ZIRLAI 8: HMÊLMA HNEH TAWH HNU, SETANA

ZIRLAI 8-NA                             February 16–22

HMÊLMA HNEH TAWH HNU, SETANA

Chângvawn: “Ani chu Berâmno thisen avâng leh an hriattîrna thute avângin an hneh a, thih pawh huamin an nunna an ngâinêp bawk” (Thupuan 12:11, NKJV).

SABBATH  CHAWHNU                                                        February 16

Chhiar tûrte: Thupuan 12; Gen. 3:15; Isa. 14:12–15; Dan. 7:23–25; 2 Thes. 2:8–12; Thup. 13:13, 14; Thup. 19:20.

THUPUAN 1214 hian ni hnuhnûnga thil thleng tûrte chanchin inziahna lâi (Thup. 15:1–22:21) hi chhiar tûrin min lo buatsaih lâwk a ni tih hria ila. Thupuan bû chanve hma lam zawng hian anmahni haw êm êmtu khawvêla chêng kohhranhoin thlarau lama harsatna hrang hrang an tawhte chu a sawi a, chutih lâiin, a chanve dang zawng hian Krista a lo kal a, Pathian lalram din a nih thlenga thil thleng pawimawh deuh deuhte chu a thlûr bing ve thung a ni.

Bung 12-na bîkin a tum ber chu khawvêl chanchina buaina hnuhnûng ber phêna thil awm chu min hmuhtîr a ni a. Krista leh Setana-te an lo inbeih tawn tawh dân zawng zawng chu a târ lang vek a ni.

Thupuan bû-ah hian Setana chu Pathian leh a mite hmêlma lian ber nia sawi a ni a. Ani chu a taka awm ngei niin, lei leh vân pum puia thil sual leh helna chi hrang hrang lo chhuak tawhte phênah hian a awm vek a ni. Krista lo kal leh hmâ ngeia Pathian a hneh theih dân tûr kawng awm chhun chu Harmagedon indonaa a chak zâwk nih a ni tih a hre chiang hle a. Chuvângin, chu indona atân chuan a theihtâwpin a lo inbuatsaih rêng bawk a ni.

Thupuan 12 hi Setanan hnehna a chang dâwn lo a ni tih Pathian mite hriattîrna atâna ziah a ni a. Chutih rual chuan, ni hnuhnûnga Pathian kohhran la bângte chu Setanan do a tum ruhzia leh, Pathian kohhrante tâna amah hneh theihna kawng awm chhun chu Kristaah chauh a awm a ni tih pawh min hrilh bawk a ni.

*Tûn kâr zirlâi hi Sabbath nîa sawi ho thei tûrin lo inbuatsaih ang che.

 

SUNDAY                                                                                                         February 17

Hmeichhia leh Drakon chu

Thupuan 12:1–5 chhiar la. Johana hian inlârnaah chhinchhiahna ropui tak tak pahnih a hmu a. A hmasa zâwk chu hmeichhe nau vei mêk niin, a dang chu drakon a ni ve thung. Hêng chhinchiahna pahnihte hian eng nge an entîr ni a, hêng Bible châng pangate hian eng nge an sawi ni rêng rêng le?

Bible- ah hian ‘hmeichhia’ tih chu Pathian mite sawina atân hman a ni thîn a (2 Kor.11:2): hmeichhe thianghlim chuan ringtu rinawmte a entîr lâiin, nawhchizuar chuan Kristian kalsualte a entîr ve thung. Thupuan 12-ah hian ‘hmeichhia’ tih chuan Messia lo kalna Israel kha a entîr phawt a (Thup. 12:1–5); châng 13–17-ah erawh hi chuan a la bângte hringtu kohhran dik a entîr ve thung a ni.

