ZSL 10: KIHEL THEIHNA’NG LAMPI HOIH

LESSON 10                                                       *August 29–September 4

 

KIHEL THEIHNA’NG LAMPI HOIH

 

SABBATH NITAKLAM                                                 August 29 

 

TUKALSUNG SIMDING:          Pian. 1:1, 2, 26; Pai. 18:21–25;  1 Cor. 12:12–25; Sawl. 16:11–15, 40; Sawl. 4:31; Sawl. 12:12.

 

KAMNGAH: “Anlak ding tampi om napi in, anlak na a sem ding mi tawmbek om hi. Tua ahih manin, ama’ an la dingin, annei Topa in nasem tampi hong sawl nadingin thugen un’ aci hi” (Mate 9:37, 38).

 

Mikhatin “mimal tam leh thahat hi” ci hi. Lam khat pan himah hi. Eiguak khawng exercise ih bawl sangin, mitam tawh bawl leng lawphuai zaw hi lo hiam? Cidamna’ng kimawlna gym ah mi tampi pai uhhi. Mi tampi kikhawl ngeingai leh cidamhuai zaw ci uhhi. Pasianin zong pawl le lawm hong bawlsak hi. Kikhawl dinga, thuthak tampi i sinbehbeh ding hi. Pawl le lawm tawh hileh hoihzaw thampek hi. Khalamah zong tua mahbang ahi hi.

Laisiangtho in, pawlkhen neu thupisak mahmah hi. Pasian in upna a khantoh sakna hi a, thunget nuntakna ah hong thuklutsak in tecipan theihna hong neisak hi. Pa Pasian, Tapa le Khasiangtho in zong pawlkhenneu tawh omkhawm hi. Moses zong pawl khenneu makaipa ahi hi. Zeisu in nungzuite tawh pawlkhenneu bawl a, Paul zong, a pawlkhenneu mah tawh Rome lamah Pasian nasem dingin vapai hi.

 

SUNDAY                                                                                  August 30

PAWLKHENNEU: PASIAN’ DEIHNA MASA

 

Piancil 1:1, 2, 26; Hebrew 1:1, 2; le Ephet 3:8, 9 simin. Hihmunte in Thumgawm Pasian a kipumkhatna hong koici lak hiam?

Pa, Tapa le Khasiangtho in, piansaklai in semkhawm uhhi. A nasep uh a tuamtuam himah leh, akikhen theilo  in nasemkhawm uh hi. Pa in, limgeelpipa ahi hi. A geelsa khempeuh Tapa Zeisu aap a, Tapa in Khasiangtho tawh nasemkhawm uh hi. Tua vangliatna in mite’ ngaihsutphak hilo hi. Ei theihtheih ciang bel, a nasepzia hilo a, Pasian in bawl cih ciang hibek hi (Rom. 1:18–20).

Pawlkhenneu pen Pasian deihna hi masa hi. Pasian thu thukpite peuhmah, limtakin ngaihsut kul a, “Pawlkhenneu” masapen zong Pa, Ta, Khasiangtho mahin piangsak ahihna phawk ciat ni. Amau tengmah in semkhawm uh a, mawhna lut khit hotkhiatna’ng ngiimna zong semkhawm uhhi.

John 10:17, 18; Rome 8:11; le 1 Corinth 15:15 simkak in. Khazih’ thawhkikna in hotkhiatna ngiimna sungah Pa, Tapa leh Khasiangtho lim puathei hiam?

 

Pa, Tapa le Khasiangtho in pawlkhenneu khatin kipumkhat uh a, hotkhiatna’ng ngiimna geel uh hi. “Hotkhiat na’ng ngiimna in, a tawntungin a om ahi hi”— Ellen G. White, Fundamentals of Christian Education, p. 186. Mihing hotkhiat ding sangin a thupizaw thudang Pasian in neilo hi (1 Tim. 2:4; 2 Pet. 3:9). Pawlkhenneu in bel ngiimna tampi zong neikha sop ding a, aih hang a thupi pen in mihingte’n Zeisu kiang a zuat theihna’ng uh ahi hi. Pawlkhenneu tawh na a kisep nakleh eima’ na bek thamlo midang  zong   i  huhthei  ding   hi.  Bangbang hileh, pawlkhenneu ngiimna bulpi in kha gupkhiat ding mah hi pen hi.

