GC 10: Germany ah Puahphuatna
A thu kithei lo-a Luther hong dawk nawn lo hiau mawkna in Ger- many gam buppi patau sak mah mah hi. Amah kan sim sim mun ci teng ah a ki za hi. Kam zuau gilo peuh hong kitheh khia a, mi tampi inamah ki that sim hi ci in um uh hi. Dahna thuumna lianpi hong om hi. Ama kiciam pihsa a lawmte bek hi loin a kilanga a pawl ngam lo mi tul tampi te mah in zong kha khun pih uh hi. Mi tampi in a phu laak ding sawm a, a kiciam ciam mah zong a om hi.
Rome pawlte in amau tungah mite in bangi ci lungsim sia nei hiam cih pen mu gi ge uh hi. A masa-in Luther pen si hi lel lo ding a hia ci in ki sial sim vial uh a, ahih hangin a sawt loin mipi hehna so lua mu-in bu sim nuam van van keei lel phial mawk uh hi. A galte adingin a om hon laite uha a buaina uh sangin a om nawn lo hiau mawk cianga a buaina uh na sia zaw mawk hi. Puahphapa susia nuam-a a sinso vial zente khawng pen tu in launa tawh galmat bang hi zaw kik mai ngiau uh hi. Khat pa bang in hoh hih bangin thu gen hi, “Eite suahtaak theih nading lampi khat om lai sun pen, meivak zangh liang mah-in Luther zongkhia lenga leitung bup ah I muh mateng sabet-in bengin a mi nam bup-in amah mu sak kik leng bek lung kim ding uh ahih ciangin, amah ap kik leng hoih ding hi” ci hi. – D’ Aubigne, b. 9, ch. 1 . Kumpipa thupiak Edict khawng lelte bang mah-in ki sim nawn lo hi. Papal thukhen mangte in Luther mailam thu ding sangin kumpipa thu ki neu seh zaw a muh uh teh thang paai uh hi.
Amah hing lai-a thong kia hi cih a ki zak ciangin mite launa daai a, ahih hangin hon khia nuam uh hi. A laigelhte a ki sim nuam kaan hi. Pasian thumaan keempa pen tang sam-a lau huai hi napi in tua mihaangpa lam ah tu in mi hong ki beh lap zua zua zaw hi. (186) Puahphatna in thahatna ngah to to hi. Luther khaici vawh pen mun ci teng ah hong pokhia ta hi. Amah ki dawk hi leh a picing zaw lo ding kim lai a ki dawk loh hiau mawk man-in picing zaw sop ta hi. Makai dangte in zong amah a omloh hiau mawk ciangin hanciam zaw uh hi. Upna thak tawh hanciam-in mai nawt uh a, nasepna a bei sang sik-in huu pha zaw lai hi.
Ahih hangin Satan pen na tawl nga samlo hi. Puahphatna nasepna peuh mah ah a na do ngei zelte bang mah-in hih lai ah zong nakpi-in na a seem hi. Kheem theih teng kheem-in susia a, nasepna maan ahi ding lim mah ciing-in nuai khia hi. Kum zalom masa lai-a Khrist zuau a pian’mah bangin Khristian pawlpi sung ah kum zakhawk 16 lai-in zong kamsang zuau piang hi.
Mi pawl khat in leitunga biakna nakpi ngaihsun in sukha lua ahih ciangin amau mah mah in vantung pana mangmuhna tuam vil vel hong kipia a, Pasian in hih puah phatna nasep mai nawt nadingin Luther in a hi ningneng lel-a a pat khiat pen a picing to sak dingin hong sawl hi ci in ki gen uh hi. A tatak-in ci leng, amau in ama sep khiatsateng a su nawngkaai hi zaw uh hi. Amaute in Puahphatna nasep a laigil thu pen a nialte hi zaw mawk uh hi. Pasian kammal thubu upna leh zuihna khempeuh phuh nadingin a kicing hi cih thu pen amau ut banga a khel sak nuam, a lai sak nuam, amau hoih sak bang bang din mun-a a nei nuamte peuh hong hi zaw mawk uh hi. Tua khialhna a mankhia pi a hong paam paih uh ciangin Satan in ama deih bang banga mite lungsim a uk theih nading lampi a hong vang a hi hi.