He hmeichhia hi nî-a inthuam a, a ke hnuaia thlâ awm angin a rawn lang a. Heta ‘nî’ a tih hian Krista nungchang ropui tak, a felna chu a entîr (Mal. 4:2). Ani chu ‘khawvêl êng’ a ni a (Joh. 8:12), chuvângin, a mite chuan khawvêl hnênah hian Pathian hmangaihna êng chu an lan chhuahtîr thîn tûr a ni (Mat. 5:14–16). Thla chuan, ‘êntu ropui lo zâwk’ (Gen. 1:16) a ni ang ngeiin, chanchin tha lo thlen hnua Krista hnathawh tûrte lo entîrtu Thuthlung Hlui thutiamte kha a kâwk ve thung.

Hemi hnua Johanan thil dang a hmuh leh chu sakawlh sen lian pui mai, lû pasarih leh kî pawh sâwm lâi nei a ni a (Thup. 12:3). He drakon hi a hnu-ah chuan Setana tia sawi a ni (Thup. 12:9). Mite bum thlûkna atâna a hman thin (Isa. 9:14, 15; Thup. 9:10) entîrtu a ‘mei’ chuan vâna arsi-te khi hmun thuma thena hmun khat lâi leiah a hnûk thla a (Thup. 12:4). He a thiltih hian vâna dinhmun sâng tak lo luah tawh thin a nih avângin (Isa. 14:12–15) vântirhkoh hmun thuma then hmun khat chu a bum thlu thei a ni tih a lantîr. Hêng vântirhkoh tlu tate hi ramhuaite niin, Pathian leh a chhandamna hnathawh dodâlna kawnga Setana puitute an ni (1 Tim. 4:1 en la). Thupuan hian ‘lû pasarih leh kî sâwm nei’ nia sawi drakon chu khawvêla Setana hna thawktute an ni a ti a, chûngte chu—milem be mite hunlâia Rome (Thup. 12:4) leh thlarau biakna (Thup. 16:13) a ni. “Drakon chu Setana nia sawi a ni a (Thupuan 12:9); Chhandamtu tihlum tûra Heroda chêttîrtu pawh kha amah bawk hi a ni. Nimahsela, kum zabi pakhatna chhûnga Krista leh a mite beih nâna Setana hmanraw pui ber chu Rome kha niin, kha lalramah khân milem biakna chu sakhaw lian leh huhâng pawh nei ber a ni a. Chuvângin, a bulpui berah chuan drakon hian Setena chu entîr tho mah se, milem be mite hunlâia Rome pawh kha a entîrna lâi pawh a awm ve tho bawk a ni.”—Ellen G. White, Indona Ropui, p. 438.

 

Thupuan 12:9 chhiar la. Setana chu ‘rûlpui tar’ tia sawi a ni a. Genesis 3:15 leh drakonin hmeichhe thlah chu hrin chhuah a nih ve leha lo tihhlum nghâl a tum (Thup. 12:4) hian eng nge inzawmna a neih le?

A tîr atang rêngin Setana hian Nausên lo piang tûr Messia chu tihhlum tumin a lo nghâk reng tawh a. Khatia Messia a lo pian chiah khân milem be hnam Rome Lalram chu (Thupuan 12:4 -ah hian ‘drakon’ tia sawi a ni) a tihhlumna hmanrua atân rawn hman a tum chat rêng a nih kha (Mat. 2:13–16). Nimahsela, Nausên chu Pathian hnênah leh a lalthutphahah chuan lâk chho a ni ta daih a ni (Thup. 12:5).

THAWHTANNI                                                                                                         February 18

Leiah Setana paih thlâk a ni

See also  HSS 6: PATHIAN THU AN CHHIAR

Vâna indona a awm thu inziahna Thupuan 12:7– 9 hi chhiar la. He indona, vân atanga Setana paih thlâk a nih phah tâkna hi eng ang indona nge ni?

