SEAL SAGIHTE

Lesson 5                                                   January 26 – February 1

SEAL SAGIHTE

Sabbath     Nitaklam                                                                   Jan 26

Tukaalsung sim ding: Mang 6:1-14; Siampi 26:21-26; Eze 4:16;  Paikhiatna  32: 43; 2 Thess 1:7-10.

KAMNGAH:       “Nang Tuuno, tua laizial a lakhia ding leh, a seal te a lakhia dingin, Na kilawm hi. Nang hong kigokhin a hih manin, mi namkim leh pau namkim a paute sung-panin, na sisan tawh, Pasian a dingin, mite na leikhin a; Pasian na a sem dingin, siampi za leh kumpi za na pia a, amaute in leitung a uk ding uh hi.” Mangmuhna5:9-10.

Mangmuhna 6 in 4 – 5 sung a om thu, sihna tungah galzawhna hangin, Adam mansuah sa dinmun, a ngahkik thu mah zomto hi. Tua laizial hong a, ciamtehna lakhia in, gupkhiatna ngiimna teng zomtoto ding hi. Penticost pan a kipan Khazih gam lungdamna thu hilh hong kipatna in, tua laizial ciamtehna honna a hihi. Seal sagihna a hon ciangin, leitung tangthu a tawpna hi ding hi.

Mang 3:21 in, seal sagihte a khiatna hong musak hi: “Keimah zong gualzo in, ka Pa tokhomah ka tutkhawm uh mah bangin, a gualzo te khempeuh zong, Ka tokhom tungah hong tutkhop theihna dingin thu ka pia ding hi.” A lian 4 leh 5 in zong, Khazih gualzawhna pahtawina, a lian 7 tawpna lamah, a gualzo mite Khazih tokhom mai ah om hong lak hi. A lian 6 na in, Pasian’ mi a gualzo te, Zeisu in a tokhom hawmding cih hong lak hi.

SUNDAY                                                                                                                 Jan 27

Seal Masa Honna

Mang 6:1- 8; Siampi 26:21- 26 leh Mate 24:1- 14 te simin. A gen kibangte lungngai in. Seal masa lam 4 teng na bangci muh hiam?

…………………………………………………………………………………………………………………..

Siampi laibu 26:21 – 26 sung a, namsau, kial, natsia leh sa gilo lauhuai na te tawh enkaak leng, seal sagihte kitel pha deuh ding hi. Ezekiel in zong (14: 21) thukhen na lian 4 na ci hi. Israelte a thuhilhna leh khalam khanlawhna a neihtheihna ding a, Pasian in, tua gimnate tungsak zel a, tua mah bangin, Zeisu hongpai ding ngak kawmin, khanlawhna om theihna dingin, seal sakol 4 teng zang hi. Mate 24:4- 14 sung a gimna te zong, tua sakol 4 gimna teng mahtawh ki zawitawn hi. Hih leitungpen i inn taktak a hihlohna theihna dingin, sakol masa 4 tengtawh, Pasianin hong lak hi.

Mang 6:1,2 ah gualzawhna hi. Mang 19:11- 16 ah, Khazih sakolkaang tuang a, van galkaphon a makaih, puankaang silhpa in Khazih hi a, nihvei kumkik ciang misiangtho te gum ding cihna hi. A kaangin siangthona hi a, thaltawi in kumpi lukhu khu hi, (Mang 6:2). Hab. 3:8 -13 leh Late 45:4,5 sung a, Sakol tuang, thaltawi a, galzopa a cihpen hong phawksak hi. Tua lukhu (Mang 6:2) pen Greekpau in stephanos hi a, (Mang 2:10 leh 3:11) sung a, gualzawhna lukhu cihpen hipah hi. Amah in gualzo a, gualzo lai ding hi.

See also  SSL 2: Nehemiah

Seal masa in, lungdamna thu tangkona, Penticost pan kipan a, gualzo a Pasian gam keeuna hi a, gamtampi te, Pasiangam suaktoto lai ding hi. Ephesus pawlpi hun sung a lungdamna thupha manlang tak a, kizeelgawp un, nungzuite’ hun hiphadiak hi, (Col. 1:23).

Tu laitak a i thuakna te ngaihsun lo in, Zeisu tawh a gualzo lam i panna banghangin theihhuai hiam?

Monday                                                                                                Jan 28

Seal Nihna leh Thumna

Mang 6:3,4 simin; Sakol san leh a tungtuangpa thu, lungdamna thu tawh kisai bang kici hiam?

…………………………………………………………………………………………………………………..

A san in sisan limciing hi. A tungtuangpa in namsaupi khat tawi a, leitungpan kilemna lakhia in, mi kithahna lampi honsak hi,(Mate 24:6). Seal nihna in, lungdamna thu nialna hun, kum zalom nihna kipat hun a hihi. Khazih in khagal a do kipatlai in, gallamte zong khauh mahmah uh hi. Bawlsiatna te hong kipan hi. Sakol tuangpa in, mi a thahloh hang, leitungpan kilemna lakhia a hihmanin, bawlsiatna in hong zui pah hi, (Mate 10:34).