Tua kamsang ka hi a cite laka khatpa bang in vantung mi Gabriel in thu hong za sak hi, ci hi. Sangnaupang amah huhpa khat bang in a sang kah tawp-in Pasian mah mah in Ama thu thuk kal khia dingin kei hong puah hi, ci hi. A lawmte thu dang en nawn mah mah lo-a amau cih zuk tak a phu ten tan pawl khat bang in tua te pawm zaw lai uh hi. Tua bang a lawp pawlte nasepna in bel pholh suah lah lo hi. Luhter thuhilhna in mi tampi mun ci teng ah puahphatna kul hi ci in pholh khia a, tuate mi hoih pi pite pen tu-a kamsang thak-a (187) ki bawl te thu in buai sak leu leu uh hi.
Tua bang nasep makaite Wittenberg ah hong pai uh a, Melanchthon leh a lawmte kiang ah hong gen uh hi. “Kote Pasian in mite hilhpil dingin hong sawl hi. Topa tawh ka kimu uh a, hong piang ding thute hong hilh hi. Kote in sawltakte leh kamsangte ka hi uh a Doctor Luhter kiang ah zong ka gen uh hi,” ci uh hi. – Ibid. b. 9, ch. 7.
Puahphate lung mang in patau uh hi. Hih bang thu pen phu kha ngei nai lo uh ahih manin bang cih ding cih thei lo uh hi. Melanchthon in, “Hih mite sung ah khaa tuam pian zek bel om ve’n, bang khaa hi ding hiam?….Pasian Kha Siangtho i daih sak khak ding kidop ding hi napi in a langlam ah Satan khaa in lam hong pial sak khak ding tel et ding ahi leu leu hi” ci pah lian hi.- D’Aubigne, b. 9, ch. 7.
Tua thuhilhna thak a gah pen a sawt loin hong kimu pah ta hi. Mite in Laisiangtho hong awlmawh lo uh a, hong paam paih pah lel uh hi. Sangte hong buai gawp hi. Sangnaupang te in ki uk ki khalna te nuihsan in thu sim lo uh a, sang tawp-in University panin ciah khia uh hi. Tua puahphatna ah nasep picing sak dinga hong kisawl hi, sawlna ngah hi ung, a kici uh hi napi-in kisiatna gong ah mite puak mawk uh hi. Rome pawlte in mite’ muanna hong ngah kik ta uh a, kisialhna kammal tawh, “Khat vei kitha saan lai leng a vekpi-in ki luak lel sam na ve!” ci sim pian uh hi. – Ibid.
Luther pen Wartburgah om a, thu piang te na za za-in, lungsim thuk tak tawh, Satan in hih gimna daan hong buak kha ding ka khalau kholh den mah hi” a ci hi. – Ibid. Amah in tua kamsanga ki bawlte omzia ding mu thei a, thumaan nasepna a suk khak zia ding zong mu thei hi. Pope leh kumpite langbawlnate in amah tua zah in lungkham sak ngei lo zaw hi. Puahphatna naseem mah ka hi uh aci tua lawmte pen a su sia pen pen galte hong suak uh hi. Amah a lungdam sak leh a heh neem pen pen thumaan in tu in pawlpi sung ah ki elna leh buaina piang khia sak a suak hi.
