Jordan Gungei-a Israelte Mawhna

Israelte thumaan lampi pan leh Pasian kiang pana a pial khiatna a thu in hih bang ahi hi. A masa in Israelte’n a gam veengte a hi, Lawki gamte tawh kizopna a nei uh hi. Tua zawh a sawl lo-in, Israel mite lakah Midian numeite khat khat in hong kihel uh hi. Bangmah thusia leh lasia, a kilangh tangin bawl lo ahih manun, hih Midian numeite thu Moses kiang ah kigeen loh hi. Hih Midian numeite ngimna in, Israel mite Pasian thukhaam palsat sak ding leh amau lawki ngeinate tawh Israelte zolin, milim biak sak a sawm uh ahi hi. Hih a ngimnate uh a kitheih loh nadingin, Israelte tawh lawmta bangin a om uh hi. Tua hi-a, Israel makaaite nangawn in thei kha loh takpi mawh uh hi.

Pasian mite a kheemte thuaksiatna in hih bang a hihi. La phuakpa in: “Lawkite in a tawhsa uh dum sungah a kia uha; a phah sa uh ngen sungah a khe uh tawh a awk uh hi,” ci hi. Ps. 9:15. “Bang hang hiam cih leh Topa in A mite nawlkhin lo ding hi. Thukhenna in thumaanna a om sak kik ding hi. Misiangtho khat bawlsia dinga mite a kikaih khop uh ciangin, Topa in amaute tungah a mawhna uh tungsak dinga, a giitlohna uh hangin, amaute kibeimang sak ding hi.” Ps. 94:14-15, 21-23

Balaam in Israelte a phuisam hangin bangmah lawhcing zo lo hi, bang hang hiam cih leh Topa in Israel mite sungah kihhuaina leh uangtatna mu lo hi. Num.23:21-23. Ahih hangin, Israelte’n ze-etna a zuih uh ciangin, Pasian thukhaam a palsat uh-a, amaute kidaalna om nawn loh hi. Pasian thupiakna banga a kithumaan ciangin, phuisamna, samsiatna ih cihte in bangmah septheih nei loh hi. Tua ahih manin, Satan in ama siamnateng zanghin, Israelte mawhna tuul sungah a zol hi. Pasian thukhaam a zui banga kigeen napi a, a palsatte in, Pasian kiang pan a kikhen khia uha; a gaalte uh maai-ah ding zo lo ding uh hi.

Gaalte leh phuisamna tawh a kizo zo lo Israel mite pen suzuakte’ n zawhnop sa mahmah uh hi. Satan khut zat dinga kipia numeite in mite a thaang sung uah awk sak in, a susia uh hi. “Tua numei in mi tampi liam saka; mi thahaat tampi a that hi.” Paunak 7:26. Seth suante zongh a siangthona uh panin kizol khia-a, a siangtho nam pan a kihhuai nam a suah uh hi. Joseph zongh tua bang mah in na kize-et ngei hi. Samson zongh numei zolna hangin, Israelte kidaalna kulhpi bang a hi kimlai, Philistine mite khut sungah a tung hi. David zongh numei tungtaangah na tuuk hi. Solomon, kumpi lak pana pil pen, Pasian in “Ka it pa aw,” ci-a thumvei sinsen sapna a ngahpa, zongh hih thaang sungah na awk-a, huukna leh lanna ii sila a suak lel mawk hi.

See also  GC 23: Biakbuk i Cih Bang Hiam?

“Eite ih kithuhilh nading in hih thute ciamteh ni. Tua hi-a, na tuuk loh nadingin hoih takin ding in.” 1 Cor. 10:11-12. Satan in mihing lungsim bang tawh kheem zo ding cih thei mahmah hi. Kum tuul tampi sunga sin khitsa mah bangin, bang cih le’ng mi kikheem zo pen ding hiam cih thei hi. A beisa khang tampite ih et ciangin, numei pasal uukna in mi tampi na puuk sak zo hi cih ih mu thei hi. Tu hun in hun bei kuan hi ta-a, Pasian mite in vantung Khanaan gamgi ah a din laitakun, khanglui lai hun mah bangin, Satan in nasem dinga, Gam Ciam a kiluut loh theih nading in a zahnih in na a seem ding hi. Satan in mikim awk nadingin thaang a siah hi. Bang mah a thei tumteeng lote bek kheem ding hi lo-a, dinmun saang pen, nasep siangtho pen a seemte nangawn a vekpi-un a buai sak, a nit sak zawh nadingin na a seem hi. Tuma kum tuul thum lai-a a van zatte mah tu-in a zangh hi. Kilawmtaatna, meelhoihna, gualnopna, pawl bawlna leh zu dawnnate tung tawnin thukhaam sagihna a kipalsat nading naakpi takin a hanciam hi.

Satan in milim biakna ah a luutpih ma-in, numei pasal uukna ah paipih masa phot hi. Bang hang hiam cih leh huukna leh lanna, numei, pasal uuk luatna in lungsim ngaihsutna niam saka, kha adingin lametna beisak hi. Sia leh pha theihna zongh bei sakin, kam kham sak gawpa, ganhing banga huukna leh lanna a nei khat in, Pasian thukhaam cihte a kipan biakna thu peuhmah bang mah awlmawh nawn lo hi. Hoihna, phatna, siangthona, thumaanna diktatna, Pasian zahtaakna leh vantung tawh kisai ngaihsutnate huukna meikuang in valhtum hi. Tua bang mi in mi gina lo, dawite teenna, “a kihhuai vasate bu” bang ahi hi. Pasian meel suuna kibawl pen bangmah ngaihsutna a nei lo ganhing lim bangin a kiniam kiat suk hi.

