ZIRLAI 9: SATANA LEH A THURUALPUITE

ZIRLAI 9-NA                                           February 23–March 1

SATANA LEH A THURUALPUITE

Chângvawn: “Tichuan, drakon chu hmeichhe chungah chuan a thinur a, a thlah la bâng, Pathian thupêkte zâwma, Isua Krista hriattîrna thu neitute chu do tûrin a chhuak ta a” (Thupuan 12:17, MEV).

SABBATH  CHAWHNU                                                                                                         February 23

 

Chhiar tûrte: Thup. 13, Thup. 17:8, Dan. 7:24, 2 Thes. 2:2–12, Thup. 12:14–16, 1 Lalte 18:38.

THUPUAN 12 hian Setanan Pathian mi rinawmte a beih dân a sawi a, chu a beihnaah chuan milem be mite hunlâi leh a hnua pope thuhnuaia lo awm ta Rome-in ni/kum 1,260 chhûng tihduhdahna (A.D . 538 1798; Thup. 12:6, 13, 14 leh Zirlâi 7-na, Thawhlehni zirlâi kha en lêt leh ni se) a kalpui pawh kha a tel ve nghe nghe bawk. Bung 13-na hian a thurualpui pahnihte nêna Pathian mite a beih dân chipchiar zâwkin a sawi a, chûng a thurualpuite chu ‘sakawlh’ tia sawi ve ve an ni. Tâwpna hunah chuan drakon leh hêng sakawlh pahnihte hi Setana kaihhruaina hnuaiah thawk hovin, Pathianin tlanna hna a thawhte chu an dodâl tlâng ang a, khawvêl pawh an lama tang ve tûrin hmin an tum dâwn bawk a ni.

Hetah hian vaukhânna thu sawi a ngâi tlat. Hrilhlâwkna thu lo thleng dik tawhte kha chu a awmzia hrilhfiah a harsa hran lêm lo va. Nimahsela, lo la thleng leh tûrte chungchângah erawh chuan kan fîmkhur a tûl khawp mai. Pathian chuan tâwpna huna thil lo thleng tûrte chu a lo thlen huna kan buai lohna tûrin min lo hrilh lâwk vek tawh a; mahse, kan duh ang diak diaka chipchiar chuan min hrilh lêm lo thung. Hêng hrilhlâwknate hian tâwpna huna thil lo thleng tûrte chu eng nge ni tih min hrilh tho mah se, eng tikah nge a lo thlen ang a, eng tin chiah nge a lo thlen dâwn tih lam chu min hrilh tel lo a ni tih kan hre reng tûr a ni. Chuvâng chuan, hrilhlâwknain min hrilh bâk chu lo zêldin chiam chiam lo tûrin kan fîmkhur pawh ngâi rêng a. Thupuan bûa hrilhlâwknate hian tum fel tak a nei a, chu chu: vawiinah hian eng tianga nung tûr nge kan nih a, eng tin nge nakîn hun atân kan lo inpeih theih ang tih min zirtîr a tum a ni.

*Tûn kâr zirlâi hi Sabbath nîa sawi ho thei tûrin lo inbuatsaih ang che.

SUNDAY  February 24

Tuifinriat atanga lo chhuak sakawlh chu

Thupuan 13:1–4, 8 leh Thupuan 17:8 chhiar la. He sakawlh hi eng ang nge ni a, hun hrang hrangah eng tiangin nge a rawn inlan le?