Setana chu indona ropui tan a nih tirh tê, Pathian sawrkâr laka a hel hnu rei vak lovah khân vân atangin paih thlâk a ni a. Paih thlâk a nih chhan pawh vâna Pathian lalthutphah awm chu chan a, ‘Chungnungbera anga’ awm a duh vâng a ni (Isa. 14:12–15). Alang apauvin Pathian lakah a hel a; mahse hneha awmin leiah a rawn râltlân a. Amaherawhchu, Evi leh Adama-te kha bumin he khawvêl chunga rorêltu a lo ni ta a ni (Luka 4:6). Amah leh amah chu he khawvêl rorêltu nia a inchhâl ve miau si avângin (Joh.12:31) vâna Pathian fate rorêlnaah pawh lei âiawh anga han tel ve thei ni-ah a inngâi a (Joba 1:6–12). Amaherawhchu, krawsah khân hneh tawh a nih tlat avângin a tirhkohte nên leiah hian mi tâng angin khung khâwm an ni ta reng a, hremna an dawn hma loh chu an la awm reng rih dâwn nghe nghe a ni (2 Pet. 2:4, Juda 6).

A thihna avâng khân Isua chuan bo tawhte chu a tlan chhuak leh a, lei leh vân pum pui hmâah hian Setana nungchang dik tak chu puan chhuah a ni ta bawk. “Setana chuan a inthupna kâwr chu a thlêr ta vek a ni tih a hmu a. A thiltih vêl dân zawng zawng pawh suala tlu ve lo vântirhkohte leh vân mi zawng zawngte hmâah pharh a ni bawk. Amah chu tualthattu a ni tih amah ngeiin a puang tawh a. Pathian Fapa thisen a chhuah avâng khân vân mite lainat pawh a hlawh zo tawh lo. Chuvâng chuan, a hnathawh theih chin tûr siamsak a ni ta a ni.”—Ellen G. White, Chatuan Nghahfâk, p. 745. Lei leh vân pum pui hmâah hian lei chunga rorêltu nihna chu Setana lak ata Isua hnênah pêk lêt leh a ni tawh a, ani chu lei chunga rorêltu dik tak a ni ta a ni (Efesi 1:20–22, Filipi. 2:9–11).

He thil thleng hi Isua chuan hetiang hian a lo sawi lâwk a: “He khawvêl hi ngaihtuahin a awm mêk a, tûnah hian he khawvêl lal hi paih chhuah a ni ang” tiin (Joh. 12:31, NASB).

Hetianga Setana chunga rorêlna nên hian, “Kan Pathian chhandamna leh chakna, a lalram leh a Krista thiltihtheihna-te chu a lo thleng ta a ni” (Thup.12:10, NKJV). Mahse, Setana chuan leia Pathian mi awmte chu eng emaw chen a la tina thei cheu tho a; mahse ‘hun tlêm tê chauh a nei’ tih hre chungin a ni tawh thung ang (Thup.12:12, NKJV). A hun ‘tlêm’ tawhzia chu a hriat chian êm avâng chuan natna, tawrhna leh chhiatna a thlen theih nân a tih theih zawng zawng a ti rêng bawk a nih hi.

 

Thupuan 12:11-in Setana laka kan lo invên dân tûr a sawi chu eng nge ni? (Efesi 6:10–18 pawh en la.)

THAWHLEHNI                                                                                                         February 19

Leia indona chu

Thupuan 12:13, 14 chhiar la. Khatia vân ata paih thlâk a nih tâk hnu khân ni/kum 1,260 chhûng zet chu kohhran a beih chhunzawm ta a. Hemi hun chhûnga Pathianin a kohhran tâna thil a tih chu eng nge ni?

