Tawlngak Na’ng Hunte

 

 

 

Lesson 9                                       *August 21–27

 

Tawlngak Na’ng Hunte

 

Sabbath Nitaklam                                         August 21

 

Tukalsung Simding: Genesis 1; Exodus 20:8–11, Exodus 16:14–31, Deuteronomy 5:12–15, Psalms 92, Isa. 58:13.

 

Kamngah: “Tua ahih ciangin Pasian in ni sagih ni thupha pia in siangthosak hi. Banghang hiam cihleh, piansak nasepna ama’ nasep khempeuh panin tua ni in Pasian a tawlnga hi.” Genesis 2:3.

 

          Kua in ngaihsunzo peuhmah ding, piansaklai in—khuamial lakah khuavak, tuipi sungah nuntakna dimvat, van a vasate lengvat cih khawng! Lamdang takin Adam leh Eve hong piandan khawng e. Pasian in koici sepding cih peuhmah ei’ ngaihsut phak theih hivetlo hi. Hih a gamtang teng a bawlkhit ciangin Pasian in thu dangkhat ngaihsun kik hi. A bawl masak ngapite vasalengte bang hilo in thupi khollo bang ding ahi hi. Ni sagih ni pen sehtuam ngiat hi. Mihingte leitungah a om ngeingai mapekin, amau phawk ding thukhat Pasian in ciangtanhkhin hi. Tua ni-in nasepna pan tawlnga in, lungnuam takin lopa-hingte, huihkhite, tuite, mihingte leh na khempeuh in Pasian piak nopna sungah nuamsa dingin deih hi. 

          NulehPa masa tegel Eden pan a paikhiatkhit nangawn, tua nopsakna ngah ding hong deihsak veve hi. Pasian in hunzat siamdan sittel nuam ahihmanin, a kipatcil panin, hunte sungah hong helhsak hi.

          Tukal sung in, Pasian in, ni sagih ni Ama’ tawlngakna sungah lut dingin hong sam ngetngut ahihna thu i sin ding uhhi. 

          

Sunday                                                                 August 22

Tawlngak Na’ng Kipatna

 

          Akipatcil lai in Pasian a om hi. Topa Pasian pau in piangpah hi. Khuavak in sunleh zan khenkhia a; tualo vanleh leitung leh tuipite ninihni in piang hi. Ni thum ni in leikeu leh ankungte piang hi. Pasian in hun leh lei maitang a piansak khit nungah, ni thum sungin a dimsak hi. Khuavak in sun leh zan tawh vantung uk hi. Taanglai ngeinate bang hilo in, Laisiangtho piansakna tangthu in Ni, Kha, Aksi tepen pasiante hilo cih kiptakin gen hi. Piansak nilii-ni ciangin Pasian kammal tawh honglutpan uhhi.          

          Moses genna ah ni nga leh ni guk (Genesis 1:20-31) tegelin nuntakna leh hoihna tawh kidim hi. Vasate, ngasate, leitung ganhingte in Pasian bawlsa awngthawlpi dimsak uhhi.

          Pasian in a bawlsate tungtang koici muh hiam? Genesis 1:1–31.

……………………………………………………………………………………………………..……………………………………………………………

          Pasian in awngthawl mawkmawk a bawl hi lo a; a cingtaak mun ahi hi. Ganhingpilte in leitungah dim uhhi. La aw zaknophuai mahbangin Pasian in nisimin “hoihhi” ci den hi.

          Mi a piansakna leh a dangte khempeuh a piansakna koibangin kilamdang hiam? Genesis 1:26, 27 leh Genesis 2:7, 21–24. 

……………………………………………………………………………………………………………………………………………………………………

          Pasian in kunsuk in buansawk hi. Pasian’ limmeel sunin hong bawlna in Amah tawh kinai takin hongomsak hi. Pasian awnsukin Adam’ nak sungah huih thunsukin nungtasak hi. Adam nakguh panin Eve a bawl zong pen piansakna kaal sungah a thupiang thupi mahmah ahi hi. Mite’ adingin kiteenna zong Pasian in hong bawlsak a, ’ish leh ’ishshah, “pasal” leh “numei” pen Pasian bawlsa ahi hi. Tutung ni guk ni hong tun ngawngaw ciangin a-aw tumdang deuh hi: “Pasian in a baawlsa khempeuh enin, hoihsa mahmah hi” (Genesis 1:31) cihi.

          Laisiangtho sung a piansakna tangthu leh Pasian makaihna omlo mihingte’ tangthu a kilamdanzia ngaihsunpha in. Thumaan thutak telsiang nadingin Pasian’ kammal tungah kingak ding a thupitna bang hong hilh naci hiam?