Johana hian tuifinriat atanga ramsa tihbâiawm tak mai lo chhuak lâi chu a thlîr reng a. ‘Sakawlh’ tih hian sawrkâr/politic lama thiltihtheihna, thuneihna nei tih a entîr tho rualin, tuifinriat atanga lo chhuak sakawlh hi chuan a rawn lan dân rêngah pawh sawrkâr kal anga kal sakhaw/kohhran lian tak a kâwk bîk a ni. Tuifinriat/tuipui tih chuan Rome Lalram tlûk hnua tuifinriat atanga lo chhuak sakawlh lo chhuahna, mihring pawh tam tak an chênna hmun Europe khawmualpui khu a entîr a (Thup. 17:15). Heti hian a lan dân Johana chuan a sawi: Thupuan 12:3-a kan hmuh drakon ang bawk khân he sakawlh pawh hian lû pasarih leh kî sâwm a nei a, chu chuan milem be mite hunlâia Rome nên an inzawm hnaihzia a tilang. Hêng sakawlh lû-ahte hian Pathian sawi chhiatna hmingte a awm a, tin, a kî-ahte hian lallukhum a awm vek bawk. A lû-te hi Pathian mite tihduhdahna hmanrua atâna Setanan a lo hman thin lalram hrang hrangte an ni. Pathian sawi chhiatna hming tih hian Pathian nihna sakawlhin a chuhpui ve thu a sawi a. Kî sâwmte hian Daniela 7:24-in a sawi kha kâwkin, Rome Lalram tlu ta atanga lo piang chhuak ram hrang hrangte kha a entîr. Tuifinriat atanga lo chhuak sakawlh nihna/zia hrang hrang hrangte hian a zavâiin milem be mite hunlâi Rome Lalram atanga lo piang chhuak papacy (pope) a kâwk a ni.

Tuifinriat atanga lo chhuak sakawlh hi a lan dânah chuan keitê a ang hle a, a kê-te chu savawm kê ang niin, a kâ erawh sakeibaknei kâ ang a ni thung. Chutiang chuan, he sakawlh hian Daniela 7:2–7-a kan hmuh sakawlh palî (lalram lian tak tak palî-te entîrtu): Babulon te, Medo-Persia te, Grik te leh Rome te zia kha a zavâiin a rawn chhawm vek tihna a ni. Amaherawhchu, Johana hi chuan a hnuhnûng ber atangin a sawi tan ve thung a, ama hunlâia a thlîrna atang chuan tuifinriat atanga lo chhuak sakawlh leh Daniela 7-in a sawi sakawlh palî-na, Rome Lalram hi a inzawm a ni.

He sakawlh hnênah hian Drakon chuan (Setanan a puih milem be mite hunlâia Rome Lalram) a thiltihtheihna te, a lalthutphah te leh a thuneihna te a pe a. Krista hnêna Pa-in a lalthutphah leh a thuneihna a pe (Thup. 2:27) ang chiah khân Setana pawhin he sakawlh hi leia ama âiawhtu-ah a siam ve a ni.

Thupuan 13:5–7 hian sakawlhin tihduhdahna a kalpui hun chhûng rei zâwng chu ‘thla’ 42 a ni dâwn tih a sawi a. Kan hmuh tawh ang khân, hmeichhe thianghlimin tihduhdahna a tawrh hun chhûng tûr chu ‘hun khat leh hunte leh hun chanve’ a ni a, chu chu ‘kum’ thum leh a chanve tihna a ni (Thup. 12:13, 14; Dan. 7:25). Hrilhlâwkna thu-a ‘thla’ sawmlî leh pahnih chuan, thla khatah ni sawm thum zêl awm anga chhûtin (30×42) ni/kum 1,260 a tluk a (Thup. 12:6). Chuti a nih chuan, ‘hun khat leh hunte leh hun chanve’ tih te, ‘thla’ 42 tih te leh, ‘ni’ 1,260 tihte hian a zavâiin kum 1,260 a kâwk vek a ni. Hemi hun hi Johanan sakawlh lû pakhata thihpui khawp hial tûr hliam na tak a hmuh chiah khân a lo tâwp ta a. A hliam tawrh lo dam leh ta hian sakawlhin a thiltihtheihna a chân tawh, kum 1798 hnu-a a nei lêt leh tâk kha a entîr a. Chutia a hliam tawrh, mak tak maia lo dam leh ta chuan khawvêl ngaihsân a hlawhtîr a, drakon leh sakawlh chu chibai an bûk ta a ni.