“Vâna unaute hêk thîntu a nih avânga Setana paih thlâk a nihna chu Kristan ama nun hlâna hna ropui tak a thawhna hmang khân tlingtlâk a ni ta a. Setana chuan Pathian la dodâl zui zêl mah se, tlanna ruahman chu tihhlawhtlin chhoh zêl a ni tho a. . . . Setana chuan, a lo pâwng lâk tawh a lalram chu chhuhsak lêt a ni ve leh dâwn a ni tih a hriat avângin Pathianin ama anpuia a siam mihringte chu a tam thei ang ber tihboral a tum ruh hle mai. Mihringte hi Kristan a hmangaiha a lainat êm avângin ani chuan a hâw hle a, chuvâng chuan an boral theihna tûrin an chungah bumna tinrêng hman tumin a inbuatsaih a ni. A dinhmun a chhe hle a ni tih a hriat avângin nasa leh zualin hna a thawk bawk.”—Ellen G. White, The Spirit of Prophecy, vol. 3, pp. 194, 195.

Setana chuan leia Kristan a hmangaih ber—kohhran laka a thinrimna hrîkthlâkna hmangin hna a thawk chhunzawm zêl dâwn a ni tih a chiang a. Amaherawhchu, kohhran hi Pathianin a vênghim tlat dâwn a, leia thlalêr hmun khawhar, mite tlawh pawh lohnaah ni/kum 1,260 chhûng a awm rih ang.

Thupuan 12-ah hian Setanan tihduhdahna a thlentîr hun chhûng hi vawi hnih sawi lan niin, a hmasa zâwk chu ni/kum 1,260 (Thup. 12:6) tia sawi a ni a, a hnuhnûng zâwk chu ‘hun khat leh hunte leh hun chanve’ (Thup. 12:14) tia sawi a ni ve thung. Hêng hun chhûng sawina pahnihte hian Daniela 7:23–25-a ki tê tak tê-in tihduhdahna a kalpui hun chhûng tûr a sawi kha a kâwk ve ve a. Bible -ah hian hrilhâwkna thua ‘nî’ tihte hian ‘kum’ a entîr. Khawvêl chanchin kal tawha he hun hrilhlâwkna rem bertu chu A.D. 538–1789 kha a ni a. Hemi hun chhûng hian Roman Catholic kohhran chuan kohhran leh ram rorêlna lama thuneitu ber a nih ang ngeiin khawthlang ram zawng zawng khu a thuhnuaiah a dah vek a. Chu chuan kum 1798-a Napolean-sipai lal, General Berthier-an pope a tukdawl lailâwk thleng kha a awh a ni.

See also  SINNA 12: CAESAREA AH A KIKHUMCIPNA

He tihduhdahna hun rei tak chhûng hian drakon chuan hmeichhia chu tihhlum tumin a kâ ata tui tam tak a pik chhuak a. ‘Tui’ tih hian mipuite leh hnamte a entîr (Thup. 17:15). Hemi hun chhûng hian Rome chuan Pathian mi rinawmte bei tûrin sipaite leh hnamte a tîr chhuak nasa hle. He hun hrilhlâwkna tâwp dâwn hnaih lamah hian leiin a kâ a âng a, drakonin a pik chhuah tui zawng zawng chu lem zo vekin hmeichhia chu a chhanchhuak a, hmun him a siamsak ta a ni. Hei hian America-in a rama râltlân lûtte sakhaw zalênna nêna a lo dawnsawn kha a entîr a ni (Thup. 12:16).

Tihduhdahnain a awh hun chhûng rei zâwng, kum 1,260 hi ngaihtuah la. Hetiang taka rei a ni hian thil hrang hrang, entîr nân Krista lo kal lehna tih te hi kan hriatthiam dân a tawngchham êm êm a, keimahni thlîrna atang chuan a rei hle thei a ni tih hrethiam thei tûrin eng tin nge min tanpui le?

NILAINI                                                                           February 20

A la bângte laka induna

Thupuan 12:17 chhiar la. Tâwpna hunah chuan tute lakah nge Setana indona a puan dâwn le?

