Sinna 4: Khatguak Omciang - Zomi Adventist Innkuan

Lesson 4 April 20-26

Khatguak Omciang

Sabbath Nitaaklam April 20

Tukaal sung sim ding: Eccl. 4:9-12; Phil. 4:11-13; 1 Cor. 7:25-34; Matt 19:8; Gen. 37:34; Isa. 54:5.

Kamngah: “Tua ciangin, Topa Pasian in “Mipa amah guak a om ding hoihlo hi. Ama a ding a huh ding ka bawlsak ding hi” ci hi. (Gen. 2:18).

Khatvei lai in, numei khat, ama inn dei sungah a sisa in ki mu hi. A suukzawlai thuthang in, tua nu, tu nung kumsawm lai in sikhin hi kici hi. Kum sawm mawleh! Hi zah khuapi lian mahmah, mi tam mahmah lakah, hih numeinu sih kua mah’n thei khalo zen maw kici ngeingai hi.

Hih tangthu bel gentehna hi sam in, mi tampi takte khatguak lungzuang takin om uh hi. 2016 kumin, Newyork thuthang lai ah, “thukan siamte tungtawn khatguak omna thu” cih thulu hong suak hi.

A cil limlim Eden huan panin, khatguak om ding a hong bawl hilo in, pawltawh lawmtawh om ding a hong kibawl hi. Mawhna hong lut ciangin bangmah a hoih om nawnlo ta hi.

*Tu kaalsung tengin, i nuntaksung pawl leh lawmtawh om, khatguak omhun cihte i sin ding hi.

SUNDAY April 21

Pawl leh Lawm tawh

Eccl. 4:9-12 simin. A deihna bulpi bang aitam? Nuntaksung ading a huampi in bang thukhun gen hiam?

………………………………………………………………………………………………………

Khatguak om nuam a sa tawm hi. Khatguak in om phial mah leng zong, haksatna i thuak ciangin, pawl leh lawm mah i ngai hi. Omkhawm ding a hong ki piangsak hi a, a kihuh thei, a ki panpihthei innkuanpih neite hampha mahmah uh hi.

I pawlpi sung, i veng sungah, haksat mahmah laitak nangawn a kohtheih ding dot theih ding pawl leh lawm neilo mah na om veve hi. Khatguak ki omkha thei lel hi. Khatpa in, “nuam kasak lohpen ni Sunday ni, nidangte zumsungah mitawh omkhawm ngeingai, Sabbath ni zong pawlpimi te tawh biakinnah omkhawm ngei- ngai; Sunday ni hi ve aw, keiguak om ngeungau” ci in, tangval khat thum ngaungau hi.

A nuai a Lai Siangtho munte pan, khatguak i om hun a dingin bang thuhoih hong hilh hiam? John 16:32,33; Filipi 4:11-13.

………………………………………………………………………………………………………

Ei Tapidaw te’n, Pasian tawh maitang kimuh theihloh hang, amah tawh i kikhawlkhawm thei hi. Pasian hong naih manin, ama hehnepna i ngah thei hi. Eden huansung Adam leh Pasian kinaihna in, “mipa amahguak omding hoihlo (Gen. 2 : 8) hi”cih kammal khawlsak tuanlo hi. Mawhna suksiat nailohna Eden ah zong mipa in pawl leh lawm kisam veve hi. Eite’n zong i kisampha zawsem lai hi.

Mi tampi omna lakah, khatguak in i om kei ding hi. Amah guak a om mite pen, khuapi sung mi tampi te lakah tampen hi. A kimkot a mi tampi om mah taleh lungzuang a khat tang sawlbang hei theilo cihna hi tuanlo hi.

Khat tang sawlbang hei a lungzuang, a ki nawlkhin, pawl neilo mi mukhia a, hopih ding cih zong baih tuanlo hi. Tuabang mite vei in bangci zonkhiat theih ding na hiam?

MONDAY April 22

Kitenpih Neilo Nuntakna

Numei khat in ki tenpih neihloh hamphatzia a genna ah, “Mission nasem ding in nihvei hong kisawl a, ziakaina om hetlo in ka pai thei pah hi, Innkuan nei khatin, amah bek hilo a, zi leh ta nei a hih manin, tua sapna a san na’ng tawmvei ngaihsunlai kul dinghi” ci hi.

Paul in, innkuan neihloh ding a hoihna bangteng hong gen hiam? 1 Cor. 7 : 25 – 34.

…………………………………………………………………………………………………………………….

Innkuan neihna pen Pasian deihna hi ci in, mi tampi’n sang uh hi. “Mipa amah guak omding hoihlo hi” ci hi napi, Lai Siangtho sungah innkuan neilo mi etteh huai tampi om a, Zeisu mahmah zong hi pah hi.

