ZSL 3: Laisiangtho: Zeisu le Nungzuite Muhdan

Lesson 3                                                 *April 11–17

 

Laisiangtho: Zeisu le Nungzuite Muhdan

 

Nipini (Sabbath) Nitaklam                                            April 11

Tukalsung Simding: Matt. 4:1–11; Matt.22:37–40; Luke  24:13–35, 44, 45; Luke  4:25–27; Acts 4:24–26.

Kamngah: “Zeisu in, ‘Laisiangtho sungah, Anlum bek tawh mite nungta lo a, Pasian genkhiat thute tawh nungta zaw hi,’ ci in a dawng hi” Matthew 4:4.

                   Tuhun ciangin, Laisiangtho pen ngaihsutdan, muhdan tuamtuam tawh kiletkhia ngeingai a, a humuapna bulpi le a deihna bulpi zong sukha nawnlo hi. Laisiangtho cih hang, tuhun a ei theih bang a leitungthu a thei zolote ngaihsutna hilelhi ci uhhi. Mihing khengval thute hemkhia ziau uh a, Pasian in mihing a muhdan panin, mihing in Pasian a muhdan hisak zawta uhhi. Mi tampitakte in, Darwin ngaihsutna lamah taimang uh a, laisiangthopen uptaak sanawnlo ta uhhi.

          E’n bel tua dinmun nialpah hihang. Laisiangthothak sunga Zeisu le nungzuite’n, tua lai-in a neihsun Laisiangtholui a teldante muding hihang. Mite, munte leh thupiangte bangci hih uhhiam? Amau upmawhthu khawng tawh a khiatdaan koidaan hiam? Pasian humuap ahi khollo, mihingte’ upmawhthu khawngtawh, Pasian muanlohna dong hong tunthei khiatdaante sangin, Zeisu leh nungzuite’ muhdaan khiatdaante zuizaw ding hihang.

 

Nimasani (Sunday)                                                                        April 12

A Kigelh Hi

            Tuiphum John kiangah Zeisu a kituiphumna pankipan a nasep hong kipan hi. Judean gampa lakah Khasiangtho in paipih a, leimi’ dinmunah a thanempen laitakin – Satan in zia-et hi.

            Matthew 4:1–11 simin. Tua gampa lakah Satan’ zia-etnapan, Zeisu in Amah le amah koici kidaal hiam? Hih thu tawh kisai in Laisiangthopan bang pilna peuh ih ngah hiam?

…………………………………………………………………………………………………………………………………………

            Anduhna tawh aki zia-etna ah, Zeisu in “Anlum bek tawh mihing nungtalo a, Pasian genkhiat thute tawh nungtazaw hi ci in Laisiangtho sungah ‘Kigelh hi’” a ci hi (Matt. 4:4). Zeisu in Laisiangtho sungpan Pasian’ kammal kipsak hi. Leitungbup ukna tawh a zia-et ciangin zong “Na Topa Pasian bekmah bia in, Ama’ na bekmah nasem ding hi, Laisiangtho in ci hi” (Matt. 4:10; Luke  4:8) ci in dawng leuleu hi. Biakpiakna peuhmah Pasian lobuang kuama dang tungah suanlo ding a, Ama’ thu-ah ki-aapna in biakpiakna taktak ahihlam pulaak hi. A tawpna ah siamna lakding le uplah ding lamah zia-et leuleu a, “Na Topa Pasian, na zia-et kei ding hi, Laisiangtho in ci hi” ci in dawng hi (Matt. 4:7; Luke  4:12).

            Thumvei zia-etnate, “Akigelh hi” (Laisiangtho in ci hi) ci in dawnghi. Satan’ khemnopna khempeuh, Pasian’ kammal bekmah tawh dawngkik hi. Eite’ adingin, pilna vanglian mahmah hi-a, Laisiangtho bekmah eite’ upna thulaigil hi dinghi. Galpa galbawlnate, Zeisu in Laisiangtho kammal bekmah tawh kidal hi. Amah Pasian hi napi, Satan’ gal pan, Pasian’ kammal tawh kidal hi.

            Eima ngaihsutna, eima gelsiamna, hoihtak kiging sitset a nialna, khatpeuh muhdah man a pumnialna cihbang hihetlo: Laisiangtho kamthuk zangziau hi. Zeisu adingin, Laisiangtho in vang lianpen hi. A nasep kipat ding ciangin, Laisiangtho kammal muanhuaina tungah kibulphuh masa hi.