 

Monday                                                             August 23

Tawlngak Na’ng Thupiak

 

          Piansakna pen “hoih mahmah” napi picing nailo hi. Tua piansakna in Pasian thupha piak Ni, ni sagih Sabbath ni tawh kikhup hi. “Pasian in ni sagih ni thupha pia-in, siangthosak hi. Piansakna nasep ama’ nasep khempeuh panin tua ni-in Pasian a tawlnga hi” (Genesis 2:3).          

          Sabbath ni pen Pasian piansaksa khat mah ahi hi. Piansaksate sung panin a sangpen zong ahi hi. Pasian in tawlngakni bawlin, mihing (Adam leh Eve innkuan) in nasep silbawl khempeuh pan, Piangsakpa geizuanin a tawlngak nadingin a bawlsak hi. Mawhna honglutin leitung na khempeuh a khelgawp manbek ahi hi. Pasian tawh talsik kizopna omthei nawnlo hi. Nausuah gimna, nasep haksatna, kisiatbaihna leh unau kisiatna cihbang atuamtuam leh biakpiak haksatna cihte hi leitungah hong laang hi. Tuate kawmkal mahah Sabbath kiplai a, hong piansakna ciaptehna leh hong thaksuaksak kikding lam-etna ahi hi. Mawhna ommaa in Sabbath kisam ahihleh, mawhna omkhitin kisamsem zawlai ding hi.

          Tua khitpek, Pasian in Amite Egypt panin a lakkhiat lai in, tua sehtuamni mah phawkkik dingin sawl hi.  

          Exodus 20:8–11 simin. Sabbath in Piansakna tawh kizom a nithupi ahihna bang gen hiam? 

 

……………………………………………………………………………………………………………………………………………………………………

          Hih thupiak tungtawnin Pasian in i bulpi hong hilh hi. Mi tampi upna bangin eitepen avot luathang peuhleh utthuthu in apiang i hikei a, Pasian’ limmeel suunin hong kibawl hi. Amah tawh kikhawlkhawm ding hihang. Israel mite bangpen sal bangin kineubawl mahmah zawzen hi. Pasian limmeel sunin hong kipiangsak ahihna Sabbath nisim in phawk tawntung ding hihang. 

          “Sabbath in Piansakna ciaptehna ahih mahbangin, Khazih hong itna leh vangliatna ngahna ahi hi.”—Ellen G. White. The Desire of Ages, p. 281.

          Niguk sung piansakna bangzah thupi cih ngaihsun in. I hun neih khempeuh lak panin khen sagih suah khenkhat, kaal khat khatvei Pasian kiang i ki-aap ding bangzah thupi naci hiam? Piancil laibu sungah ombangin eima’ pianna bulpi hih bekmah in hong hilh na cithei hiam?

 

Tuesday                                                           August 24

Hun Thak

 

          Gamlakah kum 40 a vakvai khituh ciangin, Egypt a phawk nawn taktaklo khangthakte vive hong khang uhhi. Anu apate’ tawh nuntakzia hong kilamdang luata hi. Hih khangthakte in, anu apate’ uplohna leh a sulzuiteng hangin gamlakah vakvai in sigawp uh cihthu hong tellua mah mah uhhi.

          Amau hamphatna khatah a giahphualuh laizangah biakbuk kilam a, Pasian’ ompihna ahi biakbuk tungah meekai in uap hi. Tua a kikhin nakleh puanlom zial in zui uhhi. Tua meei in sun in nisaliah in zanin meitaang leh khualum sakna hi a, Pasian’itna omtawntung cih phawksakna ahi hi. 

          Sabbath tawlngak ding phawksakna khat a kipia bang ahi hiam? Exodus 16:14–31.

……………………………………………………………………………………………………….……………………………………………………………

          Tulai hun in alaang mahmah upna tetawh kilehbulhin, hih munin Sinai ah akipia Ni sagih ni Sabbath thukham pulakkhol hi.

          Bangthu piang hiam?

          Pasian piaktuam an pen Piangsakpa in Ama’ piansakna kipsak cih nisimin phawk nading ahi hi. Muhtang mahin Pasian in a kisap bangbang piaden hi. Nisimin Ni leh an-in suakkhawmin tum khawm den hi. A zingciang ading khawng kholnuam leh zong, muatziau lel napi, Friday ahih nakleh, a zah nih kipia in, a zingciang dongmah limci silsellel hi.   

          Israel in biakbuk nasepna leh thukhamte khempeuh Paikhiatna leh Gamvakna sungah ki gelhbangin neisitset uhhi. Tuapipimah, Moses in mimalkim in tua thukhamnate simkikkik sakin Pasian’piak ahihlam phawksakkik phapha hi (Deuteronomy 5:6-22).

