungchang dang chu Thupuan 14:1–5-ah hian kan hmu a. Tâwtawrâwt parukna leh pasarihna inkârah pawh hian thil dang rawn tla zep a awm leh bawk (Thup. 10:1–11:14). He thil rawn tla zep, Harhtharna Tum Hnihna leh Isua lo kal leh thuai rinna boruak nêna rawn thleng rual hi bung 7-a thil thleng a sawite nên hian a thlen hun a inrual a, chu mai bâkah, tâwpna huna Pathian mite thil la tawn tûr leh an hnathawh tûr pawh an sawi ve ve bawk a ni.

*Tûn kâr zirlâi hi Sabbath nîa sawi ho thei tûrin lo inbuatsaih ang che.

SUNDAY                                                                              February 3

Thli palî-te chelh rih a ni

Thupuan 7:1–3 hi 2 Peter 3:9–14 nên chhiar kawp la. Eng thil nge Johanan a hmuh? Eng tik thleng nge vântirhkohte hian thli palî -te hi an chelh dâwn? Chhinchhiah hna thawh zawh a nih hunah eng thil nge lo thleng ang?

Thuthlung Hlui lehkhabu-ahte hian thlî chu thil tichhetu, Pathianin mi sualte chunga rorêlna a thlentîrna hmarua anga sawi a ni a (Jer. 23:19, 20; Dan. 7:2). Pathian vântirhkohten mihringte thinurna thlipui râpthlâk tak an lo chelh beh hrâm hrâm thin chu an thlah ve leh buaina thlentu thilbulte chu chhuah zalen a ni ve nghâl dâwn a ni.”—Ellen G. White, Indona Ropui, p. 614. Hêng chhiatna thlentute hi Pathian mite chhinchhiah hna thawh a la nih chhûng chuan Pathian inrawlhna hmanga chelh rih a ni a. Hmânlâi chuan chhinchhiahna tihin a kawh bulpui ber chu neitu nihna a ni. Thuthlung Tharah chuan chhinchhiahna tih awmzia chu “Lalpa chuan ama tâte chu a hria” tihna anga hman a ni a (2 Tim. 2:19). Pathian chuan ama mite chu a hria a, Thlarau Thianghlimin a chhinchhiah thîn (Efesi 1:13, 14; 4:30). Tâwpna hunah chuan Pathian mi rinawm, a thupêk zâwmtute chu an chalah chhinchhiahna pêk an ni ang. He chhinchhiahna hi chala lang vû vû tûra inchhinchhiahna ni lovin, “tihnghîn theih loh tûra rilru lam leh thlarau lama thutaka intu lût” tihna zâwk a ni—Last Day Events, p. 220. A leh lamah, sakawlh lama tangte chuan sakawlh chhinchhiahna an pu ve thung ang (Thup. 13:16, 17).

Pathian mi chhinchhiah tawhte rinawmna chu chhuan tinah finfiah a lo tawh a. Amaherawhchu, buaina hnuhnûng bera an rinawm leh rinawm loh fiahna chu Pathian thupêkte an zâwm tih hmangin a ni ang (Thup. 12:17, Thup. 14:12). A bîk takin, thupêk palî-na hi Pathianthu kan âwih leh âwi loh fiahna a la ni dâwn a (Thup. 14:7). Sabbath hi Bible hunlâi khân Pathian mite chhinchhiahna a lo ni tawh thîn a nih kha (Ezek. 20:12, 20; Heb. 4:9, 10), chutiang bawk chuan, buaina hnuhnûng berah pawh Pathian laka kan rinawmzia tilangtu a ni ve leh ang.

Tâwpna hunah chuan, he chhinchhiahna hi hremna hnuhnûng pasarihten chhiatna an thlente laka humhimna chhinchhiahna pawh a ni nghâl dâwn bawk a (Ezek. 9:1– 11 en ang che). Chuvâng chuan, Thupuan 6:17-a zawhnazâwttute hian chhânna famkim an dawng rêng a ni: Pathian thinurna nî-a ding thei tûra humhimte chu Pathian mi, chhinchhiaha awm tawhte an ni.

Paula chuan chhinchhiaha kan awmna Thlarau Thianghlim chu tilungngâi lo tûrin min hrilh a (Efesi 4:30). Hei hi eng nge ni a awmzia? Eng tiangin nge Thlarau Thianghlim chu tihlungngaih theih a nih? Chhânna i hriat tawh hnu chuan amah tilungngâi lo tûrin duhthlanna engte nge i siam ang le?

