SINNA 12: CAESAREA AH A KIKHUMCIPNA
SINNA 12: CAESAREA AH A KIKHUMCIPNA
September 15– 21
SABBATH NITAK
Tukal sung sim dingte: Sawl. 24; Sawl. 25; Sawl. 26; 1 Cor. 1:23.
LAI SIANGTHO BULPHUH: “Hun tom taleh sau ta leh, nang bek hilo tuni a ka thugen a ngaite khempeuh hih sikkhainiang (sikkol) bulhna lo buangah kei a bat theih nading uh Pasian tungah thu ka ngen hi.” (Sawltak 26:29, ZIV)
Caesarea ah Paul kumnih sung Rome gam-ukpa inna ahi Herod kumpi inn sungah (Sawl. 23:35) ah thongkia in om a a (Sawl. 24:27) hi. Tua a thongkiat hun sunginRome gam-uk nihte ahi Felix leh Festus te leh kumpi Agrippa II mai ah thusitna thuak kawikawi hi. Tua hi a, Pasian in sep ding a piak lungdamna thu gualzo tak in tangko thei hi (Sawl. 9:15).
Thusitna khempeuh ah, mawhpeng a kisakna leh ama langah mawhsakna ding matlap kician omlo ahihna Paul in pulaak tawntung hi. Caesar tungah a thu tun lo hi leh kikhah thei ding zah in a kimatna ding khop khialhna Paul in neilo ahihna hong lak pipen hi (Sawl. 26:32). Hih thusitna te in Jesu thu teci a pan theihna ding lehthawhkikna kamciam sungah a lian lametna om ahihna pulaak theihna hunpha a ngah a hi hi.
Hih bangin kum tampi lunghimawhna leh khumcipna sawltakpa in thuak hi mah ta se leh, Jerusalem a om pawlpi te kiang panin bangmah panpihna ngahlo hi.
Jerusalem a makaite in, “Hih thu piang khempeuh in Paul vaipuak hi ci in ngaihsutna nei den lai uh hi.” – Ellen G. White, The Acts of the Apostles, laimai, 403.
SUNDAY September 16
FELIX MAI AH
Caesarea ah a kipuak zawh ni nga khit ciangin, Jew makai thupi pawlkhat ahi tulpipa leh Sanhedrin pawlpi pawlkhat leh taangding (lawyer) Tertullus te Jerusalem pan in hong pai uh a, sawltakpa mawhsakna thu te Felix mai ah hong sung uh hi (Sawl. 24:1-9).
Sawltak thubu sunga kigelh thukhenzum a thusitna te lak ah hih mun bek in taangding (lawyer) a zatna kimu hi. A thugenna ah, Tertullus in gam-ukpa maipha a ngahna dingin a lunglut huai lampi tawh a hanciamna teltak in kimu thei hi.Felix nuai ah Jew te in lungmuang takin sawtpi om cih in thudik hi hetlo hi. A taktak in, Rome ukna zah in Jew te tungah nengniamna, ngongtatna, leh hih nenniamna te in langpanna a piangsak ki-ukna omlo hi. Pilna tawh Tertullus in gam-ukpa thukhun zangin nakpi tak bawlsiatna tawh hih thu siangsakna hangin a gam sungah daihna a omsak ding thuzawh sawm hi.
Tua khit ciangin Paul mawhsakna thu thum gen hi: (1) gamlianpi sung khempeuh a Jew te lakah buaina piangsak, a linglawngsakpa (Sawl. 24:5), (2) Christian khempeuh buaina a piangsak te in ngaihsun in, tua Nazarenes pawl te makaipi (Sawl. 24:5), leh (3) Jerusalem biakinnpi buahsak sawm (Sawl. 24:6).
Sawltak 24:10-19 sim in. Paul in hih mawhsaknate koi bangin dawng hiam?
