ZSS 4: Meikhuk Pan Kumpi Inn-ah

Zomi Sabbath School 4: Meikhuk Pan Kumpi Inn-ah

 Lesson 4: Meikhuk Pan Kumpi Inn-ah

*January 18–24

Sabbath Nitaklam                                                    Jan 18

Tukal sung Simding: Daniel 3; Rev. 13:11–18; Ex. 20:3–6; Deut. 6:4; 1 Corinth 15:12–26; Hebrews 11.

Kamngah: “Ka biak ka Pasian in, meiphualpan hong honkhia zo ding a, Nangma khutpan in zong hong honkhia ding hi, kumpipa aw” (Daniel 3:17).

            “Tua khangnote in Khasiangtho tawh kidim uh a, gambup mipi maiah, a upna uh pulakkhia in, a nungta Pasianbia ahihlam theisak uh hi. Hihbangin a kipulakna uhpen, amau hihtheihtawp mah hipah hi. Milimbiate mai ah, Pasian vangliatna le nungta ahihna lakna dingin, amau un Pasian zakta masa uh hi. Pasian bekmah pahtawi in bia a hihna uh pulak uh hi. A nuntakna uh suakta pahding himah lehzong, milimbiakna lamah amau a zolzo ding bangmah dang omsaklo uh hi. Hih thute in, tulai hun nunung eite zong tangtak in thu hong hilh hipah hi” Ellen G. White, In Heavenly Places, p. 149.

            Biakna tawh kisai in, tulai pilna khang a leitung khangto mahmah le, mite ngaihsutna khauhpaithei mahmah hunsung in, sihna tawh hong ki tawngphial mahleh zong, laisiangtho in hihbang thu piangding cih genkhol khinzo hi. Hih tangthu ihsin ciangin, a thumaan Pasian’ mite thuakding pawlkhat omding cih hong hilh hi.

Sunday                                                                 January 19

Kham Milim

            Daniel 3:1-7 simin. Hih milimpi abawlnop na’ng bangin hanthawn hihtuak hiam?

…………………………………………………………………………………………………………………………………………………………………

            A mangmat le  milimpi a bawl kikal hun pawlkhat beiziau hi. Babylon gam bei dinga, gam dangkhat hong piang ding cih amang pen mangngilh thei hetlo hihtuak hi. Kham lutang bek thangah zolo in, a pumpibup in kham hi ding a, Babylon gam in kip tawntung ding cih ngaihsutna hong nei hi.

            Hihbang lungsim mah tawh Babel tausang lamte in, Pasian langdona in lamkhinzo uh hi. Nebuchadnezzar zong tua bang lianmah in kiphasak hi. Babylon gam ukpa le bawlpa ahihna tawh, a gam beimang ding cih peuhmah sangsiamlo hi. Amah a kipahtawi nopna in, a vangliatna limlak ding milimpi hong bawl in; a mite ama’ tungah thuman le manlo khentel hong sawmta hi. Tua milim in kumpikhat aihkeh pasian khatpeuh limpuasak nuam ahih le hihloh ih theihloh hang, tanglai in, gamvai le biaknavai peuhmah helzau gawp cih kitel hi.

            Phawk ding inah, Nebuchadnezzar in Pasian tawh kimuhtheih na’ng thu nih nei hi.

              A masa in, Hebrew khangnote sittel a, Babylon mipilte sangin azah sawm pilzaw hi.

            A nihna in, mipil dangte khempeuhin, ama’ mang phawkkiksak theilo uh a, Daniel in, a mang le a khiatna zong phawkkiksak zo hi.

            A nunungpen in, Daniel’ Pasian in vanglian Pasian cih thei khinzo hi. Himah leh, tua bang thupiangte in, milimbiakna lamah a ciahkik ding khaktan sakzolo hi. Banghang? Kiphasak. Mawhna dim mihing in, leitungnate peuhmah amawkna hi a, beimangkhin ding cih thei gegu pimah nial veve uh hi. Eite zong “Nebuchadnezzar neute” peuh ih hi mawkmawk thei hi. Eima sepsa nate peuh thupisak zaw in, tawntung adingin tuate in khiatna neilo a hihna ih mangngilh zel thei hi.

See also  A Tawldamlo Kamsangpa

            Nebuchadnezzar bawlsa thaangte bangin, a pilvang mahmah thaangte sungah ih kiatloh na’ngin, ih koici kidoptheih ding hiam?