          Hih khangthakte in khapsa gamah lut ding hong kisa keei uhhi. Israelte in makai kikhel ding hong kulta hi. Hih khangthakte in amau masuan banghiam cih a theih dinguh, Khangham Moses in deih hi. Anu apate’ mawhna lampi zuihkik ding deihsaklo ahih mnanin thukham thu hilhkik phapha hi. Thukham sawmte zong hilhphakik in, tua khangthakte in Canaan gam alakuh ciangin a mangngilh hetloh dingun hilh hi.        

          Eite zong, Zeisu hong pai dinghun pen i sihkhit sawthetlo pahlel ding cileng; tuahun pen ei’ upmawh sangin naizawtham ding hi. I Sabbath kepcinna in Pasian hong sepsaksa tebek thamlo in Zeisu hong paikik ciangin hong hihsak dingte zong koibangin hong phawk sakphapha na ci hiam?

 

Wednesday                                                                 August 25

Tawlngak Na’ng Thudangkhat

 

          Israel mite Jordan nisuahna lamah phualsat uhhi. Kumpi Bashan gamleh Amorite kumpi nihte gamteng laksak khinzo uhhi. Tua ciangin Moses in, Sinai a kibawl thuciamna pen a Pate’ adingbek hilo a, amau ading zong a hihna hilhpha kik hi. Thukhamna sawmte zong amau te’n simphasak kik hi.

          Exodus 20:8–11 leh Deuteronomy 5:12–15 simkhawm in. Sabbath thukham a tellakdan kibatlohna koibang hiam? 

……………………………………………………………………………………………………………………………………………………………………

          Exodus 20:8 ah, thukhamin “Phawk in” cihi. Deuteronomy 5:12 in “tangun” cileuleu hi. “Phawkin” cih kammal zong Deuteronomy 5:15 ah hong pai hi. Hih tengah amaute sal ahihlam uh a kiphawk ding cihi. Amaute suakta khinuh ahihhang, Pasian in lamdangtakin honkhia hikeileh salsuante ahi uhhi. Piansaklai in a gamtang Pasian pen amau suahtaklai in zong gamtang cihthu pen Thukham in phawksak hi: “Topa na Pasian un a vanglian khut tawh hong paikhiatpihna naphawk ding uhhi” (Deuteronomy 5:15). Tu nung kum sawmli lai in khang masate in, a guallelhna uh hih khapsa gamgi ah, tutung khangthakte in anihveina hong dinna uh ahi hi. Khang masate in Egypt pan suahtak nading a thanem mahbangun, khangthakte zong thanem mahmah uhhi. Tua lai in “vanglian khut” anei “a khut zanpa” kisampha uhhi.     

          Sabbath zong a zop tohtoh dinguh ahi hi. Pasian pen suahtakna ahih manin a Sabbath zong Israel mite’n a tan uh kul hi (Deuteronomy 5:15).  

          Deuteronomy 5 sungbek nangawn ah a hilhcianzia cihloh buang, piansakna pen Sabbath thukham tawh ki gamla khollolel hi. Thu khat panin Israel mite Egypt pan hong suahtakna in, Piancil laibu sung a piansakna mahbangin, a ki piankiksakna ahi hi. A suakta Israel tepen, Pasian in a piansak thak mite ahi uhhi (Isa. 43:15)

          Paikhiatna laibupen mawhna pan suahtakna limkhat ahih mahbangin, Hotkhiatna tawh kisai in, Sabbath in Piansakna leh Hotkhiatna limpua ahi hi. Ataktak in cileng, Sabbath in Piangsakpa leh Honpa honglak higige hi.

                    John 1:1–13 simin. Hih munin Zeisu pen Piangsakpa leh Honpa a hihlam bangteng gen hiam?

 

Thursday                                                          August 26

Sabbath Tang 

          

          Pasian in a mite Sabbathni tang ding thupia hi. Thatlo ding, gulo ding cihte Sabbath ni phawk ding tawh hong piakhawm a, Laisiangtho in Sabbath tandan dingbel amalmal in hong gense nawnlo hi. 

          Sabbath ni in, eima omzia koibangin bawltawm ding i hihiam? Psalms 92 leh Isaiah 58:13 simin.

……………………………………………………………………………………………………………………………………………………………………

          Sabbath tanna in Piansakna leh Hotkhiatna pahtawina ahih manin, Topa sungah lungnop kipaknani hiding a, lungziinna hilo ding hi.     

          Sabbath phawkna cihpen ni sagih ni pan kipan phinglo hi. Sabbath masapen in Piansakna pahtawina ahihmah bangin, Sabbath phawktheih nadingin kal khatbup nasep silbawl geelkhol sit set ding a, Sabbathni in tua teng khempeuh hemkhia sitset in “Sabbath siangthosak” ding hihang. Kal khat sungbup kiginkholh khit ciangin Kiginni (Mark 15:42) Friday ni ciangin, a kisehtuamni adingin lungnopna ngiimkhol ding hi. 