See also  HSS 12: THUTLUKNA THA LOTE HMACHHAWNIN

THAWHTANNI                                                                      February 4

Pathian mi chhinchhiahte

Thupuan 7:4–8 chhiar la. Pathian mi chhin-chhiaha awm zât chu eng nge ni? Chu namber chuan eng nge a entîr?

Chhinchhiaha awm tawh zât an puang hian chhinchhiah hna chu thawh zawh a ni tawh tih a entîr a. Johana hian chhinchhiah zât chu Israel hnam 12 atangin 144,000 a ni tih a hria a. Heta namber zât a sawi hi a ngialngana lâk tûr ni lovin, entîr nei anga ngaih tûr a ni zâwk ang. Namber 144,000 hi 12 hmun 12 leh 1,000 puntîr a ni a. Sâwm leh pahnih tih hi Pathian mite chhinchhiahna a ni a: chu chu Israel hnam zât a nih mai bâkah, kohhran pawh hi tirhkoh sâwm leh pahnihte lungphûm chunga sak a ni bawk (Efesi 2:20). Chutiang chuan, namber 144,000 hian tâwpna huna Pathian mite chu an zavâiin huam vek a. Hetah hian ‘Israel mi zawng zawng chu’ (Juda-te leh Gentail-te), Krista lo kal lehna atâna lo inpeih leh thihna tem lova tihdanglam tûr zawng zawngte chu an tel vek a ni (Rome 11:26, 1 Kor. 15:51–53).

Thupuan 12- a hnam hrang hrang a sawite hi a ngialngana lâk chi a ni lo tih a chiang a, a chhan pawh chhim lam lalram leh hmar lam lalram luahtu Israel hnam 12-te kha chu tûnah chuan an awm tawh loh vâng a ni. Hmar lam lalrama bet ta hnam 10-te kha Assuria ramah sala hruai niin (2 Lalte 17:6–23), an va awmna ramah chuan hnam dangte nên an inneih pawlh vek tawh a. Chuvâng chuan, tûnlâia Juda-te khu chu hmânlâi hnam 12-te kha an ni tawh lo va ni.

Thupuan bung 7 -a hnam 12 a sawi ang hi Bible hmun dangah hmuh tûr a awm ve lo bawk a (Num. 1:5–15, Ezek. 48:1–29). A upa ber Reubena âiah Juda zâwk ziahhmasak ber a ni a (Thup. 7:5 leh Num. 1:15 khâkhin rawh). Tin, Namber 1 leh Ezekiela 48-a tel Dana leh Efraim hnamte chu Thupuan 7-ah hian chhawk an nih lâiin, Levia leh Jesefa erawh telh a ni leh thung si (Thup. 7:7, 8). Thupuan 7-a Efraim leh Dana hnamte ziah lan a nih ve loh chhan chu Thuthlung Hlui hunlâi khân rinna kawnga kalsual a, milem an biak tâk vâng a ni (1 Lalte 12:29, 30; Hosea 4:17).

Chuvângin, Thupuan 7-a hnam hrang hrang 12-te hi hmânlâi Israelte kha ni lovin, thlarau lama Israel-te an ni zâwk tih hriat tûr a ni a. Dana leh Efraim telh a ni ve ta lo hian Pathian mi chhinchhiaha awm tawhte zîngah hmun an chan ve lohzia a tilang. Tin, Thuthlung Thar lehkhabu-ahte hian kohhran chu Israel hnam 12-te ni anga sawi a ni ve leh bawk a (Jak. 1:1). Thupuan 7-a hnam 12-te hian Pathian mi zawng zawng, Juda an ni emaw, Gentail an ni emaw, a tâwp thlenga tuar chhuakte chu a entîr vek a ni.

Buaina huna hrehawm tuar chhuakte hnêna Pathianin thu a tiamte chu eng nge ni?

THAWHLEHNI                                                                                                       February 5

Mipui tam tak

Thupuan 7:9, 10 chhiar la. Johana hian tute nge a hmuh? A mi hmuhte chu eng tiangin nge a sawi a, khawi lam atanga lo kal nge an nih? Pathian lalthutphaha thû hmâah chuan eng tin nge an âu?