 

Pasian kipumkhat cih i thei hi. Telsiang zo kei mah leng zong upna muanna i nei thei diam? Hih thukhun in Christiante ading a thupi upna ahi thei diam?

 

MONDAY        August 31

LAISIANGTHO SUNGAH PAWLKHENNEU

 

Laisiangtho sungah, thungen pawl, kikholhna, kihanthotna le nasemkhawm pawlkhenneute om zeizai hi. Hih pawlte in, Pasian’ mite khempeuh nasep ding mawhpuak neisak ciat a, amau sil saanzah tawh semsak hi. Pawlkhenneu in, Topa ading nasepna ah kiheltheihna hong ngahsak hi.

 

Paikhiatna 18:21–25 simin. Moses’ sunghpa in a makpa vaihawm siamna ding a kician mahmah bang thu hilh hiam? Banghangin thupi nasa hiam?

 

Israelte giahphual sungah mi sawmta in kipawlin, thu-ummi in makaih hi. Pawlkhenneu in a ki-uk nading bek hi lo a, thusia pianloh na’ngin kidalkholhna zong hilai hi. Amau ading Pasian’ ngiimna khempeuh a kikuptheih nading zong hilai hi. Tua pawlsung mahah kinaitakin kikholhna tawh mailam thupiang peuhmah phukhawm geelkhawm thei uh hi. Thukhat peuh a omleh kipanpih ngeingai theipah uh hi. Khalum takin kikhawl uh a, khalam khantohna zong omzaw hi. Pawlkhenneu siamte genna ah, mi guk pan sawmlenih kikal hoihpen ci uhhi. Moses le Zeisu in a zat mi phazah mah hipah lel hi.

 

 

 

Zeisu in nungzuite pen, khalam ahi a, pumpi lam ahi zongin leitung mite kiangah nasem dingin deihin teel hi. Kikhawl diamdiamin hehpihna sungah khang ding uh hi. Pawlkhenneu sungah nasepna apicin nading kisin ding uh hi. Nisimin Zeisu in mihingte’ kisapnate a sepsak mu den in, amau zongun, nasep a kisin nadinguh ahi hi. Zeisu’ pawlkhenneu pen khalam le mi vaphak nading ahi  hi.

Pawlkhenneu khat sungah om lecin, bangbang hileh, khat le khat kidonzek in, ngiimna khat neihkhop a kul hi. Tua in pawlkhenneu a thupitna bangkhawng teng hong telzaw sak hiam?

 

TUESDAY                                                                     September 1

NASEP NA’NGIN KIPAWLKHAWM

 

1 Corinth 12:12–25 simin. I pumpi sungnate nasepzia in pawlkhenneu omzia koibangin hong telzaw sakthei hiam?

 

Paul in kha silpiak a thupitna banah, a kipawlkhop theih nading zong hong hilh hi. Khazih pumpi i hihna le Kha silpiakte zatna zong amah’n gen hi. Mihing pumpi khenneu thu sinna ah nasep tuamtuam tawh akizom khenneute ahi uh hi. Gentehna in, an-gawina, sihuite, husanna le guh tangte pumpi khat sungah omkhawm uh hi. Kha silpiak zong pumpi sung khenneute mahbang ahi hi. Kipawlkhawm in nasepna hoihpen hi. Khat guakin nasem theilo uh hi. Amau ut bangin gamta ngeingai theilo uh hi. Pumpi sung a tuate khempeuh, kinai takin kizom dimdiam uh a, ngiimna khat neikhawm  uhhi.