Monday                                                                January 20

Biakding Sapna

            Daniel 3:8–15 le rev. 13:11–18 simin. Daniel hunlai thupiang le mailamah thupiang dingte a kinaihna bang omhiam?

 …………………………………………………………………………………………………………………………………………………

            Milimpi in Dura zangtam, Akkadian pau in “kawm tawh ki-um” cih khiatna nei munah ding pepa hi. Agei a meikhukpi in zong, biakna tau thupisak tuam hi. Babylonte biakpiakna ah tumgingte kitum hi. Tumging nam sagih kitum in, picinna, muibutna le zah-takna lahna ahi hi.

            Tu hun in, nundan thak, ngaihsutna thak sungah, Pasian kiang ki-aptaktakna nusia zaw in, Babylonte biakpiak dan peuh kizui mawkmawk hi. Leitung vante in hongzol ciangin, piangsakpa Pasian kiang thuman takin ki-aap ding kiphawk kiksak ding hi hang.

            Genkholhna calendar bang hileh, leitung hun nunung sungah ih omtek hi. Mangmuhna 13 in, sapi le a milim bia dingin, leitungmi khempeuh kisam ding ci hi. Tua kipawlna in, “alian aneu, ahau azawng, sila le to, mikhempeuh in, a taltang le a khut taklamah tua ciaptehna aneihna dingun thupia” (Rev. 13:16) ci hi.

            Mi namguk in tua sapi milim bia dinguh a, “alian aneu, ahau azawng, sila le to” ci hi. Sapi nambat zong 666 hi a, 6 thupisak hi. Nebuchadnezzar bawl milimpi in, hun nunung Babylon bawlding sihdaan limla hipah hi (Daniel 3:1 ah guk le sawmguk ngaihsun in). Mi khempeuh theihsa hithute le Pasian in ukzawhna tawh leitung lengige ahihna limtak ngaihsun ciatni.

            Bia cihpen, mikhatpeuh maiah kuun ziauna le a tungah thuman nabek hipak tuanlo hi. I Topa biak ding sangin a dangkhawng biakna pan pilvangtak a hong khawlsak thei bang lampi peuh natheih a om hiam?

Tuesday                                                                January 21

Mei tawh Sittel

            Hebrewte adingin, milim biakding kumpipa sawlna pen, Jerusalem biakpiaknate simmawh langdona tawh kibang hi. Kumpi innsungah nasemuh a, kumpipa tungah a thuman a cihtak uh mahbangin, Pasian tungah a thumancihtakna in, mihingtung thumancihtakna ciangtanh omsak hi. Kumpipa ukzawhna tungah thuman citaknuam uh ahi ta zongin; a pawi sungah kihel zolo dinguh hi.

            Ex. 20:3–6 le Deut. 6:4 simin. Hih mite pen a bang peuhmah in huzap a, hibangin dingngam uh kici hiam?

 …………………………………………………………………………………………………………………………………………………………

            Kumpipa thupiakna bangin, tumging a tumkhitciang, mipite’n kham milimpi mai ah kuun in bia zuaizuai uh hi. Mi thum- Shadrach, Meshach le Abed-Nego tebek in kumpipa’ thupiak nialngam uh hi. Thakhatin, Babylon mite in, hih thu kumpipa kiang tunpah uh hi. Mi mawhzongte in, kumpipa hehtheih nadingin (1) Hih khangno thumte Babylon ulian a suaksak kumpipa mah hi; (2) Jew minamte in kumpipa’ pasian biaksaklo hi; (3) kumpipa tektek in a bawlsa milimpi biaksaklo (Daniel 3:12) ci inmawhsak uh hi. Hehding sangsikin, kumpipa in, tua mithumte a nihveina hun piakik hi. Hih mi thumte’n a dinmunte uh ngaihsunin, milim a biaktheih khakleh cih deihsak in, panpha sakkik hi. A nialvua le, meikhuksung kilawn ding uh hi. Nebuchadnezzar in zolna uangmahmah tawh thukhup a: “a hong honkhia zoding pasian omin um nahi uh hiam”(Dan. 3:15) ci hi.

