2. Khuatual Lai-a Khuavak

THUKHEN 2

Khuatual Lai-a Khuavak


​ 
AZAI ZAW INN’ HUZAAPNA
         Christian Innkuan in Thuhilhna Lim.—Innkuan in innkuan sunga mimalte bannah na sepding nei lai hi. Christian innkuanin lim tawh thuhilhna hia, nuntakna ie zilding thukhunte alak ding ahi hi. Tuabanga lim tawh lahnain leitung ahoih sak vangl;iatna ahi hi. . . Tuabang inn panin khangnote apaikhiat uh ciangin inn pan-a asin thute mite piasawn uh hi. Innkuan dangte kiangah ahoihzaw nuntakzia thukhunte kihawmsawn a, khuatual ah kisangkhanna piang sak hi.1
Innkuan mimalte’ awdam, ziadamna-in inn hoih nading huzaap zaipi pia hi. Tuabang innte ngah thupha midangte in mu uha, amaute’ lah lim zil in, Satan’ huzaap nate inn alut lodingin dal ding uh hi. Pasian’ deihna azekna innah vantungmite sungtum pusuak ding hi. Pasian’ hehpihna ie vangliatna in tuabang innte’ gimna panin thamalhna pia ding hi. “Kei” cih mi ahing lo ding in dal den in. Zongsat hoihte lamto hi. Midangte’ ngah hamphatna zahtak sak hi. Itna tawh upna’ nasep leh kha siangthosakna in nuntakna kai dinga, innkuanbup zek ding hi. Innsunga asiangtho huzaapna ahi, unau sanggam thukhun in Pasian’ kammal tungah kilam ciangin, mitampi in phawk siam a, zui siam kim pen uh hi.2
Kikhila Aki-uk sitset Inn’ huzaapna.—Jesu Christ aitangin, lawki mihonte maiah Pasian’ thukham ih zuih pen, innkuan adingin a athuneu hipeuh mahlo hi. Mite in simin atheihtheih anungta laikhakte ahidingin eite hong kingen hi. Hih-in alau huai mawhpuakna hi.3
Innkuan thu akhil, auk sitset innkuante in pau-na tawh thugennate sangin Christian biakna gen siam zaw hi. Tuabang innkuan in Pasian’ lamlahna azuihna uhah angah gualzawhna lakuh a, atate in zong Ama adingin pawlpi na asem uh hi. Apiakkhiatna uh tawh kituakin anuntakna uh khang dinga, apiak khiat ding uh ngah kik ding uh hi. Nu leh pate in tate kiang panin huhna ngah ding uha, inn pan-a angah uh thuhilhnate midangte pia sawn ding uh hi. Avengte zong huhna angah uh hipah a, tu leh atawntung adingin akiphung vuh uh hi. A innkuan bup un Topa’ na asem uh hia, alahkhiat uh Pasian’ zia-le- tong limte in midangte zong Pasian’ tuu honte tungah athumaan dingin huzaap
hi.4
Innthu khil a auk sitset bangkua in leitung maitang ah akilah khia thei Christian biakna ie vangliatna alian pen ahi hi. Thu dangdangte sangin thumaan pia thei zaw hi. Banghanghiam cihleh, hih in mihing’ sungah anungta lawntheih tetci panna ahi hi.5
Innkuan khat ie biakna pen amaute zia-le-tong in ahuzaapna tungtawn in kisittel siam pen hi. Pasian um ih hihna ih gensiamna sangin tatna-in gin ngaih zaw hi.6
Leitungah ihbuai-pih ding nasep in . . . ih tate, ih innkuanpihte neih dinga ihhilh “vaang” (parami) muhna hi a, tua in innkuan dangte zong ahuzaap hi. Mite inn sungah ih lut ngeiloh hangin mite apilsuah ih hi hi. Thu gualin geelin aki-uk sitset innkuanin Pasian maiah Ophir kham sangin hoih zaw lai hi.7
Alamdang Apiangthei Thutein Ei-a.—Nuntakna hunte tom hi. Hih leitung khatvei bek ih nawk ding hi; ih nawk ciangin akicingin nungta ni. Hong kisem sak Na in hauhna,leh siamna, leh za lianpipi hong kallo hi. Migitna, kipiak khiatna lungsim, leh akip ngimna hong ngen bek hi. Meivak in aneu phial zongin atan paisuak leh, meivak tampi atangsak meivak hiding hi. Ih huzaap nate toi mah tase leh, ih siamnate neu in, ih ngah hunphate tawm se taleh, ih kaikhopte cihtham takei leh, innkuan sunga hunpha ngahte thumaan tak-a ih zekkhiatna-in sim tham takei leh, na khempeuh ei adingin apiangthei thu hikhin ding hi. Nuntak nanga Pasian’ hong piak thukhunte adingin ih lungsim leh innte hong hilengh, eite in nun takna apia vangliatna ie tuizawi ih hiding hi. Tuabang inn panin damna tui luang dinga, nunna piang sakin, buan leh leikeugaw panin hoihna leh gah punna piang ding hi.8
Silngo in anlum sungah akiseel mahbangin Pasian akihta nu leh pate in innkuan huzaapnate midangte tungah luang khia sak ding hi.9
Innkuan sungah thuman tak-a nasepna in tuabang mah apiang sak dingin innkuan dangte thuhilh hi. Pasian up theihna lungsim in silngo tawh kibang hi. Pawlpi sung ah upna akipulaak ciangin midangte tungah huzaapna nei dinga, mun ci tengah Christian biakna kizel ding hi. Lungsim takpi tawh Christ galkap sepna-in atawntung in huzaap tangzai sak hi. Tua hinapi banghangin missionary kha omlo hiam? Innsungah Pasian muanna akineih loh man ahi hi.10
Hoihtak-a Akizeksiamlo Innkuan’ Huzaap.— Akizeksiamlo innkuan ie huzaapna kithehthang semsem hi. Siatna pung sak hi. Siatna tuihualte kikhawm sak-a, innkuante, khuatualte, leh kumpite huzaap hi.11
 
