PAUL TANGTHU

Zo Phualva Vol 09, Issue 07:

Paul pen Roman Empire sungah min kidawkzo mi nuamsa innkuan khat sung-a piang ahi hi. Asia gam Turkey gamtaw Tarsus khuapi ah suak hi. Jewish minam thu-um Pharisees khauhpai mahmah bangkua sung pan khangkhia hi. Italy gampua Roman Empire sung a om Jews te pen Roman citizen suakzo om zen lo hi. Italy gampua om napi Roman citizen ngahte pen mi maimai hilo hi. Tua tungtawnin i et ciangin, Paul nulehpate pen mihau huzaap nei mi thupi ahihlam kilang hi.
Kum-14 a phak laitakin Judaism biakna Rabbi sia sin dingin Jerusalem kipaisak hi. Asiapa pen Gamaliel hi a, Gamaliel Trade School cileng kikhiallo ding hi. Tua biakna Sangah nuntak kivak nading ngimna-in siamna namkim kisin sak hi. Haksatna a om ciangin amau dinzawh nading in akisin ahi hi. Paul in puanbuuk bawldan sin hi.
Paul pen pasal lungtangpha hi a, ama upna leh tupna khahsuah ngeilo hi. Judaism upna siksanin Christiante nakpitak buaisak hi. Stephen suangtum tawh denglup ding-a hanthawn makaipi ahi hi. Inn khat khit inn khat banpai-in thu-umte manin thonginn sungah a khumpa ahi hi. Christian bawlsia dingin Damascus khualam manawhin pai hi.
Lampi-ah a pailaitakin thum-vei vilvel Zeisu in hopih hi. “Saul, bang hangin kei hong bawlsia na hiam?” ci hi. Paul in, “Ka hong bawlsiat nang kua nahiam?” acih ciangin, “Keimah Zeisu ka hi hi” ci’n dawng hi. Paul pen nungzuipite mah bangin Zeisu tektek thuhilhna ngah hi. Gentile minamte khuavak puak dingin sawl hi. Ama khuavak muhna pen Zeisu tungpan a ngah ahi hi. Bangzah ciang dong Zeisu in pantah thuhilh cih kithei khinlo ahih hangin thuthuk-thuman pen nungzui dangte sangin mu zaw hi.
Jerusalem Council a makai ahi Peter, James te kiangah member hihna vala a, Barnabas tawh kikhawlin Missionary na seem dingin Cyprus lam manawhin paikhia uh hi. A paina khua Antioch, Pisidia, Iconium, Lystra, leh Derbe khuate ah Stephen a bawl bangmah in thah dingin kizong tawntung hi. Pianthakna ngah khit Jerusalem vaciah kik hi. AD-50 pawl hihtuak hi. Christian taktak hidingin muangzo nailo uh hi.
Tua khit ciangin Paul missionary na seemin kuankhia leuleu hi. Galatia, Phrygia, Macedonia leh Greece dong va pha hi. Athens khuapi-ah mipi mai-ah (philosopher) te tawh kinial uh hi.
Tua lai munah Sawltak Lai Siangtho (Acts) agelh nungzuipi Dr Luke tawh kimu uh hi. Missionary thumvei a pai khit ciangin Jerusalem ciahkik a, Sanhedrin kici Jews biakna makaipite tawh nasiatakin kinial leuleu uh hi. Tua thu hangin Israel gambuppi kilok a, patau uh ahih manin Paul manin Caesarea puak uh hi. Tua lai-ah tamveipi thusit uh hi. Mipi buaisak ding a lau manin Governor Felix mangpa in keem hi. Rome Emperor tungah a zu khan kah a, tembaw tuangin Rome manawhin pai hi. Malta kici tuikhulh a tunna-ah huihpi tuak a, tembaw kitamzan dikdek hi. Paul thungetna tungtawnin Pasian in vantungmi khat sawlin “mi khat zong pelem loding hi, Rome kumpipa mai-ah na ding ding hi,” ci-in hilh sak hi.
Paul simloh nungzuipi Christian masate pen Barnabas dongin Jewish lungtang vomlai uh hi. Paul pen Gentile mite lakah missionary thupuak makaipi ahi hi. Gentile minam cih ciangin Jews lo khempeuh gennuam ahi hi. Christian suaknuam khempeuh Jews minam suak masa ding hi, ci-in ngaihsun lai mawk uh a, Paul in, tua bang ding hikei, ci-in nialin thuhilh den hi. Zeisu hotkhiatna pen mi khempeuh aading ahi a, “thuciamthak ” tawh kisai hi. Jews sihsan kullo hi, ci hi.