            Mihing thahatna tawh hilo in, tha thak tawh “meiphualpi sung pan a hong honkhia thei a omleh, ka biak ka Pasian uh hiding a, na khut sung panin hong honkhia ding hi. Kumpipa aw, a hong hotkhiat kei zenzen leh zong, na pasian lah ka bia tuankei ding uh a, na kham milim mai ah zong, ka kuun kei ding uhhi, ci in theita in a ci uh hi” (Daniel 3:17, 18).

See also  BANGHANG TECI PANG?

            A Pasian un gumthei ding cih thei gige napi un, hong gum hamtang dinghi ci tuanlo uh hi. Kumpipa thupiak a nialte meikhukpi sung kilawn ding cih thei gige uh hi. Tuabang upna koipan i ngah thei diam?

Wednesday                                                          January 22

A Lina Mipa

            Daniel 3:19–27 simin. Bangthu piang? Tua midangkhatpa kua hiam?

 …………………………………………………………………………………………………………………………………………………

            Mi citak Hebrew thumteng meikhuk sung a lotleh, Nebuchadnezzar in, meikhuk sungah a lina mipa a muh ciangin, lamdang sa hi. Ama theihna ciangtawh, tua a lina mipa pen “Pasian’ Tapa” (Daniel 3:25) na ci hi. Kumpipa’n tampi genzom selo mahleh, a lina mipa kua cih theilel hi hang. Sodom le  Gomorrah kisiat madeuh in, Abraham kiangah kilang a, Jabbok lui gei ah Jacob tawh kilai, Moses kiangah sawlbawk sung meikuang tawh kilak hi. Amah Zeisu hi a, mihing hong pian ma in, Pasian in mite haksatna sungah dinpih tawntung a hihna honglak ahi hi.

            EGWhite in, “Topa’n A mite mangngilh lo hi. Ama’ teci-te in meikuangsung a tun uh ciangin, Honpa in, Amah tekmah hong kilangh in, mei sungah vak-hialhial lel hi. Topa a omna munah, a sa, avot le meikuangte  thahatna bei hi” ci hi. Prophets and Kings, pp. 508, 509.

            Isaiah sungah Topa in “Tuite na  kantan ciangin, nang kong ompih ding a, gunte na kantan ciangin, tui in nang hong tumlo ding hi. Mei kantan in na pai ciangin, na kangkei ding a, meikuangte in nang hong kangtumlo ding hi” (Isaiah 43:2) ci hi.

            Hihbang tangthute hoih ih sak mahmah hangin, upna hangin bawlsiatna thuak a, lamdang takin a kihonkhialo mite tawh kisai in dotna tampitak omthei hi. Tua mite in, Pasian kihtalo kumpite thahlupna a thuak Isaiah le Zechariah te thu theitel mahmah ding uh hi. Laisiangtho tangthu sung le tuhun mahmah in a citak Christian te’n, bawlsiatna a thuak uh ciangin, lamdang takin hotkhiatna ngah tuanlo in, sihna thuak zawsop uh hi. Hih tengah acitak te’n a lamdang hotkhiatna ngah mahleh, hihbang thute piang mengmeng lo cih phawk in.

            A thuman Pasian mite khempeuh in, a lamdang mahmah in hotkhiatna a ngah dinguh pen banghun ciang hiam? (1 Cor. 15:12–26).

Thursday                                                             January 23

Tuabang Upna Ii Thusim

            Shadrach, Meshach, le Abed-Nego tetangthu ih sin ciangin theihnophuai thu khat: Hihzah upna khauh, a thusim bang hiam?  Milim biakding sangin, meikuang sung kihaltum ding banghang in teelzaw thei hiam? Kumpipa thupiak a zuihhuaina thu tampi tak omthei ding himah leh, sih ding teelzaw uh a, dingkip zaw uh hi.

            Hebrews 11 simin. Upna thu bangteng hong hilh hiam?

 ……………………………………………………………………………………………………………………………………………………

            Tuabang upna neihtheih na’ngin, upna banghiam cih theihphot kul hi. Mi pawlkhat in upna tampi nei uh a; Pasian kiangpan a saan zahvei khawng simthei uh hi. Store-saipi a pai uh ciangin, mawtaw khawlna’ng munpeuh thungen mawkmawk uh hi. Mawtaw koih na’ng mun a ngahvua leh, a upna liat hang kici pah uh hi. Mawtaw khawng a nadimkhin ahihleh, a upna uh picing nailo ahih manin Pasian in dawnglo ci uh hi. Hihbang upna tepen, Pasian khawng eima deih bangbang in nasawl gawpgawp in, na khempeuh Pasian in uk, cihkhawng mangngilh a, lauhuai mahmah hi.

See also  Lesson 2: KIPUMKHAT LOHNA A PIANGSAK THEI NATE

            Upna taktak pen bel, Daniel le apawlte bangin, Pasian tawh bangzah kizopna nei a, Pasian bangzah in pummuan cih hizaw hi. Upna maantaktak in, eima pumpi deihna khawng Pasian’ deihna suaksak mawkmawk cihbang hilo; Pasian’ deihna sungah eima deihna aap hizaw hi. Hebrew mi thumte in, kumpipa thupiak nial in, Pasian’ deihna a teel laitak un, Pasian in amau aading bang koih khinkhian cih theikhol tuanlo uh hi. Anungah bangbang a piang zongin, thumaan ah ding ding cih hiphot hi. Hihbang upna pen upna cingtaak ahi hi. Pasian kiangah ih deihthu khatpeuh ihnget ciangin, tua laitakin bangthu piang ding cih ih thei kei phial zongin, Ama’n ei aading ahoihpen in hong geelsak ding cih upna taktak ih lak ding hi.

            Nisim in i upna nasemsak tawntung ding, “neucik” himah leh, upna hong khangsak thei ding le a lianzaw nate hong hihzo sakthei ding, bangte peuh hiding hiam? Na “neucik” te in, banghangin a thupipente hithei mawkmawk hiam?

Friday                                                                   January 24

Ngaihsutbeh Ding:”Hebrew khangno thumte’n Dura zangtamah, a phutkhak thute eite ading thupi mahmahhi. Tuni tuhun in, Pasian’ nasem tampite in, khialhna bawlhetlo sa in,

            Satan khutzat mite simmawh ding in, hong ki-aap in, biakna hong ki haza ding hi. Thukham 4na Sabbath a kemcing mite tungah hehmahmah dinguh a, sihdaan piaktuak hi ci in, leitung buppi ki tangko ding hi.”

            “Pasian’mite, a puktheilo upna ah hong kisam dinghi. Ama’tate in, Amah bekmah biaktakcingpa ci ding uh a, biakna maanlo biadingin, nuntakna piakpah ding hiphial mahleh zong, hong zolo ding ci uh hi. A thumaan lungsim sungah, Pasian kammalte khengval in, mawhneipa thupiakte pen, thupi kisalo ding hi. Thongkiatna, sihna ciang tungphial mahleh zong, thumaanmah kimang zaw veve ding hi.” Ellen G. White, Prophets and Kings,pp.512, 513.

Kikup Ding Dotnate:

  1. 1 Peter 1:3-9 simin. Banghangin, Pasian in haksatna thuakmi hotkhiat le hotkhiatloh nei hiam? Hih dotnate a dawnna kingah nailo zaw hiam? A lamdangmahmahin hong kihonkhia keiphial zongin; banghangin, lungkialo in, Pasian muang veve ding ihi hiam?

 

  1. Tua Hebrew mi thumteng sihna na thuakuh hileh, koibang lamsangin tha ihla zaw ding hiam?

 

  1. Hun nunung thupiang dingte telsa ihi a, akua biazaw cih ihtheih na’ng, apualam a kilang bang limpeuh a omdiam? Sabbath in bangzah thupi cih hong lak hiam?

 

  1. Luke 16:10 simin. Khazih kammal in, upna nuntakpih cihthu ihtelsem nading koicibangin hong huh hiam?

 

  1. Daniel 3:15 simkik in; Nebuchadnezzar in, “Kei khutsungpan honghonkhia ding na pasian uh kua a hiam?” ci hi. Koici dawn ding nahi hiam?
Tags: ,

dammang

dammang

One thought on “ZSS 4: Meikhuk Pan Kumpi Inn-ah

  1. I and also my guys have already been going through the best strategies located on your site then at once got a horrible suspicion I had not thanked you for those techniques. Those guys were definitely as a consequence excited to read through them and have simply been taking advantage of those things. Appreciation for actually being really accommodating as well as for opting for this kind of remarkable areas millions of individuals are really eager to be informed on. My sincere apologies for not expressing appreciation to you earlier.

Comments are closed.

Top