See also  HSS 10: LALPA CHU CHIBAIBÛKIN

THAWHTANNI                                                                   February 25

Tuifinriat atanga lo chhuak sakawlh thiltihte

Thupuan 13:5 hian nimin zirlâia kan sawi tihduhdahna a thlen hun chhûng rei zâwng tûr kha min hrilh a. Sakawlh chêt hun chhûng tûr thla 42 hi Thupuan 12:6, 14-a kan hmuh, hmeichhia/kohhranin tihduhdahna a tawrh hun chhûng tûr ni/kum 1,260 nên hian a rei zâwng a inang chiah a. (Hrilhlâwkna thu-a ‘ni khat’ tih hian kum khat a tluk zêl a ni [Nam. 14:34, Ezek. 4:6]. Zirlâi 7-naa Thawhlehni zirlâi bîk kha en leh ni se). A.D. 538 kha he hun hrilhlâwkna lo intanna chiah hi niin, khami kum khân Roman kohhran chuan sakhaw lam leh politic lama thuneihna nei tanin, hun laihâwl chhûng zawng kha chu a thuhnuaiah Europe ramte khu a awm a ni. French Revolution khân he sakawlh hi hliam na tak a tawrhtîr a, A.D. 1798 khân kohhran râwvâ tak, sawrkârin a tanpui ni bawk si chu hun eng emaw chen chhûng atân a titâwp ta rih a ni.

Thupuan 13:5–8 hi Daniela 7:24,25 leh 2 Thessalonika 2:2–12-te nên hian khâikhin la. Eng tiangin nge tuifinriat atanga lo chhuak sakawlh thiltihte hian ki tê tak tê leh dân bawhchhepa nihna a rawn pho chhuah le?

Ni/kum 1,260 chhûnga tuifinriat atanga lo chhuak sakawlh thiltihte hi Pathian sawichhiatnaa bul tan a ni a. Thuthlung Thar lehkhabu-ahte hian Pathian hming sawichhia tih chu Pathian nêna intluk nia inchhâlna (Joh. 10:33, Mat. 26:63–65) leh, a thuneihna han chuhpui ve-na (Marka 2:7) tihna ang deuha hman a ni tlangpui. He sakawlh, tuifinriat atanga lo chhuak hi chuan alang apauin Pathian a do va, a hming te, a biak bûk te, vâna awm vân mipuite thlengin a sawichhe bâwng bâwng mai a ni (Thup. 13:6, NKJV). Pathian chênna hmun chu vâna awm biak bûk, chhandam kan nih theih nâna Kristan rawng a bâwl mêkna khi a ni a. He sakawlh hian Kristan sawipui hna a thawh chu sualte ngâidam a, chhandamna thlen thei nia inchhâl puithiamte hmanga thlâk a tum a. Hêng thuneihna, Pathian chauhin a neihte han chuhpui ve-na hi Pathian sawi chhiatna chu a ni.

Thupuan 13 hian Kristian kohhran chhûnga kalsualna lian tak a thlen hun lâi a sawi a, chu chu Roman Catholic Kohhranin a lû ber atâna pope hmanga Pathian dinhmun leh a thuneihna a han chuhpui ve chiah khân a lo thleng famkim ta a ni. Rome hnêna intulût ve duh lote chuan tihduhdahna an tuar a, nun chân ta hial pawh tam tak an awm nghe nghe. Tûnlâi hunah chuan hetiang thu han sawi hi a dêngkhâwngin, huatthlala tak pawh a ni âwm e; mahse hun kal tawha thil thlengte kha duhin tum sa teh mah ila, nawh reh theih a ni tawh si lo a ni.

Eng tin nge kohhran chanchin kal tawh chung-chânga hrilhlâwknain a sawi hi a dik a ni tih Kan pawm ang a, chutih rual chuan, mi dang hnêna hêng thutakte kan hril dânah erawh zâidawh tak leh fîmkhur taka thil kan tih a ngaih bawk si le?

THAWHLEHNI                                                                    February 26

Lei atanga lo chhuak sakawlh chu

Thupuan 13 chanve hma lam zawng hian ni/kum 1,260 chhûnga Roman Catholic Kohhran thiltihte chu a sawi a. French Revolution lâia thil thlengte avâng khân he pâwl, sakhua leh politic lama thuneihna nei kawp hian thihpui khawp hial tûra nâ hliam a tuar ta a ni. Amaherawhchu, a hliam chu a lo dam leh dâwn a, a hmâa a thuneihna ang kha a rawn nei lêt leh bawk ang. Bung chanve tâwp lam hian tuifinriat atanga lo chhuak sakawlhin hliam na tak a tawrh chu a lo dam leh dân tûr a sawi ve thung a ni.