Mang 6:5,6; Siampi 26:26 leh Eze 4:16 cihte sim-khawmin. Sakol vom leh a tungtuangpa thu, lungdamna thu tangkona tawh bangci kizop hiam?

…………………………………………………………………………………………………………………..

Sakol vom tuangpa in an-tawikhaina khat tawi a, “mangbuh lawhta khat in, nikhat thaman a, mangbuh lawhta thumin, nikhat tha mah man hi (Mang 6:6) ci hi. Tua munah, mangbuh, sathau leh lenggahzu cihte pen, nuntakna a hihi (Thuhilhkikna 11:4). Mangbuh teh ngiatngiat a neekna in, kial nasia cih na hi (Siampi 26:26; Eze. 4:16). John hunlai in denarius dangka tangkhat in mi’ nikhat thaman hi (Mate 20:2). Nikhat thaman tawh innkuanbup nikhat neekding lei zo hi. Seal thumna cihnopna in, nikhat thaman tawh mikhat a ding nikhat neek ding bek ki leizo cihna hi.

Sakolkaang in, lungdamna thu tangkona hi a, sakolvom in lungdamna thu omlo, mite’ ngeina kizui cihna hi. Mangbuh in, Pasian thu hi a (Luke 8:11), kialtung cihin, lungdamna thu kinial cih na hi leuleu hi (Amos 8:11).

TUESDAY                                                                           Jan 29

Seal Li na

Mang 6 : 7,8 simin; Hih sung a bang kimu a, zanni a tawh bangci kizop hiam?

…………………………………………………………………………………………………………………..

Seal 4 na, Sakol puang hi a, Greekpau in chloros (vut-puang) hi in, misiluang meel hi. Sakol tuangpa min sihna hi in, han leh sihna in amah zui hi. Hite gelin, namsau,gilkialna, sihna leh gamsa gilo te tawh, leitung khenli suah khenkhat a, mite a that ding hi (Mate 24: 7,8). Seal 4 na in, natsia leh sihna a sam hi. Lungdamna thu a kinial manin, Pasian’ thu kialtung a, khalam sihna tung hi. Lungdamthu khat ah, han leh sihna tungah, leitung khenli suah khenkhat bek thahtheih na thu ciangtanh kipia hi. Zeisu in, han leh sihna tawhtang ka nei hi (Mang 1:18) ci hi.

See also  A Tamzaw Lunggulh

Mangmuhna 2 sung a, Ephesus, Sardis, Pergamum leh Thyatira pawlpite thu enkik in. Ciamtehna 4 dong sung a thu te tawh i etkaak ciangin, bang kizopna nei uh hiam?

……………………………………………………………………………………………………………………

Seal sagih te in, pawlpi’ mailam thute vive hi. Pawlpi sagih a om mah bangin, seal sagih mah om a, pawlpi tangthu mah tawh kizom uh hi. Nungzuite hunlai in, lungdamna thu kizel manlang mahmah hi. Tua khit teh, kum zalom khatna beikuan pan kum zalom 4 na kipat dong, Rome kumpi i bawlsiatna in hong zomto pah hi. Seal thumna in, “khuamial hun” i cih kum zalom ngana sung, thuman gilkialna hun om hi. Kum tulkhat dektak sungbang Tapidaw te “khalam sihna” hong omsak hi.

Mangmuhna 6:6 na ah, “sathau leh lenggahzu” pen, seal thumna kialpi tawh kizomlo hi. Sathau in “Khasiangtho” (1 Samuel 16:13; Sawlt 10:38) cihna hi a, lenggahzu in “Zeisu’ hong gupkhiatna” (Maku 2:22) hi. Pasianthu gilkial laitak in, Khasiangtho in nasem veve lai cih, hih limciing te’n, bang a cihnopna hiam?

WEDNESDAY                                                                                  Jan 30

Seal Nga na Kihong

Mang 6:9,10 simin; Hih sung a bang thu piang hiam?

…………………………………………………………………………………………………………………..

Laisiangtho in “Kha” a cihteh, mihing pumpibup a gen hi (Pian 2:7). Pasian’ misiangtho te’ bawlsiat thuakna sisante in, biakbuk sung biakpiakna sisan (Paikhiat 29: 12; Siam 4:7) te tawh lim kipuasak hi. Pasian’ mite in a thumaanna uh hangin a diklo bawlsiatna te a thuak uh ciangin, awngin, Pasian kiangah huhna ngen uh hi.

Mangmuhna 6:11; Thuhilhkik 32:43 leh Late 79:10 cihte sim lecin, thahna a thuak Pasian’ mite kahna aw bangci ki dawngkik hiam?

…………………………………………………………………………………………………………………..