________________________________________________________________
Paul gen thunih te in a mawhmat te mawhsakna thu tungah siatna lianpi tun hi: (1) Asia pan hong pai teci te a omlohna (Sawl. 24:18,19) hih thu in thukhen zum ah thusitna thulut saklo hi, (2) tua lai a om Jew te in tua ma kalkhat lai a Sanhedrin te maiah thusitna te bek gen thei uh hi (Sawl. 24:20). Tua hi a, hih mite in misi te thawhkikna thu tawh kisai mawhsakna ding simloh a dang mawhmat ding neilo uh hi (Sawl. 23:6 tawh etkaak in).
Paul thugen a deihna Felix in telpah hi, a hangin Jew mi a zi Drusilla tungpan hi kha ve, Christian biakna thu a thei ngei mahmah khin khat ahi hi. Thusitna khawlbawl in, zaksakkik na a om madong sottoh ding thupia hi (Sawl. 24:22).
Felix dawnkikna in a bangci mi cih hong lak hi (Sawl. 24:24-27). Golhguk a kipiak khak leh cihna tawh hunpha ngakin Paul tawh kimuhna sotto thithe a, hunpha la nuam mahmah khat ahi hi. Felix bang mi tawh Paul in a dik thusitna neih ding lamet tawm mahmah hi.
Sawltak 24:16 sim in. “Pasian leh mite mai ah kisuantakna omlo dingin gamtat sawm tawntung” ci in Paul in gen hi. Bang a cihnopna hiam? Tua bang cih theihna dingin na kikhel ding bang teng a om diam?
MONDAY September 17
FESTUS MAI AH
Jew te maimuhna dingin hanciamna tawh kum nih khit dong thong sungah Felix in Paul nusia hi. Judea gam-uk dingin Porcius Festus in Felix za laih hi (Sawl. 24:27). A.D. 60 – 62 dong Festus in gam uk hi.
Sawltak 25:1-5 sim in. A um nuamlo te tungah lungdamna thu genna in bangzah in muhdahna piangsak thei cih, hih thu in koi bangin hong lak hiam?
_________________________________________________________________
Felix maiah Paul mawhmat ding hanciamna guallel ngeikhin ta uh ahih manun ama mai ah makaite va pai kik ngam nawnlo uh hi kha ding hi. Festus Jerusalem ah hong hawh masak pen hunin, thukhenna mun laih in Jerusalem ah Paul kipaipih a Jew thukham tawh kizui in Sanhedrin te mai ah thukhenna a neihsakna dingin makaite in ngen uh hi.
Ahi zongin amaute ngetna thu in a thah dinga a sawmna uh selcipna ding hi lel hi. Festus in hih thuneihna honkik ding a phal hangin thusitna in Jerusalem ah hilo in Caesarea ah neih dingin gen hi. Rome thukham om bangin Paul thu kikhen ding cihna ahi hi.
Caesarea ah Festus a tun phet in thukhen zum ah tupah in, Paul a mawhsakte in a mawhsakna te uh pulaak pah uh hi (Sawl. 25:7). Hih lai ah Luke in a mawhsaknate uh hong telgen nawnlo hi. Ahi zongin Paul dawnkikna tungtawnin (Sawl. 25:8), tua ma kum nih lai aa mawhsakna te mah hi a, a thukzaw in Rome gam a nawngkaisak ahihna tawh mawhmat le uh kilawm hi.
Sawltak 25:9-12 sim in. Gamvai tawh kisai in Paul a zattheihna ding hunpha Festus in agen ciangin Paul in koi bangin dawng hiam?
_______________________________________________________________
A tawpna ah, gamvai geelna te ah Festus leh Felix kilamdanna om mello hi (Sawl. 24:27). Gam-uk a sepcil kum in Paul mawhlohna thu khenna tawh Jew te panpihna sup ding lau ahih manin, a nget khitsa uh ahi Jerusalem a Sanhedrin te mai ah Paul thusitsak ding a ngaihsun ahi hi.
Ahi zongin, maantak in thu kisit lo ding cih theihkhol khin ahih manin hih thu Paul in sang zolo hi. Rome gammi khat i ngahtheihna zangin Rome thukhen zum ah thu a kisitna ding leh kumpilianpa (emperor) mai mahmah ah thutang tawh Rome thukhenna a ngah ding ngen teitei hi.
TUESDAY September 18
AGRIPPA MAI AH
Rome ah a kipuak ding Paul ngetna Festus in thukimpih hi (Sawl. 25:12). Tua laitak in, Herod Agrippa II hawhna hunpha la in kumpilianpa (emperor) kiangah Paul thu tawh kisai a puak ding thu ah bang teng gelh ding cih kuppih hi. Festus in Jew te ngeina tampi theihpih nai mello ahih manin Agrippa in tampi huh theih tham ding hi (Sawl. 26:2, 3).
Sawltak 25:13-22 sim in. Paul thu Agrippa tungah Festus in bang gen hiam? Kumpipa in koi bangin dawng hiam?
________________________________________________________________
Herod khanggui nunung pen Agrippa II pen Caesarea ah a sanggamnu Bernice tawh gam-uk thakpa zahtakna pia dingin hong pai uh hi.
Paul thu a genna ah, a kimawhmatna te in gitlohna lianpipi hilo in, Jew ngeina te leh Paul in “nungta hi a cih Jesu kici mi sisa khat thu” hang hi lel hi (Sawl. 25:19) ci in Festus in pulaak hi. Sanhedrin te mai ah Jesu thawhkikna tawh kisai thusitna a neihkhitna thu Paul in gen khinzo ahih manin, hih thu in a buaina pipen uh hi cih Festus in telgen hi.
Sawltak 25:23-27 sim in. Agrippa mai ah Paul a kipaipihna thu ah a kithupi bawl zia Luke in koi bangin hong lak hiam?
________________________________________________________________
“Aki kaikhawm mite mai ah kol kibulhsa in Paul ding hi. Hih lai ahbangzah in kilamdanna om! Agrippa leh Bernice te in thuneihna leh za le mun nei uh ahih manin leitung i maipha piakna ngah uh hi. Ahi zongin Pasian thupi ngaihsut nunzia te neilo uh hi. A thukham palsat te hi uh a, lungsim leh nuntakna ah a siacip te ahi uh hi.Amau gamtatnate vantung in kihhuai sa hi.” –Ellen G. White, The Acts of the Apostles, laimai, 434.
Mite muh a puatham etlawmna in i omzia taktak hong khemthei ahihna hih tangthu in bang hong hilh hiam? Eite zong ee le? I hih taktak na leh i puatham bangzah in kilamdang hiam?
WEDNESDAY September 19
PAUL KIHUUTNA
Thupi takin kumpi nasem zaliante gam-ukpa tawh a tut khit uh ciangin, Agrippa mai ah amah le amah kihuutna a gen dingin thongkiapa hong kipaipih ta hi(Sawl. 25:8-11).
Sawltak 26:1-23 sim in. Agrippa mai ah thu a gen ma in Paul in bang hih hiam?
______________________________________________________________
A taktak in, Paul gen thu in a kikhel ma leh kikhel khit ama nuntakna thu ahi hi. Sawltak 22:1-21 sunga Jerusalem a mihonpi te mai ah a gen thu mah a hi hi.
Agrippa maipha muhna ding kammal tawh sawltakpa in thugen pan hi. Athupi leh a zahtakhuai ban ah Jew te ngeina leh biakna tawh kisai thute a tel mahmahna hangin Agrippa mai ah thugen theihna hunpha a ngahna thu ah a lungdamna gen hi. Hih thu hangin, amah a ki mawhmatna te in khiatna neilo leh a khial vive ahihna Agrippa in gam-ukpa a genpih theihna ding ahi hi.
A thugenna khenthum in kikhen thei hi. Khen masa ah (Sawl. 26:4-11), Jerusalem a om te in theih khit sa uh ahi Pharisee hahkat mi khat ahihna Paul in gen hi. Pharisee ahihna tawh tanglai Israel te lametna tangtunna ding a thupi mahmah a hi misi te thawhkikna thu um hi.Tua ahih manin, Jew te in a gen khempeuh Jew ngeina tawh kitukalh khin lo ahih manin langpan samlo uh hi.Ahi zongin Paul in amau lungsim puak zia tel ahi Pasian in Jesu sihna pan thosak zuzen ding hiam cih ngaihsutna tel mahmah hi. Amah ngiat zong tua bang a um mite a bawlsia te hi lai hi.
Khennihna ah (Sawl. 26:12-18), Damascus paina lampi ah Jesu tawh a kimuh ciangin Gentile te kiang lungdamna thupuak ding a sapna a ngah khit ciangin koi bangin a muhna hong kikhel cih thu gen hi.
A tawpna ah, a muhsa thu te hangin lungdamna thu puak nasep sep ding sawlna manglo in a omlohna thu a gen hi (Sawl. 26:19-23). Ama kimatna a hangpi pen in Jew te thukham palsatna hilo a, biakinnpi buahsakna zong hilo hi. Gentile te nangawn in um in hotkhiatna a ngah theihna dingin Lai Siangtho genkholhna tawh kituak thu ahi Jesu sihna leh thawhkikna thu ahi hi.
Sawltak 26:18 sim in. Christ sungah hotkhiatna a ngah mite tungah bang thu piang ding ci hiam? Hih thu koi bangin nang mahmah in na sin/thuak kha hiam?
___________________________________________________
THURSDAY September 20
MAKAITE MAI AH PAUL
Agrippa tungah thugen ahih hangin, Sawltak 26:24 sunga i muh mah bangin a dawng masa pen Festus ahi hi. A si theihlo kha/nuntakna tawh kisai Paul in a gen hi leh Festus in bangmah buaina neilo ding hi. Tanglai Greek leh Rome mite in a si theilo kha leh thawhkikna pen a kihual lo upna leh ngaihsutna ahih lam tel uh hi. Tua hi a, thawhkikna nial in a si theilo kha om cih um zaw uh hi.Hih thu hangin, mundangah Paul in a genna ah lungdamna thu in Gentile te a dingin haina hi ci hi(1 Cor. 1:23).
Zahtak kaitak in, ama ngaihsutna te haihuai ahih lohna Paul in kihuutna a gen khit ciangin a gen thu te a tel thei leh Hebrew kamsangte gen te tawh kituak ahihna thu Agrippa lamah kiheiin gen beh hi (Sawl. 26:25, 26).
Sawltak 26:27, 28 sim in. Paul dotna Agrippa in bangci dawn hiam?
________________________________________________________________
Paul dotna in Agrippa buaisak mahmah hi. Jew khat ahihna tawh Lai Siangtho a upna thu nial ngeilo dinga, thukimpihna in dawngkik hi leh lah Jesu pen Messiah hi cih a sang hong suak ding hi. Agrippa in pilvai takin kikangkoih a, “hun tomno sungin Christian a suak dingin hong zol zo dingin ki-um na hiam” ci-in dawngkik hi(Sawl. 26:28).
Paul dawnkikna, “Hun tom taleh sau ta leh, nang bek hilo tuni a ka thugen a ngaite khempeuh hih sikkol te bulhna lo buangah kei a bat theihna dinguh Pasian tungah thu ka ngen hi” (Sawl. 26:29) in lungdamna thu ah a kithuk-ap na hong lak hi. Hih thusitna ah Paul in a kam khupna in thungai mite a suahtak bnagin a suahtak ding ngetna gen lo hi. Tua sangin, sikkol tawh kibulhna simloh amaute in amah tawh a kibat dinguh a ngen zaw hi. Paul i lungdamna thu ading a lunggulhna in amah pumpi kihuutna ding sangin lian zaw hi.
Sawltak 26:30-32 sim in. Paul mawhpengna thu Agrippa in koi bangin pulaak hiam?
________________________________________________________________
Paul thu a puakna ah bangci gelh ding cih tawh kisai bek Festus in Agrippa huhna a ngen ahi hi(Sawl. 25:25-27).Caesar mai din ding Paul ngetna kipia khin zo hi (Sawl. 25:12). Gam-ukpa thukhen theihna sungah Paul om hi nawnlo hi.
Sawltak 26:24-28 sim in. Paul in bang thu ngen pipen a, hih thu in upna thu ah buaina a om ciangin eite hih theihna tawp dong koi bangin sep ding hong lak hiam?
FRIDAY September 21
NGAIHSUT BEH DING: “Hih Agrippa kammal te in Paul gen mipa tungah a lawhsam zia a ngaihsutna in a innkuan khangthu vuah a puakkik hiam? Mawhna neilo Bethlehem naupang te thah ding thu a pia a pu sawn Herod a ngaihsun kik hiam? ahi kei leh Tuiphum John a that a papi Antipas ee? ahi kei leh sawltak James a that a ma pa Agrippa I mahmah a ngaihsun kik hiam? Pasian nasem te tungah a gitlohna uh hangin Pasian lungkimlohna in hih kumpi te tungah a banban in siatna tung cih a mu hiam?Hih khuapi sung mah ah amah sangin a vanglian zaw kumpi a pa Agrippa I mahmah puan tee zeizai te silh in mite in pasian hi ci in a kiko hun lai,tua ni a thupi taka kilahna in a phawk kik sak hiam? Mipi te otna bei in a ki liansak kumpipa tungah a lipkhaphuai, a manlang mahmah phulaakna a tunna mangngilh khinta hiam? Hih thu te khempeuh Agrippa phawkna ah hong kidawk kik a, ahi zongin ama mai ah thupi tak a kilahna in ama kiliatsaktawmna dingin phatkhem a, kiphatsakna leh amah bek thupi kisakna in a picing zaw ngaihsutna te khaktan hi.” –Ellen G. White Comments, The SDA Bible Commentary, vol. 6, laimai, 1066, 1067.
KIKUP DING DOTNATE:
1. Kikupna sungah, Caesar maiah din ding Paul in a ngetna thu kikum un. A khensatna dik mah hiam (Sawltak 25:25; 26:31, 32 tawh etkaak in). Pasian kepbit na tungah ki-ngak vekna sangin eimau kihuutna dingin bantan ciang limtak a khensatna bawl thei ding i hiam?
2. Agrippa tungah Paul thugen: “Kumpi Agrippa aw, van pana mangmuhna thu mang loin ka om kei hi” (Sawl. 26:19) cih thu ngaihsun in. Hih in Paul thu bang hong gen hiam?Christian hihna tawh missionary dinga sapna ah bangzah i muanhuai hiam (1 Pet. 2:9, 10)?
3. Paul in mi a ding – mipha zah hilo – mi ading lunggulh mahmahna nei hi. Caesarea ah a kithusitna nunung pen ah, thungai mi khempeuh in Pasian hehpihna tawh hotkhiatna a ngah amah bang ahih ding a lungtang i lunggulhna ahih thu gen hi (Sawl. 26:29).Amaute in Pasian hotkhiatna a ngahna ding a lunggulh zah in a suahtak ding lunggulh lo hi. Hih thu ah eite in i etteh ding bang om hiam? Lungdamna thu kizelhna dingin bangzah tak i kipiakzawh ding i lunggulh hiam?
4. Paul kam mahmah panin lungdamna thu zaktheihna ding Agrippa in hunpha ngah hi. Himah leh, amah in nial hi. Eite mai ah hih bang hunpha a om ciangin i mansuah khakloh na ding koi bangin kidawm ding i hiam?