(188) Puahphatna nasepna ah Pasian in Luther pen Kha Siangtho in mai nawt dingin sawl a, ama hun kheng to-in mai a nawt to sak hi. Amah in tua a din mun la ngei dingin kiseh kha lo a, tua zah-a a ki khel dingin tuat kha lo hi. Amah pen mong neilo vanglianpa khut zat a hi hi. Tua hi napi in a nasepnate ah khalau zel lai hi. Khat vei a gen ngei thu ah, “Ka muh khiat thu upna in bang zah-a mi niam mi hi ta leh, mi khat bebek zong a suk siat ding leh, — su sia het kei sam in cin Lungdamnathu ahih man in, — taw kik lo-a ka om sangin sawm vei ka si nuam zaw hi” ci hi. – D’Aubigne, b. 9, ch. 7. Puahphatna phualpi ahi Wittenberg nangawn tu in thu mot phuut te mot tatna in hong tuam cip ta hi. Hih a lung kham huai thu pen Luther thuhilhna pana piang hi lo hi, ahih hangin Germany gam buppi-a a galte in ama hang hi ci in ngawh uh hi. Kha sia mah mah sa-in amah in dotna pia zel a, “Puahphatna thu in hi bang thu tawh thaman ngah thei zaw zen ding hiam?” ci kik zel hi. Thu ngetna tawh Pasian a buan zel ciangin lung nopna a ngah zel hi. “Hih nasep pen kei aa hi lo-a Nangma aa hi. Hih bang thuciin lel peuh leh mot phuutna lel peuh in a suk siat dingin na lung kim thei ding hiam? ci
zel hi. Hi bang biai buai hun-a taam teei teei ding ngaih sut hak a sa hi. Tua hi in, amah zong Wittenbergah ciah kik sawm hi.
Zekaai loin a lau huai pi pi-in khual hong zin khia hi. Amah pen kumpi in a sam siatsa ahi hi. A galte in a suk siat theih nading thu ngah-in om uh a, a lawmte in a huh a huut ding ki khaam hi. Tua hun-a kumpite pen in Puahphate a khauh thei pen pen-a adal laitak ahi hi. Ahih hangin Lungdamnathu nasepna pen kisia hi cih mu a, Topa min tawh lau loin thumaan a huu ten tan dingin a pai khia hi.
Mee teelpa tunga a laikhakna khat ah Luther in Wartburg a nusiat phot ding thu gen a, “Wittenberg-a ka pai nading ah kumpite leh Me piate kepna sanga sang zaw kepna ngah in pai ding ka hihna nong theih dingin kong zasak hi. Nangma ginatna tawh nong huh ding leh nong kep ding zong kong nget ding kisam-in ka um kei hi. Kei mah mah in nang kong keem nuam zaw hi. Nang’ hong kep ding kul-in um hi leng Wittenberg ah ka pai kei zaw (189) ding hi. Hih nasepna namsau in mai nawt pih zolo hi. Pasian bek in na khempeuh a vaihawm ding hi mai ding hi. Mihing huh theihna zong om vetlo zaw hi. Upna lian bel a neite pen lim kep zo pen ding ahi hi,” ci hi. – Ibid. b. 9, ch. 8.
Wittenberg a ma nawh lai-in nih veina lai khak a, “Keimah in leitung bup hehna leh nangma vanglian hong lungdam sak lo ding ka hi ta hi. Wittenberg mite ka tuu hon hi mah lo uh hiam? Pasian in kei kep dinga hong piak hi mahlo hiam? A kul leh amaute hangin sihna ka thuak lel ding mah hoih lo hiam? Tua lo thu dang khat panin, i gam Germany buppi ah buaina hangin Pasian in i minam bup daan a piak ding ka lau hi.” ci-in beh lap hi. – Ibid.