            Koibangin, Pasian kammal          tungah ki aap in, i kinga thei ding hiam?

 

Ninihni (Monday)                                                              April 13

Zeisu le Thukham

            Matt. 5:17–20; Matt. 22:29; leh Matt. 23:2, 3 simin. Zeisu in bang a gennuam hiam?

See also  ZSL 13: Leivui pan Aksite ah

………………………………………………………………………………………………………………………………………

            Zeisu in a nungzuite, Pasian’ kammal le thukham mang ding hilh hi. Laisiangtho muanlah na’ng peuhmah gen ngeilo hi. Pasian’ thupiak ahihlam phawksak den hi. Sadducees-te tungah Zeisu in, “no mawhneite aw, Pasian’ kammal le a vangliatna na theikei uh hi” (Matt. 22;29) cihi. Lungsim pilna’ng lel a Laisiangtho kihilhna in, thuman thutak ahi Topa le a thuman thutak tel taktakna cing zolo hi.

            Matt. 22:37–40 ah, Zeisu in Moses thukhamna a muhdan bang gen hiam?

            Thukham hilhpa kiangah Zeisu in, tuma kum 1500 lai-a Moses kiang a kipia thukham sawmte tomkaih hi. Zeisu in Laisiangtholui thukham mah pahtawipen hi cih honglak hi. Christian tampi takte in, Laisiangtholui thukham pen, Laisiangthothak lungdamthu tawh kilaih khin ci in umkhial uhhi. Himah taleh, Zeisu’ thuhilhna ah Laisiangtholui thukham mah siksan hi. Zeisu in, i telzawh loh thute hong honkhiatsak a, hih “thukham nihgel” (thukham sawm tomlak, amasa li teng Pasian itna, a zom gukteng mihing itna) panin “kamsangte thuhilhna khempeuh hong mengkhia” ci hi (Matt. 22:40). Zeisu in “thukham le kamsangte” ci in, thukham, kamsangte le a laigelhte pahtawi in thugen hi.

            “Khazih in, Laisiangtho pen dotna veng vangliatna nei ahihna gen hi. Laisiangtho in vang lian Pasian’ kammal hi a, upna khempeuh bulpi ahi hi”—Ellen G. White, Christ’s Object Lessons, pp. 39, 40.

            Pasian’kammal sangin a ki liansakzaw nuam ahi, innkuan, ngaihsutna leh ngeina khatpeuh a omdiam?        

 

Nilaini (Tuesday)                                                                  April 14

Zeisu leh Laisiangtho Khempeuh

            Luke  24:13–35, 44, leh 45 simin. Zeisu in, a nungzuite lungdamthu ahilhna dingin Laisiangtho koici zat hiam?

…………………………………………………………………

            Zeisu a sihmawk ciangin nungzuite lungkham uhhi. Hithei dingmaw? Bang a cihnopna? Luke  24 sungah, Zeisu in, Emmaus lampi ah minih kiang, leh midangte kiangah khatvei, gawm nihvei hong kilaak hi. A kibanglo thupiang-nih tungtawn in, Zeisu in, Laisiangtholui genkholhte tangtung ahihna honglak hi: “Moses’ laibu akipan, kamsangte’ laibu khempeuh a khiatna a gen hi” (Luke  24:27) cihi. Luke  24:44, 45 sungah zong “Moses’ thukham laibu sung, kamsangte’ laibu sung le Late sunga kigelh thu khempeuh a tungding ahi hi” Zeisu in cihi. Tua bangin Zeisu in “a lungsimte uh honsak hi”

            Luke  24:27 zong kician mahmah hi: “Laisiangtho khempeuh” ci in, “Moses’ thukham, kamsangte le Late” (Luke 24:44) cih kammal pulaak kikna ahi hi. Tua in, Thu pan cilesa asuak Zeisu (John 1:1–3, 14) cihna hipahlian a, tuama kum zalom pawlkhat lai a genkholhsa ahi hi. Laisiangtho picinna genkawmin Zeisu in nungzuite etteh ding limlak hi. Lungdamthu a tangko kawmun, mi thak thu-umthakte vangliatna tha guanzel uhhi.