Hihte khempeuh in, i kha silpiakte ahoihpenin zattheih ding hong theisak hi. Eibek gamtang leng ki lungkia baih mahmah a, ngiimna kibang anei pawlkhat sungah  omkhawm leng, i  ngiimna hoihtak ki   tangtun theizaw cih hong theisak hi. Pawlkhenneu in kimkot nuamsak a, kha silpiakte zong midang vaphak nadingin hong zangthei sak hi.

EGWhite in Pawlkhenneu’ thu a genna ah: “Christiante’n kipawlnaneu tawh kipawl dingin a khial ngeilopa in kei hong lak hi. Pawlpimi a tam leh, khenneu in kikhen uh henla, pawlpi sung bek hi lo in, pawlpua lamah zong nasem tahen. Mun khat ah thuman a thei nih le thum a omnak leh, kipawlna nei tahen. Tua kipawlna kitamsak kei ta uh hen. Itna, kipumkhatna le kithapiakna tawh mainawt in khat le khat tha kilakna nei ciat ta uh hen”— Testimonies for the Church, vol. 7, pp. 21, 22.

Pawlkhenneu pen, pawlpi mite khalam khantohna, kikhalumsakna le silpiakte zatsiamna a neih theih na’ngun, Pasian piak ahi hi.

 

Atung a EGWhite kammalte hoihtak ngaihsun un. Agual agual in simpha unla, na pawlpi sungvuah na koici zatsawm uh hiam?

 

 

Wednesday                                                                September 2

LAISIANGTHOTHAK SUNG PAWLKHENNEUTE

 

Laisiangthothak pawlpi khanglua mahmah hi. Kum tawmno sungin, mi tawmnocik pan, tul tampi hong pha uh hi. Tua bang manlang takin a khantheihna thu tampi omhi. Zeisu in lungdamthu tampitak na vawh khin a, nungzuite’n thuhilh in mi tampi takin saangthei pah uhhi. Zeisu van a kahtoh khit ciangin, Penticost-ni a thungen a om, nungzuite tungah Khasiangtho kibua hi. Laisiangthothak pawlpi khan baihna thute lakpan khat pen, pawlkhenneu hang ahi hi.

 

Luka in Paul’ naseppihte’ min pawlkhat gualsuk deudau hi. Amah’n misim mahin thupisa a, amin uh tawh theikim hi. Midangte a vaphakna vuah kipanpih tek uh hi. Ama’ gen min teng bel tawmno khat bekmah ahih hang, mi tawmno kilomkhatin nasep a thupitzia hong lak hi. Tua mite khat simin silpiak tuamtek nei uh hi. Amaute in mun le ngeina tuamtuam pan hong pai uh ahi hi. Ngaihsutdan peuhmah kibang theilo ahihhang, Khazih ading nasepna ah manpha lua uh hi. Silpiak le mun tuamtuamte in pawlpi khangto sakmahmah hi.

 

 

Laisiangthothak pawlpi mite in mi’ inn ah kikhawm zel uh hi. Christian innkuante in, mi huzaapna ah pawlkhenneu phual hongsuak hi.

 

Pawlkhenneu kipan dingin, na-innkuanpan ahi a, mi khatpeuh innkuan pan ahi zongin, kipat ding na ngaihsun ngei hiam? Pawlkhenneu khatpeuh tawh na kizopkhit aleh, Sabbath School khanpihte kiangah hopsawn ding bang khawng na nei diam?

 

 

THURSDAY                                                                  September 3

PAWLKHENNEU  THAHATNA

 

Pawlkhenneu pen, pawlpi khantohna’ng Pasian’ khutzat ahi hi. Mihingte’n amau buaina le haksatnate a kikup theihna mun ahi hi. Kikholhkhopna tungtawnin kha lam khantohna ngahthei uh hi. Christian lote in, biakinnpi sungkhawngah kikhop sangin, pawlkhenneute tawh mi’ inn khatpeuh khawngah kikhop nuamsa zaw ding hi.

 

Christian masate in khat le khat thu kingetsak, khalum takin kikhawl, Pasian kammal sim, Pasian’ nasem ding kiging, khat le khat galkidalsak in midangte vaphakhawm uh hi. Pawlkhenneu in thuthak piangsak hi. Amau silsaante zangkhawm uh a, Khasiangtho tawh midang vapha in, Topa’ khut sungah hiamhoih in kizangthei uh hi.