Ki niamkhiat tak leh ki dawm takin, kipna leh khentel sa-a omna tawh hih nasep a kipan a hi hi. “Zawhthawh thu tawh aki ding saksate Thu tawh i sial paai ding hi. Keimah in thuciin khawng umte, thutak umlote, zawhthawh thu tawh ka nawk kei ding hi….Kuamah ki zawh thawh bawllo ding hi. Upna ah suahtakna cih thu a pangpi pen a hi hi,” ci hi. – Ibid. Wittenberg ah Luther hong ciah kik ta hi cih ki thangin thu a hilh ding hong hi ta hi. Mun ci teng panin mite hong pai-in Biakinn dim leet hi. Pulpit a kah toh ciangin thuneemna leh pilna tawh hilh-a, hansuah-in a taai hi. Mass phiat khiat vai-a thatang a suangte tung ah:
“Mass pen thusia pi khat hi. Pasian in deihlo hi. A kiphiat lel ding mah hi. Tua taang-in leitung bupin Lungdamnathu nitak an in ne zaw leh ka deih hi. Ahi zongin thatang tawh kuamah ki kaai khia kei hen. Tua vai pen Pasian vaihawm dingin I koih ding hi. Ama thu in na na seem dinga, ei sep ding hilo hi. Bang hang hiam? nong ci kha ding uh hi. Bang hang hiam cih leh, mite lungsim pen kei khut sungah tungman meek bangin ka meek thei kei hi. Thu hilh ni. Tua ban Pasian in sai ta hen. Zawhthawh thu in sem leng bang ngah ding ka hi hiam? Maai sia, cih ngei ci, mi ciing, ngeina neih, ki neih tawm hi lel hi… Lungsim tak leh muan’na migitnate ki ngah hetlo ding hi. Hih thu thumte a ki (190)sapna mun ah na dang khempeuh zong a kisam hi a, ka koih khong khi-khe mawk thei kei hi….Nang leh kei leh leitung buppi kikop-a I thatang hatna I zat sangin Pasian in Ama thu lel tawh na sem thei zaw hi. Pasian in lungtang uka, lungtang a zawh khit ciangin a vekpi a zawhsa a suak hi zaw hi.
“Laigelh-in thu hilh-in thu ka gen pih ding a, ahih hangin kuamah ka sawl ten tan kei ding hi. Bang hang hiam cih leh, upna in ama utna tawh hong sem na ding hi. Ka sep dan na en un. Pope lang pang-in mawhhon’na leh papistte nasep na ka nial mah hi. Ahih hangin thatang leh buaina ka zangh kei hi. Pasian thu ka masuan a, thu hilh-in lai ka gelh a, — tua bang ciang bek ka sem hi. Ka ihmut sungin ka hilh thute in pope vai nalawn mangin kumpite hi ta leh vaihawm pite hi ta leh in tua zah-in bawllo uh hi. Ahih hangin bang mah kei bawl omloin Pasian bekin na a seem ahi hi. Thatang suang hi leng Germany gam buppi sisan in tuum kha ding hi. Ahih hangin tua cih leng bang hong piang ding hiam? Siatna leh hawmsuakna, pumpi leh khaa in a thuakna tawh kizom ding hi. Tua ahih ciangin daai takin ka om a, leitung bup ah Thu in seem ta hen ci in ka aap hi.” – D’Aubigne, b. 9. Ch. 8. Ni khat khit ni khat, nipikal khat bup, a lawp mite tung ah Luther in kizom-in thu a hilh hi. Pasian thu in thu motphuut te omzia teng a phel khia hi. Lungdamnathu vangliatna in aki makaih khial miteng thumaan ah hong kaai kik hi.
Lutherin thu motphuutte in thusia a pian’ sakna uh gennuam selo hi. Amaute ngaihsutna maan nei lo leh uk khialh hi uh a, van pan-a khuavak tuam vil vel hong kipia hi a ci zaw zen te hi na pi’n a lang nialna kammal neem pen khat zong a thuak zo lo lel te ahih lam uh a thei hi. Amau leh amau a lian pen in kituat khol kin ken uh a, mite in dong nawn het loin amau cih bang bang mang lel dingin thei sak ziau lel uh hi. Amau in Luther tawh ki kum ding a nget uh ciangin a mang hi; a ki kup uh ciangin amaute a kineih tawm ahihna teng uh ki dawk khia sak sisek lel mawk ahih manin tua a kineih tawm miteng pen Wittenberg panin a taai khia uh hi.
Thu motphuutnate tawl khat sung hong daai sam hi; ahih hangin kum tawm khat khit ciangin a gam zaw a sia huai zaw-in a hong dawk kik hi. Hih nasepna a makaaite pen Luther genna ah, “Amau te adingin Laisiangtho pen lai sisa bang hia, amaute in ‘Kha! Kha!’ ci in sam tawm tawm uh hi. Ama kha in amaute a makaih na ah bel ke’n ka zui (191) zo kei ding hi. Pasian in Amah migiitna tawh misiangtho be bek midang omlo hel mawk pawlpi sung ah kei hong keem ta hen. Kei pen mi tha neem, mi cina, mi niamte, amawhna a phawk-a a lung kham, a tau mite, a lungsim tawng donga Pasian hehnepna leh huhna a deih mite tawh ka teeng khawm nuam hi” ci hi. – D’Aubigne, b. 10, ch. 10 .