Abraham tungtawn a kipia thuciam pen “Upna tungtawn a diktanna” ahi hi. Christian hoih suah nadingin Jews minam tawh kizop kullo hi. Pasian misiangtho hih nadingin Pawlpi khat peuhpeuh min puak phot sese kul lo hi. Zeisu Upna tawh Pasian direct kizuan thei hi, cihpen Paul message ahi hi. “Paul pen Gentile te kiangah tetipang dingin kateel hi,” ci’n Pasian in gen hi. Asia minor, Greece, Macedonia leh Rome kumpipa tokhom mai-ah maitang kituahin teti pangsak hi. Paul ii philosophy leh Theological movement in leitungbup Christian Pawlpi upna sungah lomkhat suaksak hi.
Paul sih pen Roman kumpi gilo-a minthang NERO a khan laitak ahi hi. Christian a bawlsiat nop manin khuapi hal hi. Christian te hal hi, ci-in alomlom in that hi. Mei tawh a hingtang khawngin halin meivak khuamin zang hi. Humpi hon tawh Stadium kimawlna tualpi-ah ahonin khahin laithaangsak hi. Ahingtangin savun tawh tuamin uite nesak hi.
Greek Olympiad kici sakol-leeng taikidemna tawh kisai 65-kum a kihel ding lawp mahmah hi. Ahuang sungah kisinin a nasem silate ensak hi. Prove zo mahmah lo hi. Lungkim zahin siam kisalo hi. Ahun kicing zaw angah nadingin kum-67 ah khinto hi. A ngeina bangin cileng sakol-4 tawh chariot kaih ding ngeina ahi hi. Aman sumgolh pia-in sakol-10 kaisak hi.
Kidemna ah sakol-leeng kibungin kilumlet hi. A cingte in huhin kipan kik a, kilumlet leuleu hi. Anihveina ciangin thokik zo nawnlo hi. Golhguk ne thukhente in, “taisuak hileh zo hamtang ding hi,” ci-in zosak veve mawk hi. Greece pan hong ciah ciangin Augustus in gualzawhni aa a zat Chariot leeng tung tuangin, kham tawh kibawl aksilim tawh kizem Greek puantualsan silhin, a lutungah Olympic crown khu in, a taklam khutah gualzawhna laipi Pythian laam kawmsa-in, galkap honpi in a nungzui -in gualzawhna pawi bawl hi. Hih gualzawhna pen zuauthu ahi hi. Hih kumpi gilopa pen Galba in a kumpigam simin la a, galte khut sungah sinuamlo ahih manin AD-68 kumin amahmah kisunlum hi.
Paul in a sihma deuhin pawlpite laikhak hi. Kumpipa in sim masalo-in thongkia mikhat laikhak kipaisak ngamlo hi. Kidawmtak in aat kul hi. Tua laitakin Nero in thah dingin thukhensatna nei khin hi.
A laikhak sungah “I have fought the good fight, I have finished the race, I have kept the faith. Henceforth there is laid up for me the crown of righteousness, which the Lord, the righteous judge, will award tome on that Day, and not only to me but also to all who have love his appearing.” 2 Timothy 4:7-8.
Hih kammal in Nero kumpipa mitnauta sawk kha taktak hi. Pasian kamsangte leh Christian sittaktakte pen thuneite leh mipi pahtak hingeilo hi. Puapaihna thuak, bawlsiatna thuak, mudahna thuak hitawntung hi. “Hun nunung ciangin kamite in kamsangpa bangin gen ding” cingiau hi. Pasian misiangtho galhangte in dikzul ngeilo hi. Maivilna tawh thuman phualsel ngei lo hi. Zuauthu ah lungdam theilo hi. Zuau leh khemna thuakzo lo uh a, teltak tangtakin pholak tawntung hi. Paul laikhak in Nero kumpipa maizum sak mahmah kha ding hi.
“Galdona pha kado zo hi. (Nero bangin lampi-ah ka tuuk kei hi.) Katai zah ding among dongin ka taizo hi. (Nero bangin matunlo-in akhawl ka hi kei hi) Upna thu kazui khinzo hi. Thuman thukhenpa Topa in tua ni ciangin hong piak ding ahi, thumaanna kumpi lukhu kikoih khol zo hi. Kei bek hilo-in Amah hong kilangding cih a lamen khempeuh a hong pia ding hi. (Nero ngah kumpi lukhu bangin thuman lopi tawh thukhente piak kumpi lukhu hilo hi.) Olympic kidemna pan Rome hong ciah kik khit AD-68 kum kipatcil pawlin, Nero in Paul that hi.
Paul dinmun pen “nang hong uk mangte thu na mang in,” cih bang bek tawh thu khempeuh kaikuunin melhlo hi. Thuman a man bangin in gen hi. Ama ngawng tan dingpa mai-ah thanemnate nakpi-in hilh ngam hi. Ei, tu hun Christian thuhilh siate, member te nungzuipite bangin kamsangpa bangin, hangtakin din ngam ding, Paul in hong lak hi. Mihing diksak mikhempeuh Pasian mai-ah dik tuanlo uh hi.
Pr Thang Siangh

Download (PDF, 412KB)