            Matt. 28:18-20 sungah, nungzuite tungtawnin eite zong “leitungah ahi a, vantungah ahi zongin vangliatna khempeuh Kei tungah hong kipia khinzo hi” cihi. Hih vangliatna pen Pasian ahih keileh zong, thumgawm Pasian tungbekmah ah omhi.  Tua ahih manin, “note pai unla, midang khempeuh Keima’ nungzui suaksak in, Pa’ min, Tapa’ min le Khasiangtho’ min tawh tuiphum un” a cih khitteh, “note tungah ka hong gensa thute khempeuh azuih nadingun na hilhun” cilai hi. Zeisu in bang hong hilh hiam? Hong thuhilhte Laisiangtho bulphuh hi. Laisiangtho genkholhsa khem peuh bangin, Zeisu hong paisuk in a Pa’ deihna bangin a kipiakna tawh tangtungsak hi.

See also  ZSS 5: Lungsim Thukham Palsat

            Zeisu in Laisiangtho pom ahihleh eizong e leh? Laisiangtho vangliatna khempeuh pom hi leng, tuni tuhun ading a kisamnawnlo zong omlai cileng bang cihding? Kikum dih vou leh?

 

Nilini (Wednesday)                                                               April 15

Zeisu le Laisiangtho’ Bulpi le Tangthu

            Zeisu in Laisiangtho’ kammalte’n khiatna nam nih/thum neiphial mah taleh, Pasian’ kammal a hihna hong hilh hi. A bulpi in Pasian a hih manin, mikhempeuh tungah vanglian hi. Pasian in Ama’ deihnate tangthu tawh hong lak hi. Gentehna in, Matt. 19:4, 5 sungah Moses’ kammal “A ki patcil in a Piangsakpa in …hihthu hangin, Pasalin a nu a pa nusia in” a cihteh, “Laisiangtho in” ci zawlo in “A kipatcil in Piangsakpa in ci hi” acih ciangin, Piancil laibu sung a Piangsakpa’ kammal a pahtawi ahihi. Hih kammalte pen Pasian’ kammal Moses ciaptehna bang a hihi.

            Anuai ate simin. Zeisu in tangthu sung a mite le Laisiangtho thupiangte bangzah tel naci hiam?

Matt. 12:3, 4   …………………………………………………………

Mark 10:6–8   ……………………………………………………

Luke  4:25–27 ……………………………………………………

Luke  11:51     …………………………………………………………

Matt. 24:38      …………………………………………………………

            Zeisu in Laisiangtholui mite, munte le thupiangte peuhmah tangthu thumaan in pom hi. Genesis 1 le 2, Piancil 4na ah Abel, David in anlum siangtho a neekna, Elisha’ tangthu cihte thupi sak mahmah hi. Tanglai kamsangte thuakna ci in gen tawntung hi (Matt. 5:12; 13:57; 23:34–36, Mark 6:4). Hilhkholna khatah, Noah hunlai ci: “Noah in, tembaw sung a tum ni ciangdong, mite in, an-ne zu-ne in om uh a, mo kipi mo kikha in nuntak ngeina bangin omuh a, tuiciin hong tungin, tui in mi khempeuh a tupcip hun ciangdong, kuamahin bangmah atheihloh mahbangin, Mihing’ Tapa hong pai ciangin zong kuamahin thei khollo ding hi” (Matt. 24:38, 39). Tangthu sungah, a lian mahmah Pasian’ thukhennate, Zeisu in honglak zel hi.

            Hih tangthu sunga mite Zeisu in thumaan thutak ci ahihleh, tuni tuhun a Christian a kicite in, tuabang thute om ngeikei ci in, Satan’ khemna a um mite in nial thei uhhi. Tua thaang sungah banghangin ki-awklo dinghiam?

 

Ningani (Thursday)                                                             April 16

Sawltakte leh Laisiangtho

            Laisiangtho thak gelh laikungpute’n zong Zeisu mahbangin pom uhhi. Upna thukhunte, mi’ gamtatdaan le genkholhte tangtunna tungtawnin, Laisiangtholui pen Pasian’ kammal hi ci uh hi. Laisiangtho thak in Laisiangtholui bu pen maanlo hi a cihna om hetlo hi.

            Anuai a Laisiangtho munte in, Pasian’ kammal nungzuite teldaan koibangin honglak hiam?

Acts 4:24-26    ………………………………………………………

Acts 13:32-36 ………………………………………………………

Romans 9:17    …………………………………………………………

Galati 3:8         …………………………………………………………

           Laisiangtho kammalte pen, Pasian’ aw ngiat tawh apau cihzong phawkkul hi. Acts 4, Khasiangtho tawh a kidim madiak un, nungzuite’n, Peter le John suahtakna dingin, Pasian’ min phat uhhi. Phatna’ awte sangsak uh a, David’ kammal zangin Pasian pen piangsakpa ahihna pulak uhhi. David’ kammalte pen Pasian’ kammal hi. Acts 13:32-36, David’ kammal Paul in a genkik na-ah “Pasian in i pu i pate tung a ciamthu” ci hi.