Thupuan 13:11 chhiar la. Sakawlh pahnihna ziarângte chu eng nge ni? Thupuan 12:14–16-in a sawi dân atang hian he sakawlh hi lei atanga lo chhuak a ni hian eng nge a entîr le?

Johana hian sakawlh dang lo chhuak leh chu a hmu a. Sakawlh hmasa ang lo takin he sakawlh hi chu lei atanga lo chhuak a ni ve thung. Sakawlh pahnihna hi chu khawvêl huapa thiltihtheihna nei niin, sakawlh hmasa ang bawka mi dangte hmin thei a ni bawk. Amaherawhchu, tuifinriat atanga lo chhuak sakawlh kha ang lo takin (ani kha chu tihbâiawm tak a nih kha), he sakawlh hi chu [a tîrah chuan] ngainatawm tak angin a lang [rih] phawt ang. ‘Berâmno kî ang kî pahnih’ a nei a (Thup. 13:11). Heta berâmno a tih hi Krista entîrtu a ni. Chutiang chuan, he sakawlh, tâwpna huna lo chhuak tûr hi Krista ang takin a rawn inlan vêl dâwn a ni.

He sakawlh hi ni/kum 1,260 chhûng tihduhdahna (Thup. 12:14–16) tâwp dâwn hnaiha Pathian kohhran dik entîrtu hmeichhia lo humhimtu ram atanga lo chhuak a ni a. Mi thar niin, tuifinriat atanga lo chhuak sakawlhin French Revolution lâia thihpui khawp hial tûr hliam a tawrh hnu khân khawvêl hriat thamin a rawn lang chhuak ve chauh a, chu chuan tâwpna huna hna thawk tûr liau liau a ni tih a tichiang hle.

“Khawvêl Thar an tiha a eng ram ber hi nge kum 1798 hnua thiltihtheihna rawn nei thar ve a, chakna leh ropuina thutiam pe a, khawvêl mit fûk rawnna lo ni ta le? Hemiin a entîr chungchângah hian zawhna dang vak a awm thei lo. Ram pakhat, pakhat chauhin chu hrilhlâwkna thil sawite chu a rawn tifamkim a; hai rual lohin United States of America hi a kâwk a ni.”—Ellen G. White, Indona Ropui, pp. 399, 440.

Amaherawhchu, Thupuan 13:11 hian Protestant tamna ram America khu Setana ang maia che-in drakon tawng angin a la tawng ang a, Rome Lalram ang bawk khân khawvêl pum ngaihsân a la hlawh dâwn niin a sawi. He tâwpna huna lo lang sawrkâr hi khawvêl pumin sakawlh hmasa zâwk, thihpui khawp hial hliam nei kha chibai an bûk theihna tûra hnathawktu tûr a ni. Tawngkam danga sawi chuan, thâwk khat lâia kohhran thlavâng hauh na bertu leh tihduhdahna tlânchhiatsante lo humtu United States khu ni hnuhnûngah chuan mite tihduhdahtu a ni ve leh tho dâwn tihna a ni.

See also  ZERUBABELA LEH EZRA-TE HUN LÂI CHANCHIN

United States khu Thupuan 13-in a sawi sakawlh pahnihna a ni e tia sawi a nih tantirh lâi kha chuan tûna thiltihtheihna leh huhâng a neih ang hi a la nei pha lo nasa hle. Hei hian hrilhlâwknain sakawlh pahnihna a tih hi United States a ni ngei a ni tih eng tin nge a rawn nemngheh le?

NILANI                                                                             February 27

Sakawlh lem chu

Thupuan 13:12, 13 chhiar la. Eng tin nge 1 Lalte 18:38 leh Tirhkohte 2:3-te hian berâmno ang tak sakawlhin thil a tihte—vân atana mei tlâktîr ang chi te—chu hrethiam tûrin min puih le?

He sakawlh, berâmno ang tak hian thilmak tak takte tiin mi tam tak chu a hmin ang a, a thusawite chu Pathian Lehkha Thu nêna inrem thlap ni hlawm lo mah se an âwih tho dâwn a ni. “Thlarau biakna hmangin thilmakte tih a ni ang a, damlote tihdam an ni ang a, hnial thlâk theih mai loh thilmak leh ropui tak takte pawh tih a la ni bawk ang.”— Ellen G. White, Indona Ropui, p. 588. Hêng thilmakte hian berâmno ang tak sakawlh chu, thihpui khawp hial hliam nei tawh tuifinriat atanga chhuak sakawlh kha chibai bûk tûra leia chêngte a hmin theih nân a pui dâwn a ni.

Tuifinriat atanga lo chhuak sakawlhin thihpui khawp hial hliam a neih lo dam leh ta khân Roman Catholic Kohhran lû ber pope-in sakhua lam leh ram rorêlna thila thuneihna a rawn nei thar leh ta hi a lo entîr a. Tin, berâmno ang tak sakawlh pawh drakon tawng anga tawngin, tuifinriat atanga lo chhuak sakawlh thiltihtheihna kha a rawn hmang tan ta bawk. Chu chuan hêng chhin-chhiahnaten an entîr ramte ang bawk khân mi dangte dawhtheihna nei lo tak a la ni ve leh dâwn tih a lantîr a ni. “Chu a thiltih chuan ama sawrkâr kalphung te, a dân te, mahni kêa ding a ni tih a puanna thu urhsûn tak te leh a inkaihhruaina dânpui ngei pawh a kalh dâwn a ni. Nimahsela, chutianga a nihna nêna inrem lo tak thil a tih chu chhinchhiahnaa amah entîrtu âiin a ropui lo zâwk tho si. Berâmno kî ang kî nei sakawlh a ni miau a—a lan dânah chuan thianghlim, nunnêm leh pawi sawi lo a ni—mahse, drakon tawng angin a tawng tlat si. . . .

“‘Leia awmte hnênah chuan sakawlh lim/lem an siam tûr a ni tih a sawi a.’ Hetah hian sawrkâr, mipuite hnêna dân siam tûra thuneihna pe ram a sawi a ni tih a chiang a. Chu ram chu United States ngei hi a ni tih phat rual a ni lo.

“Mahse ‘sakawlh lem’ chu eng nge ni, eng tianga lo siam tûr nge ni le? Sakawlh lem chu kî pahnih nei sakawlhin a siam a ni a, chu chu sakawlh [hmasa zâwk] ang tak kha a ni a, sakawlh lem/lim tia sawi a ni. Tichuan, sakawlh lem chu eng nge ni a, eng tiangin nge siam a nih tih hre tûr chuan sakawlh (papacy/pope) nungchang leh ziarângte kan zir a ngâi ta a.

“Kohhran hmasa kha a lo khawloh a, chanchin tha tluangtlam lak ata a pên bo a, ring lote mite serh leh sâng thilte leh tih dân phung te a lo pawm ve tâkah khân Pathian Thlarau leh Pathian thiltihtheihna chu a hloh ta a; tichuan, mipuite chhia leh tha hriatna thununsak tûrin sawrkâr tanpuina a dîl ta a ni. Chumiin a rah chhuah chu, sawrkâr thuneihna thununa, ama duh dân tihhlawhtlin, a bîk takin ‘zirtîrna dik lo vuantu’ nia a ngaihte hrem nâna sawrkâr hmangtu pope rorêlna a ni. . . .

“United States-a kohhran lian deuh deuhten thurin intâwm a neihte changchâwia an insuihkhâwm a, an thurêlte leh an dân siamte lek kawh tûra sawrkâr an hmin hunah chuan Protestant ram America hian Rome Kohhran hotu pope lalna lem a siam ang a, kohhran laka hel nia an hriatte chungah chuan hremna a chelek ngei ngei dâwn a ni. . . .

“‘Sakawlh lem’ tih chuan Protestant kalsual entîrin, chu chu Protestant kohhranten an thurinte lek kawh tûra sawrkâr thuneitute puihna an zawn hunah siam a ni ang.”—Ellen G. White, The Great Controversy (Indona Ropui), pp. 442446.

NINGANI                                                                           February 28

Sakawlh chhinchhiahna chu

Thupuan 13 hian berâmno ang tak sakawlhin buaina hun hnuhnûng bera dinhmun pawimawh tak a rawn luah chhoh dâwn thu a sawi a. He ram/sawrkâr hian mipuite thurin/rinna thununna atân khawvêl pum huap inkaihhruaina dân a siam ang. Chu a dân siam chu pope thuhnuaia Kristian kohhran a awm lâi, hun laihâwl vêla an dân chelek nên khân a inang hle dâwn a ni.

Thupuan 13:16, 17 leh Deuteronomi 6:4–8 chhiar la. Kut ding lamah emaw, chalah emaw chhinchhiahna pû tih hian Pathian thupêkte nên eng nge inkungaihna a neih le?

Mi tinrêngte hi—mi lian leh mi tê pawh—an kut ding lamah emaw, an chalah emaw sakawlh chhinchhiahna pu theuh tûra nawr luih an la ni dâwn a. Chala chhinchiahna awm tih chuan a putu chu Pathian tâ a nihzia a tilang a (Thup. 7:3, 4; Thup. 14:1), chutiang chiah chuan, sakawlh chhinchhiahna pawh hian sakawlh chibai bûktute chu tute nge ni tih a tilang ve ang.

Sakawlh chhinchhiahna chu mita hmuh theih tûra inziak a ni lo. Kut ding lamah emaw, chalah emaw put tûr ni anga a sawi hi Mosian Pathian dân inziahna puanthem chu chhinchhiahna atâna an bânah emaw, an chalah emaw zem tûra Israel mite a hrilh ang deuh kha a ni a (Deut. 6:8). Kut ding lam tih chuan nungchang a kâwk a, chutih lâiin, chal tih chu rilru-a pawm tihna ang a ni thung. Mi thenkhat chuan tihhlum nih an hlauh avângin sakawlh chhinchhiahna an pû ang a, thenkhat dang chuan an rilru leh thlarau zawng zawngin he sakhaw dik lo tak hi chibai an bûk ve thung dâwn a ni.

See also  HSS 2: NEHEMAIA

Tâwpna huna thu inchuh lian ber ni tûr chu chibai bûkna leh Pathian thuâwiha a thupêkte zawm leh zawm loh chungchâng a ni ang (Thup. 14:12). A bîk takin, Sabbath serh tûra thupêk hi Pathian laka kan rinawm leh rinawm loh, a thu kan âwih leh âwih loh fiahna a ni dâwn a. Sabbath chu Pathian mi rinawmten Pathian thu an âwih a ni tih chhinchhiahna danglam bîk a ni ang chiahin (Ezek. 20:12, 20), sakawlh chhinchhiahna pawh hi sakawlh laka mi a rinawmzia tilangtu a ni ve ang.

Sakawlh chhinchhiahna chuan Pathian thupêk hi mihringte siam chawp dânin a thlâk thleng a. Chutiang a nihzia tichiang êm êmtu chu min siamtu’n thu min pêk ngei, Bible-ah pawh kan hmuh ni sarih nî Sabbath âia mihring siam chawp Sunday zâwk serh tûr a ti mauh mai hi a ni. Pathian thuneihna chhinchhiahna n$ danga thlâk tumna hi amah Pathian dinhmun leh thuneihna han chhuhsak tumna a ni. “Sakawlh chhinchhiahna chu pope-in a siam chawp sabbath [suak] hi a ni a. . . . He sabbath suak hi serh tûr a ni tia thupêk chhuah a nih a, vântirhkoh pathumnain sakawlh leh a lem chibai bûktute tâna vaukhânna thu ring taka a puan hunah . . . dân la bawhchhe chhunzawm rengte chuan sakawlh chhinchhiahna an dawng tawh dâwn a ni.”—Ellen G. White, Evangelism, pp. 234, 235.

Thupuan 13:18 -ah chuan he thu hi kan hmu a: “Hetah hian fin a tûlzia a lo lang a. Hriatthiamna nei chuan sakawlh namber chu chhût chhuak rawh se, chu chu mihring namber a ni a, a namber pawh 666 a ni nghe nghe” (NKJV). He mi hi tu nge ni? Paula chuan ‘dân bawhchhepa’ tiin a sawi a (2 Thes. 2:3). He a nihna hian tuifinriat atanga lo chhuak sakawlhin a entîr pope thuneihna a kâwk a, chu mi lû-tea Pathian sawi chhiatna hming awm chuan Pathian nihna a han chuhpui tih kâwkin, leia Pathian Fapa dinhmun luahlan a tum a ni.

ZIRTÂWPNI                                                                               March 1

Zir belhna: Thupuan bû hian khawvêl tâwp dâwn hnaih tak takah chuan Sabbath hi thuâwih leh thuâwih loh chhinchhiahna a la ni dâwn tih a sawi a. Amaherawhchu, tûna Sunday serh mêktute hian sakawlh namber a nei tawh e tihna chu a ni chuang lo tih kan hre reng tûr a ni. Sunday serh hi ‘sakawlh chhinchhiahna’ a nih hun tûr chu eng nî ber hi nge Pathian chibai bûkna atâna hman tûr tih chungchânga thu inchuhte hi hriatthiamna chiang tak neih a nih hunah chauh a ni ang. Chutih hunah chuan bumna chi hrang hrang lêng vêl mah se, mi tin hian Pathian lama tang tûrin emaw, amah do tûr zâwkin emaw duhthlanna an siam dawn a. Mahse, chumi hun chu nakîna thleng tûr a la ni rih.

“Tûnah hian fiahna hun chu a lo la thlen rih miau loh avângin mi tu mahin sakawlh chhinchhiahna an la dawng rih lo. Kohhran tinah hian, Roman Catholic-te zîngah ngei pawh Kristian dik tak an awm teuh a. Mi tute mah hi êng an dawn a, thupêk palî-na hi zawm ngei tûr a ni tih an hriat hma loh chuan thiam loh chantîr ngawt a ni lo vang. Mahse, sabbath suak (Sunday) serh tûra thupêk chhuah a nih a, vântirhkoh pathumnain sakawlh leh a lem chibai bûk lo tûra mite vaukhânna thu ring taka a puan hunah chuan a dik leh dik lo inkârah chiang takin ramrî kham a ni tawh dâwn a. Chutah chiah chuan, Pathian dân la bawhchhe zui zêltute chuan sakawlh chhinchhiahna an dawng ang.”—Ellen G. White, Evangelism, pp. 234, 235.

Tûna Sabbath serhna hian mi a chhandam hran lo ang bawkin, t<na Sunday serhna pawh hian mi a tiboral bîk chuang lêm lo a ni tih hi i hre reng ang u. Amaherawhchu, ‘sakawlh chhinchhiahna’ hi thu inchuh ber a nih hun tûr leh, chibai bûkna ni dik thlan chu rinawmna fiahna a nih hun tûr chu a lo thleng ngei dâwn. Thupuan bû hian Pathian mite chu Bible keu a, thil hriat duhna tak tak rilru nêna hrilhlâwkna thute zir a, Krista la hre ve lote hnêna chanchin tha thlen a nih theihna tûra theihtâwp chhuah theuh tûrin min sâwm a ni.

SAWI HO TÛRTE:

  1. Vawiina khawvêl awm dân hi thlîr la, sakhaw lam leh politic lama thil thleng engte hian nge Thupuan 13-a hrilhlâwkna thu hi rawn thlen dik tîr chho mêk zêl le?

 

  1. Tâwpna hun chu kan lo nghah mêk lâi hian kohhran pâwl danga Kristian awm vete chunga kan rilru put hmang tûr chu eng nge ni ang? He thurâwn hi ngun takin ngaihtuah ang che: “Kan rawngbâwltu (pastor-te) hian kohhran pâwl danga rawngbâwltute bul hnâiah awm an tum tûr a ni. Hêng mite tân hian Isuan sawipui hna a thawh avângin an tân tawngtâi se la, anmahni nên pawh tawngtâi ho thîn bawk rawh se. An chungah mawhphurhna khûn tak nghah a ni a. Krista thuchah kengtute kan ni ang ngeiin, hêng berâmpute hi kan ngaihsakin kan lainat êm êm tûr a ni.”—Ellen G. White, Testimonies for the Church, vol. 6, p. 78.

 

Kohhran pâwl danga awm Kristiante chunga kan rilru put dânah hian anmahni âia chungnung zâwk nia inngaihna emaw, Kristian rilru lo deuh emaw kan neih loh nân eng tin nge kan invên theih ang? Anmahni mai bâkah, an mi mal rinna pawh (keimahni rinna hnûk hniam si lovin) kan zahsak a ni tih eng tin nge kan lantîr ang le?

Tags: ,

Admin

Admin

Top