Thahna thuak misiangtho te, Khazih dikna a hi puanpaak kipia hi (Mang 3:5; 19:8). Mang 6:11 sung ah a siding zah nambat pialo hi. Pasian mite pen, amau’ hoihna hang hilo, Khazih’ dikna puanpaak bekmah tawh, ki picingsak ci hi (Mang 7:9,10). Thahna a thuak misiangtho te in, kumtul maanna kipat ding Zeisu hong tuaksuk ciangin thokik ding uh hi (Mang 20:4). Ciamtehna ngana pen, biakna kipuahphat hun laitak, mi awn tampi takin, thumaanna hangin thahna a thuaklai hun (Mate 24: 21) a hihi. Taanglai Abel pan kipan (Pian 4:10), Pasian in “a nasemte sisan thukkikna” a piakni dong, Pasian mite’ thuakna te huamgai hi (Mang 19:2).

“Aw Topa, bangtan sawtlai ding hiam?” ci in misiangtho te in, a khang a khangin awng uh hi. Diklopi a mawhsakna tawh a kipelh a om kha hiam? Khatvei teeiteei, thumaan thukhenna hong om ding a hih teh ci in, seal ngana tungtang, bang thangahna na nei hiam?

See also  ZSL 9: Kihhuaina pan Siangthona ah

THURSDAY                                                                                                  Jan 31

Seal Gukna Kihong

Seal ngana ah, Pasian mite’n a thuaksiatna uh,

Pasian ko in, hong huh meng in ci a otna aw i sinzo hi.

Pasianin a mite’ thungetna a dawn hun hong tung ding hi.

Mang 6:12- 14; Mate 24: 29,30 leh 2 Thess 1:7-10 te simin; Bang thu piang hiam?

…………………………………………………………………………………………………………………..

Seal gukna i a nunungpen lim thumte Matt. 24:29,30 sungah Zeisu’n genkhol zo hi. Tuate in, nihvei kumkikna, a madawk in “gimna lianpi” te tawh kinai, 1798 khit deuh in (Mang 7: 14) in hong tung hi. Mate 24 sung a Ni, Kha, Aksi te in limla hilo, a taktak vive hi. Ni hong mial in, Kha sisan bang ding, Aksi te thei pulh bangin pulh ding ci hi. Nitumna gamlam te’n, tuate a picin mu uh hi. 1755 kum Lisbon zinliing; 1780 kum May kha 19 ni, Newyork leh New England ah – Ni mial; 1833 kum, November 13 ni, Atlantic tuipi tungah Aksi pulh cih te, kumkikna a naina lim vive hi.

Mang 6:15- 17;  Isa. 2:19;  Hosea 10:8;  leh  Luka 23:30 nate simkhawm in. Khazih hong kumkikni ciang a, patau a, bukna a zongdingte omdan hong lak hi. Mualte suangte kiangah, “tokhom tung a tu pa maitang pan suahtak na’ngin hong vuk un” ci in kap in tau ding (Mang 6:16) uh hi. Misiangtho ta ding “thumaan thukhenna hun”

(2 Thess 1:10) hong tungta hi.

Migilo te a dingin, “Ama’ hehna ni hong tung a, kua in thuakzo ding hiam?” (Mang 6:17; Nahum 1:6; Mal 3:2), cihni hong tung hi. Tua ni ciang, a dingzo ding mite pen “Pasian’ mite” (Mang 7:4) bekmah hi.

Ama hongpai ni in kua in thuakzo ding hiam?” (Malachi 3:2). Hih dotna, bangci dawn ding na hiam? Na dawnna khanpih te hawmin.

FRIDAY                                     Feb 1

Ngaihsut Beh Ding: E G White lai, Testimonies to GospelWorkers, laimai 457-460 sung a, “Leitung in a Kisap” cih thu simin.

Seal sagihte in, Pasian in a mite hong khal hong hilhna lim hong lak hi. Kenneth A Strand in hih bangin ci hi:

“Laisiangtho sungah, Pasian in a mite a kepna:

khang tawntung a ompihna: thuaksiatna te a dingin zong,

thuhkikna picing leh tawntung nuntakna tawh pahtawina te omgai hi. “Sihna leh han” tungah a gualzopa “a nungtapa” (Mang 1:18) in, a thumaan a mite, cikmah hunin nusia ngeilo hi. Amau thuakna zong gualzawhna (Mang 12:11) hizaw a, nuntakna lukhu in, amau ngak (Mang 2:10; 21:1-4; 22:4) gige hi.

KIKUP DING DOTNA TE

  1. Seal sagihte honna pan bang pilna na ngah hiam? Leitung ah bangzah siatna tamta leh, Pasian maang lai a, Khazih sungah a kamciamte picing teitei ding cih na bangci up thei hiam?
  2. A nuai a thu nihte ngaihsun in: “Pawlpi pen, midangte gupkhiatna dingin, Pasian in a teeltuam ngiat hi.
Nasem dingin pawlpi a koih a hihi. EGWhite,Sawltakte Nasepte, laimai 9. Na khuatual pawlpi ngaihsun in. Lungdamna thu tawh, bangci dan in vapha thei ding i hi hiam?
  • 3. Zanni a dotna te Sabbath Sang khan sungah dawngun, Kuate in, banghangin, Zeisu hong kumkik ni dong thuakzo ding hiam? Topa hong kumkik ding ni a dingin, tuni i nuntakna sungah, bangci kigin theih ding hiam?
Tags: ,

Admin

Admin

Top