ZSS 5: Kiphatsakna Pan Kiniamkhiatna ah
Lesson 5 Kiphatsakna Pan Kiniamkhiatna ah
*January 25–31
Sabbath Nitaklam Jan 25
Tukal sung Simding: Daniel 4:1–33; Pro. 14:31; 2 Kings 20:2–5; Jonah 3:10, Daniel 4:34–37; Phil. 2:1–11.
Kamngah: “Pasian honglak na lamdangte bangzah in lian ahi hiam? Abawl nalamdangte bangzah in vanglian ahi hiam? A tawntung in Pasian kumpi hi ding a, Amah in a tawntungin a uk paisuak ding hi.” (Daniel 4:3).
Kiphatsakna in mawhna kipatna hi. Vantung innsung a om Lucifer sung pan hong kipan hi. Pasian in Ezekiel tungtawnin, “Na melhoihna nakisaktheihpih kha a, na minthanna in nang hong haitatsak hi. Leilak ka hong denna a, kumpi dangte hilhkholhna in nang ka hong koih hi” (Ezekiel 28:17).
Kiphatsakna in Lucifer puksak a, tua kiphatsakna mite’ sungah hong guan in, Pasian langdona lam le kisiatna lamah hong makaih hi. Eite in apuksa mite ih hih manin, ih nuntak nadingin Pasian tungah kingamh ih hi hi. Silpiak khat peuh tawh septheih khatpeuh ih neih leh zong, Pasian kiangpan mah hi veve hi. Tua pipi khawng, a bang kiphatsakpih ih hi hiam? Kiniamkhiat mahmah ding hizawsop lo hiam?
Nebuchadnezzar, a kiniamkhiat theih ding hun sawtpi la hi. Meikhukpi sungah mi lina pa a muhkhit nangawn a nundan kheelthei nailo lailai hi. Pasian in, amah, kumpi panin hawlkhia in, ganhingte tawh a omkhop khit ciangin, a dinmun kitelpan phing hi.
Sunday January 26
Alian Mahmah Babylon Hilo Hiam?
Daniel 4:1–33 simin. Kumpipa tungah bangthu piang hiam, Banghang hiam?
……………………………………………………………………………………………………………………………………………………………………
Pasian in Nebuchadnezzar tungah anihna mang piakik leuleu hi. Tutak in bel a mang mangngilh nawnlo hi. Babylon mipilte’n hilh theilo ahihmanun, kumpipa’n mangkhiatna gendingin Daniel teel hi. A mang sungah, van a nawk singkung golpi khat mu a, vanmite’n tua singkungpi phukpaai ding in thupia hi. A bultawng le a zung bekmah leitung vandaitui lakah nusiacip ding ci hi. Nebuchadnezzar lungkhampipen napen, vanmi in, “Amah in mihing lungsim nei nawnlo in, kum sagih sung ganhing lungsim a nei ding hi” (Dan. 4:16) a cihna mun ahi hi. Tua mangin dipkuathuai mahmah ahih manin Daniel in, hihmang a khiatna in, kumpipa aw, na galte ading hizaw tahen aci hi. Bangbang hitaleh, thumaan takin, tua mang in kumpipa a cihnopna a hihlam pulakkhia hi.
Laisiangtho hunlai in, singkung pen, kumpi peuh, minam le gam peuh limpua sak uh hi (Ezekiel 17; 31; Hosea 14; Zech. 11:1, 2; Luke 23:31). Tua hi a, singkung golpi in, a kiphasak kumpipa cihna hipah hi. Amah’n, a neihsa khempeuh, Pasian kiangpan a hihna thu phawk khalo hi.
Daniel 4:30 encian in. Pasian thuhilhna awlmawh hetlo a hihna, kumpipa in bang kampau hiam?
…………………………………………………………………………………………………….……………………………………………
Kiphatsakna a lauhuai zia in, Pasian tungah ih kingakloh phamawh ahihna hong mangngilhsak zozen hi. Tua mangngilh lengpen, khathu lamah a lauhuai mahmah ahi hi.
Na khansung in bang sepzawh peuh nanei hiam? Kiphasak hetlo in, na angtang thei diam? Bang cih ding?