‘A la bâng’ tih emaw, ‘a la awm chhun’ tih emaw hian mi tam zâwkten rinna an phatsan lâia Pathian laka la rinawm tlatte chungchâng a sawi a (1 Lalte 19:18, Thup. 2:24). Tâwpna hunah chuan khawvêla mihring chêng tam zâwkte hi Setana lamah an tang ang a, chutih lâiin, kum 1798 hnua Pathianin a koh chhuahte erawh chu Setana thinurna hmâah pawh Krista lakah an rinawm tlat dâwn tho a ni.

Thupuan 12:17 -in a la bângte nihna a sawi pahnihte chu eng nge ni? Eng tin nge tâwpna huna Pathian mi la bângte zîngah chuan kan tel ve a ni tih kan inhriat theih ang?

Tâwpna huna Pathian mi la bângte hian Pathian thupêkte chu an zâwm a. Thupuan 13 hian Thu Sâwm Pêka a hmasa palî-te hi tâwpna hunah chuan a pawimawh hle dâwn tih a sawi. Tin, thupêk hmasa palî-tena an sawi ber chu chibai bûkna chungchâng a ni a. Buaina hnuhnûng bera thu inchuh ber ni tûr chu chibai bûkna chungchâng bawk hi a ni ang. Khawvêl mipuite hian sakawlh lem chu chibai bûk an thlan lâiin a la bângte erawh chuan Siamtu Pathian chu chibai an bûk ve thung dâwn a (Thup. 14:7). Thupêk palî- na, Sabbath hian Pathian chu min siamtu Pathian a ni tih min hrilh a, chu tak chu tâwpna huna buaina hnuhnûng ber a thlen hunah pawh inhnialna a chhuah chhan tûr a ni rêng a ni.

Tâwpna huna a la bângte nihna dang leh chu ‘Isua Krista hriattîrna thu,’ Thupuan 19:10-in ‘hrilhlâwkna thlarau’ tia a sawi an nei hi a ni. He lâi châng hi Thupuan 22:9 nêna kan en kawp chuan, Johana ‘unau,’ Isua hriattîrna thu neitute chu zâwlneite an ni tih kan hmu a. Chuti a nih chuan, ‘Isua hriattîrna thu’ tih hian Johana hnêna a tih ang chiaha (Thup. 1:2) a zâwlneite kal tlanga Isuan thutak a hriattîr kha a kâwk tih a hriat theih a. Thupuan bû hian tâwpna hunah chuan Pathian miten ‘hrilhlâwkna thlarau’ an neih tûr thu a sawi a, chu chuan hun harsa -ahte kâihruaiin Setanan anmahni buma tihborual a tumna lakah a vêng tlat ang. Keini Seventh-day Adventist-te hnênah hian chu hrilhlâwkna thilpêk chu Ellen G. White-i rawngbâwlna leh thuziakte-ah hian pêk a ni.

‘Hrilhlâwkna thlarau’ zâra fiah tak taka thil kan hmuh/hriatthiam thenkhat chu engte nge ni? He thilpêk hian, a mi mal ang leh a kohhran ang pawhin eng mawhphurhnate nge min pêk le?

NINGANI                                                                           February 21

Tâwpna huna Setana hnathawh dân tûr

Thupuan 12:17 chuan Setanan khawvêl mipuite hmin a, Krista zuitu rinawmte ngei pawh a bum thlûk theih nân ruahmanna dang a siam tâk thu a sawi a. Hun kal ta zawng zawngte kha kan thlîr kîr chuan kohhran chhûnga dâl tial tialna hmang leh pâwn lam atanga tihduhdahna leh tihluihna hmanga Setanan Pathian chhandamna hnathawh a lo dodâl tawh thin dân kan hmu ang. He a ruahmanna hi kum za eng emaw zât chhûng chu lo hlawhtling viau thîn tho mah se, Kohhran Siamthatna leh Pathian miten Bible thutak an lo hmuhchhuah belh zêlnate khân a rawn tithuanawp ta tlat mai a. Amaherawhchu, a hun a tlêm tawh a ni tih hriain ngawrh leh zualin hna a thawk ta a, chutichuan, tâwpna huna Pathian mi la bângte ‘do tûrin’ a thawk chhuak ta a ni (Thup. 12:17). A la bângte hi bumna chi hrang hrang hmang pawhin a bei tel dâwn a.