Thu motphuutte laka thahat pen Thomas Munzer in thu ngaihsun siam khat hi a, maan tak-in kimakaih leh na-pha a bawl theih nading siamna a nei hi; amah’n bel biakna maan deihna bulpite na sin kha lo hi bek hi. “Amah in leitung bup ki puah pha leh a deih hi a, a lawp het hat mawk dangte mah bangin amah mah tung pan a puahphatna nasepna a pat masak ding ahih lam a mang ngilh hi.” – Ibid. Amah pen in ngimna lian nei a, a lian pen hih ding ut-in, Luther zom pah hih ding na ngawn a hawm thawh hi. Amah in, Puahphate in Laisiangtho thuneihna leen-in pope ding mun mah bang ve ve pope tuam khat a phuang khia hi lel lo uh hiam? ci hi. Amah mah Pasian in puahphatna thugen dingin sawl hi ci in ki gen hi. Munzer in, “Hih khaa aneite in a nuntak sungun Laisiangtho khat vei zong mukha ngei ta kei leh upna maan a nei uh a hi hi” ci hi. – Ibid.
Thu motphuut siate in amau mah mah a lung lawpna bang ciat uh zui in ki uk uh a, a lungsim sunguh ah hong lut thu khat pepeuh pen Pasian Aw hi ci uh a, tua bangin zui in khengval kha pah pah uh hi. Kim khatte in a Laisiangthote uh hal tum in, “Lai in sihna pia a, khaa in nuntakna pia hi” ci nong zen uh hi. Munzer thuhilhna in mite lam dang dang ah a deihna uh taang tung sak-in Pasian kammal sangin mihing lungsim sehna te tung nung sak zaw in tua tawh a lung tup uh a tung sak uh hi. Ama thu upna zong mi tul tampi mah in a saang ve ve a hi hi. A sawt loin mipi biakna ngeinate nial a, Kumpite thu man’na in Pasian leh Belial’ na i sep khopna khat hi ci in a gen hi.
Mipi lungsimte in papacy hak kolte hep khiat a sawm sa pen zawh thawh thu hial a ukna husia tawh amai uh a kidalte zong hong thuak lah ta uh hi. Munzer in lumlet nuam a a thuhilhna Pasian hong sawl hi ci-a a ki gen pen in amau te a ki uk cipna panin phu (192) keek dingin makaih a, amau ki manialna te leh thuakna te ah tha a pia hi. A buai huai pen pen Kumpi langdona leh kidona hong piang sak a, Ger-many gam teng sisan tawh a ki diah sak hi.
Puahphatna ah thu motphuutte hong dian’ man-un Erfurt-a a thuaksa lungkham na Luther in a zah nih-in a hong thuak kik hi. Papist gam ukte in mi tampi amin-in lo khia uh a, hih tualgal pian’na pen Luther upna phuan khiat’ gah hi ci-in angawh uh hi. Hih ngawhna pen maan het lo ahi ta zongin Puahphapa amin pua suak hiau mawk ahih manin lung sii sak mah mah hi. Thumaan nasepna pen hih thu motphuut te bawl-in ki en san mawk ding ahih ciangin tua pen mah mah thuak hak sa pen hi. A leh lam ah, hih tualgal makaite in Luther mudah ve ve uh hi. Bang hang hiam cih leh amau upna nial sak bek zong hi loin van pan-a kisawl thu hi lo hi cih sak baan ah kumpi lang pangte hi cih sak ahih manin heh uh hi. A mi mal-in amah a ki neih tawm bulpipa hi ci-in mawh sak uh hi. Amah in kumpite leh mipite a gal bawl tuak tuakna om hi ci uh hi.