                    Leviticus 19:3in Sabbath tanna tawh kisai bang athupi khat peuh gen hiam?

……………………………………………………………………………………………………………………………………………………………………

          Sabbath tanna tawh innkuanpih lawm leh gualtawh kizopna puahphatna ahi hi. Pasian in innkuanbuppi kikhawlhna thupisak mahmah a, nasem sila leh gankhawite nangawn kihelsak hi (Exodus 20:8-11). Sabbath leh innkuan tonngiat hi. 

          Tawlngakna leh innkuanhun in a thupit mah bangin, Sabbath tanna in pawlpi innkuanin mapankhopna ahi hi. Zeisu leitung a omlai in Pasian biakpiakna munah paibek thamlo makaihlai hi (Leviticus 23:3, Luke 4:16, leh Heb. 10:25).      Nipi kal sim sepleh bawlte ah manmawh mahmah phial mahleng, i lungsim sungah hong Piangsakpa tungah tawldamna taktak i lunggulh ding uhhi. Nasep silbawlteng tawlnga a Pasian tawh hun zat khopna pen, i kizopna puahphatna a hihmanin, Sabbath tawlngakna sungah i lutciat ding uhhi. 

          Sabbath tawh kisai in, phutkhak khat peuh leh a thuphate na ngah khak peuh a omhiam? Tuani pen a siangtho hun ahihmah bangin, koibangin nazangsiam thei hiam? 

 

Friday                                                                         August 27

Ngaihsutbeh Ding: “Pasian in A piansakna vanglian hong phawksak a, Ama’ khut tawh a bawlte hong telsak hi. Piangsakpa in a piansakna vangliatnate Sabbath in hong musak hi. Siangtho tawlngakni in, piansaksa-te tungah Pasian’ khutmate i sim ding uhhi. Piansaksa tetawh i kinaih semsem ciang in, Khazih in amah hong omtaktak cih honglak ding a, ama’ nopna leh itna tawh i lungsim hong hopih ding hi.”—Ellen G. White, Christ’s Object Lessons, pp. 25, 26.

          “Topa in, Israel mite Egypt pan a hotkhiatna thubulpi-te lakpan khat in, Ama’ Sabbath siangtho tangdingin a deihna kihel hi. Exodus 5:5 ah “Na mite a nasep panun na tawlngasak uh hi” ci in Pharoah a kamtam ciangin, Moses leh Aaron te’n zong tua Sabbath sianthona hilhcian phapha hi. Tua thu hangin Moses leh Aaron in Egypt gamah Sabbath puahphatna bawlkhin cih hong theisak hi.”

          “Sabbath tanna peuhmah pen Egypt-te sila ahihna phawkna hisaklo ding hi. Piangsakpa phawkna hi a, Egypt ah Sabbath tanding nangawn haksa mahmahna munah, biakna nenniamna pan suahtakna ngahna lim ahi hi. Sila pan a suahtak manun a lungsim sungvuah mizawng, pa neilo leh meigong nenniam thuakte donnopna lungsim aneitheih nading uh ahi hi.”—Appendix note in Ellen G. White, From Eternity Past, p. 549.

 

Kikupding Dotnate:

1.  Christian pawlkhatte, Adventist pawlkhat nangawn in, piansakna a hilhcianna in, Pasian in damtak in kikhelkhelsak cihbangin hilh uhhi. Sabbath tanna pen Pasian in damtakin khel cih upna leh ni sagih ni tanna koibangin kilamdangsak hiam? Pasian’ kammal Laisiangtho in Sabbath pen piansakna nigukkhit nisagih masapen pan kipan ci napi, a beisa kum awn tampi laipanin ni sagih ni kitangkhin cih upna in bang ngiimna hiding hiam?

2.  Ani tektek thupikei e, kalkhat nikhat tawlngak limlim ding hipeuh a cite kiangah bang gen ding nahiam? Ahihkeileh Zeisu in eite’ Sabbath tawlngakna hi a, tawlngakni a dang kisam kei e acite kiangah e?

3.  Sabbath tawlngakna in banghangin suahtakna phawksakna hithei hiam? Zeh bangliang leh kumpi thukham bangliangin ngaihsutna koici pelhthei ding hiam?

4.  Pawlkhat in Ni sagih Sabbath tanna pen vantung thalawhna peuh ci mawkmawk uhhi. Sabbath tangin vantung thalawh a cih theihna’ng uh bangthu om hiam?    

 

 

See also  ZSS 3: SABBATH: SUAHTAK  NI
Tags: ,

Admin

Admin

Top