Johana hian ‘mipui tam tak, tu ma chhiar sên loh’ a hmu a, chûng mite chu ‘hrehawm nasa tak tuar chhuak a, an puante Berâmno thisena sûa tivâr tawhte a ni’ (Thup. 7:14). Chumi awmzia chu, hêng mite hi mi bîk a ni a, hrehawm nasa tak tâwk mah se Isua lakah an rinawm tlat reng tho a, an rinawmzia pawh a felna kawrfuala khuh an ni hian a entîr a ni. Heti lâia ‘hrehawm’ tih hi Bible hmun hrang hrangah kan hmu a, ringtuten an rinna avânga thil an tawrhte sawina atân hman a ni thîn (entîr nân Exod. 4:31, Sâm 9:9, Mat. 24:9, Joh. 16:33, Rome 5:3-te hi en la). Chuvâng chuan, hêng mite Adventist mi thiam thenkhatin mi 144,000-te nên khân thuhmun niin ngâi mah sela, ‘mipui tam tak’ tih hi hun hrang hranga mi, an rinna avânga hrehawm lo tuar tawh tlan sate zawng zawng an zavâia sawina a ni zâwk tih kan hre thei âwm e.

Bible hmun dang zawngah pawh a ni angin, Johanan ‘mipui tam tak, tu ma chhiar sên lohte’ chanchin a sawinaah pawh hian khawngaihna avânga chhandamna thu ropui tak kan hmu ve leh bawk a. Tlansaten chhandamna, chatuana nunna, lei thar leh vân thara luh theihna a neih chhan awm chhun chu Krista felna a ni a, chu chu khawngaihna avânga an hnêna hlan a ni.

“Lalthutphah bul chênah chuan Setana tâna thahnemngâi taka lo thawk tawh thîn, mahse meialh atanga thingthû phih chhuah ang deuh ni a, tih tak zeta inpumpêkna nêna a Chhandamtu zui tate chu an awm a. An dawt chiahah hian hun hrang hranga mi, dik lohna leh rin lohna kârah pawh Kristian nunchang tha tak chu lan chhuahtîr a, Kristian dang zawng zawngten Pathian dân an hnâwl tawh lâia châwisâng tlat a, an rinna avânga nun chân ta mi tam takte chu an ding ve leh a. Chûng mite hnungah chuan ‘mipui tam tak, tu ma chhiar sên loh, hnam tin zînga mi te, chi tin zînga mi te, mi tin zînga mi te, tawng tin zînga mi te chu puan vâr sina tûmkâu kengin, lalthutphah hmâah leh Berâmno hmâah chuan an ding ve leh bawk a ni.’ Thupuan 7:9. An râl do hun chu a tâwp ta a, tûnah chuan hnehna an chang tawh. Intlânsiakna chuan zo tawh a, lâwmman pawh an dawng tawh bawk. An kuta tûmkâu an kente hian hnehna chang an ni tih a tilang a, puan vâr an sin hian kâi dum eng mah awm lo Krista felna, tûna an tâ lo ni ta chu a entîr bawk a ni.”—Ellen G. White, The Great Controversy (Indona Ropui), p. 665.

See also  HSS 8: PATHIAN LEH THUTHLUNG

Ni e, rinna thilthlâwnpêk, Krista felna kawrfual chu hâktîr tawh kan ni a. Nimahsela, eng tin nge chu rinna chu kan neih reng theih ang a, fiahna leh hrehawm kârah pawh rinawm takin kan awm zêl theih ang? Chu âi pawha la pawimawh zâwk chu, eng tin nge chu rinna chu hun awlsam leh kan hmuingîl viau lâi te hian kan neih tho theih ang tih hi a ni (Deut. 8:11–17 en la.)

NILAINI                                                                                                       February 6

Berâmno zuitute chu

Thupuan 14:1–5 chhiar la. Mi thianghlim 144,000-te nihna langsâr deuh deuh pathumte chu eng nge ni? Hêng an nihna hrang hrangte hian Thupuan 14:12-a kan hmuh tâwpna huna mi thianghlimte nihna nên eng nge inzawmna a neih le?

Thupuan 14:4, 5 hian mi 144,000-te nihna sawiin, chu an nihna chu ni hnuhnûnga Pathian mi, Pathian thupêk âwihtute leh Isua laka rinawmte nihna nên a inang chiah a (Thup. 14:12) . Hêng mite hian buaina hnuhnûng bera Setana thinurna chu a pumhlûmin lo tuar tawh mah se, Isua nêna inzawmna nghet tak an neih tlat avângin an ding tlang thei a ni.

Thupuan 17:5 chhiar la. Eng tiang kawngin nge hêng mi 144,000-te hi hmeichhe laka intibawlhhlawh lo an nih? Eng tiangin nge an nungchang thianghlimna chu ‘Pathian tâna rah hmasa berte’ (Thup. 14:4) an nihna anga lei ata tlan tawhte a nihna nên hian a inzawm le?

