Zomi Bible: Siantong Study Bible

ZOMI BIBLE

Thang DL Pau Mung
Siantong Study Notes

Tangthupha a hong puak Mikangte in Laisiangtho version tuamtuam 450 kiim nei ta uh a, i kiang naia i sanggam Mizote in version nga (5) nei pan uh hi. Zomite in zong version nih leh thum i neita uh a, version khata kitel i sak phat lohte a dang khat in hong telsak thei ding ahih manin a lungdam huaia i ngaihsut theih ding thupi hi. Tuin Laisiangtho version thak – Zomi Bible a kici, Thuciam Thak, Late leh Paunak kihel i nei kik uh a, hih Laisiangtho koi bang ahi hiam cih vel (review) khawm leng ka ci hi.

Translator : Zomi Bible pen Revd. Suan Khan Thang (Sia Suan) in a lehkhiat hi a, amah pen Mizoram a om Zomi Baptist Church (ZBC), Pastor Pension khat ahi hi. Sia Suan pen leitung pilna lamah B.A. (Guwahati University, India) hi a; Laisiangtho lamah B.D. (Union Biblical Seminary, India), leh M.T.S (Virginia Theological Seminary, USA) degree-te ngah hi.
Topa’ gam aa dingin Evangelist, Missionary, Pastor leh Secretary cihte kum 2013 kum bei dong a sep zawh ciangin pension hi.

Translation : Sia Suan in USA gamah kum khat sung tawntung Laisiangtho lehkhiatzia sin a, Wycliffe Bible Translation vaisaite’ sehna tawh kizuiin Ghana gama Lelemi mite Bible translator ahi Dr. Andy Ring in a lai lehte velsak (sit) zel hi. Laisiangtho tei dingin a pilna leh siamna in cin hi cih a muh uh ciangin leh phalna pia uh hi.

Chin Baptist Association (CBA) pawlpi in Laisiangtho version thak neih ding kisam a sak thu tawh kizuiin, March 1993 in Kalaymyo ah Rev. Kam Khaw Thang leh ZCLS makaite tawh a kimu dingin Sia Suan sawl uh hi. Makaipite’ thukimpihna leh lamlahna tawh lawp takin hong ciah kik a, CBA pawlpi sehna tawh kizuiin Thuciamthak leh hong kipan hi. Ahi zongin Mizoram-ah ZBC pastor hong sep ciangin a van gik lua ahih manin tawlkhat dinkhawl a, a pension khit ciangin zom kik a, Topa’ huhna tawh May 5, 2019 niin Laisiangtho thak apna hun zang thei hi.

Zomi Bible pen puahphatna (revision) hi bek loin version thak hi zaw pian hi. Version khat bek dapphaha kilet hi loin etkak kawikawia kibawl hi a, a diakin New King James Version, New American Bible leh Revised Standerd Version cihte limet diak hi.

See also  NUNGZUIPITE KALSUANNA & SIH DAN

A deihna : Laisiangtho, Pasian Kammal pen a hoih bukim hi, i cih laitakin a kiteikhiatna (copying) leh a kilehkhiatna (translation) lamah deih a bat zawh lohna pawlpawl om thei zel hi. Zomi Bible pen a translator in a gen mah bangin, i neihsa Laisiangtho (Tedim Bible) nawlkhinna dinga kilet hi loin i neihsa tawh zat khop ding leh etkak ding deihna ahih banah kammal a kim zaw leh nam dangte’ aa tawh a kinai zaw ding deihna ahi hi.

ETKAKNA

I Laisiangtho neihsa (Tedim Bible) leh hih Zomi Bible etkakna tawm khat i nei nuam hi. Mihing pen i mel a kibat loh mah bangin hoih i sak zong kibang lo hi. Tua ahih manin hoih ka sak zawkna leh kicing ka sak lohna pawlkhat kong lak nuam hi. A hoih zaw i theihna dingin English Bible tuamtuama kizang thumalte tawh zong i etkak khawm ding hi.

Zomi Bible hoih zaw ka sakna pawlkhat

ENGLISH / ZOMI BIBLE / TEDIM LST / REFERENCE

1. Virgin / nungak siangtho / nungak / Matt. 1:23
2. Daily bread / nisim an / khamkhop an / Matt. 6:11
3. New tongues / pau thakte / pau dangte / Mk. 16:17
4. Made / bawl / piangsak / Joh. 1:3
5. Receive / sang / thu ngai / Joh. 1:12
6. Baptized / kibaptize / kidimsak / Sawl. 1:5; 11:16
7. Days / nite / ni / Sawl. 2:18
8. Spiritual gift / khalam letsong / thupha / 1 Cor. 1:7
9. Tongues / kamtuam pau / pau lamdang / 1 Cor. 14
10. Redemption / tatkhiatna / hotkhiatna / Heb. 9:12

11. Tu lai English version tamzawte in, “God is spirit” a cih pen, Tedim Bible in, “Pasian pen Kha Siangtho ahi hi,” ciin Trinity-a mi thumna kawk a; Zomi Bible in, “Pasian pen kha hi” ci-in Pasian pianzia teltakin hong lak hi (John 4:24).

12. English Bible sunga “First day of the week” kici pen Zomi Bible in “nipikal sunga ni masa bel ni” ci a, Tedim Bible in “sani nitak” ci hi (Sawl. 20:7).