Huzaap neilo in leitungah kinungta theilo hi. Mi tawh kisawhlo-in ei le ei kibuzial theih hilo hi. Maitang puakbek inzong sia leh pha adingin huzaapna nei hi. Alungsim, akampau, agamtat, midang’ tunga alungsim puakte, kiselcip theilo hi. Angsung khuatin anungtate zong, amah leh amah natsia tawh ki-umcih veve hi. Christ’ itna tawh akidimtein migitna, awzolna, ziadamna,, midangte awlmawhna leh mitawh kizopna ah itna, migitna, lungdam theihna leh nopsakna tawh gamta hi. Jesus adingin nungtakna kilang hi. Nisimin Jesu khe phungah thusin ahihna, Ama kiang panin Ama’ khuavak leh kilemna ngah ahihlam kimu hi. “Nangma’ migitna in kei hong lian sak hi” ci in Topa kiangah gen sak hi.12 

AKHAUH CHRISTIAN TETCI

Missionary Ahoihpente Christian Inn Pan.— Pasian akizahtakna, aki-itna, akibiakna, thumanna in piannihna ahihna, lopthop leh awlmawhlo a innkuan’ na seplohna, nisial nasepnadingin gamdai-a Pasian azong innkuan panin Topa ading missionaryte kipantah hi.1
Innkuan nasep pen lungsim dik tawh kisem hileh, tua-in akip pen leh ahi sitset in Christ ie na ih septheih nadingin siamna hong pia hi. Theihtelna tawh inn’ na sep ding kisam hi. Anuam hetkei zongin, anungta Christian khatin missionary na asepnaah thumaantakin nisim nasepte semin, maitai takin asinglamteh puain, nasep khat peuhpeuh awlmawh lohin omding hiam?2
Christ adinga nasep pen inn panin kipan ding hi. Inn kan-a missionary akisap zawkna mun omlo hi.
Mi tampitein inn nasep phual pen zumhuai takin koihdap uh hi. Hih siatna akipuahphat nadingin Pasianin damna leh sepzawhna tha hong piak hun ahi hi.3
Innkuan panin khangnote asangpen nasep kipia hi. Nu leh pa, unaute itna leh kinna tawh thupha apia ding hi. Hih thu-ah kei-deihna nialin, midangte ading sepna tawh amau mah akimangngilh ding uh ahi hi. U numei khat in anaupa tungah bang huzaap nei thei ding hiam? Amah adik leh anau zong dik sak thei hi. Ama thungetna, migitna, leh itnate in inn-ah na tampi sem thei hi.4
Jesu asang khinte in, hehpihna in amau adingin bang bawlzo hiam, cih inn sungah lak thei hi. “Amah asang mitampite tungah Pasian’ tate hih theihna apia zo hi.” Jesu diktakin aum khin mi khat in innkuan bup ahuzaap thei vangliatna nei hi. Inn kuanpihte’ in zia-le- tong apicin sak nadingin hih thu-in khua-hun hoih sak hi.5
Thu-umlote in Anial Zawhloh Thu.—Hi sitset a aki-uk innkuanin thu-umlote in anial zawhloh, Christian biakna maan hi, ci-a alian thunialna ahi hi. Innkuan sung ah huzaapna khatin nasema, tua-in tate huzaap-in, Abraham’ Pasianin amaute tawh omkhawm ahihna muh sak hi. Um ing, aci Christian innkuante in adik biakna ie zepna ngah uh hileh, thuhoih adingin huzaap lianpi nei ding uh hi. Amantakin “leitung’ khuavak” hiding uh hi.6
Tate in Laisiangtho Thukhunte Zekkhia.—Pilna hoih takin akipia tate-in kizekkhia nuamin, nu leh pa huh nuam uh hi. Amaute’ adik ngaihsutna leh aneih uh Laisiangtho thukhunte apawl alawmte hawmsawn uh hi.Ih innte apianding bangun ahong pian ciangin, tate pen thadah in kikhang khia sak loding hi. Mi genthei tampite kimkotna panin, Pasian’ tang-a ihsep dingte awlmawhlo tuanlo ding hi. Pasian’ gaamluah dingte ahihna uhtawh, sepdingte hong semding uh hi. Atheilote adingin innkuan sungpanin khuavak hong tang khia dinga, thumaan saal lamah makaih ding hi. Pasian ading leh Ama’ thumaan adingin avanglian huzaapna kizang khia ding hi.8
Lampi dang tawh akineh thei ngeilo nu leh pate pen atate tungtawnin kipha ding hi.9