Mipat hmeichhiatna dik lo taka hmanna (uirêna) hi Pathian laka rinawm lohna entîrna a ni a. Thupuan 17:5 hian tâwpna huna nawhchizuar Babulon leh khawvêl mihring zawng zawngten an la ngaihzâwn rawn tûr a fanute chanchin a sawi a. Amaherawhchu, mi 144,000-te hi chu Krista lakah an la rinawm reng tho dâwn a, Babulon leh kohhran kalsualte nêna inlaichînna bawlhlawh neih an duh ve lo vang. Hêng mi 144,000-te hian Berâmno chu a kalna apiangah an zui thîn a ni (Thup. 14:4).

Mi 144,000-te hi Pathian tân leh Berâmno tân rah hmasa berte ni tûra mihring zînga ata tlan chhuahte nia sawi a ni bawk a (Thup. 14:4). Hmânlâi Israel mite khân an thlâi thar hmasa berte chu a tha ber nia ngâiin Pathian hnênah an hlân thîn a nih kha (Nam. 18:12). ‘Rah hmasa berte’ tih tawngkam hian khawvêla awmte laka danglam, chhandama awm tawhte a kâwk thei a (Jak. 1:18); mahse, Thupuan bû-ah chuan mi 144,000-te chu mi bîk an ni tih chiang takin a lang, a chhan pawh thihna tem lova siam danglam an nih dâwn vâng a ni (1 Kor. 15:50–52). Chutiang chu a nih avângin, hun hrang hranga chhandam ni tawh mi tam takte atanga rah hmasa berte an ni tihna a ni (Thup. 14:14–16).

Kan hriat miah loh pawha thlarau lama kan lo uirê reng theih dan kawngte chu eng nge ni? Enga ti nge chutiang dinhmun hlauhthâwnawm takah chuan kan ding lo nia ngaihna hi mahni inbumna mai a nih le?

NINGANI                                                                             February 7

Kan Pathian leh Berâmno hnênah chhandamna

Thhiar la. Thupuan bû hian tâwpna huna Pathian mite chu ‘sawisêl bo’ niin a sawi a. Chutiang dinhmun chu eng tia han neih theih nge ni le?

Mi 144,000-te nihna dang leh chu a kâah dâwt thu rêng a chhuak ngâi lo va: Pathian lalthutphah hmâah chuan sawisêl bo an ni hi a ni (Thup. 14:5). Khawvêl miten Setana dâwtthu âwih an thlan lâiin, tâwpna huna Pathian mi, an thusawi leh chêtzia rêngah pawh bumna rawng kâi eng thil mah awm lote erawh hi chuan chhandama an awm theih nân hmangaihna thutak chu an dawng ang (2 Thes. 2:10, 11).

‘Sawisêl bo’ (Grik, amomos, ‘dik lohna pakhat mah awm lo’) tih hian mi 144,000-te hi Krista lakah an rinawm hle a ni tih a kâwk a. Bible-ah hian Pathian mite chu thianghlim tûra koh an ni (Lev. 19:2, 1 Pet. 2:9). Abrahama (Gen. 17:1) leh Joba (Joba 1:1) kha sawisêl bo an ni a.Kristiante pawh hi thianghlim tûr leh Pathian hmâah chuan sawisêl bo ni tûra koh a ni (Efesi 5:27, Filipi. 2:15)

Rome 3:19–24 chhiar la. Eng vângin nge he thu pawimawh tak hi kan hriat reng ang?

See also  HSS 2: NEHEMAIA

He khawvêl chanchin tâwp dâwn hnaih lamah chuan hêng mi 144,000-te hian Krista nungchang an lan chhuahtîr dâwn a. An chhandamna chuan anmahni thianghlimna leh thiltihte ni lovin, an tâna Kristan thil a lo tih tawh leh anmahni chhûnga a tih tawhte zâwk chu an lantîr ang (Efesi 2:8–10 en la). Mi 144,000-te hian an puan chu Berâmno thinsena sû-in an tivâr tawh a (Thup. 7:14) chutiang chu a nih avângin, Pathian hmâah pawh ‘bawlhhlawh kâi leh sawisêl bo’ an lo ni ta a ni (2 Pet. 3:14).

“Kan Chhandamtu hmêl chu kan lan chhuahtîr a, ‘Pathian nungchang tâwmpuitute’ kan lo nih hma chuan lei lam thil rêng rêng laka ata then thianghlim leh sil fâi lêng kan nih a ngâi . . . .

“Hringnun buaina zawng zawng hi a tâwp a, Isua ke bula râlthuamte dah a nih a, Pathian mi thianghlimte chu chawimâwi an nih hunah chauh chhandam ka ni ta, sual eng mah rêng ka nei tawh lo tiin kan sawi thei ang.”—Ellen G. White, Selected Messages, book 3, pp. 355, 356.