Rome te pen kisial-in na nuam mah mah uh hi. Puahphatna nasep a puak ding hi ta hi, ci uh hi. Luther mawh sak uh hi, amah mah in hanciam tak-a a kawk khiat a puah phat thumaan lo te teek mah tawh tu’n Luther leh-mawh sak uh hi. Thu motphuut te in maan lo tak-a a pulaakna uh om a, amaute maanlo tak-in ki bawl hi ci in mipi te in khasiat huai a sakna uh a ngah uh hi. A tatak-in amaute a khialhna uh om a a thuak uh hi lel a, tuate pen midik kithat te (martyr) bangin gen ta zen uh hi. Tua banga Puahphatna a thatang neih khempeuh tawh anial lelte khawng hehpih-in git loh man-a bawlsiatna thuak bang in gen uh hi. Hih pen Satan pian khiat sak hi a, vantunga a gal phuan khiat cil-a a lungsim pen mah a hong zangh kik kik a hi lel hi.
Satan in a tawntungin mite khem theih nading zong den a, amaute in mawhna ahi gige te bang, Hoih hi, mah ci sak ve ve ta zen-in a hoih te bang Mawh hi, mah ci sak ve ve se ta zen ngei den sa a hi hi. A nasep paisuakzo zen mah si maw! Pasian naseemte pen lau lo taka thumaan a dingin a din kip uh teh bang zah vei ki mawh sak-in ki zahpih mawk mah hiam? Satan zat mite pen bel ki paakta zaw helse a, midik kithat-te bang keek-in ki (193)dawk sak zaw hel se zen hi. Pasian adinga muan huai taka dingte Pasian tunga a muan huaina uh zahtaak huai zaw napi in amahkia tangkop sak-in, migilo hi dinga muan mawhna ki nei sak zaw hel se zen hi.
Sianthona limcing, bawl tawm sianthona in a mi kheemna zom lai hi. Lampi tuam tuam tawh Luther hun lai-ate mah bangin mite
31
lungsim Laisiangtho pan heii khia a, mi makaite in amau hoih sak bang zui-in Pasian thukham zuihna pan lam pial pih uh hi. Hih pen thumaan leh siangthona maan pam paih theih nadinga Satan vaihawm pi pen ahi hi.
Luther in laulo takin Lungdamnathu keema, mun ci teng pana a hong ki nawk teng a dal hi. Kidona khempeuhah Pasianthu in amah leh amah a vanglian galhiam ahih na ki lak hi. Tua thu galhiam mah zangh-in pope in mi thuneihna a suh khiat pen va do a, sang pan-a thu ngaihsun siam-pilna zong lang doin, puahphatna pau lam-a thu motphuutna lang khat ah suangpi bangin a kip a kho-in a ding hi.
Hih thu nialna te in Laisiangtho pen pam paih-in mihing pilna thupi sa zaw-in, biakna thumaan theihna bul ahi dingin a saang hi. Ngaihsut tawmnate in thu saikak na bia mai ta a, tua pen biakna sunga et teh dingin a zangh sak hi. Romete upna in pope ukna pen sawltakte hun pana ki tatsat lo-a ki saang suk sawn sawn vantung thupiak hi a, cikmah hun-in ki khek thei lo hi, ci ahih manin a siatna, a nitna teng ah a uat luatna teng uh, sawltakte thupiak hi, a siangtho hi, ci suk suk sak hi. Munzer leh a pawlte in Pasian hong sawl hi a cihte uh zong lungsim-a a sehna mawk mawk uh, mitkha-a uang et luatna pan-a piang peuh hi a, thuneihna nei khempeuh Pasian hi ta leh mihing hi ta leh nial dinga hanciamna hong suak mawk hi. Khristian maante in Pasian kammal om bang saang dinga, thumaan kikholna Laisiangtho bu tawh tua a kisawl thute en kaak-in sit tel pah pah ding a hi hi.