Milim biate tawh a kithuah sakna panin Satan in Israelte Pasian thukhaam palsat saka, Pasian thukhenna a thuak sak hi. Tua mah bangin, tu-in, Khrist nungzuite leh upna neilote kithuah sakin, pawi bawlna a tuamtuamte ah a pai sak hi. “Tua hi-a, amaute kiang pan hong pai khia unla, a tuam in om un, a sianglo nate lawng kei un, ci-in Topa in hong sam hi. 2 Cor. 6:7. Pasian in a mite leitung mite tawh kibang lo-a, ngeina, uukna, leh nuntaak ziate ah, taanglai Israelte banga ih tuam om ding deih hi. Hih leitung ii ngeinate a zuihpih kim ding ih hi kei hi. Khrist in, “Leitung it kei unla, a sunga nate zongh it kei un. Leitung a it mi-in Pa itna a sungah a nei kei hi.” ci hi. 1 John 2:15. “Hih leitung tawh kilawm a hi mi-in, Pasian gaal ahi hi.” James 4:4. Pasian tawh hong kigamla sak thei ding ih lawm leh ih gualte ih paisan hangin kikhial loh hi. “Ze-etna hong thuak sak kei in,” ci-a ih nget mah bangin, ze-etna sungah ih luut loh ding hi pah hi.

See also  Khangtawn Lunggulh: Nunneem Zeisu

Thu-ummi khat in a kilangh tanga mawhna a bawl ma-in, kuama theihpih lo-in, mawh nopna lungsim leh kithawina nei khin gige zo hi. Lungsim in thakhat thu-in, a siangtho pan a kihhuai, mawh baanglo pa mawh bawl den nopna nei pah loh hi. Siatna ah a kipicin nading zongh tawlpi khat kisam hi. Ngaihsutna hoihlo tawh a kidiah cip manin, a kihhuai mawhna pen a deihhuai na khat a suak hi.

Satan in khialhna leh hoih loh gamtatna a tam seemseem nadingin, daatsian sungah a hi zongin, drama sungah a hi zongin, laibu sungah a hi zongin mite muh theih leh sim theih dingin kicing sak kawikawi hi. Tuate a kimuh leh a kisim mun luat ciangin, ngeina bangin kituata, hoih loh gamtatna pen a hoih mah kisa sa hi.

Tu lai-a, Khristiante cimthawina vante in lawkite cimthawina bang vive hi ta hi. Cimthawina a kici peuhmah, Satan khutzat kici thei phial hi. Satan khutzat ahi lo, cimthawina pen tawm mahmah hi. Mi pilpa in “na lungtang hoih takin keem in, bang hang hiam cih leh tua panin nuntaakna a piang hi,” ci hi. Paunak 4:23. “Mi khat in a lungsim sunga a ngaihsut bangin, a gamta hi. “Paunaak 23:7. Lungsim pen Pasian hehpihna tawh a kisian suah ding ahi hi. Khrist huhna kihel lo-a mi hoih, gamtat hoih a hi nuam khat in, sehneel tunga inn lam tawh a kibang hi. Ze-etna guahpi a zuk ciangin a tuuk lel ding hi. David thungetna pen mi kim thungetna hi leh hoih ding hi. “Pasian aw, lungtang thak hong bawl sak inla, ngaihsutna thak hong pia in.” Ps 51:10. Pasian huhna tawh siangtho na lampi ah ih pai ding hi.
Sep ding khat ih nei lai hi. Tua in ze-etna ih nan zawh nading nasep ahi hi. Ze-etna ih do theih nadingin, ngaihsutna hoihlo, a kihhuai uukna hong peng theite ih sim loh ding, ih et loh ding, leh ih ngaih loh ding ahi hi. Ih ut peuh ih mawk ngaihsut kawikawi ding hi lo hi. Peter in, “Na lungsim kawnggaak uh gaak un. Pil unla…nidanga bangin om nawn kei un: Hong sampa a siantho mah bangin no zongh a siangtho in nungta un:” ci hi. 1 Peter 1:13-15. La phuakpa’n “Bang ci bangin tangvaalpa in a lampi siangtho sak thei ding hiam? Na thu banga omna tawh,” “Nang tungah ka mawh loh nadingin na thu ka lungtang sungah ka seel hi,” ci hi. Ps.119:9-11.

See also  Khangnote Hanthotna 1

Mi khatpeuh in a lawmte theih loh in a mawhna seelcip zo kha mah ding hi, a hih hangin a mawhna thaman, thuaksiatna, natna, haina leh sihna a thuak teekteek ding hi. Tua baanah thukhenna lian zaw khat maai-ah, mawh sakna thuak dinga, a mawhna thaman a hi tawntung sihna a ngah ding hi. “Hih bang a seemte in Pasian gam a luah kei ding uh hi. Satan leh a pawlte tawh” “meikuang” sungah a thaman uh ngah ding uh-a, tua in “nihvei sihna” kici hi. Gal. 5:21, Mangmuhna 20:14.

“Numei ginalo muuk in khuaizuluum bang hi-a, a kam in sathau saangin zol zaw hi: ahih hangin ama beina in singkung bang hi-a, langnih-a hiam naamsaau bang ahi hi.” Paunak 5:3-4. “Ama kiang pan pai khia inla, a inn kong naih vet ke’n: na naih leh na minphatna midang tunga a pia na hi dinga, na nasepna in khualmi inn a hi ding hi; na ci leh sa, na pumpi a kantum ciangin, na thuum ngeungeu ding hi.” Paunak 5:8-11. “Tua numeinu inn in sihna tawh kizom hi.” “Tua numei kianga pai peuhmah ciahkik ngei loh hi.” Paunak 2:18-19. “A leenglate in heel thuukpi sungah a om uh hi.” Paunak 9:18.

Tags:

Admin

Admin

Top