Chatuan atâna inbuatsaih chung leh, tha famkim nih tumna leh firfiak taka thianghlimna thu tuipuina thanga âwk si lo hian eng tin nge thianghlim takin kan nun kan hman theih ang?

ZIRTÂWPNI                                                                          February 8

Zir belhna: Ellen G. White-i lehkhabu,Selected Messages,book 3, phêk 353–357-a, ‘Sinlessness and Salvation’ tih kha chhiar ni se.

Mi 144,000-te hi tute nge ni tih thu-ah inhnialna a lo chhuak tawh thîn a. Thupuan atanga lang chiang tak chu, mi 144,000 -te hi he lei chanchin tâwp dâwn hnaih lama Pathian mi, chhuan hnuhnûng berte an ni tih hi a ni. Hêng mite hian buaina hun chu an pal tlang ang a, hremna hnuhnûng pasarihte lak atang pawhin humhim an ni bawk ang (Sâm 91:7–16); tin, an rinawmna chu chhuan hmasaa mite rinawmna teh a lo nih tawh dân ni lovin teh a ni dâwn tih pawh kan hre bawk.

Hêng mite zîngah hian tu tute nge tel dâwn tih chu hrilh kan ni chiah lo va. An nihna hi Pathian chauhin a hriat thurûk inthupte zînga pakhat a ni (Deut. 29:29). Hêng mi thianghlimte zîngah hian tute nge tel dâwn tih chu hunin a la rawn hril mai ang. He thurûk inthup chungchângah hian hetiangin vaukhânna thu pêk kann ni a:

“Krista chuan Pathianin rilrua vawn reng tûr thutak ropui leh zahawm tak takte min pêk hunah kohhranah hian thawnthu phuahchawp leh zêldin thu sawi vak vak chîngte an lo la chhuak dâwn tih a sawi a. Chûng thute chu miin an âwih a, an tâna tangkâina nei miah lo thil eng eng emaw hriat an châk tlat a nih chuan Pathian hruai an ni lo tih hriat tûr a ni. A mite hi Bible-a awm pawh ni hlei lo zêldin thu eng eng emaw sawi sawi tûrin a ti lo va. Thlarau thila an hlâwkna tûr ni miah lo zawhna, entîr nân, mi nuai khat, sînglî leh sâng lî-te hi tute nge ni tih chungchângah te hian inhnial inhnial lo se a duh a ni. Hei hi chu Pathian mi thlante hian zawh belh pawh ngâi hauh lo tûr khawpa chiangin an hre thuai ang.”—Ellen G. White, Selected Messages, book 1, p. 174.

Sawi ho tûrte:

  1. He zilhhâuna thu hi ngun takin han ngaihtuah teh le: “Pathianin thiltihtheihna min pêk zawng zawng nên hian mi nuai khat, sîng lî leh sâng lî-te zînga tel tumin i bei theuh ang u.”—Ellen G. White Comments, The SDA Bible Commentary, vol. 7, p. 970. He thu hi eng tin nge a tak ram kan chantîr theih ang? Chutianga i beihna chuan eng tin nge ni tina duhthlanna i siamahte nghawng a neih?

2.        Tâwpna huna mi thianghlim, mi 144,000-te nihna pawimawh tak pakhat chu hla thar an sa hi a ni. He hla hi mi tu mahin an sakpui ve theih loh hla bîk a ni a, an sakpui ve theih loh chhan pawh an thil lo tawn tawh atanga phuah chhuah niin, chu an thil tawn ang chu mi tu mahin an tawn ve loh vâng a ni (Thup. 14:3, 4; Thup. 15:2, 3). I nun kha en la, tûna i thlarau nun khân eng tiangin nge Pathian nêna intawnna thar i nei a ni tih a lantîr tih sawi ang che? Nge ni a, thil thar eng mah sawi tûr awm lovin, hmâna Pathianin i nuna hna a lo thawh tawh kha i sawi nawn i sawi nawn thîn zâwk le? Ama hnêna i nun hlân thar leh tûrin eng thilte nge i tih thar ngâi awm sawi rawh.

  • Krista chanchin hriat leh amah hriatna tak tak neih hi eng nge ni a danglamna? Mi tu-in emaw, “Krista chu eng ang nge ni”? tiin zâwt ta che se la, eng nge i chhânna ni ang a, eng vânga chutia chhâng chu nge i nih ang?
Tags: ,

Admin

Admin

Top