Wartburg pana hong ciah kik ciangin Luther in Laisiangtho Thak atei pen hong zo ta a, Germany mite amau pau-in Lungdamnathu pia khia thei baih ta ding a hi hi. Hih laite pen thumaan a it mi peuh mah in lungdam takin na saang uh a, ahih hangin mite thuciin lel (194) peuh leh mite thukham a zui nuamte mudah-in na nial uhhi.
Mi taangpi nangawn in Pasian kammal thukhamte siampite leh dot uh a kisel thei tangh tangh uh a a om mawk pen phungzite in lam dang sa in amau theih loh luatna kilangh sak ahih manin patau mah mah uh hi. Amau ci le sa thu sai kaakna galhiam lel pen Kha Siangtho namsau mai ah taang thei vet lo hi. Rome in ama thuneihna teng kai kawm in hih Laisiangtho ki hawm keek pen dal nuam a, a bawl theih zah zah tawh dal-in thupiakna te, pawl sung pana paih khiatna te, gawt bawlna te zong zangh napi uh lah tuate lel pen a mawkna suak-in dalzo tuanlo hi. Laisiangtho hawm khiatna a naak khaam semsem uh ciangin mipi in a sung ah bang thu om zaw zen-a hi ci khaam mawk uh hiam ci in a theih nopna uh nasia semsem zaw hi. Lai sim thei peuh mah in amau mimal adingin Pasian thubu sim nuam pha seemseem zaw uh hi. A paina peuh uah pua kawi kawi uh a, sim sim mai in, sim pha pha mai uh hi. Khawkpi khat khat a kam ngah ma teng uh lungkimloin simsim uh hi. Laisiangthothak tua zah in ki sim nuam hi cih a muh ciangin Luther in tha khat mah-in a Lui zong tei ki pan pah a, a zawh masak sak a khawk khawk-in a hawm khia pah pah hi.
Luther laigelhte khuapi hi ta leh khua neu hi ta leh ah a ki bangin na pahtawi mah mah uh hi. “Luther leh a lawmte in a thu kaihkhop si-in, mi dangtein hawm khiat asii uh hi. Phungzite in a phungzi huang sung thukham tawh kituak lo thei napi-in a khan’ tawn uh naseem lo-a tha dah-a nuntakna panin hong ki kheel in thanopna hong nei uh hi. Ahih hangin Pasian thu tangko dingin bang mah theilo lua lawmlawm zek uh a, zin kawi kawi-in khuaneute ah Luther leh a lawmte laibute va zuak uh hi. A sawt loin Germany gam sung teng a haang mah mah laibui zuakte in tuam khin hi,” – D’Aubigne, b. 9, ch. 11.
Hih lai kigelhte a hau a zawng, a pil a hai in lawp takin sim ciat uh hi. Khua neu saang omnate ah nitakin meikiangah ki khawm uh a, sangsia te in a vek pi ua a zak dingun a sim khia uh hi. Sep theih khempeuh ki seem a, khaa kim khat-te in thumaan a theih khit uh ciangin lungdam takin saang uh a, tua thupha mi dang te va puak sawn zel uh hi. Pasian gensa hong ki tel muh hi: “Na thu a lutna ah khuavak pia a, mi hoih te tung ah theihna, pilna guan hi.” Late 119: 130, acihna thu tung takpi hi. Laisiangtho simna (195) in mite lungsim leh lungtang nakpi-in a kheel hi. Tuate tungah papal ukna in sik kol bulh a, thu thei loin niam kiat suk suk ni loh a na hi ta zen hi. Thuciin lel khawng leh a ngeina khat bawl-a tua zuihnate in theihna pilna neu guat lua mah mah hi. Luther thu hilhna pen in Pasian thu a om bangin thumaan tang takin lak khia a, mipi te khut ah tua thu aap-in amaute hih theihna ki phual cipte tua thu in pholh khiat sak-in khaa te tha hat sak a, puahsiang a, a pilna te uah tha thak guan in a tok suah hi.
