Lupna Khat Bawl

Kinnie Aitorea, 18

Solomon Islands, August 10

Kinnie Aitorea kum 18 bek a hihpat hangin, Solomon Tuikulh tung-a, Seventh-day Adventist boarding School ah deaconess khat ahi hi.

Tua bangin deaconess ahihna hangin Kinnie angtang kisa mahmah hi. A nu zong deaconess mah hi ngei-a, amah zongh deaconess asem kha dingin ki lamen ngam vet lo hi.

Betikama Adventist College pawlpi ah deaconess dingin a kiteel khia mi giat te Pastorpa in avek un kimuh khoppihna khat nei in a tavuan ciat ding uh kuppih hi. Tuate’ lakah khangham numei li leh sangnaupang numei li kiteel a,tuate’ lakah Kinnie zongh khat ahi hi. Pastorpa in Kinnie le adang khat ahi, Kinnie’ lawmnu Wendy pen atuam vilvel nasep khat pia hi. Tua nasep pen, amau’ numei bawda leh a dang numeite’ bawda ah kisapna khat peuh a om hiam? cih a hunsim a, etcik nading nasep ahi hi.

Kinnie le Wendy te laawmtate in nasep khat hong ngah ta uh hi. Amautegel zongh, a bawda sunguh, numei 40 te’ lupna khaan golpi sungah kawm beela kikilhcip lupna zai deedaate ah hong vak kawikawi uh hi. Tua sangnaupang numeite in delhphah tuam hoih, zanpuan hoih, lukham hoih anei uh hiam cih a en kawikawi uh ahi hi. Tua banah tua numeite in puansilh niikteen kicing anei uh hiam, sang kah nading a kisam laikung laidal kicing anei uh hiam? cih a en kawikawi uh hi. A zenzen in khat peuh in tua bangin kisapna khat peuh aneih khak a, huhna akisap leh tua nu’ kiangah khawl phot in kikup pih uh hi.

“Dam maw lawm? Sangkah bangci na sa aa?” ci-in kamkhum taktawh Wendy in va hopih hi.

See also  1. Zukhamden Nulepate Kikheel

“Huhna na kisam hia?” Kinnie in na cih beh hi.

Pawlkhatte in puansilh akisap lam uh na pulaak uh hi. Pawlkhat in laikung laidal na ci uh hi.

Tua khit ciangin Kinnie le Wendy te in Mitlyn Todonga’ lupna hong en uh hi. Zanpuan padildel khat kikhep litlet in lupna khekhuan tawlam ah ki koih hi. Singpeek khauh mahmah tawh kibawl lupna tungah Mitlyn alupciangin anip theuhtheuh ding`, delhphah  muaiza cih khawng om se lo hi. Delhphah tuamna, lukham cih khawng zong kimu kha lo hi.

Tua banah sangkah ciang a kisilh ding puanpaak le niikbawk vom cih te -a kipan adang tuamtuamte Mitlyn in a neih loh lam Kinnie le Wendy in hong thei khia uh hi.

Tua kum pen Mitlyn a’dingin a kah ciilna kum ahi hi. Tan sagih kah ding hi-a, tuikulh dang khat panin a va tung tungg` ahi hi.

Adventist ahi nai lo, Mitlyn’ nulepate in ahih uh leh ahihtheih tawpkhak un a tanu uh a hanciampih uh ahi hi. A nu in neektheih moh tuamtuam le tampaza tui khawng bawl in a pa in tuate zuak kawikawi hi. Himah taleh a khom dinguh sumlut ngah zo lo uh hi.

Kinnie le Wendy zongh Mitlyn tawh ki holim nuam mahmah uh hitaleh, sun thapaai in Gambup khuapi lianbel ahi Honiara khua sung a, Museum innpi ah, amau’ sang’ pan un choir lasa pawlte tawh kithuah in a pai lam, a bawda pih numeite in na gen uh hi.

Tua banah tua numeite in Kinnie’ lungnoploh nading thu khat na gen uh hi. Numeino pawlkhat in Mitlyn pen mizawng innkuan pan in hong pai hi, ci-in ciamnuih bawl gawpgawp uh ahihmanin zan thapaaipaai in Mitlyn kap zeelzeel hi, cih thu ahi hi. A geivuah Mitlyn a om ciangin simmawhna kammalte gen in, gensiatna kammal bekbek tawh tua nu’ zakdingin na kihoho se uh hi.

See also  MSS 7: Sabbath Tona

“Lupna gina nangawn zongh anei zolo ai ve hi nu’n,” khat in cihsan hi.

“Bang hih dinga, hiah ong pai deldal ahi tam? Mi khempeuh in lupna ciangciang nei saam hi ven” adang khat in ci hi.

Kinnie le Wendy zongh Pastorpa’ kiangah hong pai uh-a, Mitlyn’ thu teng a gen uh hi.

“Aw hi mawk maw. Tua ahih leh muaiza leh puansilh niikten ding va lei pah ni ei” ci hi. Pastor in ci hi.

A thum un khuapi sungah hong zin khawm pah uh hi. Mitlyn nuamtakin a nip theuhtheuh lupna tungah a lup theih nadingin, Letmat nih bangh a sah muaiza khat hong lei pah uh hi. Tua banah, kaaphi meel delhphah tuam khat leh paak hoih nono a tuang blanket khat, lukham khat leh atuamna ding kaaphi meel khat mah, puanpaak sitset khat leh niikbawk vom khat, laikung laidal honkhat, satpiang, hazaa, leh hanawtna, cihte aa kipan akisam ding khempeuh hong lei uh hi.

Bawda hong tunkik uh ciangin, Kinnie le Wendy in a muaiza leite uh tawh lupna hoih takin na puahsak uh a, avan leisak dangteng uh lupna tungah na koih sak uh hi. A mankhit uh ciangin Pastorpa’ kiangah genkik uh hi.

Tua ni, nitaak, Choir lasakna panin Mitlyn hong tunkik ciangin a lupna a-et leh na lamdang lua ahih manin kilatvat liang hi.

“Hih kua’ muaiza ahia?” ci-in a khaanpihte’ kiangah dongh hi.

“Tua nangma a’ ai ve lawm,” khat in na ci hi.

“Mi khat in nang a’ dinga hong puak hi ei,” adang khat in na ci hi.

“Kua’n hong puak peuhmah ahia? Nuam lua si’ng ee!” ci hi.

See also  MSS 13: Roma Khua in Sabbath Muta

“Kinnie le Wendy in muaiza nang a’ ding a, ong puak uh hi. Hih puante leh adangdang teng zong hi ei,” numeino khat in na ci hi.

Tua nitaak, bawda ah Kinnie hong pai kik ciangin, Mitlyn in na delh in, a kah hi.

“Mi khat peuh in kei a’dingin muaiza ahi-a, puan ahi zongin hong leisak ngei dingin ka ngaihsun ngam ngei kei hi. Kei a’ dingin hong sup lawh zensi cia. Tam manh ngel ding hi ven. Ong suplawh lua teh. Ka pa’n thei leh nak lungdam mah si’n teh maw!” ci ngaungau hi.

Mitlyn lungdam mahmahna amuh ciangin Kinnie lungkim mahmah hi. Midangte i huhding pen Pasian hong ngimsakna ahih lam Kinnie in tel mahmah ta hi.

“Ki ngah lua ei, kei lungdam zaw ing ei lawm. Midang te huh ding pen Pasian’ nasepna hi ei,” acih kawmin naakpi takin angpom pheii hi.

By Andrew McChesney

 

Related posts: