Lesson 1                                                    *September 26–October 2

EDEN HUAN SUNGA PILNA

Sabbath Nitaklam Sept. 26

Tukalsung Simding: Gen. 2:7–23; Gen. 3:1–6; 2 Peter 1:3–11; 2 Peter 2:1–17; Hebrew 13:7, 17, 24.

Kamngah: “Pasian avanglian mahmahna phawktel in. Pasian pen sia khempeuh lakah Sialianpen ahi hi.” (Job 36:22).

Laisiangtho sinte in Piancil 1 pan 3 sung a, Pasian nasepzia telpha mahmah uh: Pasian, Adam, Eve, vanmite leh gulpi cihbang tangthute hi. Amun bel “Eden” a kici gamnuam khatah ahi hi. A tangthu bel kizom dimdiam mah ei. Pasian in Adam leh Eve piangsak hi. Adam leh Eve mawh hi. Adam leh Eve pen Eden huan pan kihawlkhia hi. Piancil laibu a kipatna lam pan pilna tawh limsim leng, a tangthu paizia ih tel phasem ding hi.

“Hotkhiatna pilna pen khang tawntung adingin leitung kipat panin kihilhpah hi. Eden huan sung i nu leh pa masapen tegel’ innkuan panin, sanghoihpen hong kihonsak pah hi. Eden huan pen amau sang khandei hi a, piansaksate khempeuhin amau laisimbu, Piangsakpa in amau siapa leh nu leh pa masapen tegel in sangnaupang masa tegel ahi uhhi” —Ellen G. White, Education, p. 20.

Topa in tua sang masapen a phuancil Siapipa ahi hi. Tua kawmkalah, Adam leh Eve nupate in, thumanlo ahilhthei ding sia dangkhat vateel tawm uhhi. Tua manin bangteng piang a, banghang hi a, tuni tuhun a ding bang pilna peuh i sintheih ding a omdiam?

SUNDAY September 27

Sang Masapen

Huan khatpeuh khawng sangkhaan in kingaihsun zolo mahleh, siatna a omvetlo Pasian bawlsa Eden huan pen hoihmahmah lel hi. Tuhun muhdan tawh bel ngaihsut hak himah leh, apuuklo leitung dang a, leimite pen, a Piangsakpa tektek in, tua sanginn sung mahah pantah ngiatngiat hi.

Gen. 2:7–23 simin. Pasian in Adam piangsakin, a koihna mun leh a nasep piak lai in, a ngiimna bulpi bang hi in na um hiam?

Pasian in tua mipa leh minu Ama’ meel suunin bawl a, inn khat leh nasep kician apia hi. Sia leh Sangnaupang kikalah kizopna thupi mahmah omhi. Pasian in Adam pen ama bawlsa ahih manin Adam’ siamna telpha mahmah hi. Adam hilhthei a, Adam in apilna kicing takin zangthei cih zong thei hi.

Pasian in mite nasep guan a, lungnopna aneih ding uhzong deihsak hi. Nasep kician a piakna zong lungnopna a piaknop hang hizaw hi. Anasep picing takin semzo a, lungnopna a ngah zolo kua omding hiam? Pasian in Adam lungsim telpha ahih manin, gualzawhna a ngahna dingin, Eden huan kemcing ding nasep pia hi. “Topa Pasian in mipa la in, Eden huan kho in akem dingin akoih hi” (Gen. 2:15). Leitungah mawhna leh sihna bek athei eite in, Adam in, Eden huanpuah nasepna tungtawn bekin pilna sintoto ding cihpen ngaihsut haksa tham hi.

Gen. 2:19-23 sungah, Adam kikholhpih dingin ganhingte bawl a, a zi dingin Eve zong bawlsaklai hi. Adam ading kikholhpih kisam a, ahuhding zi kisam cih thei-in numei abawl hi. Mihing in Pasian tawh kinai mahmah ding kisam cih thei a, a kikholhkhop theihna dingin Eden huan zong abawl hi. Hiteng khempeuhpen Pasian in mihing a itmahmahna pulakna ahi hi. Eden huan tawh kigamla mahmah ihih manin, tua huan koibang hi cihzong i ngaihsun zokei hi.

Eden huan tawh kigamla luata himah leng, piansak sate tung pan pilna sinthei veve hihang. Bang pilna peuh hi a, Laisiangtho tungtawnin imuhna pan bang phattuamna peuh ingahthei hiam?

MONDAY September 28

Buluhna

Sangsiate ading anuam penpen in asangkhaante kaikhawm, laisuanna bawl, a kisam-nate kaikhawm, sangkhaante zong adeih bangun puahpha cihte ahi hi. Pasian in sangkhaan dingin Eden abawllai in, Adam leh Eve pilna sin na’ng in akimkotah kicingtakin koih hi. A kimkot zeempha mahmah hi. Pak, vasa ganhing leh singkungte khempeuhpan a Piangsakpa Pasian’ Thu asinthei uh hi.

Piancil 2 pan 3 sungah thute kikhel vat hi. Pasian in mihingte ading hong bawlsaksa khempeuh ih theikhin zo hi. Ahihhang Gen. 3:1 sungah, Pasian in deih teeltheihna hong pia hi. Gul in “ganhingte khempeuh sangin pilzaw” cih pen amasa kammalte ahi, “hoih mahmah, maizum lo, nuamsa mahmah” cihbang Pasian’ nasepna ahoihzia pulaknate pan lampialna ahi hi. Gul tawh kisai in, “pil” cih pen “ngiansiam” ci-in akhia zong om hi. A hoihkim mahmahna pan thu kilehbulh hong piangsak hi. Piancil laibu in Pasian pen “ngiansiam” cih tawh kilehbulh in pulak hi. Pasianin, huan sunga nupa tegel ading alam-etna kician mahmah hi. Gen. 2:16, 17 sungah Pasian thupiakna in huanlaizang akungpan singgah nelo ding cihthu ahi hi.

Hih tangthu tungpan theihding a thupi khat in: Adam leh Eve tegelpen, lungsim asuakta, thumanna leh thumanlohna deihteelthei in kipiang sak hi. A kipatcil lai, leitungmi apukma pekin mihing’deihteel theihna omcih i muhtang ahi hi. 

Gen. 3:1–6 sungpan, gulpi kammal zatte leh, Eve dawnkiknate encian in. Gulpi in Eve kiangah bangthu peuh pulak hiam? Eve in zong sia leh pha khentelna singkung koici muh naci hiam?

Gen. 2:17 sungah, Topa in Adam kiangah, tua singgah na neekleh “si taktak ding” ci hi. Gen. 3:3 sungah Eve in Pasian’ thupiak agenkhiat ciangin “taktak” cih kammal nusia in, peeng gen hi. Gen. 3:4 sungah, gulpi in tua kammal suutkik napi, Pasian’ thupiak tawh kilehbulh sak hi. Pasianin, huan sungah Eve thuhilh mahleh, tel meello cihpen, ama’ kammal zatte mah tawh kimuthei pahlel hi. 

TUESDAY September 29

Thupiak Mansuah

Zanni i muhsa ahi, Eve tungah Pasian’ thupiakte, ama’ kammal mahtawh pulak kik hi. A khiakhial bel hisamlo a, a telzolo hizaw hi. Ama’ thuakding mawhna sulzuite ki gentel theilo hi. Gulpi tawh a kitalsik ciangin, Eve in suutkik himahleh, Pasian’ kammal banglian hi nawnlo pah hi (Gen. 3:2, 3). Tua thupuak zong gulpi ading thuthak hikhol tuanlo hi. Tua thupiak gulpi in thei khinlua zaw ahih manin, mawhna aba’ang nailo Eve akhemzawh nadingin kigingpha mahmah hi.

Gen. 3:4–6 entel in. Pasian’ thupiak thalnial hetlo in, gulpi in bangteng gen a, Eve tungah bangci in gualzo hiam? Bang thukhun zangsiam naci hiam?

Gulpi in thupiakna hoihlo acihpeuhteh, Eve in zong, Pasian dongnuam leh dongthei lel hi. Eden ahoihna hizaw hi: sangnaupang peuhmah in, tehpih omlo Siapi Lianpenpa tuate khempeuh khengval atheipa ahi hi. Zia-etna nusia in Pasian huhna ngetding sangsik in, Eve in gulpi’ thupiak sang zawsop hi. Gulpi thupiak asaan manin, Pasian’thupiakte tungah lunghiang cih honglak hi.

Tua laitak in Adam zong mundangah tuamvak sese hi. “Pasian in acihtak na’ngun athupiak khatbek a omsun penmah palsat-uh a hihlam, Adam in telpha mahmah hi. A lungsim buai mahmah hi. Eve, amahguak avaksak bang kisik mahmah hi. Himahleh mawhkhin zo uh: a lungnop mahmahna uh tawh kikhenkhia ding hita hi. Hizo peuhmah ding hiam”— Ellen G. White, Patriarchs and Prophets, laimai. 56. Thuman leh thukhial telsitset pipi mah, thukhial teelta mai hi.

A kikhemdaan ngaihsun in: Gulpi in tua singgah aneekvua leh “Pasian tawh kibang ding” cihi (Gen. 3:5). Gen. 1:7 sungah Pasian suunkhin cizaw hi lo maw? Hih thu in, Adam leh Eve tegel bangin, pilna sangmahmah neikhin i hihhang, eite zong khemnop mahmahlel a, upna leh thumanna bekin eite hong humzo cihthu hong koici hilh naci hiam?

WEDNESDAY September 30

Mansuahsa Ngahkik

Adam leh Eve te nupa in gulpi’ thu man ding ateel manun, mawhna sulzui tampitak leh, Pasian sanginn sungpan hawlkhiat in om uhhi. Mawhna hangin Adam leh Eve te’ na mansuahte ngaihsun in. Amau’ puukna i telphat manin, tulai pilna hongpiak adeihna bulpi itelpha zaw hi. Amau kihawlkhia in, a cingtaklo leitungah thuthak a ding pilna a sinuh kulpah hi. Mihingte a puk ma in, Pasianin, vantung pilna, hoihna, itna tawh akizoppih mah bangin; amau pukkhit ciangin, Ama’ meel suunkik thei dingin tua vantung pilna hoihna, itna mah tawh kizoppih kik hi. A mimal in Pasian tawh ikigamlat hang, ama’ hoihna itna theihna tawh amah i naihthei veve hi. Thungetna tawh ama’ nasemin, athu simin, Adam leh Eve te’n, Pasian a naihmah bangun; e’nzong i naihthei veve hi.

Lungdamthu in, Zeisu leh hotkhiatna hangin i mangthang nawnkei hi. Hotkhiatna leh thak suahna’ng lam-etna i neihlawh hi. Christian pilna in, sangnaupangte mai ah Zeisu leh ama hong sepsak thaksuahna kawk tentan ding hi.

2 Peter 1:3–11simin. Mi in huan a nutsiatlai in a mansuahsa khempeuh pen, hih Laisiangtho mun in ngahkik ding tha hongpia hi. Pasian meel isutkik theihna dingin, Peter in bang hihding hongci hiam?

Zeisu tungtawnin, “Pasian’ deih bangin biakna mantak inuntak theihna” hong pia hi. Peter in gualsuk diudeu hi: Upna, gamtat hoihna, thu theihna, pumpi ki-ukzawhna, thuakzawhna cihte leh azom omsuk diudeu hi. Thu theihna pen Peter in thupi gen phadeuh hi. Pilna a cihnopna ahi hi. Pilna diktakin thutheihna dik ahi Khazih theihna hongtun a, Amah tawh kibang bekhilo in, Amah i theihna midangte ahawmsawn theite hong suaksak hi.

Thukham singkung ahi “sia leh pha theihna” thute ngaihsun in. Thu theihna khempeuh hoihkimlo ahihna bang hong gen hiam? Thutheihna hoih leh hoihlo koici khentel thei ding ihi hiam?

THURSDAY October 1

Thunial Mite

Sangnaupang pawlkhat pen “hilhnop” hi. Mat hoih ngah na’ngin lai zong nak et selo lel uh hi. Tel baih mahmah lel uhhi. Apilna uh muibun lel hi. 2 Peter 1 leh 2 sungah, Khazih sungah ih ngah pilna pen, Ama’ sungah a ki-aap mahmahte tawh ki zakim hi. 2Peter alian 1 sung a hanthotna in 2Peter alian 2 sung a hilhkholna tawh kibang hetlo hi.

2 Peter 2:1–17 simin. Bang vanglian leh taaina kammal pau hiam? Tua hilhna taaina kammalte kawmkal ah bang lametna hong neisak hiam?

Ukna aana asimmawh mite tawh kisai in Peter in taang 10 na ah agen simin. Eite tulai mite ading nangawn nakpi takin taaina hipah hi. Pawlpi in zong (Heb. 13:7, 17, 24) sungah hong uk kumpite’ thu mang ding acihna bangin, Pasian’ deihna tawh a kituak laiteng i manlel ding ahi hi.

Bawlsiatna anasiat mahmah laitakin, Peter in thudangkhat tawh hong kuppih hi. Pasian in tua khemnate a paaikhia zo dingin vanglian mahmah hi tase leh, “a mite zia-etna pan a suahtak theihna ding lampi, Pasian in thei lua hi” ci hi. Christian pilna ih cih teh, zia-etna pel ding cih ciang bek hilo a, suahtak theih na’ng Pasian’ lampi tampitakte zongkhia ding, ei leh ei mah kikem ding, “siatna a piangsakthei thuhilhna manlo hong lutpihsim” (2 Pet. 2:1) hi ci hi.Ukna aana simmawhna pen kimawhsak mahmah ahih ciangin, ei Christian’ siamsinte in, hong ukte telsiamna, ki-apna leh thumanna i kisin a kul diam (Heb. 13:7)?

Adam leh Eve in ukna aana simmawh i cihlian theihloh hang, atawpna ah, thumanloh ding mah teelzaw uhhi. A thu palsatna uh asuukzaw saksem dingin, Pasian in amau’ phattuam nading mahin athupiakte, tang nial uhhi.

Hih dotna nakpi takin ngaihsun in, pawlpi sungbek hilo, innkuan sung leh nisim nuntakna sungah zong e. Ukna aana neite ahi zongin, ukthuak mipite ahi uh zongin, thuman takin omding, banghangin thupi naci hiam? Na ngaihsutna Sabbath ni ciangin biakinn ah hong hawmkhia in.

FRIDAY October 2

Simbeh Ding: “Nupa siangtho tegel pen Pa Pasian in kem bek hi lo in, siamkim Piangsakpa in pantah ngiat hi. Vantung mite hong hawhsuk zel uh a, Piangsakpa tawh zong akhak ahal omlo in kikhawlthei uh hi. Nuntakna singgah panin thahatna a dimin ngah uh a, apilna uh zong vanmite’ nuai deuh bekmah ahi uhhi. Muhphak vanpi’ thu thukte, a siamkimpa’ banzal sepnate (Job 37:16) in a bei theilo nopsakna leh siamsin lamhilhna ahi hi. Piansak sate omzia thukhunte pen kum 6000 sungbang ih sinsinsa hi a, a Piangsakpa akoihpa in eite lungsim sungah hong guan hi. Singkungte in tehte, paakte nei uh a, ganhing nungta a lian mahmah tui-ganhing leviathan pan kipan nitaang sunga gamtang lungnote khempeuhte Adam in theigai hi. Tuate minvawh a, amaute gamtatziate telsitset hi. Vantungah Pasian’ vangliatna, sim zawhloh leitungte, meeite akaaisakna, khuavakleh awgingte, sun leh zante khempeuh i Nu leh Pa masate’n tellua uh hi. Singteh khempeuh leh mualtung asuangte khempeuh, aksitang tekhempeuh, leitung vantung leh huihte tungah Pasian’ min kigelh hi. Piansak sate thuman na leh ki pumkhatna in, tehpih omlo pilna leh vangliatna hong lak hi. Lungsim hong lazo mahmah, itna hong neisak, lungdam hong kosaksak zo thute ahi hi.” Ellen G. White, Patriarchs and Prophets, laimai. 50, 51.

Kikupding Dotnate:

1. Pasian in sang leh nasep peuhmah amah langdo nadingin a piansak hizen leh, eite’n Pasian deih bangin nasemsem lai ihi diam? I nasepna tungtawnin Pasian tawh a hoihzaw kizopna bangci neihtheih ding i hi hiam? (Khasum, siamsinna, kipumpiakna, Pasian nasepna, etc.)?
2. Eden huan sungah Satan’ khempilna ngaihsut ciangin, leimi’ thanemna tawh hileh lauhuai mahmah lel hi. Adam leh Eve in amau kiang naimahah Pasian omcih thei gige sa in, gulpi’ thu langmaan hong sang uhhi. Tua bang kinaihnapan gamlapi a kilawn khiasa eite in, tua zia-etna tetung i gualzawh theihna’ngin, Pasian’huhna koici ngah theih ding hiam?
3. Ukna aana-thu ngaihsun inla, tua aana manding banghangin thupi naci hiam? Ukna aana a kiciat kholloh ciangin bangpeuh piang thei hiam? Ukna aana koibangin kizangkhial thei a, ei’n i koici dawn ding hiam?