Mite amau din mun tuam tuam ciat mah tawh a khut sung uh ah Laisiangtho tawi-in puah phatna thumaan pan pih-in om ki mu hi. Papistte in Laisiangtho pen phungzi te siampite sim ding bek-a a koih uh hi a, tu ciangin hih thuhilhna thak hong nial un ci in ki to to ta hi. Pasian vangliatna in lah na seem baan ah Laisiangtho thu thei lo lua uh ahih ciangin siampite leh phungzite in laisiam lo te lampial thu nialte ci-a a zah ko ko te uh lelhpi-in lel ta mawk uh hi. Katolik laigelhpa khat in a gelhna ah, “Lungkim lopi-in Luther in a nung zuite kiang ah, Laisiangtho longal thu dang um het loh dingin hansuah hi,” ci hi. – Ibid. b. 9, ch. 11. Pilna tawmno bek mah a nei hi napi thumaan teci pangte thu ngai dingin mipi ki sung zuah zuah a, a tuate lel mah in laisiam minthangte leh theology siam minthang te nial gawp thei ve ve lai uh hi. Hih mi minthang, bang mah lah a thei tuanlote in zum huai takin Pasian thumaan dai tak-a a ki gente nangawn dawng thei lo veve lel mawk uh hi. Na sem gim mite, galkap te, numeite leh naupang te na ngawn in siampite leh phungzi te, lai thei Doctor akici zaw zen te sangin Laisiangtho thu thei zaw hiau mawk uh hi.
Laisiamte leh mihonpi mawk mawk te kikal a ki lam danna zah-in pope thuciin leen te leh Gospel thu zui mite kikal ki lamdanna a ki zakim in om hi. A cial cial-a ki ukna a cial tung nung pen te pau sin ding leh lai sim ding awl mawh lote lang doin khangno lungsim lai sim tha nuam te in Laisiangtho sim sim mai uh a, taanglai laigelh thupi te a hong thei uh hi. A lungsim uh tha hat in pahtawi huai nuntak leh lungsim khauh a nei hih (196) khangnote in tua bang pilna hong nei uh a, sau vei pi sung amau dem zo hong om kei hi….Hih puahphatna-a khangno te in Romete’ Doctor pipite, mipi kikhopna sung khawng ah hong ki muh khak uh ciangin phuul gawp zo uh a, hih bang mah thei ngap lo te in a cih nading uh thei loin mai mawl mah mah uh a, mipi tung pan-a a ngah ding mah uh a hi lel et thawlna a ngah uh hi.”
– D’ Aubigne, b. 9, ch. 11.
Rome siampite in amau mite kiam kiam hi cih mu-in thukhen mangte huhna khawng zangh-in amite uh leh kaih zawh nading a vai hawm uh hi. Ahih hangin mipite in amau taang sapna huh dingin hih thuhilhna thak sung ah thu gil-vah thei zaw uh a, buhvai bek ahi pipu thuciin lel ante nek na pan a taai khia uh hi.
Thumaan hilh siate bawl siatna mei hong kuan’ ciangin amaute in “Hih khua ah hong bawl siat uh ciangin khua dang ah taai un” cihna Khrist’ kammalte a phawk kik uh hi. Matt. 10 : 23. Khuavaak mun ci tengah lut ta hi. Amaute ading kongvang a na hong nuam pe peuh beel uh a, Khrist thu hilh-in, khat veivei biak innte ah zong hilh uh a, biak innte a ki phalloh ciangin mi innte leh kong lak mun awngte ah hilh uh hi. Koi ma peuh ah thungai ding mi a om nak leh biak inn tawh kibang hi kawi kawi hi. Thumaan pen thahat takin ki tangko kawikawi a, a dal zo bang mah omlo hi.
Leitung thuneite leh pawlpi siatein Upnapial ci in a gawi cip nop uh hangin zo thei lo uh hi. Thongkhiatnate, gawt bawlnate, meikuangte, leh namsaute azat uh hangin zo thei tuan samlo uh hi. Mi tul tampi in amau upna a sisan uh tawh kip sak uh a, nasep pen mai nawt veve hi. Bawlsiatna in thumaan ki theh thang sak semsem zaw a, motphuutna tawh Satan in ahelsak pen in lah Satan nasep leh Pasian nasep teltakin ki lang khia sak zaw khin lel hi.
32