Jeremiah bang pen zi na nei kei ding hi (Jer. 16:1-3) ci hi. Ama tungah Pasian thukhenna hipah a, tua thukhenna pan a suahtakna omlo a, tangval hampi mah in Pasian’ na sem hi.

Ezekiel zineihna pen ki thupi sim khollo na pi’n, a zi a sihvat ciangin, kap theilo ding ci in khaam zawsop in, meigong pi mahin Pasian’ na ki semsak (Eze. 24:15-18) hi. Kamsang Hosea zong nupa kikhensa mahin, Pasian’ na kisem zom sak veve hi. A pasal taisan in, midangte tawh a kiteng ding pipi mah, angzuaknu tawh tengsak (Hosea 1:3) hi. A nunglam enpha kikleng, Pasianin, Ama’ lampan bek aa hong it keei ahihna hong telsak hi. Hosea adingin bel, lim akizang ahihmanin lungtang nathuai mahmah hi.

Hih limte khempeuh enleng, kitenna thupi zawlo a, tua mite’ thudikna, cihtakna, thumanna cihte hong musak zaw hi. Eite nuntakna pen, inkuanpih neih leh neihloh tawh kisai lo hi. Mi tampi in, innkuan neilo peuh kicinglo cikha ding uh hi. Paul in, “Leitung mihingte gamtat bangin gamta kei unla, nomau mahmah ahing tangin, Pasian na kipia un” (Rom. 12:1,2) ci hi.

Zi neilo pasal neilo, pawlsung pawlpua mite tungah, bangci bangin na kizoppih thei ding hiam?

TUESDAY April 23

Kitenna Atawp Ciang

Pumpi thuakna sihna cihte hi hetlo in, mawhna in innkuan hong susia thei zel a, “innkuan tawp” cih khawng tam mahmah hi. Sihna lobuang, innkuan hong susia penpen, kikhenna ahi hi. Mi tampi te in hih haksatna thuaktek uh hi. A tampen in lungkhamna, amimal in a kum akha in thuaktek uh hi. Pawlkhat te in launa sum haksatna, lungkiatna, hehna, khat tang omna cihbang in thuak tek uh hi. A nuai a Lai Siangtho munte pan, kikhenna tawh kisai bangteng hong hilh hiam? Mal 2:16; Matt 5:31, 32; 19:8; 1 Cor. 7:11-13.

………………………………………………………………………………………………………

Khazih in, gupkhiatna nasem dingin, pawlpi hong koih ahihmanin, i pawlpi mite khempeuh, Khristian picingte ahih theihna dingin, pantah ding hi hang. Pawlpi mite in khantawn ading akiteng nuam, a kikhen nuam cih khawng om thei hi. Nupa kikhen nuam a omleh, pawlpi leh innkuanpih dangte in, Pasian deihna tawh kituak in, gawmtheih tawpin i gawm ding hi (Hosea 3:1-3; 1Cor. 7:10,11; 13:4,7; Gal. 6:11).

Khristian innkuan te ading, ki phungvuh na leh laptoh na’ng pen, pawlpi in vaihawm sak hi.Tua te lak ah (1) a kiteng thei ding mite pahtawina pawi (2) a kitengsa innkuan te thu sinbeh sakna (3) innkuan kisia te leh kikhen te huhna, panpihna cihte om hi. SDA Church Manuel 19th edition 2016, p. 161.

Innkuan kikhente tungah thukhenna a hilo, zat taktak theih ding huhna bang na pia thei ding hiam?

WEDNESDAY April 24

Sihna leh Khatguak Omna

Mi leh ak, a sih uh ciang, bang kilamdang hiam ci’n dotna om ngei hi.A dawnna bel, mite’n a sih dinguh thei, akte’n a sih dinguh theilo. Si ding cih i theihna in i nuntakdaan hong huzaap pah hi.

I theihsa bangin, innkuan ki itna pen, sihna mah in hong khen ding hi. I kizopna bangzah kinai a, ki itna bangzah in lian, hun zatkhop bangzah in nuam ta leh, sih na in hong kikhensak veve ding hi.Mihing Gen.pan kipan Zeisu hong paikik ni dong i mabaan a hihi.

Adam leh Eve kua si masazaw cih Lai Siangtho in genlo mah leh, a si masa zawzaw in, a nutsiat zaw dahna kahna piazo hi. Singteh khat pulh in amau dahna piangsak a hihleh, innkuanpih in a sihsat ciangin dahlua mahmah ding hi.

A nuai a Lai Siangtho munte in, sihna thu bang hong hilh a, mite’n bangci phuut cih hong theisak hiam? Isa. 57:1; Mang. 21:4; 1 Thess 4:17,18; Mat 5:4; 2 Sam. 18:33; Gen. 37:34.

……………………………………………………………………………………………………………………

Eibek siziau ding hibeklo in, it leh ngaih u te, nau te sihzong i tuaklai ding hi. Tua te’n hong sihsan manin, lungzuan khasiat i thuaklai ding hi. Haksa in na ahih manin, tuabang i thuak ciangin, Pasian kamciam phawk ni. Mawhna, thuakna leh sihna te khempeuh khit ciangin, bang i sunsiah lai hiam?

Na pawlpi in, it leh ngaihte sihsat a lungzuang khateem te bangci huh theih ding hiam?

THURSDAY April 25

Khalam Meigong

Natalie kici numei khangno khat, a pasal neih khit kum sagih ciangin, SDA pawlpi khat i thugenna ah kisam a, va kah hi. A lungsim lawngkha mahmah a, Khazih tungah ki ap in, hong piangthak a, a pasal, a teekte leh lawmte khempeuh in phallo napi SDA pawlpi hong lut hi. A muh upna thak leh nuntak dan thak hong nuntakpih hi.

Nasiatak in ki langdo a, a pasal phadiak in, “Hihbang ding a kong tenpih na hi kei hi. Tu’n mithak taktak na suakzo a, na miluina ka ngahkik nuamzaw hi” bang ci liang zaw hi. Kum tampi a upna nuntakpih zo a, pasal nei gige hi napi, “khalam a meigong” hi gige hi.

Khalam meigongte adingin, anuai a Lai Siangtho munte pan, bang hanthotna i mu thei hiam? Isa. 54 : 5; Hosea 2 : 19,20; Ps. 72 : 12.

……………………………………………………………………………………………………………………

Leitung khempeuh a om i pawlpite sungah “Natalie dan” tam mahmah hi. Innkuan nei gige napi un, meigong in biakinn kah uh hi. Upna kibanglo tawh kiteng, pawlpi hong lut uh teh, a lawmin zui nuamlo cih khawng; pawlpi lutkhawm napi un thukhat peuhpeuh hangin khatzaw tawpkik cihkhawng om ngeingai hi. Hihbang pasal/numei te in meigongtak in, biakinn hongpai uh a, pawlpi nasepna te ah zong meigong tak mahin hongkihel uh hi. Sum leh paai tawh zong pawlpi a huhnop uh hangin, innkuanpihte in phallo zel a hih manin, piakhia theilo uh hi. Innkuanpih nei gige napi in, khalam a meigong gige uh hi.

Hihbang mite i pawlpi sung a omkha te in, eite’ itna leh panpihna kisam mahmah uh hi. I pawlpi sung a om, khalam meigong te, bangci bangin i huh thei ding hiam?

FRIDAY April 26

Ngaihsut ding thu:

“Leitung nasepna tampite lakpan mahin, Enoch in, Pasian tawh kizom in, kiptakin ding hi. Nasep hanciam semsem, thunget hat semsem hi. Pasian tawh a kizop hunsung in, mi tawh kizopna omsaklo hi. Mite adingin, etteh cing nasep silbawlna te aneih khitciangin, gilkial dangtak thuak ta leh, Pasian tawh kizopna nei hi.

Pasian tawh a kizopna khauh semsem in, Pasian suun semsem hi. Zeisu’ maitang taang bangin a maitang tang hi. Pasian tawh a kizopna pan hong paikhiat ciang in, Pasian theilo te nangawn in vantung meelpua in mu uh hi.” EGWhite, Gospel Workers, laimai 52.

Enoch tangthu in, tuam om a Pasian tawh kizop ding a teelte, hanthotna hi mah ta leh, ut lopi a, a tuam omkha tampi om leuleu hi. Amau zong tuam om nuam samlo uh hi. Nisimin Topa tawh lungnuam takin i kizop kawmkal mahin, midangte zong i ngai thei lai hi. Amau guak a om te kiangah hawh leng a, Sabbath ni in, biak inn ah paipih in, i gei ah tusak leng, bangzah in hoih ding hiam? Tuabang hun ciangin paikhia inla, pawlpi sung aa om ding na mi muante zong in. Mikhat en in, bangci mi hi ding cih gen ding haksa hi. Sungham in puaneel mi tampi om hi.

Kikup ding Dotna te:

Na pawlpi sung a mi atang-om te, bangci daan in veeina neithei ding hiam?

“Bangbangin om ta leng, a lungkim thei dingin a kisinsa ka hih manin, hih bang ka hong gen ciangin, ka ki tangsapna hong pulaak nuam kahi kei hi” (Phil 4:11). Hih Paul kammal te, i nuntakpih theih ding thupi hi. Lungsim na takpi te ading kidopna tawh i gen ding kisam hi.