Innkuan Nuamin Vengte Adingin Khuavak.— Eite in amaitai nu leh pa leh Christian atamzaw ih kisam hi. Ei le ei ihinn sungah ih kikhakkhum lua khazel hi. Migitna, pahtawina,
maitai-nate tate muhna panin leh alungkia leh akinengcip mite maipan ih hemkhia hi.
Nu leh pate aw, khuavak apua ding leh khuavak apia ding nasep hong kisuan hi. Inn sungah khuavak bangin tang unla, na tate’ pai nading lampi vak sak un. Tua hileh khuavak aneilote adingin zong atang na hi uh hi.10
Christian innkuan khatsim panin asiangtho khuavak atang khia ding hi. Gamtatna tawh itna kipulak ding hi. Innkuan kizopnateah thukhualna, migitna, angsung khuallo ziadam tawh itna luangkhia ding hi. Hih thukhun akizekkhiatna innte—Pasian akibiakna leh asiangtho pen itna atenna ahi hi. Hih innte panin Pasian kiangah zing leh nitakin thungetnate paknamtui hal bangin kahto a, zingsang daingo bangin Ama’ hehpihna leh thuphate thungente tungah hong kumsuk ding hi.11
Innkuan Kipumkhatna Thaman.—Christiante’ amasapen nasep in, kipum khatna ahi hi. Tuaciangin veng leh pamah nasep kikhaksawn ding hi. Khuavak angahkhinte in siang takin khuavak tangsak ding uh hi. Amaute kammalte in Christ ie itna tawh namtui dinga, nuntak nadingin nuntakna lim sak ding hi.12
Innkuan mimalte in nasepna-ah kinai semsem leuh amaute’ huzaapnain midangte tungah huhna leh kikhang khanna piang sakin, nu leh pa leh ta leh tanute in inn pualam ah aom mite tungah kizek khia ding uh hi.13
Mipil Sangin Mihoih Kisam zaw.—Innkuante leh pawlpite lungnopna pen innkuan huzaapna tungah kinga hi. Atawntung a nuntakding lungtup pen hih nuntakna in aneih nasepte phatak-a sepkhiatna-tawh kisai hi. Innkuan sungah thupha ahidingin leitungin mipil tampi sangin mihoih tampi kisam zaw hi.14
Kong Akhakthei Khialhna Pel-in.—Innkuan sungah biakna akipulak ciangin tua ie huzapna pen veeng leh biakinn sungah kimu hi. Christian ka hi, aci mipawl khattein amaute innkuan sung haksatnate avengte tungah genthei hi. Hehpihna angah theih nadingun athangpaih nate uh genkhia thei uh hi. Tuabangin mite bil sungah eite haksatnate ih vagenna-in, ei khialhna ahi hi. Ahangin, adiakdiak-in hih haksatnate eite biakna neih lahna leh gamtat siatnate panin thangpaihna apiang hizaw hi. Mimal thangpaihnate midangte tungah pai-in pulaakna sangin innah omzawin, thungenin, apaktat ih lungzaulen nate Pasian’ kiangah apzaw lengh, tua Suangpi tungah vakia in kitam zaw lengh, “kei” si sak zaw lengh hoih zaw hi. Athu-in, Jesu in apahtawi huai tuibeel in hong bawl zaw kha ding hi.15
Thukhuallohna, lungtomna, paukhauhna, ngaihsun lo-a pauna in namin siasak dinga, mite’ lungsim kong khak dinga mi tawh na kizom thei nawn kei ding hi.16
Innsung Christianna Apualamah Ta’ang.— Leitung innkuan pen vantung innkuan ie lim ihsuahsak ding sawmna-in azaizaw in hong kizek khia sak hi. Khat le khat ziadam tak-a kizopnading pilna in midangte tawh kizop theih nading tha hong guan a, biakna maan ie thu khunte hilhding kisam mite tawh kizop danding hong thei sak hi. Pawlpi in ihngah theihding khalam thahatna, adiakdiakin, Topa’ innkuan sungah khangnote, kepcing mahmah ding kisam hi. Inn sungah nuntakpih thumaan in apualama, hong ki-iplah saklo nasepna phualte nangawnah kilang thei hi. Inn sungah Christian biakna tawh anungtatein apaina khempeuh uhah atang khuavak hiding uh hi.17
———————————-
READ  1. INNKUAN OMZIA
Tags:

Admin

Admin

Top