Ramhuaite chuan thilmakte tiin, thlarau biaknate pawh a rawn chhuak bawk ang (Thup. 16:14). Hetianga a hnathawh dân phung a thlâk ta hi Thupuan bû-in chanchin kal tawhte sawi tawh lo va, tâwpna hun zâwk a sawi ta daih nên pawh hian a inrem chiah a ni (Mat. 24:24).

Thupuan 12–22-ah hian tâwpna huna Setana thiltihte sawina atân ‘bum’ tih thumal a hmang tam hle mai a, hei hian chhan tha tak pawh a nei nghe nghe. ‘Bum’ tih thumal hi tâwpna huna Setana thiltihte sawi hawn nân (Thup. 12:9) leh khâr nân (Thup. 20:7–10) hman a ni.

2 Thessalonika 2:8–12 leh Thupuan 13:13, 14 leh Thupuan 19:20-te hi chhiar la. Tâwpna huna Setana bumna chu eng ang nge ni?

See also  ZERUBABELA LEH EZRA-TE HUN LÂI CHANCHIN

Thupuan 12–20 hian khawvêl bum tuma Setanan hna nasa taka a thawh thu a târ lang a (Thup. 12:9, 13:14, 18:23, 19:20, 20:8 en rawh). A hna thawktu atân hian politic leh sakhaw chakna a hmangin, drakonin a entîr milem be mite hunlâia Rome kha a hmang phawt a (Thup. 12:4, 5), chu chu tuifinriat atanga lo chhuak sakawlhin a entîr thiltihtheihnain a rawn zui ve leh a (Thup.12:6, 15; Thup. 13:1–8); tichuan, a tâwpah lei atanga lo chhuak sakawlhin a entîr thiltihtheihna chu a hmang ve leh dâwn ani (Thup. 13:11).

Thupuan lehkhabu tâwp lamah hian hêng Setana hmanraw pathum—drakonin a entîr milem biakna/thlarau biakna te; tuifinriat atanga lo chhuak sakawlhin a entîr Roman Catholic Kohhran te; lei atanga lo chhuak sakawlh emaw, berâmno ang tak sakawlh emawin a entîr Protestant kohhran kalsualte hi khawvêla Pathian thiltihte dodâl tûrin an tang ho vek a ni kan hmu a. Mite chu Pathian hawisantîr tûr leh, ‘Pathian Engkimtitheia indona ni ropuia’ Setana lama tantîr tûrin bumna hna an thawk ho dâwn a ni (Thup. 16:13, 14, NKJV). Hêng sakhaw dik lote hi Krista lo kal leh hunah tihboral vek a ni ang a (Thup. 19:20), chutih lâiin Setana entîrtu drakon, leia lalte hmanga hna thawk thîntu (Thup. 12:9) erawh hi chu kum sâng rorêl zawh a nih hnu-ah chauh tihhlum a ni ve thung dâwn a ni (Thup. 20:10). Thupuan bû hian tâwpna huna bumna hi do a hautak hle dâwn a ni tih min hrilh a, mi tam zâwk hi chuan boralna kawng an thlang dâwn rêng a ni (Mat. 7:13).

Thupuan bû -ah hian tâwpna huna Setana bumnate hrethiama hneh thei tûra finna leh thlarau lam hriatthiamna neih a tûl thu hmun hnihah ngawt kan hmu a (Thup. 13:18, Thup. 17:9). Heta finna a tih hi eng ang finna nge ni? Jakoba 1:5 chhiar la, chu finna chu eng tin nge kan lo neih theih ang?