 

Mate 9:37, 38 simin. Zeisu in anlak hun thu koici gen a, Amah’n bang hih hiam?

 

Nungzuite in lungdamthu khan na’ng piangthei saphalo uh a, Zeisu in piangthei lua ding in mu hi. Amah’n “Anlak ding tampi omhi” ci a: “Anla ding mi tawm hi” (Matt. 9:37) cihi. Zeisu in “Annei Topa in anla ding nasem mi hong sawl ding thungen un” (Matt. 9:38) ci hi. Pawlkhenneu pen, Zeisu thungetna kidawnna hi a, Khazih ading anla nasemte khangsak hi. Pawlkhenneu a muibunsak pen in tecipanna ahi hi. Apualam a paikei a, a sunglambek a khual lel leh pawlkhenneu pukbaih ding hi. Pawlkhenneu in amau ading bek semin, thu kikup khawng a-omsak kei leh omsuak zolo ding hi. Zeisu kiangah mite paipih dinga, a upna uh kipsak ding le Zeisu ading tecipang dingin kigingsak ding uhhi.

 

Pasian in, nang innsung pan pawlkhenneu kipan dingin hongsam thei diam? Pasian hongsawlna peuh ahihkhak leh banghang thungen loding na hiam?

 

FRIDAY                                                                        September 4

 

NGAIHSUTBEH DING: Khatvei lai in, Europe ah khuapi khat in Topa ading a thupi nasep ding khat vaihawm hi. Pawlpi bel omhithiat lel. Tuiphum zong nei mello. Tua bang ahih den ding aleh pawlpi mailam bel lungkhamhuai hi. Pastorpa le churchboard in nasia takin ngaihsut ding neita uh hi. Laisiangtho a simuh ciangin, pawlkhenneu bawl ding thukim uh hi. Pawlpimi 9 in thu telthei uh hi. Amau kipia ngiat in, pawlkhen bawlin, thungen, Laisiangtho sim uh hi. A innciat uh, thugenna phual suaksak uhhi. Tua pawlkhenneu in amau neih silpiaktek kikum uhhi. Thungetna tawh mite zol in, veng sung tengah lawm zong uh hi. Amau innkuan, a lawmte le Adventist masate vapha uh hi. A pawlkhenneu in mi-inn 9 ah Laisiangtho hilh uh a, mi 40 bang hongkah thei uh hi. Khasiangtho nasepna lamdang mahmah hi. Mi 40 lakpan 17 ki tuiphum uh hi. A ihmu pawlpi ah, tua pawlkhenneu in thuthak piangsak hi. Pawlpi sungah mi tampi a lut nadingin Pasian khutzat hong suak uhhi.

KIKUPDING DOTNATE:

1. Na khan sung vuah, Thursday sinna pan, pawlkhen- neu ading akisamte genkik in. Pawlkhenneu in thudang bangkhawng bawlthei lai ding hiam? Pawlkhenneu khatin, silpiaktuam neite nidang sangin a hoihzaw in koici bangin zangthei ding hiam?

 

2. Pawlkhenneu in apualam a vaphak ding bangzah thupi hiam? Pawlkhen in ama sung zong puahphat ding kisam mah leh, lungdamthu vapuakkhiat ding mah banghangin thupizaw hiam? Bulpi pawlpi tawh kizop dending banghang kisam hiam? Banghangin thupi hiam?

 

3. A sidektak nasem mello pawlkhenneu khat sungah na kihelkha ngei hiam? Bang hangin tua bang thu piangthei hiding hiam?

 

4. Europe a piang atunga tangthu ngaihsun kikin. Banghangin a nasep daupai hiam? Lamdang seplua lo napi’n banghangin muibun mahmah se hiam? “Galmuang” inn pan sepna pen, langdona adim biakinn khawngah sep sangin, banghangin veng sungah muibun zaw thei hi ding hiam?