13. English Bible a, “A third of the stars” kici pen Zomi Bible in “aksite, seh thum suah seh khat” ci a, Tedim Bible in “aksi sehsawmsuah sehkhat” ci hi (Mang. 12:4).

See also  NUTE’ NI (MOTHER’S DAY)

14. Tedim Bible in Jesu pianna, “Nazareth khua” ci a; Zomi Bible in “ama khankhiatna” ci zaw hi (Mk. 6:1).

15. Tedim Bible in, “Upna hanga hotkhiat, hehpihna tawh ngah” cih bangin gen a; Zomi Bible in, “Hehpihna hanga hotkhiat, upna tungtawna kingah,” ci zaw hi (Eph. 2:8).

16. Tedim Bible in tui sunga kiphumna (water baptism) pen Khris tawh kipawlna bangin gen a; Zomi Bible in Khris sunga kiphumna (baptism into Christ) thu gen zaw hi (Rom 6:3-4).

17. Tedim Bible in, “tui sungah na phum un” ci ahih manin tui sunga kiphum tektek pawlpite bek in sim nuamsa uh a; Zomi Bible in, “na baptize un” ci ziau ahih manin tuitak/tuibuah a zang pawlpite in zong lunghiang lo takin zang thei ding uh hi (Matt. 28:19).

18. Tedim Bible in, Korin pawlpite sungah Pasian misiangtho hinapi-a a siat gamtat mi pawlkhata om bangin gen hi; Zomi Bible in ahih leh tua a sia gamtatnate pen pawlpi sungah hi loin Tapidaw a suah ma uha a gamtatna uh ahih zawkna “Nidangin” cih tawh hong lak hi (1 Cor. 6:11).

Zomi Bible a bukim lohna pawlkhat

Khat leh khat muh dan leh san dan kibang lo thei ahihna tawh kizuiin Zomi Bible a hoih zawh lohna hi-a ka ngaihsut mun pawlkhat om hi. Siapa in a thukim leh puahphat kik cianga bawlphat dingin hih thute kong lak hi.

1. Johan 15:16 sunga Topa Jesu in “Keima’ min tawh Pa kiangah na nget peuhpeuh uh hong pia ding hi,” a cih pen Zomi Bible in “Pa kiangah” cih kammal koih kha lo hi.

2. Galati 3:13 “Sing (tree) tunga kikhai mi peuhmah” kici pen Zomi Bible in, “siangkhuam tung” ci hi (Jehovah’s Witnesses pawlte san dan tawh kibang hi. Amaute in Jesu pen singkikalh[cross] tunga kikhai hi loin singkhuam [stake] tunga kikhai hi zaw ci uh hi). Singkhuam cih sangin sing ci ziau leng kikhia khial lo zaw dingin ka ngaihsun hi.

See also  An Adventist Remnant in the Wilderness

3. Galati 3:16 “suan leh khakpa” cih pen “suanpa” cih bek hi leh hoih zaw ding hi. Pasal khat (Jesu Khris) genna hi. “Suan” pen tapate genna hi a, “khak” pen tanute genna hi.

4. Galati 3:28 sungah “sila leh sila lo, numei leh pasal” cih thu teng kinusia hi.

5. Hebru 6:6 Zomi Bible in, “A pukmangsan kikte” a cih pen “a pukmangsan uh leh” (If they fall away) cih ding hih tuak zaw hi (Tedim Bible zong hi veve – tg. 4 en in). A pukmangsan a om thu hong hilh lo a, a om bang hi leh (conditional –“if”) cih hi zaw hi. Om bel om taktak sam lo hih tuak hi (tg. 6).

Lei theihna: Zomi Bible pen hih munte ah lei theih hi. USA Tulsa-ah Rev. Genpu & Mr. M.C. Khai kiang pan; Aizawl Mizoram-ah Rev. Lalno, Jehova Jire AG; Mr. Cin Sian Dong ZBC Complex, Ramhlun South; Champhai-ah Mungpi Suante; Manipur-ah CBA Office, New Lamka; Chennai-ah Mr. Mangboi Suante; Australia-ah Mr. Sawm Thang Suante, Melbourne; Shillong-ah Rev. Thang Lian Go leh Rev. Go Za Mung-te’ tung panin kingah thei hi.

Bu khat ciangin India gamah Rs. 350/- man a, US Dollar 10/- hi-in, Australia gamah Dollar 15/- man hi. Tu tungin copies 1500 bek kibawl ahih manin bei hak lo ding hi. A deihte in a tunga min kigelhte kiang hiam translator (+919615558559) tungah a manlang lama kan pah kisam kha ding hi.

Thukhupna : Zomi Bible i neih pen i minam hamphatna-in ngaihsun ka hih manin Pasian leh Sia Suan tungah ka lungdam hi. Mikim in nei-in, sim ciat leng Pasian thutak i theihna gil semsem dingin lamen ing. Ahi zongin i omna pawlpi a kibat loh dung zuiin pawlkhatte in i biakinn pulpit tungah i sim thei ding a, pawlkhatte aa dingin Church Council thukimna ngak zong kul kha thei ding hi. Bangbang ahi zongin eima personal study bawlna ding leh sermon panpih dingin kizang thei mahmah ding hi.

Tags:

Admin

Admin

Top