ZIRTÂWPNI                                                                       February 22

Zir belhna: Ellen G. White-i lehkhabu, Indona Ropui, phêk 518–530-a, ‘Setana Thangte’ tih kha chhiar ni se.

A hmasa berin, Thupuan 12-in a tum chu tâwpna huna thil thlengte hi Krista leh Setana inkâra indona awmin a hrin chhuahte a ni tih Pathian mite hriattîr a ni a. He lehkhabu hian Pathian mite chu tûna a hmachhawn mêk thilte leh, nakin lawka nasa leh zuala an la hmachhawn leh tûr chu hmêlma hlauhawm leh fing tak a ni tih a hrilh a. Paula pawh khân tâwpna hunah chuan Setana chu thiltihtheihna zawng zawng te, chhinchhiahna zawng zawng te, dâwt thilmak zawng zawng leh boral tûrte zînga inbumna verther zawng zawngte nên a lo thawk dâwn niin a sawi a, chutianga a lo thawh dâwn chhan chu [hêng mite hian] chhandam an nih theihna tûr hmangaihna thutak chu an lo pawm duh miau loh vâng a ni (2 Thes.2:9, 10, NKJV).

Thupuan bû hian nakîn hun chu ngun taka thlîr a, Pathiana innghah chu ngaih pawimawh bera neih tûrin min chah a. Chutih rual chuan, Setana chu chakin, thil tih vêl dân hreh tak pawh ni mah se, Krisa hneh tûr erawh chuan a chak tâwk chuang lo a ni tih pawh min hrilh tho bawk a ni (Thup. 12:8 en la). Pathian mite tân chuan Setana leh a ramhuai sipaite lo hneh tawhtu-ah chauh beiseina a awm a. Tin, amah zuitu rinawmte hnênah chuan “khawvêl tâwp thleng pawha awm zêl” a tiam tawh bawk a ni (Mat. 28:20, NKJV).

SAWI HO TÛRTE:

  1. Keini Seventh-day Adventist-te hian tâwpna huna kohhran la bâng chu ni-ah kan inngâi a. Hamthatna ropui tak zawng a va ni êm! Chutih rual chuan, kan ko-ah mawhphurhna sâng tak nghah a ni thung si! (Luka 12:48.) Amaherawhchu, he hna hian mi mal chhandamna a keng tel emaw kan tih lohna tûrin eng vângin nge kan fîmkhur hle a ngaih le?

 

  1. “Setana thiltihtheihna chungchâng hi kan sawi ho tam mah mah a. Ni e, Setana hi thiltihthei tak chu a ni alâwm; mahse vân ata sual paih chhuaktu Chhandamtu thiltithei tak kan neih avângin Pathian hnênah lâwmthu ka sawi a ni. Kan hmêlmapa chanchin kan sawi a, a laka kan him theih nân kan tawngtâi a, amah kan ngaihtuah a; ani chu kan ngaihtuahnaah a lang ropui pui tial tial leh thîn nghe nghe. Tûnah hian enga ti nge Isua chanchin kan sawi zâwk loh ang ni? A thiltihtheihna leh a hmangaihna ngahzia te hi i sawi thîn ang u. Setana hi, a nihna tak âia thiltithei zâwka kan ngaih hian a lâwm êm êm thîn asin. Isua chu en ila, a chanchin ngaihtuah ila, chutianga amah kan en reng chuan amah ang kan lo ni ve dâwn a ni.”—Ellen G. White, The Advent Review and Sabbath Herald, March 19, 1889. Eng tiang kawngtein nge Kristiante hian Setana chu thiltithei tak angah kan chuah thin? Kawng leh lamah chuan, Setana chu awm tak tak lo leh thil eng mah tih theih nei lo anga ngaihnaah hian eng thil hlauhawmte nge awm ve tho le?
Tags: ,

Admin

Admin

Top