Monday January 27
Kamsang pa’n Hilhkhol
Daniel 4:27 simin. Hong piang dingthu a hilhkhol banah, Daniel in, kumpipa bang hih ding gen beh lai hiam? (Pau. 14:31 enkaak in).
…………………………………………………………………………………………………………………………………………………
Daniel in mangkhia bek hilo in, Nebuchadnezzar a suahtak na’ng lampi laklai hi: “Tua ahih ciangin kumpipa aw, kong thuhilhna hong mangin. Mawhna bawl nawnkei inla, diktakin gamta in. Mizawngte hehpih leteh, tua in a sia a na gamtatnasate hong puahsak ding a, na nuamsa toto ding hi” (Dan. 4:27) a ci hi.
Nebuchadnezzar in Babylon hoihtak in lampha hi. A huan, tuiguamte, biakinn le innhoih tuamtuamte in Babylon pen, tanglai na lamdang khat in kipsak hi. A hoih mahmah tuate khempeuh pen, zawhthawh thu tawh salte le mizawngte’n a sepsak ahi hi. Bek thamlo gam buppi hauhnate pen, kumpipa gualnopna le ulianteng’ gualnopna bekin zang uh hi. Nebuchadnezzar kiphatsakna in, Pasian’ a theih nading pan khaktan bekthamlo in, mizawngte haksatna le kitangsap nate phawklo sakzo hi. Pasian in mizawngte awlmawh ding a tuam vilvel in hong hilhzo a, kumpipa mawhna dangdangte genlozaw in, mizawngte awlmawhlohna bekmah kawkpah hi.
Nebuchadnezzar aading thupuak thak lua hi tuanlo hi. Laisiangtho Lui kamsangte in, Pasian’ mite’n mizawngte a simmawh uhmah thuhilh denden hi. Kumpi panin a kihawlkhiatna thu mawhnate lakah khat in, mizawngte awlmawhlohna ahi hi. Khristiante ading hoihna sangpenin mizawng hehpihna hi a: mizawngte awlmawhlo le suksiatna in Pasian talsik a langdona ahi hi. Mizawngte don peuhleh, na khempeuh Pasian aa hi a, eite’ neihsa omlo a, hong kepsakbek ahi hi. I neihsa-te tawh mihuhna pen, Pasian in a neipa hi ci a, pahtawina ahi hi. I neihsa khempeuh manphatna theihna dingin, a neipa Pasian hi cihtheihna ahi hi. Tua mun santak lian kumpipa Nebuchadnezzar kiatna mun ahi hi. Eite’n zong, Pasian’ ukzawhna phawklo in nasemsem in, mizawngte ih panpih keileh a kibang ih hihi.
Tuesday January 28
Sangpen Pa’n Uk
Kisik in Pasian kiang mawhmaisakna ngetding sangsik in, Nebuchadnezzar in, gilo in kiphasak ahih manin vantung thukhenna thuak hi (Daniel 4:28-33). A huan sungah a vak ciangin, keima sepsa vive ci in amah-le-amah akiphat laitakin, a lungsim hong kisia a, kumpi inn sungpan kihawlkhia hi. Ganhing lungsim hong nei a, ganhingte bangin hong om hi. Tu hun in zong tuabang natnate om thei zel a, “species dysphoria” “ganhing ut” cihna ahi hi.
2 Kings 20:2–5; Jonah 3:10; le Jeremiah 18:7, 8 cihte simin. Tua mawhna daan pan suahtak theih na’ng lampi bang omci hiam?
……………………………………………………………………………………………………………………………………………………
Nebuchadnezzar in lam haksapi tawnkha hi. Ukzawhna a neih ciangin, Pasian tawh kizom khalo hi. A vangliatna teng zawngkhal sakin, ganhingte lakah omsak in, Pasian tung bekmah a kingamh dingcih phawkkik theihna hunpha ngahkik sak hi. Pasian in a hilhnop a thupipen pilna in “Vantung in Uk” (Daniel 4:26) cih thu ahi hi. A mantakin, kumpipa’ tung thukhenna tawh kisai in, a zaizaw Pasian’ deihna khat in, “mun khempeuh a om mihing khempeuh in, a lian Pasian in mite’ kumpi gamah vai a hawm hi cih thei ding uh hi. Amah in, a teelpeuhpeuh, aneupen zong kumpi a suakthei ding hi” (Dan. 4:17) ci hi. Nebuchadnezzar tungah a kipia thukhun pen tulai hun eite aading zong ahi hi. Eite zong “mihing” vive mah ih hih manin, ih sinna bulpi ahi “mihingte kumpigam sungah zong Sangpen Pa’n Uk” hi cih ih phawk den ding hi.