See also  HSS 6: PATHIAN THU AN CHHIAR

            Romans 9:17, Pasian a cihnopna in Paul in “Laisiangtho” ci hi: Laisiangtho in “Pharoah kiang ah” (NKJV) a cihteh “Pasian in Pharoah kiangah ci hi” a cihnopna hi a, “Pasian” a cihna mun ah “Laisiangtho” a ci hilel a, Pasian le a kammal kizom ahihna honglak hi.

            Amantakin, Laisiangthothak laikungpute in, Laisiangtholui Pasian’ kammal bulphuh mah mah uhhi. Laisiangthothak sungah Laisiangtholui kammal tampitak kizangkik hi.Laisiangtho siam mikhat in a muhna ah 2,688 veibang kizangkik a, Isaiah pan 400, Late pan 370, Paikhiatna pan 220 cihbangin mukhia hi. Hihte lakah, a kihemlaakte, thulupite, kammal hoih nonote behlap leng tammahmah ding hi. “A kigelh hi” cihbangpen, (Matt. 2:5, Mark 1:2, 7:6, Luke  2:23, 3:4, Rom. 3:4, 8:36, 9:33, 1 Corinth. 1:19, Gal. 4:27, 1 Peter 1:16). Laisiangtholui sungpan a laakkik vive ahi hi. Zeisu le nungzuite thuhilhte khempeuhpen, Laisiangtholui sung vive bulphuh in a hilh uhhi.

            Hih thute khempeuh in, Laisiangtho uplahna muanlahna bangzah in lauhuai hi ci in hong theisak uh hiam?

 

Kiginni (Friday)                                                                               April 17

Ngaihsutbeh ding:  Ellen G. White laibu The Desire of Ages sungpan “As a Child” pp. 68–74, leh “The Temptation,” pp. 114–123 cihte simin.

            “Mite in Pasian le a kammalte sangin kipilsak zaw uhhi; Pasian’ kammal tungah bulkip takin kiphuh ding sangin, Pasian’ kammal pen, amau pilna leitung pilnate tawh tok mang uh a, amau pilna tawh aki tuakphat keileh, muanhuailo le zathuailo ci in hemkhia uhhi” — Ellen G. White, Signs of the Times, March 27, 1884, p. 1.

            “Pasian’ deihna a kammal sung ombang tawh a kizomte, lungsim thahat uh a, Zeisu ading nasem muibunte suak uh: Zeisu in zong amite thuman thutak pia a, leitungah tangko sak hi. Tua thuman thutak lo peuhmah tawh siangthona omtheilo hi. Tua ahih manin mi khempeuh in tua thu a telloh bangzah phamawh hiam?” —Ellen G. White, Fundamentals of Christian Education, p. 432.

 Kikupding Dotnate:

 

  1. Zeisu, lungdamthu laikungpute le Paul in, Laisiangtholui pen Pasian’ kammal hi a cihleh, tulai hun muhdaan tampite khial mahmah ahihna koibangin hong theisak a, amaute kuamah’n hilhlo ahihleh eite lutungah hong tu hi lohiam?

 

  1. Tulai Laisiangtho siamte in, uplohna mun tampitak mah nei neunau khin uh a, tua munte mipite theihsakna in: piansak hun niguk nial, kumtul tampi hunla a hong piang cih um. Leitung puukma in Adam mawhbanglo cih nial. Leitungbup tuiliim cihzong nial. Pawlkhatin Abraham om takpina nial. Pawlkhat in Paikhiatna zong nial. Pawlkhat in Zeisu’na lamdangbawlte leh a thawhkikna zong nial uh hi. Pawlkhatin kum tampi lai a, kamsangte genkholhnate zong nial. Mite in Laisiangtho hong upnawnloh uh ciangin, ih thukhupna in bang hong hilh hiam? Mite’n thuman thutak a theihna dingun bangci lampi tawh i huhthei ding hiam?
  2. Tuesday ni dotna i dawn ciangin, Laisiangtho a ki humuapzia, tulai huntawh a kituak nawnlo a cihte nangawn i teldaan kikum dih vou.
Tags: ,

Admin

Admin

Top