Sangpen pa’n ukcih ih theihna bangzah in thupi hiam? Ei’ ukzawhna nuai a omte tungah I nasep dingdan bang hong theisak naci hiam?
Wednesday January 29
Vantunglam Ento
Daniel 4:34–37 simin. Bangci, le banghangin, kumpipa aading nate kikheel hiam?
………………………………………………………………………………………………………………………………………………………………
Pasian in, Nebuchadnezzar pen natna lamdang khat tawh vat himah leh, a lungsim damna piakik hi. Kum sagih a cin khitciangin, kamsangpa genkholh mah bangin, na khempeuh kikheelta a, cidamlo kumpipa in vantunglam ento hi (Daniel 4:34).
“Kum sagih tawntung, Nebuchadnezzar pen, a mite’n lamdangsa mahmah uh a; leitung mite mai ah amah kiniamsak hi. A ngaihsutna hong ngahkik ciangin, kiniamkhiat in vantunglam ah Pasian ento a, Vanglian khut in amah satzo cih hong tel hi. Mi honpi mai ah, a mawhna hong pulaak in, Pasian in a hehpihna tawh a dinmun hongpia kik cih tangko hi” Ellen G. White, Prophets and Kings, p. 520.
Vantung lam ento leng kikheelna lian hong piang cihpen dotdot kullo hi. A theihna hong lutkik phetin, kumpipa’n pilna khang ing cipah lian hi. Hih tangthu in Nebuchadnezzar tangthu hilo zaw a, Pasian’ hehpihna tangthu hizaw hi. Kumpipa’n Israel’ Pasian pen a nuntakna Topa in a saan ding thumvei bang taisuah khinzo hi. A salmatsa Hebrew tangval 4 te’ tehpih omlo pilna a muh limlim in kikheel thei hi (Daniel 1), Daniel in a mang a khiatsaklai (Daniel 2), le Hebrew tangval 3 meikhuk sungpan a ki hotkhiat lai (Daniel 3).
Hizah hotkhiatna a muhkhit nungsang, a kiniamkhiat nopkei laileh, bang cih nawn ding? Lungsim khauhlua a hihmanin, Pasian in, a li veina hun a piakbehlai leh, kumpipa’ lungsim ngahzo a, kumpi tokhomah tusak kik hi (Daniel 4). Nebuchadnezzar etteh leng, Pasian in, Amah tawh ih kinaihtheih nading in, hunkhat khit khat hongpia zelzel hi. Paul in “mi khempeuh in hotkhiatna ngahin, thuman a theihkim ding Pasian in deih hi” (1 Tim. 2:4) na ci hi.
Pasian in nang hong niamkhiatna bangci bang peuh omhiam? Tuate tungpan bang pilna nangah hiam? Tua thuhilhnate na thuakzel lohna dingin, bangteng kikheel ding na hi hiam?
Thursday January 30
Kiniamkhiat in Lungdamthei
A kisik Kumpipa’n Tangko: “Amah in leitung mite bangmahin a simkei hi” (Dan. 4:35). Ama’n a thupi mahmah bang hih hiam?
……………………………………………………………………………………………………………………………………………………………………
Nebuchadnezzar in, Pasian maan sang takpi cih bangci theih ding hiam? Daniel 4na zong Nebuchadnezzar gelh hi kici hi. Tua munsan pen, kumpipa in a gambup aading in lai hawmkhiat a bawl hihtuak hi. Hih lai sungah, amah’n a kiphatsakna, a haigawpna te le a kiniamkhiat theih nading Pasian’ nasepna cihte pulak hi. Tanglai kumpite in, amau-le-amau kiniamkhiatna lai cihkhawng gelh ngei khollo uh hi. Kumpi thuciaptehna khempeuh phialin, kumpipa phatna lai khawng peuh ciaptehna bawlzaw uh hi. Kiphatsakna le ganhing bang omna khawng pulakkhia cih pen kisiktaktak cihna hizaw hi. Tua banah, Pasian’ liatna pulak in, ama’ nuntakzia thute a ciaptehnalai bawl cihpen, Pasian’ nasepna khat hipah hi. Pasian maan a muh manin, amah ki-imcip thei nawnlo ta hi. Kumpipa thungetna le phatna late zong (Daniel 4:34-37) sungah om a, ama phutkhak taktakte ahi hi.
Kumpipa, tu in mithak taktak hita a, mihing thahatna ki ciangtanhlua cih hong telta hi. Lungdamkoh thungetna lianpi khat bawl a, Daniel’ Pasian min phat in “Amah in leitung mite bangmahin a simkei hi” (Dan. 4:35) ci in pulakkhia hi. Mihing te’n, kiphatsak tham nading bangmah neihetlo cihna hi. Nebuchadnezzar tangthu a tawpna lamah, kumpipa kiniamkhiat in, lungdam ko, Pasian’ min phat cih peuhmah pen, eite kiphatsak lohna’ng hong thuhilhna ahi hi.
Pasian in eite nuntakdan hong khelkhel hi. Bangzahta in nakiphasak phial a, mawhna nanei zongin, langdo mite le mawhnei mite Pasian’tate suahtheih kikna dingin Pasian in hehpihna le vangliatna tawh kidim hi.
Philippians 2:1–11 simin. Eite sungpan kiphat-sakna ih paihkhiat theih na’ngin, hih Laisiangtho ah bang i mu hiam?
Friday January 31
Ngaihsutbeh Ding: ”Khatvei lai-a a kiphasak mahmah kumpipa, a kiniamkhiat mahmah Pasian tapa hong suak; a ngongtat, a khengval makaipa, a pil le hehpihthei kumpi hong suakta hi. Vantung Pasian khawng a ko ziahziahpa, Sangpenpa vangliatna hongtel a, Jehovah Pasian bekmah kikihta ding cih a tangkopa hong suak hi. Kumpite’ kumpipa, Tote’ Topa’ in, ukna aananei khempeuh zuihding thute hilh hi. Liatna taktak pen hoihna sungbekah omhi. Jehovah in a nungta Pasian ci in sang a, “Keimah Nebuchadnezzar in vantung Kumpipa phat in ka zahtak hi, Ama’ septe in thumaan a, Ama’ lampi in thukhenna: a kiphasak mite Amah’n niamkhiat thei hi.
Pasian deihnapen, leitung kumpi lianpente’n, Amah phatna pulak ding hi. Hih bangin mipi mai ah, Pasian hehpihna, hoihna le ukzawhna a tangkona pen anuntak sung in asep nunung pen ahi hi” E. G. White, Prophets and Kings, p. 521.
Kikup Ding Dotnate:
- Kiphatsakna in siatna hong tun a: Pasian langdona lungsim ahi hi. Khengval lua nasa hiam? Nasakleh ngaihsun pha in. Mi khat a kiphatsakna lian semsem leh, midang kiphatsakna deihlo semsem hi. Na kiphatsak zah na theihnop leh nang-le-nang kidongpah in. Mi’n kei hong awlmawhloh, hong donloh ciang, honghep ciang, hong hopih buahbuah ciang cih khawng? Mikhat’ kiphatsakna cihpeuhmah, a dangkhat tawh a kidem hipahpah hi. Pawisung khawngah a gamlumpen hi nuam, midang’ ngaihzaw leh deihlo pah. Sumbawl nih kilem theilo.” C. S. Lewis, Mere Christianity [New York: Touchstone, 1996], p. 110. Lewis in nangma lungsimsung a om kiphatsakna hong musak nuam hi.
- Hih Laisiangtho sung pan ih muhkhiat pen, Pasian’ ukzawhna, aana neihna. Hih thute banghangin telhuai sa na hiam? Hih thumaan teltheihna ding in, Sabbath in koibangdan in hong huhthei in na um hiam?